(Л. 1) Црь і великиі кнзь Федор Іванович всея Руси в лѣта 7097 (⌀343) июня в 14 день приговорил и уложил сеи судебникъ со отцемъ своим духовнымъ патреярхом московским Иевом, да с митрополитом[1] наогоротцким Алѣксандром, и со всеми кнзми, и бояры и со вселенским соборомъ по пърежнему уставу, по уложению отца своего блговернаго цря Івана Васил(ь)евичя всея Руси и прежних кнезей и бояр, как впред судъ судити бояром, и околничим, и дворецкимъ, и казначиемъ, и диякомъ, и по городом (л. 1 об.) намесникомъ, и по волостемъ зем(с)кимъ суд(ь)ямъ и по всеи моеи гсдрве Рускои земъли; а впред всякие дела судит(ь) по сему судебънику і управы чинити по указу, как гсдрь укажет, с котораго дни уложит.
1. (С)уд цря и великаго кнзя, как судит(ь) коимъ суд(ь)ямъ.
2. Которые суд(ь)и просудятца, ино суд з головы.
3. Которые бояре и суд(ь)и в суде посул возмет.
4. Которои дияк список нарядит посула для.
5. Которои подьячеи дело запишет не по суду.
6. Хто виноватои солжет на суде на коих ни буди.
( Л. 2) 7. Суд(ь)ямъ жалобников от собя не отсылати.
8. Будет жалобнику не мочно управы учинити.
9. Имати бояромъ и суд(ь)ямъ пошлин с рублеваго дела.
10. Дияку что от белово списка имат(ь) писчево.
11. Что суд(ь)я возмет ли(ше)къ пошлин возмет или жалобникъ солгалъ.
12. Не став у поля помирятца[2], и что пошлин имат(ь).
13. У поля став помирятца, околничему имат(ь) полевых пошлинъ.
14[3].
15. Кого побиют на поле, что пошлин имат(ь).
(Л. 2 об.) 16. Не став у поля или отбежит, и что пошлин имати.
17. Побиютце на поле в пожег(е), въ душегубстве, на убитом пошлинъ.
18. У поля спросит стряпчих и порутчиков окольничеи.
19. Битися боицу з боицом на поле или небоицу с небоицом.
20. Ищея пошълетца на послуси, и кои как послуси говорят.
21. Убиют на поле ищеины послуси ответчиковых.
22. Послух по исце или по ответчике не молвытъ.
23. Коя кабала в пятнатцет лет как судити.
(Л. 3) 24. Хто суда просит в переемъных или в чемъ повинитца.
25. Хто от судеи отбиетца и как отбои писати.
26. Дияк и мужи порознятца по кабале по скупу.
27. Послух опослушествует кого, и того повинитъ.
28. Против послуха стар и мал и увечен ответчикъ или попъ.
29. Послухъ перед суд(ь)ю не придет, есть ли ричи или нет.
30. Взыщет женка или девка и мал и дастъ целование.
31. Ищет на трех или на четырех[4] (л. 3 об.) и за коих отвечяют и не ответчяют.
32. Езду имат(ь) на версту, хотя пеш или конемъ по указу.
33. На кого накинут срочную и не покажет, кои с нимъ писаны.
34. Хто на намесникех; учнет искат(ь), и не отвечяют за всех.
35. Которыхъ[5] учнут примешиват(ь) к намесничиім городских и волосных.
36. Иногородцы пришлецы о обидах биют челомъ и что под крестъ класть.
37. Иногородцы на намесников биют челомъ, а пришлецам суд давати до осми годов.
(Л. 4) 38. На земъских судеи дават(ь) суд и до кех месть.
39. Ответчик скажет бил, а не грабил, да і в-ыных делех по тому же судити.
40. Хто в чемъ на суду повинитца, без суда доправити.
41. Безчестия детем боярским кормленымъ.
42. Детем боярским, кои жалован(ь)е емлют.
43. Діяком полатным безчестия.
44. Гостю болшему безчестия.
45. Середнему гостю безчестия.
46. Меншему гостю безчестия.
47. Торговым середнимъ посатцкимъ.
(Л. 4 об.) 48. Боярскому члку доброму.
49. Тиуну и довотчику безчестие.
50. Крестиянину безчестия.
51. Молотчему человеку безчестия.
52. Торговому человеку безчестия.
53. Повоскому доброму безчестія.
54. Молотчему повоскому безчестія.
55. Суд(ь)е безъчестия.
56. Целовалнику верному безчестия.
57. Сотцкому безчестия.
58. Петидесятцкому и десятцкому.
59. Дияку земъскому безчестия.
60. Старосте церковному и губному.
61. Дияку и пономарю и проскурнице.
62. Попу безчестия.
(Л. 5) 63. Игумену черньцу и чернице.
64. Вдове и вдовице.
65. Скомороху описному.
66. Неописному скомороху.
67. Каликам, кои с кусол ходяд.
68. Московским кликуномъ.
69. А выблядку, кои не у венчялные.
70. Блядем и видмамъ.
71. Татемъ и разбоиникомъ и зажигалникамъ лихимъ.
72. Ст(р)елцам и ратним казакам и каменщикам.
73. За увеч(ь)е хрестияном.
74. Которои чюжеземец ищет на чюжеземъце, и то под крестъ положит или на волощанине.
(Л. 5 об.) 75. Которое дело судит црь.
76. Которые дела судят бояре, исцем у записки не стояти.
77. Смеснои суд: ищея у своего суд(ь)и возмет сторожа, и не сходя с суда, да против ищет, да и въсякои суд судити смеснои, по тому[6] доложа суд(ь)и.
78. Исцы не ходя на суд помирятца.
79. Да въ челобитные суд(ь)е да помирятся, на суд не ходя.
80. Недилщику на суде на бояр и на судеи не имат(ь).
81. Пошълин имат(ь) от правые грамоты бояромъ і диякомъ.
(Л. 6) 82. Докладнои список печятати боярину і дияку.
83. С холопа и с робы от правые отпускные грамоты имат(ь) от печ(ати).
84. Как на кабалы отпис имат(ь).
85. Црева суда пошлин имати.
86. Црву и детеи црвых печятнику имат(ь) от правые.
87. Докладнаго списка црва докладу имат(ь) от печяти.
88. С холопа и с робы от правые имат(ь) и з головы.
89. Безсудные правые дават(ь) за колко верстъ.
90. Дат(ь) грамота с красною печят(ь)ю какая ни бу(ди).
91. Тарханных не давати.
(Л. 6 об.) 93. А от приставных имати езду.
94. А хоженое ндщку и на правду и волосным доводчикомъ повѣръстное і в трапезе.
95. А езду от Москвы до котораго города.
96. А ездити неделщику с приставными на поруки давати.
97. А в которой[7] город и въ волость приедет неделщик и довотчик.
98. А кого дастъ на поруки недельщикъ или доводчикъ.
99. А строки хрестияном отписывати и бзсудъные по срочнымъ, а без записки на поруки не давати.
(Л. 7) 100. А хто дав на поруки, і не станетъ на срокъ искати самъ.
101. А пересуд какъ имати.
102. А судънои списокъ оболживитъ, а лжи не доведетъ.
103. А приведут кого с поличным впервые с узломъ и колко ударов.
104. А имати татеи и разбо(и)никовъ, а чистых не имати.
105. Кои неделщикъ или волоснои кои человекъ татю снаровит.
106. У котораго неделщика или в волостях у сотниковъ седят тати и разбоиники.
107. Поимают татя[8] с какою татбою (л. 7 об.) и доноду[9] нет, и головою[10] исцу отдати.
108. Поимают того же татя вдругие, и на кого тат скажет.
109. На кого нозмолвит[11] тат, и про того обыскати.
110. На кого молнят[12] дети боярские и добрых; хрестиян человек десят, или 15 или 20.
111. На тех 10, 15 и 20 дати суд, на кого неподелно молвыли.
112. На мошенники оманщике ищет хто.
113. На кого доведут разбои, и душегубство, и ябедничество и подписку ручную кабалную.
(Л. 8) 114. Доведут душегубстно[13] опърич разбою или злои человекъ.
115. Го(с)пдарьскому убоице, и здавцу, и коромолнику и лихимъ людем.
116. Бояромъ судити и кому на суде быти.
117. Суд боярскои, давати полные и доклад(ные).
118. А детеи боярских судити по жаловалнымъ грамотам намесникомъ.
119. И по волостям кабалных людеи судити.
120. Намесникъ і властел без суда выда(с)т холопа и робу.
121. Ни господарю на холопа ти(у)ну грамоты не давати.
(Л. 8 об.) 122. Где цѣлоналниковъ[14] и старостъ не было, и ннѣ[15] без целовалниковъ не судити.
123. Суднои пришлют н[16] доклад и оболживят списокъ.
124. Не станет з запискомъ исщея или ответчик.
125. По комъ поруки нетъ.
126. Всякаго лихаго без докладу не казнит(ь), ни продати.
127. Посадских судити городских по их жинотомъ[17] и по промыслом.
128. Про изцовъ сыскивати розметными книгами.
129. По волостем черныхъ судити, (л. 9) и хто много ищет не по животомъ и не по промысломъ.
130. Ответъчикъ говорит на суду: самъ под крестъ сяду.
131. Хто на суде учит кого.
132. (С)кажетъ дал было животъ на соблюдение, а ищетъ.
133. Где два суда, и суд не в розне и не в розделе.
134. По намесника и по властеля пошлетъ пристава.
135. По волостямъ суд(ь)ямъ коег(о) году судитъ, и товарищем ему[18] отвечяти и не отвечяти.
(Л. 9 об.) 136. О холопствѣ сутдъ.
137. Кои родилися в холопъствѣ дети и какъ холопъ.
138. Кои отцъ и мати в черньцех.
139. Отпускные давати в Новегороде и Псковѣ.
140. Опричъ Москъвы и Пскова и Новагорода отпускных не давати.
141. Кои люди вольные.
142. На вольных людеи на старых холопеи.
143. Положатъ на одного холопа 2 полные.
144. Холопа[19] рат полонит.
145. Кои холопъ побежит зъ господаремъ своимъ.
(Л. 10) 146. Детеи боярских, век не служівали, не приимати.
147. Казаку денегъ хто дастъ взаимы и держитъ у собя.
148. Наимитъ не доживетъ до сроку.
149. (О) землях суд и манастыря.
150. Взыщет хрестиянин на хрестіянине, и за сколько судити.
151. В землях судити старожилы и старожила лъживит, а своего не поставит.
152. Истеи много в челобитную убытка пишет не по земъле.
153. Старожилцы порознят в речях о земляхъ.
(Л. 10 об.) 154. Молвытъ старожилъ ісцѣвъ или ответчиковъ не в их речи.
155. Суд(ь)ямъ су(ди)ти, род и племя отставъливати.
156. Взыщетъ на боярине іли на монастыре земъли црвы.
157. Двумъ суд(ь)ямъ на землю не ехати и кому с нимъ ехати.
158. Правда пред судьею речи скажет.
159. Новои жилецъ в деревъне захочет землю делити і угод(ь)я.
160. Кои складникъ захочет на новое место дворъ ставити.
161. Хто наездомъ деревню пашет.
162. Складник у складника в однои деревне наставитца. (Л. 11)
163. Суд о водчинахъ; хто вотчину продастъ.
164. Судити о вотчинах за 40 лѣтъ.
165. Хто деревъню отпишет детемъ после своего живота.
166. Хто с съторон дастъ денги под чюжую[20] вотчину.
167. Хто вотчину свою променит не вотчиннику.
168. Промеж селы и деревни как огород городити и срок, что протравѣ.
169. Охород каков ставит(ь) около пол, и гуменъ, и осекъ и о пакостьливои животине.
170. Хто назла огород отворитъ в поле или за осек.
(Л. 11 об.) 171. А отхожие пожни пашни как пахати и городити, чеи скот ходит.
172. Хто межу зорет меж селы і деревнями.
173. Крестиянин у крестиянина[21] в однои деревне межу перекосит.
174. Как молоди пахати просто безъ делу.
175. Черънои лѣсъ пахати просто без делу.
176. Где у деревни угод(ь)я и старожилы сыскивати.
177. Меж деревнями меж(а) до осека.
(Л. 12) 178. Крестияном отказывати один срокъ и о подворномъ.
179. Хто за кемъ живет годъ и какова мерная копна сена.
180. Убиют на поле в розбое и лихом диле.
181. Купец идучи на торговълю возъметъ.
182. Хто возметъ торговаті и безумиемъ потеряетъ.
183. В розбоиномъ деле дадут полетъную.
184. Попа и діякона, черньца і черниц.
185. Поп похочет на комъ искати чего ни буди.
(Л. 12 об.) 186. Крылашеня похотят тягатися и кому ихъ
судити.
187. Крылашаня похотят межъ собою тягатися.
188. Кои люди живут в волосте не от цркви питаютца.
189. Торговые люди станут жити на монастырях.
190. Умърет хто без духоввые и не будет с(ы)на.
191. Хто при смерти пишет духовную и попу быть.
192. Хто дочер(ь) дастъ замуж і доч(ь) умретъ.
193. У кого не остану(т)ца дети з женою.
(Л. 13) 194. Купит на торгу что поношено.
195. Хто лошад купит или менит въ городе і въ волостях.
196. По всей моей земъли лошадеи не пятнати.
197. Въ служебном походе купил хто лошад.
198. Доморощеных и непродажныж не пятнати.
199. Кои дела преж сего судебника вершены.
200. Впред всякие дела судит(ь) по судебнику.
201. Которые дела новые, а в сем судебънике не писаны.
202. На Москве и по всей земъле (л. 13 об.) велити клич прокликати исцев и ответчиковъ, чтобы посулов судиямъ не давали.
203. Послухи бы не видевъ не послуховали.
204. Взыщет москвитин на селецких волостях.
205. Приговорил црь, шлютца на миръ и многие дъжутъ.
206. Шлютца на иных послух ведомо и послушества[22] доспрашивати.
207. Послат(ь) на обысъкъ оприч родовъ и заговоров обыскивати.
208. На коих шлютца безымянно (л. 14) на многие люди и обыскивати с лица на лице.
209. Речи бы сами писали обыскные.
210. Скажут в обыску не в одне речи и болшему оправити.
211. В обыскахъ коя половина солъгала.
212. Скажут в обыску поровну по ищее и по ответчике.
213. Кои люди в одномъ обыску двои речи скажут.
214. Пошълютца изъ виноватаг(о) члкъ на 5 или на 6.
215. Пошълютца ищеи или ответчик на власныхъ людеи.
(Л. 14 об.) 216. Пошълютца из виноватог(о) оба хотя на одного члка.
217. Бояромъ и диякомъ приказывати своимъ крест(и)яном говорит(ь).
218. Сыскивати розбоиные дела в правду, что заговоры говорят сем(ь)ями.
219. Учнут татиные и разбоиные дела сыскивати ложно.
220. Посылати старостам обыски к Москве.
221. Ответчикъ скажет нечемъ поля поставити и истец.
222. Которому холопу дадут отпускную грамоту.
223. Дорога[23] от Москвы и до Колмогор куды преже была.
(Л. 15) 224. Где в осенъ дорога.
225. Сусед у суседа да животину утепет в одном деревне какую нибуд.
226. Хто у ково собаку утепетъ безвинно.
227. Хто умрет и как делит(ь) живот и з дядею.
228. Приговорил црь что без управы земъли не держыти.
229. Погонные и выписи давати за бег(лыми).
230. Под судъ[24] даватмся.
231. Кого где дан(ь) застанет.
(С)уд цря великаго кнзя судити бояромъ, и околничим, и дворецкимъ, (л. 15 об.) и казначиемъ, и земъскимъ суд(ь)ямъ, а въ суде другу не мъстити, а посудовъ не имати в суде; а на томъ велити суд(ь)ямъ крестъ цедовати, что посулов не имати, а судити в правду.
Которои дворецкои, или боярин, или діякъ, или суд(ь)я просудится, кого обвинити не по суду безхитросно, или список подпишет и правую грамоту дастъ, а сыщетца в правду, — и боярину и околъничему и суд(ь)е в том пени (н)етъ, а исцемъ дат(ь) суд з головы новои, а взятые пошлины отдат(ь) назядь.
(Л. 16) Которой[25] боярин, или под(ь)ячеи, или дворецкои, или суд(ь)я, или дияк или целовалникъ в суде посул возмет, а повинит кого не по суду, а сыщут, что посул взяли, — и на том боярине, или на дворецкомъ, и на д(ь)яке и на судье взяти исцев искъ, и пошди(ны) на цря гдря, и ѣздъ, и правда, и пересуд, и правои десятокъ и пожелезное на томъ взяти втрое, кои посул взялъ.
Которои[26] диякъ списокъ нарядит или речи перепишетъ не так, как на суде говорили истеи и ответчик, или[27] список подпишетъ без боярскаго или без судьина ведома, а сыщут, что он (л. 16 об.) посул взял, а список нарядил, — а на томъ діяке половина исцева иску, да его бити кнутомъ да отставити от диячества, а руки ему не сѣтъчи; а другая половина — взяти иску на судие, потому что, знаючи дияка лъжіва, почто с нимъ судитъ. А по д(ь)яке взяти поруку, что впред не воровати, доколе и живъ будет; а в суд его не примати и доколе жив будетъ.
Которои под(ь)ячеи запишетъ дело не по делу для посула без диячия приказу, и тог(о) под(ь)ячего бити кнутомъ.
Хто виноватои солъжет на боярина, (л. 17) или на дворецкого, или на суд(ь)ю, или на[28] діяка или на кого ни буди, а сыщут, что солъгал, — и того жалобника повинити, безчестие на нем взяти, да бити его кнутом, да вкинути в тюрму да порука взяти, что впред не лъгати.
Которому боярину, или дворецкому или суд(ь)е придет жалобникъ его приказу или не его, иные волости, а биет челомъ, суда прошает, — и суд(ь)е жалобников от себя проч не отсылати, давати всемъ управа, которой биет челомъ по делу.
Которому будет суд(ь)е жалобнику без господарева ведома по ег(о) челобитнои (л. 17 об.) уп(р)авы учинит нѣ мочно, ино тог(о) жалобника челобит(ь)е сказати црю гсдрю. А которои боярин, или дворецкои или суд(ь)я жалобъников отошлет, и суда не дастъ, и челобит(ь)я его црю гсдрю не скажетъ и отказу ему не учинит, — и тотъ жалобъникъ биетъ челомъ црю гсдрю на суд(ь)ю, что суда не дал и его волочил, и гсдрь, его жалобъницу подписавъ, с нимъ же отошлет к тому же, а велит ему судити; и бояринъ, или суд(ь)я или казначии управы ему не учинят же, — и тому суд(ь)е быти от господаря цря в великои опале, да на томъ же суд(ь)е доправити волокиты рубль да отдати жалобнику. (Л. 18) А которои жалобникъ биет челомъ не по делу, и суд(ь)я ему откажетъ, и он опят(ь) учнет црю гсдрю докучят(ь), — и того жалобника вкинути в тюрму.
Имати боярину, или дворетцкому, іли суд(ь)е или діяку от рублеваго дела на виноватомъ пошълинъ: суд(ь)е одиннатцет(ь) денег, а дияку 7 денегъ с-ысца и со ответчика пополамъ.
Учнет діякъ судно(и) список набело писатъ, которои списокъ в доклад идетъ, — и ему писчево десет(ь) денегъ с обехъ пополамъ, а от поручныхъ записеи діяку не имати; а суд(ь)е пошлинные денги (л. 18 об.) взяв держати у себя, доколе гдрь попытает. А будетъ дело выше рубля или ниже, ино суд(ь)е имати по тому же розчету, съ рубля по одиннацети денегъ, а болши того не имати; а которои боярин или суд(ь)я на ком что возмет лишекъ, на том взяти втрое.
Которои жалобникъ станет бити челомъ на суд(ь)ю, а скажет, что на немъ лишекъ пошлинъ взялъ, а сыщут, что он солгалъ, — и того жалобъника бити кнутомъ да вкинути в тюрму.
Досудятъца до поля, а не став у поля помирятца, — а боярину, (л.19) и дворецкому, и казначию, и діяку и под(ь)чему имати пошълина по тому же указу, а околничему и недилщику полевых пошлинъ не имати; а хто возмет болши того лишекъ, и на томъ взяти втрое. А которои жалобникъ солжетъ, и того бити кнутом да вкинути в тюрму.
У поля став помирятца ,— и боярину, и дворецкому, и казначию и діяку по тому же указу имати.
Окольничему имати полевых пошълинъ по 8 алтын по 2 денъги, а діяку по 4 алтына, а под(ь)ячему денга, а недилщику четверть рубли (л. 19 об.) да ему вязчего 2 алтына, а болши того им не имати; а (х)то возмет лишек, на томъ взяти втрое. А солжет жалобъник, и его бит(ь) кнутомъ да на поруки дат(ь), чтобы вперед не лгал.
Побиютца на поле в заемъномъ деле или в грабеже, и околъничему полтина да за доспехъ убитаго три рубли, а дияку четъверть рубъли, а недельщику полтина да ему-ж вязчего 4 алтынь без копеики, а под(ь)ячему 2 денги.
Не станетъ хто у поля или отбежит от поля, и околничему, и дияку и ндщку имати (л. 20) пошълин, как с мироваго дела, а избных пошълин имати съ рубля по гривнѣ, а болши тог(о) не имати имъ; а кои возметъ лишек, и на томъ взяти втрое. А жалобникъ солъжетъ, и его бити кнутом да вкинути въ тюрму, докаместъ порука по нем будет.
Побиютца на поле въ пожеге, или в душегубъстве, или в розбое или татбе, — ино на убитомъ исцев искъ доправіти, да околничему на убитомъ полътина, да за доспех убитаг(о) три рубъли, а дияку 8 алтын 2 день(ги), а неделщику полтина да ему-ж вязчего 4 алтына (л. 20 об.) без двух денег. А убитаг(о) дати на поруки, какъ его гсдрь попытает, и он бы был в лцах; а не будетъ по немъ поруки, ино его кинути въ тюрму, доколе по немъ порука будетъ.
К полю приедетъ околничеи, дияк, им воспросити исца и ответчика, хто у них за ними стряпъчеи и порутъчики; кого за собою скажутъ стряпчих и порутчиков, темъ винити у поля стоят(ь), а доспеховъ и дубин порутчикомъ у собя не деръжати. А бои боищико(мъ) давати ровен. А которые люди опъришенные стоят, и тех отсылати; (л. 21) и кои не поидутъ проч, и тех кинути в тюрму.
Битися на поле боицу з боицомъ или небоицу с небоицомъ, а боицу с небоицомъ не битися; а похочетъ небоец з боицомъ битися самъ, ино имъ битися да і в-ыных делехъ по тому же.
Ищея пошлетъце на послуси въ заемъномъ деле без кабалы, а ответчик шлетъца на свои послуси, или в бою, или въ граб(е)же, или в татбе или в какове деле ни буди, — и послуси став межу собою порознятца: иные молвят по исце, а иные по ответчике; (л. 21 об.) и которые молвят по исце, а просят поля и целования со ответчиковыми послусями, кои не молвыли по исце, — ино дати крѣсное целован(ь)е и поле на волю техъ послуховъ, кои говорили во ответчиковы речи, хотят сами целуют или ищеинымъ вирят послухомъ, а межъ исцами по суду дати крѣсное целованье, а сверхъ тог(о), какъ судъ былъ.
Убиютъ на поле ищеины послуси ответчиковыхъ послуховъ или крестъ поцелуютъ, ино исцевъ искъ доправити на ответчике и на его послусех, что по исце не говорили. (Л. 22) А ищеям ответчиков въдругие ко кресту не приводити деле иску. А убиют ответчиковы послуси ищеиных послусеи, кои по исце говорили, или крестъ поцелуют, — ино послусеи ищеиных обвинити и пошълина взяти на ищее и на его послусехъ.
Не просят ищеины послуси поля и целован(ь)я со ответчиковыми послусями или послуси не зговорят по ищее, ино темъ исца[29] повинити.
Кто учнетъ бити челомъ по кабале суда прошати, и суд(ь)е кабалы дозрити, и будет кабала петинатцати лѣтъ или ниже, (л. 22 об.) ино судити; а будет того болши лет кабале, ино без господарева ведома не дати суда. А которои суд(ь)я не дастъ суда, коя петинатцети лет, и темъ суд(ь)я виноват и волокита на нем справити рубль. А по кабалам судити, а ростъ правити за пят(ь) летъ, а дале пети лет росту не правити; а кабалы писати на крестиян вдвое, а ростъ правити на пят(ь) шестои, а в чем кабала писана, то и справити.
Проситъ ответчикъ суда на ісца в переемъныхъ денъгах, ино суд дати; а будетъ[30] истец иного уезду или иные волости, (л. 23) ино там на нег(о) не бити челом, чей суд. А в чемъ ответъчикъ по кабале повинитца, то на немъ справити, а в достале суд дати. А в чемъ немочно управы учинити меж исцами в какове деле ни буди, ино исцов за судънымъ спискомъ строчити к намъ к Москве.
Которые исцы или ответчик отобиютца, и судие писати отбои да прислати к нам к Москве; а отбои писати за поповскою рукою.
Будетъ по кабале послуси порознятца и діякъ, кои кабалу писал, — и про то сыскати, которои послух (л. 23 об.) или діакъ солъгал, и на томъ повытие иску, что на заимъщике ж, доправити; а будетъ послуси, кои в кабале, по скупу все солжутъ, а діякъ руки не попретца, и миромъ сыщутъ, что кабала в правду писана,— ино исцевъ искъ вес(ь) доправити на послусех и на заимщике повытно, а діякъ человекъ доброи. Да і во всяких делех по тому же судити, а истец по кабале дошел.
Кого послух опослушествуетъ в бою, или въ грабеже, или в какове деле ни буди, ино его повинити, а с послухами дати ему суд да кресное целован(ь)е; а будет (л. 24) послух поцелует крестъ, ино пошлины взяти на ответчике; а будет послуха на поле поб(ь)ютъ, ино пошълины на убитомъ же.
Противъ послуха ответчик стар, или мал, или немощен, увичен, или попъ, или чернецъ, или девъка, или женъка, и тому против послуха наимит, а послуху наимита нетъ; а будетъ чемъ послухъ увеченъ безъ хитрости, или попъ, или черънец, или женъка, и темъ наимит же. А что[31] правому и послухамъ учинитца убытъка, то имати на виноватом.
Которои послух перед судью не приедет, (л. 24 об.) естъ ли за ним речи или нет, и на томъ исцевы иски доправити и пошълины, а з довотчикомъ в строце дати суд.
На комъ взыщет женка или дѣвка и мал детина, или хто взыщет на женке или на девке, ино их судити судом. А досудятся до поля или до целования, ино поле отставит(ь), дати вѣра на отвѣтчикову волю, а сверхъ тог(о) по суду, как суд былъ; а нѣ мочно вершити дела, ино срочити к нам на Москву, чеи суд.
Хто взыщет члкъ на трех, или на 4 или на колки (л. 25) ни буди по жалобнице, а напишет в жалобнице члкъ 10, или на пятинатцати или болши или менши, и тѣ два или 3 за собя и за иныхъ отвичяютъ, а за иных не отвичяют; а за коих отвичяютъ по жалобнице, ино судити вь их жереб(ъ)яхъ; а за которых не отвичяют, ино по тѣхъ посылати розсылщыка из езду.
Езду имати на версту по денге, колъко верстъ ни буди, хочетъ пешъ поди, хочетъ лошад наими; а по кого пристав ходил, ино на тех писати безсудные въ ихъ жереб(ь)яхъ.
(Л. 25 об.) На котораго на них ездокъ накинет (с)рочную на одного, и тот срочные товарыщемъ своимъ не покажет, кои писаны с ним в одънои срочнои, и на тех въ их жереб(ь)яхъ выляжет безсудъная грамота и ездъ и хоженое, ино темъ[33] дати суд, хто имъ не показал срочные.
Которои люди учнут искати на намесникахъ и на властелях и на иных людехъ по жалобницамъ, не за въсех отвечяти учнутъ, а исцы учнутъ искати на них и на людехъ всего своего иску по жалобнице, и без тех, за которых не отвечяютъ, и по тех (л. 26) их жалобницамъ судити въ всемъ иску техъ людеи за тех людеи, за которыхъ не отвечяютъ.
Которых людеи исцы учнут примешивати к намесничьим людем или к волостелнымъ гороцких людеи или волостных людеи, а намесничные люди за техъ городских люде(и) отвечяти не хотятъ, ино судити въ их вытехъ[34], а по городцких и по волосныхъ посылати пристава; а которои не поидет ко ответу, ино давати неответныя; а до намесничных людеи дела нет.
(Л. 26 об.) Которые люди иногородцы или пришлецы станут бити челом о обидах на намесниковъ, или на суд(ь)ю, или на судецких товарищевъ, или на волосных людеи, и как намесники или властели, едучи на жалован(ь)е, или на волосте живучи, или едучи зъ жалованья, кого чемъ изобидятъ, и темъ людемъ иногородъцемъ на намесниковъ и на волосных люде(и) суд давати; а что пришлецъ въ жалобнице напишет и досудятъца до крста, и ответчику то под крестъ класти. А не похотят намесники отвечяти, ино имъ ко ответу посылати своих людеи.
(Л. 27) А которые иногородцы, а не станут бит(ь) челомъ о своих бедах на намесниковъ до году, и впред имъ и суда не[35] дати; и на их людеи и на волосных хрестиян давати судъ пришельцамъ давати до осми летъ, а судити им[36], обыскав[37] по их жалобницамъ.
А на судеи давати судъ после его году, доколе и живъ будет, кроме того, кого гсдрь пожалует, не велит на кого суда дати.
А которои ищея взыщетъ бою и грабежу, а ответъчикъ скажетъ билъ, а не грабил, — и ответчика в бою повинити и безчестіе (л. 27 об.) на нем доправити, а в пене, что гсдрь укажет; а въ грабеже дати судъ и правда, а во всемъ не повинити. А скажет он, что грабил, а не бил, ино то доправити имянно, что грабил, а в пене что гсдрь укажет, и безчестие взяти по члку. А в-ыных делехъ по тому же судити.
А хто в чемъ на суде повивитца, то на немъ по тому же без суда доправити; а в достале судъи по суду кресть, и как суд был и речи на суду были.
А безчестия детем боярскимъ, за которыми кормление, противо доходу, что на кормление по книгам, а женам[38] (л. 28) их (в)двое.
А которые дети боярские емлют жалованние денежное, и колко емлет на год по книгамъ, то им и безчестие; а женам их вдвое.
А діякомъ полатным и дворцевым, что црь гдръ укажеть; а женам их вдвое.
А гостю большему безчестия петдесят рублевъ, а женам их вдвое.
А середнему гостю безчестия дватцет рублевъ, а жене его вдвое.
А меньшему гостю безчестия двенатцет рублевъ, а жене его вдвое.
А торговымъ людемъ посадцким и всемъ середним безъчестия пет(ь) рублевъ, а женам их вдвое.
(Л. 28 об.) Боярскому человеку доброму безчестия пят(ь) рублевъ, оприч тиунов и доводчиковъ; а женам их вдвое.
А тиуну и доводчику безчестия против их доходу, а женам их вдвое.
А крестиянину пашенному безчестия рубль, а жене его два.
А молодчему члку бояръскому, и посадцкому, і волосному безчестия рубль, а жене его два.
А доброму крестиянину, которои торгует, или денги и рож взаимы дает, или въ волосте его назовут добрым члком, безчестия ему три рубля; а жене его вдвое.
А повоскому члку доброму безчестня два, рубля, а жене его вдвое.
(Л. 29) А молодчему члку повоскому безчестия полтина, а женѣ его вдвое.
А суд(ь)е безчестия пет(ь) рублев, а жене его вдвое.
А целовалнику судецкому верному безчестия пет(ь) рублевъ, а жене его вдвое.
А сотцкому безчестия два рубля, а жене его вдвое.
А петидесятцкому и десятцкому безчестия полтина, а жене его вдвое.
А діяку земъскому безчестия по указу противъ его доходу годоваго[39], что от судовъ доидет по указу; а жене его вдвое.
(Л. 29 об.) А старосте церковному безчестия пет(ъ) рублевъ, а жене его вдвое; а губному тоже, а жене его вдвое.
А попу безчестия против волоснаго доходу, что от церкви годомъ доидетъ; а попад(ъ)е вдвое.
А діяку, и пономарю, и проскурне и строю против их доходу безчестия годоваго, что от церкви доидет.
А игумену черньцу и чернице, что стль укажетъ безчестия.
А вдове, и двце, и нещему члку против их животовъ вдов(ъ)их и нищих, а двце против черьницы безчестия.
А скомороху описному безчестия два рубля, а жене его ничего.
(Л. 30) А неописному скомороху гривна безчестия, а жене его вдвое.
А каликам безчестия, которые ис кусов ходят, 4 алтыны.
А московъским городцкимъ нищим кликуном безчестия вос 8 ал(тынъ) 2 де(нги).
А выбляткам, которые не у венчялные жены родился, тому безчестия 2 де(нги).
А для матерних промыслили.
А татем, и разбоиникамъ, и зажигалщикам, і ведомым лихимъ людемъ безчестия нет, потому что оне лихие люди.
А стрелцам, и ратнимъ людемъ, и волнымъ[41] казакам и каменщикамъ, что црь гдрь укажет.
(Л. 30 об.) А за увич(ь)е крестияномъ указати, зря по члку и по увич(ь)ю.
А которои чюжеземец взыщет на чюжеземце или на волощанинѣ, ино того воля, на ком ищут, хочетъ сам отцелуетце, что в том не виноват, или под крестъ положит, чего на немъ ищут; истецъ поцелует, а пошълины имать на ответчике.
А которое дело судитъ црь і великии кнзь или дети црвы и боярѣ, и которои суд не кончяетъца, а оставят его во обговоре, — и діяку исцевы и ответчиковы речи велити записывати пред собою, да те ему дела держати у собя за своею печат(ь)ю, (л. 31) доколе дело кончяетца.
А которые дела судят бояре, и тот суд велити записывати діякомъ перед собою, а исцемъ у записки не стояти; и будет исцы к чему будет надобе, и их призывати и, выспрося их, отсылати от записки; а списка не чести перед исцы, а прочести ево боярем.
А случитца суд[42] смеснои, ищея и ответчикъ судимы будут не одному суд(ь)е, и хто по ково возмет п(р)истава в какове деле ни буди, ищея возметъ у своего суд(ь)и за собою сторожа, да идет к тому судие просити пристава да перед темъ суд(ь)ею ищет. (Л. 31 об.) А будет ответчик, не ходя съ суда, да против на немъ ищет, и ему отвечяти перед темъ суд(ь)ею. Да и во всяких делехъ судити смеснои суд по тому судие, у кого в приказе ответчикъ. А пошлины имати одне по указу, а делити пополамъ.
А хто по кого пристава пошлетъ в бою или в какове деле ни буди, а исцы не похотят на суд итъти, и доложа суд(ь)и помирятцѣ; а судие пошлин на них нет, оприч езду и хоженог(о).
А которые исцы зададут суд(ь)ямъ челобитные, а сами до суда помирятцѣ, и суд(ь)ямъ пошлин не имати.
(Л. 32) А неделщику на судех на бояр, и на околни(чи)х, и на дворѣцких, и на д(ь)якох посуловъ не имати и самому нделщику пе просити; а которои нделщикъ возметъ посулъ в суде на боярина, или на околничево, или на д(ь)яка или на собя посул возмет и уличят его в томъ, и того нделщика бити кнутомъ, а посулы на немъ доправити втрое, да и ездъ недельщиковъ выкинути.
А пошлинъ имати от правые грамоты: боярину от печяти по девети денег, дияку от подписки с рубля по алтыну, а под(ь)ечему с рубля по три денги, а болши тог(о) имъ не имати; а кои возъметъ лишекъ (л. 82 об.) и уличят его в том, и на нем взати втрое; а жалобникъ солжетъ, и его бити кнутомъ да порука взяти по нем, чтобы впредь не лъгалъ.
А докладнои список боярину, и діяку, и казначию печатати, а дияку подписывати; а пошлин имати с рубля по алтыну, а от печяти дияку с рубля по 4 де(нги)‚ а под(ь)ячему по две денъги, а болши того имъ не имати.
А с холопа и с робы от правые грамоты и от отпускные боярину и казначию от печати имати з головы по 9 де(негъ), а дияку з головы от подписки по алтыну, а(л. 33) под(ь)ячему з головы по[43] три денги, кои правую отпускную напишет.
А хто заимет денги в кабалу в росты, и на те кабалы отписи без боярскаго докладу и без дияч(ь)и подписки не имати; а боярину от всякие подписки от печати по три денги, а дияку от подписки 2 де(нги), а под(ь)ячему, которои отпис напишет, имати по денгѣ.
А с црва і великаго кнзя с суда и з детеи црвых с суда пошлинъ имати на виноватомъ по тому ж, как з боярскаго суда‚ — с рубля по одинънацети денег, а дияку по 7 де(негъ), а под(ь)ячему по 2 де(нги).
( Л. 33 об.) А црву и детеи црвых печятьникомъ имати от правые грамоты с рубля по 9 денег, а дияку с рубля по алтыну, а под(ь)ячему с рубля по З деньг(и), кои правую напишетъ.
А з докладнаго списка црва і великаго кнзя з докладу имати црву печятънику от печяти с рубля по девети денег, а дияку по алтыну, а под(ь)ячему по 2 де(нги), которои списокъ напишетъ.
А с холопа и с робы от правые грамоты имати печятнику от печати з головы по 9 де(негъ), а диаку от подписки по алтыну, а под(ь)ячему по 3 дѣньги, кои правую напишетъ.
(Л. 34) А от строчных и от по(д)писеи имати діаку по 2 де(нги), а под(ь)ячему с рубля от подписеи по 2 де(нги); а похотят оба исца[44] срок отписывати, ино оба платят от подписи пополамъ, а неделщику хоженое.
А безсудные давати правые за сто версть семым днемъ, а дале того по тому же розчету; а пошлин имати от правые и безсудные прву печятнику от печати с рубля по алтыну, а діяку с рубля по тому ж, а под(ь)ачему по тому же с рубля по 2 де(нги)‚ а болше того имъ не имати; а кои лишекъ возмет, и на том доправит(ь) втрое.
(Л. 34 об.) А велит кому какову грам(о)ту дати льготную, или уставную, или полетную с красною печят(ь)ю, что возмет печятникъ от грамоты от печяти, а діяку то ж от подписи.
А тарханъных грамот впред не давати, а старые имати у всехъ назад.
А от приставных имати црву печятънику, діяку, и недельщику[45] по езду: с которые приставные рубъль езду, и печятнику с рубля от печят(и) по алтыну, а дияку от подписи с рубля по ал(тыну). А будет езду до котораго города рубля больше или менше, и печятънику и дияку имати по тому же розъчету. А будет…
(Л. 35) А хоженое неделщику в городе 10 денег, а по правду вдвое. А по волостемъ доводчику имати хоженое, кого на поруки дастъ, на версту по деньгѣ, а в трапезе от поруки 2 де(нги). А от поруки неделщикам и дово(д)чикам поклонноннаг(о) и поминъковъ не имати, до котораго города по указу, а на правду[46] вдвое.
А езду от Москвы до Коломны полтина, до Кошыры|полътина, до Хутыни 10 алтынъ, до Олекъсина 25 ал(тынъ), до Колуги рубль, до Ерославца полтина, (л. 35 об.) до Клинца 20 алтын, до Можаиска полътина, до Вязмы полтора рубли, до Воротынска 40 алтын, до Ко(зе)лска рубль с четвертию, до Одоева 40 алтын, до Беляева рубль с четвертию, до Мезецка[47] 40 ал(тынъ)‚ до Оболенска полътина, до Звенигорода 2 гривны, до Дмитрова 10 алтынъ, до Радонежа 8 алтын, до Ростова рубль, до Ерославля рубль с четвертию, до Вологды пол-трет(ь)я рубли, до Белаозера пол-трет(ь)я рубли, до Устюга пет(ь) рублевъ, до Вятки пол-осма рубли, (л. 36) до Вычегды семъ рублевъ, до Двины до Колмогор 8 рублев, до Юр(ь)ева рубль, до Володимера рубль с четвертию, до Суздала рубль с четвертию, до Костромы полътора[48] рубли, до Галичя пол-трет(ь)я рубли, до Мурома полтора рубли, до Отародубских кнзеи водчинъ полътора рубля, до Мещеры два рубля, до Новагорода до Нижнего пол-трет(ь)я рубли, до Углечя рубль, до Романова городка рубль с щетвертию, до Клина. полтина, до Кашина рубль, до Твери рубль, до Великово Новагорода пол-трет(ь)я рубли, до Пъскова. (л. 36 об.) пол-четъверта рубли, до Смоленска пол-трет(ь)я рубли, до Іванагорода пол-четверти рубли, до Великих Лук и до Торопца по полу-четъверта рубъли. А где будет болше или меньше того верстъ, ино имати по тому ж розчету.
А ездити недилщику с приставными, на поруки давати, самим или ездоковъ своих посылати, а людеи своих не посылати; а от поруки им поклоннаго не имати. А в к(о)тором городе недилщик живет, и ему в том городе с приставными не ездити и своих ездоковъ не посылати. (Л. 37) А кои неделщик или доводчик поклоннаго у ково возмут, и уличят его в томъ, — и на немъ взяти втрое.
А в которои город или в волость приедет неделщик, или доводчикъ, или ездокъ с приставною, и ему приставная явити намеснику или суд(ь)е и его товари(ще)м; а будет оба исца одного города или тое волости, а намеснику и судие оба судимы и ответны ему, обоихъ исцовъ перед судию и намесника поставити. И не явит неделщик и доводчик намеснику и судие приставные (л. 37 об.) или[49] обоих исцов перед намесника или перед судию не поставит, — и онъ езъду лишенъ своего; а одного исца не поставит, и поручные не покажетъ и исправы на собя не поставитъ, — и на немъ справити исцева волокита, на ден по три деньги.
А кого дастъ недельщикъ или доводчикъ на поруки в какове деле ни буди, и ему исцов и ответъчиковъ не волочити, а ставить их перед судиею.
А строки крестияномъ отписывати, и безсудъные по срочным давати і волокита правити (л. 38) по три[50] денги на ден, кто на срокъ не станет по записе; а без записи на поруки не давати, а правя волокита отдати тому исцу, которои к строку приедетъ. А которои истецъ и ответчикъ самъ на срокъ не приедет, а пришлетъ в свое место члка сроку отписывати, и доводчику на томъ имати ездъ и хоженое.
А хто по кого пошлетъ пристава, а самъ на тот срокъ не станет и не ищет, и что во ждан(ь)е после сроку учинитца убытка, и тому и то справити на том (л. 38 об.) волокита на ден на голову по три денги, кои велят на поруки дать, а самъ не стал; да и суда ему не дати за темъ суд(ь)ею‚ до новаго судии году.
А пересуду имати на виноватомъ с рубля по две гривны; а кое дело за искъ менъше рубля, и пересуду нетъ.
А кото(ро)и члкъ судно(и) списокъ оболживитъ, а дани на нег(о) не доведет, и на томъ пересуд, да бити его кнутомъ да порука по немъ взяти чистая, что ему впред не лъживит(ь)‚ да на немъ же праваг(о) десятка 4 де(нги).
(Л. 39) А приведут ково с поличным впервые с узъломъ и доведут на него поличное, и на немъ доправити за узол, тритцет рублев гдрю в казну; а не доведут на него поличного, ино того исца и приводчика бити кнутомъ да безчестие на немъ взяти на того, ког(о) поличнили. А того татя судити да послати про нег(о) обыскати. И назовутъ его лихимъ члкомъ, ино его пытати накрепко кнутом — дат(ь) ему 100 ударовъ; и скажет он самъ на собя, ино его казнити смертною казнию; (л. 39 об.) а не скажет самъ на собя, — и его вкинути в тюрму до смерти, а исцево заплатити изъ его статковъ. А скажут в обыску, что он доброи члкъ, ино дела до него нѣтъ.
А пошлутъ котораго недельщика имат(ь) татеи и разбоиниковъ, и ему их имат(ь) безхитъросно н не норовити; а изымав татя или разбоиника, не спустити и посула не взяти. А чистых ему людеи не имати.
А кои неделщик или в волостех кои члкъ татю снаровитъ, посул возметъ, а татя отпуститъ, (л. 40) и уличят его в томъ, — и на том человеке доправити исцев искъ, а его бити кнутомъ да кинути в тюрму; а в казне, что гсдрь укажет и его діяки.
А у котораго недильщика или въ волостяхъ у сотниковъ седят тати и разбоиники, и ему татеи без бояръскаг(о) или без суд(ь)ина ведома на поруки не выдат(ь). А будетъ недилщикъ или сотникъ без докладу татя или разбоиника на поруки выдастъ и уличят его в томъ, — и на томъ недилщике или на сотнике доправити исцев искъ вдвое (л. 40 об.) да бити ихъ кнутомъ, а в указе — что гсдръ укажет.
А котораго татя[51] поимаютъ с татбою с какою ни буди црковные и головные, а в-ынои в прежнеи татбе доводу на нег(о) нѣтъ, — ино его казнити торговою казнию кнутомъ да исцевъ искъ доправити, а его дати на крепъкую поруку; а не будетъ по немъ поруки крепъкие, ино вкинути в тюрму до поруки. А не будетъ у коего татя исцово заплатити, и его бити кнутомъ да отдати исцу въ его искупу головою на правеж (л. 41) до искупу; а исца дати на поруки, что ему, доправя свое, отдат(ь) его судиямъ. А не похочет истец по собе поруки дати в том, что ему, доправя свое, отдати, — и того татя вкинути в тюрму, доколе по немъ порука будетъ, и тогды на (не)м за тою порукою‚ кто его изъ тюрмы выпустит, выручит, исцев искъ доправити; и какъ на немъ истец, свое взяв, отдастъ его бояромъ, и судиямъ дат(ь) его на крепъкую поруку, хто ему будетъ впред исцы. А не будет по нѣмъ поруки крепкие, ино его вкинути в тюрму до поруки. А суд(ь)е с того не имати ничиго.
(141 об.) А поимают[52] того ж татя с татбою вдругие, ино его пытати накрепъко; скажетъ самъ на собя, ино его казнити смертною казвию, а исцевъ искъ заплатити из его сътатковъ; а нет котораго татя с-ысцевъ искъ, и его казнити до смерти, а исцу въ его гибели головою не выдати. А пытан тат(ь) на собя не скажет, ино послати про него обыскати; и скажут про него, что он лихои члкъ, ино его повисити; а назовутъ его добрымъ человекоыъ, ино его дат(ь) на крепкую поруку, а нет по немъ поруки, ино его вкинути в тюрму, (л. 42) доколе порука будетъ.
А на кого възъмолвыт тат(ь)‚ и про того обыскати, и будет в обыску скажутъ в какове деле прежънемъ приточенъ тот[53] человекъ, ино его пытати; и скажет сам на собя, ино его казнити татиною казнию. А не будетъ на него прежнего доводу і в обыску про него лиха не молъвятъ, ино татиным речемъ не верити‚ дати его на крепъкую поруку, а того татя казнити по суду и по указу.
А на кого молъвять дети бояръские 10 человѣкъ, или 12, или въ волосте добрых хрестянъ (л. 43 об.) члвкъ 10, или[54] 15, или 20, или целовалниковъ, таки суд(ь)я по господареву кресному целованию, что он тат(ь) и грабител і всякои лихои члкъ, хотя на него довода і в прежних делехъ нет, у кого кралъ или татбу плачивал, или обыскъ старои, или душегубъство или зажигание или какое дело ни буди, — ино тем 10 или 20 члкомъ повирити, и на немъ исцевъ искъ доправити безъ суда, будетъ ниже 10 рублевъ; а будетъ тог(о) больше, ино его судити, и как доправя на немъ искъ по их обыскнымъ речямъ, отдати исцу, (л. 43) а у нег(о) взяти в том отпис.
А на техъ на 10 или на 20 члкъ дати суд да про них и про их речи миромъ сыскати, отставя их род, и племя, и кумовство, и сватовъство, сыскати добрыми християны черными, оприч миропродавцов[55]; и скажут про них миромъ, что оне нѣ лгали, а на того члка не нарядомъ говорили, а сами оне люди добрые не лживые, и дело верши по суду. А скажут про них, что оне солъгали нарядомъ‚ и на них его гибел(ь) исцева доправити, а их дати на чистую поруку, чтобы впред не лгали. А будет миром (л. 44 об.[56]) молвят в прежние их речи, ино тог(о) татя дати на крепкую поруку; а нет по немъ поруки, ино его вкинути в тюрму.
А хто на мошеннике или на оманщике взыщет тог(о), что ег(о) оманул, и хоти его трою днем изымаешъ и доведеш на него, ино его бити кнутомъ, а исцева иску не правити, потому что одинъ оманывает, а другои догадываисе, а не мечися на дешевое.
А доведут на кого татбу, и разбои, и душегубство, или ябедничество, или подписку ручную, или (л. 45) кабалную[57] или какое дело лихое ни буди, и будет он ведомои лихои члкъ, ино его казнити смертною казнию, а исцево заплатити из его животовъ и статков. А нарядчика и подписщика[58] бит(ь) кнутом, а в указѣ, что гсдрь укажет. А нет у котораго татя чемъ исцева иску заплатити, и его исцу головою не выдат(ь)‚ казнити смертного казнию. А бояромъ и суд(ь)ямъ от того не имати.
А на кого татбу‚ или[59] дшегубство, или иное лихое дело оприч розбою, а в которомъ городе или въ волосте ведомои злои члкъ, (л. 45 об.) и намеснику его казнити смертною казнию, исцево платит(ь) из его животовъ; что останетце за исцевым, и то имат(ь) намеснику и судие. А нечемъ исцева заплатити, и его казнит(ь) смертною казнию.
А гдрькому убоице, и градцкому здавцу, и коромольнику, и церьковному татю, и головвому, и коневому, и подметчику, и зажигалщику, и ведомому лихому члку живота не дати, казнит(ь) смертною казнию. А будет ис тех лихои істецъ, ино (л. 46) заплатити им его статки; что ся останетъ, ино отдати в проговы. А нет котораг(о) татя с-ыскуп, ино его повинити или заказнити.
А бояромъ и детем бояр(с)ким судити, за которыми кормъление, а на суде у них быт(ь) дворетцкому, да старосте, и лутчимъ людемъ, да целовальнику; а судные писати земъскимъ диякомъ, а старостам и целовальникомъ к тем спискамъ руки прикладывати.
А судъ бояръскои которому намеснику даннои, ему давати (л. 46 об.) полные і докладные; а правые и беглые давати з докладу, а без докладу правые не дават(ь).
А детеи боярских судити намесникомъ по всемъ градомъ по црвым грамотамъ по жаловальвымъ, а от правые грамоты имат(ь) от печяти с рубля по полутрет(ь)я алтыны[60], а дияку с рубля по 3 ден(ги).
А намесником и судиямъ по волостям кабалныхъ людеи судити, а полных на них и докладных не давати и грамоты бегълые без докладу не давати.
А которои намесникъ или властел(ь) без боярскаго суда, (л. 47) а выдастъ холопа или робу без докладу в правую грамоту дастъ, — и та грамота не въ грамоту; а что гсдъ того холопа или робы убытка скажет, ино то взяти на суд(ь)е втрое, а исцам з головы суд.
А тиуну намесничю гсдрю на холопа, ни холопу на гсдра правые грамоты не дават(ь) без докладу. А которои тиунъ гсдрю на холопа или хо(ло)пу на господаря дастъ без докладу правую грамоту‚ — и тому холопу на гсдря дата суд новои, а тиуна вкинути в тюрму до гсдрва указу.
(Л. 47 об.) А которому намес(ни)ку дано в кормление город с волостьми, а преже того в техъ волостях старость не было и целовалниковъ, —и ннѣ быть по всеи моеи земли по городомъ и по волостемъ быть старостамъ и цѣловалникомъ, і в суде им с намесникомъ и судиею седити. А суд писати земъскому дияку. А без целовалника никако же не судити. А посулов имъ от того не имати.
А пришлет намесникъ или суд(ь)я суднои список в доклад, и будет ищея или ответъчикъ у докладу (л. 48) полживят список, ино послат(ь) на правду по старосту и по цѣловалника, кои в суде были; и скажут, что суд таков был и руки у списка ихъ есть, и судные мужи[61] молвят, что суд таков был, и противен их с матицею соидетца слово в слово[62], — и того винити суднои на него подписати, хто лъживилъ (л. 48 об.) список. А скажет целовалник и судные мужи, что суд не тавовъ был и руки скажут не их у писма, — и по тому судному исцевъ искъ взяти на суд(ь)е‚ а в пенѣ, что гсдрь укажет.
А не станет за списком ищея и ответчик на срокъ, а доводчик на него запис положил, — и тог(о), кои не стал на срок, повинит(ь)‚ а подписати на вину, будет не станет (л. 49) в седьмои день за сто версть.
А кого намесничии[63] люди или властелные станут дават(ь) на поруки от кого до суда или после суда, и по ком поруки не будет, и тех имъ людеи евя в городе приказчику да старостѣ и целовалникам, кои в суде седят; а у намесников и суд(ь)и не явя тех людеи, к собе не водити (л. 49 об.) и у собя их не держати, не ковати.
А намесникам, і волостелям, и тиуномъ, і великаг(о) кнзя тиуномъ боярским татя, и дшегубца і всякаго лихаго члка без докладу ни продати, ни казнит(ь) ни отпустити. А хто татя или дшегубца отпустит или продасть, — и на том исцев искъ доправити, а в пене вкинут(ь) в тюрму (л. 50) до гсдрва, указу.
А по городам намесникомъ городцких посадцких людеи промеж их судити и, обыскав по их животам и по промысломъ и по розмету, сколко он рублевъ дани дастъ, и по тому их судит(ь). А розметные писат(ь) диякомъ земъским, а старостам[64] розметные отсылат(ь) (л. 50 об.) к Москве ко бо(я)рином и діяком, у кого кои городы в приказе.
Хто учнетъ пред намесником тягатис, и про тѣх исцевъ сыскивати розметными книгами; и сыщут, что живота его столко есть на колко ищет, іно дати суд. А будет живота его столко нѣть, на колко в челобитнои писано[65], — тѣхъ исцѣвъ винити (л. 51) и пошлины на них взяти[66], а в пѣне дать на поруки, что гсдрь укажет.
По волостям крстьян черных судити суд(ь)ямъ по их жалобницам и управа чинити бѣз(во)локитно‚ а хто взыщет много, не по животомъ, а ответчикъ и станет бити челом, что живота его столко нет, на колко ищет, — и тем суд(ь)ямъ посылат(ь) (л. 51 об.) цѣловалников и людеи добрых на обыскъ про то сыскати накрепко по тех исцев: сколко он дани дает, и что под ним позему, и чемъ промышляет, было ли живота его столко, на колко въ жалобнице. Скажут миром в обыску, что живота его было столко, — и в том ему дати суд; а скажут в обыску, что живота[67] (л. 52) столко не было, сколка ищет, ино того исца повинити и пошлина на немъ взяти, а в пене и в ябедничестве‚ что гдрь укажет, да дат(ь) на поруки и срочити к Москве перед дияка, а в казне, что гдрь укажетъ.
А которои ответчик, на суде стоя, самъ крестъ целую, а сверхъ того исцу виру, а денегъ нечево под крестъ положит: самъ под крестъ сяду до искупа, — и тому исцу не выцеловати ответчика головою, а (л. 52 об.) целоват(ь) исцу крестъ из его доиску; а ответчику под крестъ класть, чего на нем ищут, а сверхъ того по суду и по речямъ.
А кто ково учит на суде исца ли ответчика и уличят его в томъ, — будет ответчика учил, і обвинять, на немъ половина исцева иску, а другая половина на ответъчике. А будет исца оправат, и на нем пересудъ по указу; а будет ответчика отправят, и на немъ пересуд и правои десяток, а сверхъ того дастъ (л. 53) на крепкую поруку, что впред не учит никого.
А хто на комъ взыщет, а скажет, дан было ему живот на соблюдение, и ответчикъ скажетъ, было у мяня живота[68] его не столько, на колко ищет, — и что скажет имянно, то на немъ взяти; а про достал сы(с)кати‚ и судомъ судити и кресное целование дат(ь) на ответчикову волю: хочет сам целует или исцу виритъ.
А в которомъ городе два намесника или на волосте два суд(ь)и‚ а суд у них не в розделе, (л. 53 об.) ино имъ имати пошлин по списку обемъ за один члкъ, а его тиуномъ за одного тиуна. А которые городы у них в розделе или волости, и случитца у них судъ смеснои, ино им имати пошлины одне, а делити пополамъ. А возмутъ съ суднаго дела двои пошлины, а уличят ихъ в том, и на них възяти вътрое.
А хто пошлеть пристава по намесника, или по боярина, и сна боярскаго, или по волостеля, и по их тиуновъ, и по црва і великаго кнзя тиуна, и по доводчиков, и намеснику, (л. 54) и боярину, и тиуну, и детемъ боярскимъ отвечяти, к строку ехати или своих людеи посылати отвечят(ь). А кои намесник и боярин за 100 версть в седмои днь ко ответу не приедетъ и своего члка не пришлеть, и его повинити по жалобнице‚ исцев искъ доправити и пошлины неделщиковы і ездъ.
А судиям по волостям, коего году он судит, и ему пред товарищемъ не отвечяти, а отвечяти в новои годъ‚ как его судиіны дела вершатца. А суднымъ товарищем, целовалнику (л. 54 об.) и сотцкому, оприч діяка, всемъ отвечяти перед тем судиею, с кемъ в году судят; а не учнутъ отвечяти, и их винити, а суд(ь)е в то место садити людеи добрых.
А о холопъстве суд. По полным набаламъ и по грамоте холопъ з докладу зъ женою и з детьми, которые дети у одного гсдря в однои крепосте родилъся и в холопстве.
А которые дети родилис до холопъства‚ а у(ч)неть жит(ь) у одного гсдря или собе, то не холопи тому, у ково о(те)ц их. (Л. 55) А по гсдрву указу по робе холопъ, а по холопе робы неть. По духовнои холопъ к по приданои робе холоп. А по тиунъству без полные кабалы не холоп. А полному холопу и докладному сына своего свободнаго, кои родился до холопъства, не продат(ь). А продастъся сам кому хочет, а отцу его и матере у полные не стояти, ни из холопства не взяти, потому что отць его и мати сами в холопстве. А полные писати, что отцъ его и мати у полные не стоя(ли), потому что сами въ холопстве.
(Л. 55 об.) А у кого отць в черньцахъ и мати в черньцах, и тому отцу и матере у сына своего у полъные не стояти і у докладные ни из холопства не взяти. А в полъные писати, что отць его и мати у полъные не стояли, потому что позтрижены. Да и не продати детеи своихъ, а продастъся сам, кому хочет.
А отпускные давати з боярскаго докладу, а бояромъ к темъ отпуск(н)ымъ печят прикладывати, а діякомъ подписывати. А отпускные бояромъ давати на Москве (л. 56) да въ великом Новегороде і во Пъскове бояр(о)мъ і діяком. А пошлины имати отпускные боярину и намеснику от печяти з головы по 9 де(негъ), а дияку по алтыну, а. под(ь)ячему‚ которои напише́т отпускную, ино з головы по 3 де(нги).
А опричь Москвы і великово Новагорода и Пъскова в-ыных городех отпускных не давати. А хто отпускную положит без московъских и наогородцких бояр діяковъ к докладу подписи[69], хотя своего гсдря рука, — и та отпускная не во отпускную.
(Л. 56 об.) А которые люди волные учнут бити челомъ кнземъ, и бояромъ, и детемъ боярским, і всемъ людемъ, а станут на собя кабалы давати за ростъ олужити, — и боле 15 рублевъ и на сребряники кабалъ не имати; а старые кабалы[70], кои преж сего ва простых людеи писаны болше петиватцети рублев, и те кабалы переписывати, а темъ людемъ у них за росты служити; а темъ людемъ приносити кабалы к бояромъ и детем боярскимъ печяти прикладывати, (л. 57) а діаком подписывати. І впрд хто[71] кабалу оболживит, і та кабала вершитъ по суду, а имат кабалам на волных людеи.
А ва полъных людеи и на старыхъ холопеи кабал не имати. А хто возмет на них кабалу или бегълую грамоту, и по темъ крепостямъ у него денги пропали. А чеи то он холопъ былъ, и тотъ гсдрь скажет, что он у него убежал, что скажетъ свосу, то взяти на том, хто, не обыскавъ, (л. 57 об.) на чужого[72] холопа кабалу или беглую возмет; и тот холопъ старому гсдрю по прежнеи крепосте.
А положат на одного холопа две кабады полные, и которая будет старие, тому холопъ. А по новои кабале у тог(о) денъги пропали. А снос стараго гсдря на томъ же, хто новую кабалу положил, чево попытает сносу.
А холопа рат полонит, а выбежет ис полону, и он свободенъ; а старому гсдрю и того холопа явит(ь) бояромъ и діяку подписывати на старои крепосте.
(Л. 58) А которои холоп побежит з гсдрем своимъ, а не рат полонит, а выидет холоп ис которые земъли опят на Рус, и он старому гсдрю опет хопопъ по старым полнымъ, оприче кого гсдрь пожалует, дастъ волную грамоту.
А детеи боярских служимых, которые векъ не служивали, в холопехъ не бывати, оприч кого гсдрь отставит от службы; _ и хто сколько денег заимет в ростъ, и темъ людемъ не служити, жити им о собе, и у кого сколко заняли, то имъ и раздавати.
(Л. 58 об.) А (к)то казаку дастъ денег взаимы в ростъ да того члка станетъ держати у собя силно, а будет до него недобръ‚ и казак тотъ, не мога терпити, от него покрадъчи збежит, — и что у него снесѣтъ, то пропало, а по кабале денегъ лишенъ.
А наимит не доживет до сроку у гсдря своего и поидет прочъ, а вины на гсдря не скажетъ‚ — и он наиму лишенъ. А будетъ гсдрь учнет его до сроку отсылати, и ему дати наемъ по розчету; а кои гсдрь не захочеть наиму дати наимиту, (л. 59) уличят его в томъ, и наимитъ уличитъ, — на томъ доправит(ь) наемъ втрое.
А о землех суд. Взыщет боярин на боярине, или монастыр на монастыре ж, или боярин на монастыре, ино судити за 3 годы.
А взыщетъ крестиянин[73] на крестиянине, ино судити за 3 годы. А крестиянин на земъле суда не поставит въ 3 годы и не биет челомъ о обиде, и ему дале того не давати.
А в землях судити старожілцы, хто знаетъ межу или преж сего ту землю пахивалъ (л. 59 об.) и живал. А будет[74] истец или ответчикъ старожилца оболживят, а своего не поставит, и он темъ виноват.
А будет истецъ много в челобитную напишет не по земле, и суд(ь)ямъ про то сыскати, по земле зря, мощно ли столко убытковъ учинитца. А будетъ ответъчиков повинят, — и что‚ на земле сияно, где суд был или пожня, и то исцу за убытки, а в достале дат(ь) суд и кресное целование, а челобитънои исцеве не верити.
А будет старошилцы став в речях порознятъ: ищеин молвит (л. 60) по ищее, а ответъчиковъ по ответчике, ино имъ не верити, дати целован(ь)е на ответчикову волю — хочет самъ поцелуетъ, что земля его, или исцу вирить, а убытки под крестъ положити и земъли отступитца.
А молвытъ иоцевъ старожилъ или ответъчиковъ не въ его речи, ка(къ) он слался, и его пови(ни)ти в земле і въ половине убытков[75], аще молвыт старожил не в ответчиковы речи.
А судиямъ судити, род и племя (л. 60 об.) отставя обоих исцевъ, оприченными людми, ково полюбят оба исца.
А взыщетъ на бояринѣ или на монастыре земъли цря і великаго кнзя, ино судити за шесть летъ.
А по гсдрву приговору двум суд(ь)ямъ на землю не ехати — одному суд(ь)е да целовалнику с нимъ веръному и старосте волосному и людемъ добрымъ. А пошълины имат(ь) на ищее за боран 2 алтыны, целовальнику 2 де(нги) со обех исцевъ, а діяку 4 де(нги) с-ысцевъ пополамъ.
( Л. 61) А послух придет перед судию правда и что речи скажет, то діяку записати, а имати дияку с правды з головы по 2 де(нги).
А приедетъ в деревню новои жилецъ и захочет земълю делити во въсу землю‚ — и деревню в полях на волокахъ і во всяких землях и угод(ь)я делити, земля и пожни и угод(ь)я и путики повытно, по купъчимъ; и где друг друга умирит, туто умеръ взяти безубыточно. А с полос назму не вести. А где умѣритъ подворною землею, противъ (л. 61 об.) тово имати земля любая, где захочетъ, оприч хмелника и садовые земъли.
А кои складникъ захочетъ на новое место двор ставит(ь) или иную хоромину, и ему поставить от далних хоромин[76] въ любом месте, где похочетъ, хотя на хмелникъ. А отдат(ь) ему земъля в любомъ месте, гдѣ другои полюбит. А на какову земълю наставитце дворомъ или храмнною, такова земъли и отдати, а свѣрьхъ того по любъве.
А хто наездомъ деревню (л. 62) пашет, и ему болше трех годов не пахати наездомъ: любо скупат(ь), либо спродавати с суда и з жеребия; и огород ему по своеи выте ставит(ь).
А складникъ у складника в однои деревне наставитце хороминою на подворную землю, и ему земъля очистити, снести хоромина, толко другому на то место что ставити. А будет не ставит ничево на то место, и ему земъля противо того взяти в любомъ мѣсте.
Новои приговор.
А суд о вотчинах. А хто вотчину (л. 62 об.) продастъ, а будет у купчих в послусех брат, или сестра, или племянникъ, — и детемъ его і внучятомъ до тое вотчины вѣкъ дела нет; а не будет брата, ни племянниковъ, ни родни у купчие в послусехъ, — и дети его і внучята отцеву вотчину выкупят. А будеть тот купецъ отпродастъ им назадь, какъ ему стоить, и им купити.
А судити о вотчинах за сорок лѣтъ, а дале сорока лет ‚ вотчиньникомъ до вотчинъ дела нет, до купцевъ детемъ его і внучятом дела нет.
(Л. 63) А хто после живота своего отпишет деревню детем, то имъ и водчина в векъ. Хто вотчину выкупит в те урочные сорок лет, и та ему водчина деръжати за собою, а иному ни продати, ни заложити в чюжеи род, кому хочет полюбовно.
А хто стороннеи члкъ дастъ денги, а молвыт: „выкупи свою водчину, а не надобе себе, ино яз в неи живу“, — а доведет на него продавецъ, что он скупил чюжыми деньгами, а держит не за собою, ино та деревня первому купцу безденежно, (л. 63 об.) а у того денги пропали у сторонняго. А станет тот продавец и купецъ инымъ людемъ закладывати, и темъ стороннимъ людемъ имат(ь) та вотчина под заклад, а деньги дават(ь), чево та деревня стоина. А возмет хто сторонънеи члкъ, а не водчину, в заклад болше того цены, чего та вотчина стоит, и хто водчин(никъ) учнет бити челомъ, что закладывает или уже заложил в чюжеи род, — и тому водъчиннику в заклад взяти в меру, чего та водчина стоит, и что тот денги лишек далъ взаимы, то у того пропало.
(Л. 64) А хто водчину променит, а примет денег, и хто водчинъник учнет ту водчину выкупати, и ему своя водчина выкупати, а земли ему оставит(ь) столко, сколко своея вотчины земли променил.
А промеж селы и деревни городити межнои огород, где межа придет, пополам. А чиим огородом протрава (л. 64 об.) учинитца, и про то сыскати и на нем протрава взяти, чемъ люди осудят; а протрава до Семена[77] дни, а после Семена дни протравы нет.
А огород ставити около поля 7 жердеи добрая, а около гумна 9 жердеи добрая. А осек ставит(ь) 7 хлубинъ (л. 65) нарочитая. А чия животина через таков огород пакость сотьворит, и сыскав на томъ протрава взяти; а сыскиват(ь) сотцкому да волосному старосте и ближными суседи.
А про тех людеи сыскивати накрепко, хто назло огород отворит і в поле скота напустит, или осек (л. 65 об.) отворит і выпустит скот за осекъ, и которая незгода учинитца и как сыскав того[78], и на нем гибел взяти, а его бити кнутомъ, что лихо творит. А будет в поле отворил, и та протрава на нем же взяти, чемъ люди осудят.
А где отхожие пашни, и пожни, и огороды, и пожни, (л. 66) и будет от сел и от деревен на лисе и при реках, і гдѣ чья пожня, и будетъ скот его ходит на тои пожне в кое время ни буди или на пашне, ему огород ставити половина, а чеи чюжеи скот ходит, тому другая половина. А будет его скотъ пе ходит, а чия прилегла к пашне ораная земъли или чеи скот ходит, (л. 66 об.) тому и городити все; а пору[79] ему скотом не травити, а хто стравит[80], на том и протрава справити без суда.
А хто зорет межу или гран ссечет меж селы и деревни и уличят его в томъ, и его бити кнутомъ, а исцу за гран и за межу взяти рубль.
А крестиянинъ у крестиянина (л. 67) в однои деревне межу подорѣтъ или перекосит[81] ино властелю на нем взят(ь) за боранъ два алътына.
А у которых селъ и деревен есть молоди, и тех молодеи прежних выпашеи и тех лесовъ спладниками меж собя без делу и без жеребия ни сетчи, ни пахати. А кои складник без делу (л. 67 об.) молоди высечет и запашет, а инои складникъ не секъ, а выт ему такова ж въ хлебе, хоти он и ставил того же лесу.
А чернои лес пахати въ суземке просто без делу, где не молод(ь)‚ хто сколко может: то лес вопчеи црвъ і великаго кнзя.
А что за которою деревнею угод(ь)я есть — путики (л. 68) іли иное что‚ ино про то сыскивати старыми[82] жилцы. И сыщут, в которои деревне или въ суднои приписати, ино далным жилцамъ, иным деревням к тем путикамъ не ходити за чюжые деревни, ни никотораго угод(ь)я угодовати не полюбовно.
А где меж деревнями случитца межа, и межа (л. 68 об.) до осека, а на осекъ став, топором шиби, до ка(ки)х месть имет, а дале вопчеи лесъ црвъ і великаго кнзя.
А крестияном отказыватися из волости въ волость, из деревни в деревню один срок в году — за неделю до Егор(ь)ева дни и неделя по Егор(ь)еве дни осеннемъ. А пожи…[83]. (л. 69) подворъною платит(ь) подворникам на год 8 ал(тынъ) по 2 де(нги), до коего лесу десет верстъ.
А хто за кемъ живет и поидет проч, и он платит пожилое по 8 ал(тынъ) по 2 де(нги). А останется у вого рож в земле, и как тот хлеб пожнет, и он с того хлеба дастъ боран 2 алтына[84] властелю да с того же (л. 69 об.) хлеба дастъ подат црву, оброки і всякие подати, и ему по хлебу дати, да пожилая копна сена — две сажени съ локтем, одинова топтати, — и то взяти тому, кому он деревню продасть.
А убиют котораго крестиянина на поле в розбое или в-ыномъ лихом (л. 70) деле, і выручит его гсдрь, за кемъ он живет и поидет из за него, ино его выпустити[86], а по немъ порука взяти з запис(ь)ю; и попытают на немъ того крестиянина, и он бы был в лицах.
А которои купец, идучи на торговлю, возметъ деньги у ково или товар да на пути у него тотъ (л. 70 об.) товар утеряетца безхитъросно — истонет, или згорит, или рат, или разбои возмет, — и бояром і діяком про то сыскивати и сыскав дати царская грамота с красною печятию по его животомъ полетную по его животомъ, в колко лѣт ему платитца, исцу свое имат(ь) ему без росту.
(Л. 71) А хто у ково на торговлю возмучи товар или денги, или что ни буди, да тот товар пропиет или безумием потиряет без напрасньства, — и того члка исцу выдати головою до искупа.
А в розбоиномъ деле дадут кому полетную грамоту, и как своего розбою доищетца, и въ его иску (л. 71 об.) розбоиниковъ поимают, — и у тог(о) грамота полетная не въ грамоту.
А попа і діякона, черньца и черницу, и старую вдовицу, которые питаютца от церкви Бжии, ино тех судити стлю.
А будет поп захочет самъ на комъ искати какова дела, и суд(ь)ямъ его судити, а самому попу (л. 72) отвечяти перед тем же судиею‚ хто на немъ ищет чего. А во въсяких делех попа и діякона судити жереб(ь)емъ, а черньца потому ж, а в доклад их отсылати к светителю. А будет поп не похочетъ на доклад к светителю, и ему в приговор садити десятаго попа да старосту церковнаго и людеи добрых, (л. 72 об.) хто ему люб; и после приговору под правеж даватися, как список приговорят.
А діяка и пономаря крылашан, оприч проскурни, всехъ судити земъским судиямъ и меж ихъ управа чинити.
А будет учнутъ крылашане меж собою тагатис в какове делѣ ни буди, ино их (л. 73) судити попу, с коимъ служат, а в суде у них быти старосте церковному, да целовалнику верному земъскому да волосных люде(и)‚ коих оба полюбят; и судия их и дело приговоритъ.
А которые люди живут въ волосте, а питаютца о собе, не от церкви Божии‚ — и тех судити суд(ь)ямъ (л. 73 об.) земъским и розправа меж ими чинити, как меж крестияны.
А которые торговые люди учнут на монастыре жити, и тех с манастыря съсылати, а на монастыре жити нищим, которые от церкви Божи(и) питаютъца.
А которои члкъ умърет без духовные грамоты, а не будет у него сна, ино статки (л. 74) все и земълю дочере; а не будет дочери, ино взяти от ближнего роду от оцева или от материна.
А хто при смерти напишет духовную, и попу у духовные седити, а болше рубля без кабалново долгу не писати, да и то писати, коимъ обычяемъ дано что бол(ь) говорит, то (л. 74 об.) писати. И будет бол(ь) умрет, и попу взяти сорокоустъ и духовная о(т)дати, кому приписано. А будет бол(ь) оживет, и попу духовъная драти, как минет шесть недил.
А хто дочер дастъ замуж, а та доч его умрет, а останетца детя водчинникъ‚ — и ему взимъков не прошати. А не будет отрод, ино взимки взяти, что давал.
(Л. 75) А кои члкъ умрет, а у него дети не останутце з женою, и жене его приданое взяти, а cверхъ того полетное имати — по две гривны на год.
А хто купит на торгу что поношено или изъ лавки, и ему купити с порукою с рядовою. А хто купит без поруки, и тому быти винонату.
(Л. 75 об.) А по городам и по волостямъ, кои около города, лошад купит где хто или минит, — и ему прпводит(ь) и пятенщикамъ и пятнати; а пошлины имат(ь) с купца денга, с продавца денга.
А по волостямъ и по всеи моеи гсдрве земли хто лошад купит или менит, и тех лошадеи не пятнат(ь)‚ (л. 76) а купит(ь) и менит(ь) перед трет(ь)ими людми. А хто в городе купя лошад или около города, держати ея не пятнавъ и уличят его в томъ, — и на томъ пропя(те)ния 2 рубли. А хто поимаетца за ту лошад, чего с тою лошад(ь)ю взыщет, доколя ея не запятнав, и на том тот исцев искъ взяти без суда. А детемъ боярским (л. 76 об.) купленые лошади по тому ж пятънати.
А в служебномъ походе хто у ково купит лошад, и хто за нея поимаетца‚ и тому купцу ставит(ь) послуховъ члкъ 5 или 6 на томъ, у кого он купил; а запретца тот члкъ продавец, ино им судъ.
А намесником, і властелем, и тиуномъ, и пятенщиком (л. 77) в городѣх і волостехъ нѣпродажныхъ доморощоных конеи нѣ пятнать. И хто учнет непродажные и доморощеные лошади пятнати, а доведудъ на нег(о)‚ — і хто на нѣмъ чего взыщет в тѣхъ лошадех, и нему убытъки платит(ь) безъ[87] (су)да втрое, а в пѣне, что гсдрь укажет.
А которые дѣла преж (л. 77 об.) сего[88] судебъника вершены, и тех всех дел не посуживати — быти тем всем делам земълянымъ, в холопстве і во всяких делехъ по тому, как те дела преж сего верьшены.
А въпред всякие дела судити по сему судебнику и управы чинити по указу, как гдрь укажет, с котораго дни уложитъ.
(Л. 78) А которые дела будут новые писаны и как те дела з гсдрва докладу и со всех бояр приговору вершатца, и те бы дела в семъ судебънике не приписываны были.
А велити на Москве и по торгомъ проклинати і во всех городех Московския земли и Наогородцкия, и по волостямъ, (л. 78 об.) и по соборным црквамъ, и по выставочным проклинати, чтобы ищеи и ответчики судиямъ в суде посуловъ не давали[89].
А послухи бы не видев не послуховали, а видев бы сказывали в правду. А послух, не видев, опослушествует ложно, а сыщут, что он ложно правдал, — а на лживомъ послухе исцева гибел (л. 79) и убытки, а во лже казнити торговою казнию — бити кнутомъ.
А взыщет московитин[90] какова дела на селецких волостелех, и которые сельца Московские земли за уделными кнзъми, ино судити великому ннзю. А не ответчяет селецкои перед великим кнзем, — і великому кнзю его повинити. (Л. 79 об.) А взыщет его селецкои на селецк'омъ, ино их судити их же властелю.
А приговорил црь і великии кнзь: шлютца с суда ищея и ответчикъ на мир в обыскъ, і в обысках многие люди лжут семиями и заговоры великими, — иные молвятъ по исце, а иные по ответчике, и по темъ[91] (л. 80) лъживымъ[92] обыскам делъ не вершити, а посылати вдругие обыскивати, ино те ж люди говорят иные речи.
А ищея или ответчик шлютце на иных в слух и на иных въ видение і в ведомо, а против тово истец или ответчикъ шлютце в послушество, а отводу не учи(ня)т‚ и за темъ лъживым послушеством (л. 80 об.) и за обыскомъ дела не вершатца, а иные присужают поля и кресное целование. І в тех бы делех поля не присужали и обысковъ бы не оставливали, что шлютца в послушество; а послушества бы его доспрашивали, почему он шлетца в послушество. И будет отводу не учинит, (л. 81) и того повинити.
А послати на обыскъ по ищеинымъ речямъ или по ответчиковымъ и с теми людми‚ на которых слался ищея или ответчикъ, оприче их родов и заговоровъ. А велити обыскивати старостам и целовалникомъ да тем обыскомъ и вершити без поля и без целования.
(Л. 81 об.) А которые ищея или ответчик тяжутца перед бояры і во всех приказех, а шлютца в обыску на многие люди безимянно, і в тех делех пошълют бояр[93] обыскивати с Москвы, старостам и целовалникамъ велет(ь) по обыскомъ и мъногимъ людем добрымъ лутчим, кнзем, и бояромъ, і всемъ крестияномъ, (л. 82) и архимандритомъ, і игуменомъ, і попом, і діякономъ, і з городов с посадов лутчимъ людемъ обыскивати с лица на лице, и за очи обыскных люде(и) не писати.
А речи бы свои обыскные люди писали; а которые грамоте не умеют, ино отцы бы их духовные руки свои прикладывали.
(Л. 82 об.) А скажут в обыску обыскные люди не одне речи, — иные по ищее, а иные по ответчике, — и по котором члке молвят в обыску людем болше члкъ, петдесят или шездесят, и по тому болшему правити, а по меншему винити исца или ответчика без поля и без целован(ь)я.
А после тог(о) сыскивати (л. 83) в котором городѣ влдка есть, или архимандрит, іли игумен будетъ, где обыскивати, и гдрь им пришлѣтъ о томъ, чтобы сыскивали и розведывали въ правду, которая половина солгала; и тех лъживыхъ казнити по приговору, как в розбоиныхъ делехъ.
А окажут в обыску поровну, (л. 83 об.) а половина по ищее, а другая по ответчике, и по тем обыскомъ того дела не вершити, а посылати вдругие на обыскъ. А велити обыскивати старостам, оприч тех людеи, иными людми многими про то, которая половина солгала. И на которую половину доведут, что онѣ солгали, (л. 84) и ис тех людеи изо ста члкъ выбрати прикащиков и лучших хрестиян члкъ пят(ь) или шесть бити кнутомъ, а игуменовъ, и попов‚ і діяконовъ отсылат(ь) к светителю. А ездъ, і волокита, і прогоны правому, что будет убытка в том дѣлѣ, оприче исцевых исков, то взяти на тех, на. коих лож доведут. А которых (л. 84 об.) людеи по тому обыску попытает, и темъ людемъ взяти безчестия вдвое для лжи, чтобы впред не лгали.
А которые люди в одъном обыску двои речи говорят, и ис тех людеи изо ста выбрати члкъ пят(ь) или шесть бить кнутомъ.
А пошлутъца в суде ищея или ответчикъ в обыскъ (л. 85) из виноватаг(о) члкъ на 5 или на 6, а вирит(ь) кому не мочно, и теми людми не обыскивати, а вершити дело, по суду зря, по ричямъ.
А пошълетца в суде ищея или ответчикъ на боярина, или на прикащика, или въ волосте на добраг(о) члка, или на целовалника, или на старосту волостнаго, (л. 85 об.) или на црквънаг(о), іли діака, кому мочно вирити, тое правды спросити, и что скажет как, дело вершити без целования.
А будет ищея или ответчикъ сошълютца на одного члка из виноватаг(о) в слух і в ведомо, и тое правды опросити; и что скажет такъ же, (л. 86) как дело вершити без целован(ь)я. И хоти правда не великимъ словом не договорит, и темъ не вивити исца или ответчика.
А бояром, и діякомъ, и всем приказнымъ людемъ приказывати въ своих земълех своимъ хрестияном, чтобы оне в обысках говорили правду, что знают. (Л. 86 об.) А сыщут, что их хрестияне лгали в обысках, і в том бояремъ самим быт(ь) от гдря в опале, а крестиянам быти казненымъ от гсдря, как в розбоиных делех. А зведают бояре и пъриказные, что хрестияне в обыскахъ не лгали, сказали правду, ино им сказывати гсдрю, дело сыскав, по тому вершити.
(219)[94].
… (л. 88) не учнут гсдрю отписывати, ино иыъ от гсдря быти будет кнзь без милости.
А посылати старостам неделщиков со обысками к Москве и, сыскав имъ про всякое дело, и руки свои прикладывати. А кои грамоте не умеют, ино отцы бы их духовные руки свои прикладывали да, запечятав своими (л. 88 об.) печятми, прислати в Москве, а в печяте писати старосте свое имя.
А досудятца в котором деле до поля, и станет ответчик бити челомъ, что ему не мочно стоят(ь) у поля, чтобы ему присудили целован(ь)е, ино поле отставити, а дати кресное целован(ь)е на ответчикову волю. А учнет…
… (л. 89) чи лошад истепетъ[96] или ногу изломит, и про то сыскати тою волостию накрепко, в которои волосте деетца и коея деревни та земъля[97] и мостъ: на ково (в)зыщут, и на том исцева гибел доправити без суда по обыску.
А где в осен(ь) дороги живут, дорага живет по рекам, (л. 89 об.) и по тои дороге ставит(ь) вехи, до кех местъ чья земля имет. А хто не ставит по дороге вех, и что над кемъ учинитца, и то взяти ка томъ вес убытокъ. А по лесом дорога чистит(ь) поперег полторы сажени, і выскиди и поперечнои лѣс высекати, а на руч(ь)яхъ мосты мостити пеперег полторы сажени. (Л. 90) А где на проежжеи дороге заворы, и тут бы были отводы.
А хто сусед у суседа в однои деревне какую животину утепет[98] безвинно лошад, или корову, или овцу, или куря, или курицу, или какую животину ни буди и убиет неповинно, извету не положа иным складникам, (л. 90 об.) и уличят его в томъ, и какову[99] он животину убил, такову ему и отдати или цену, чемъ люди осудять добърые, да чем тот пожалует, у кого он убил. А будет он куря убил петуха, ино на нем взяти сорок алтын, а за курицу две денги.
А хто у ково собаку утепет безвинно дворовую, (л. 91) или гонную, или лешую и уличят его в том, что он убил безвинно, — и на нем взити за собаку цена, чемъ гсдрь тое собаки пожалует. А будет он не учнут миритис, и тому, хто собаку убил, стеретчи двора, до ка(ки)х местъ такову же собаку скормит; а в том по нем порука взяти крепкая, чтобы его тати (л. 91 об.) не покрали, чтоб он стерег двора.
А кои члкъ умрет, а у него останутце дети, и захотят оне меж собою делитися, ино колко их братов и сестъръ, ино им делити живот повытно: дочере та же выт, что сыну. А по отце меж ихъ дел‚ а по матере меж ихъ делу нет і во веки, и зъ дядею по отцеву делных нет.
(Л. 92) А приговорил црь і великии кнзь, что по всеи моеи Рускои земъли по городом, и по селомъ, и по волостем земъли без управы не держати ни чясу, а про всякое дело[100] суд давати не лъживо.
А погонные за беглыми давати и выписи в-ынои уездъ. А хто не дастъ погонные, а беглому снаровит, (л. 92 об.) и он тем виноват.
А под судъ даватися, чеи хто ни буди.
А где кого застанет дан(ь)‚ тут с него имати, тут с него поголовное дан(ь)‚ чем мир осудит. А где хто дастъ дан(ь)‚ тут ему и судитися[101].
Примечания
править- ↑ Далее зачеркнуто: «московским».
- ↑ Далее зачеркнуто: «околничему».
- ↑ В подлиннике ничего не написано, оставлена одна белая строка
- ↑ Далее написано: «и за», эти же слова «и за» вторично написаны и на следующей странице.
- ↑ Написано: «которыгъ».
- ↑ Написано: «по по тому».
- ↑ Написано: «кототорой».
- ↑ Написано: «тататя».
- ↑ Вероятно опечатка. Предположительно должно быть «доводу», то есть расследования. — Прим. ред. Викитеки.
- ↑ В оригинале «и головою» повторено 2 раза.
- ↑ Опечатка. Должно быть «возмолвит». — Прим. ред. Викитеки.
- ↑ Опечатка. Должно быть «молвят». — Прим. ред. Викитеки.
- ↑ Опечатка. Должно быть «душегубство». — Прим. ред. Викитеки.
- ↑ Опечатка. Должно быть «цѣловалниковъ». — Прим. ред. Викитеки.
- ↑ Вероятно опечатка. Предположительно должно быть «внѣ». — Прим. ред. Викитеки.
- ↑ Опечатка. Должно быть «в». — Прим. ред. Викитеки.
- ↑ Опечатка. Должно быть «животомъ». — Прим. ред. Викитеки.
- ↑ Написано: «о ему».
- ↑ Написано: «хмоп».
- ↑ Далее зачеркнуто: «землю».
- ↑ Далее зачеркнуто: «межу зорет».
- ↑ Переделано из: „послушествова“.
- ↑ Далее зачеркнуто: «мо»
- ↑ Переправлено из «суду».
- ↑ Написано: «ао торои».
- ↑ Далее зачеркнуто: «десятокъ».
- ↑ Написано: «илили».
- ↑ Написано: наддіяка.
- ↑ Написано: «истца», но буква «т» потом была зачеркнута.
- ↑ Написано: «будетет».
- ↑ Написано: «Атчто».
- ↑ В рукописи статья названа 32-ой.
- ↑ Слова «ино темъ» повторены дважды.
- ↑ Написано: «вытехътехъ».
- ↑ Написано было: «нетъ», но две последние буквы потом зачеркнуты.
- ↑ Далее зачеркнуто: «по».
- ↑ Переправлено из: «обыскамъ».
- ↑ Написано: «жанам».
- ↑ Далее зачеркнуто: «что от церкви доидет».
- ↑ Этот № в рукописи пропущен.
- ↑ Далее зачеркнуто: «людемъ».
- ↑ В рукописи: «суде».
- ↑ Написано: «под».
- ↑ Написано: «иссца».
- ↑ Написано: «недельщикувъ».
- ↑ Написано: «правввду», причем середина слова, между словами «правв» и «вду», залита чернилами.
- ↑ Написано: «Мерецка».
- ↑ Переправлено из: «полъты денгира».
- ↑ Далее зачеркнуто: «отпускные».
- ↑ Написано: «поттри».
- ↑ Написано: «тятя».
- ↑ Написано: «поиминают».
- ↑ Повторено два раза.
- ↑ Сперва было написано: «ими».
- ↑ Написано: «миро(зачеркнуто: про)продавцов».
- ↑ Листы 43 об. и 44 — белые, не записаны.
- ↑ После слога «ка» сперва было написано и потомъ зачеркнуто: «кое».
- ↑ Написано: «и под и подписщика».
- ↑ Повторено два раза.
- ↑ Написано: «алтыныны».
- ↑ Сперва было написано: «мужу».
- ↑ Далее зачеркнуто: «во».
- ↑ Переправлено изъ «намесничниии».
- ↑ Написано: «старостаростам».
- ↑ В оригинале: «тисано».
- ↑ В оригинале: «звяти».
- ↑ Далее написано: «стол столко».
- ↑ Написано: «жиживота».
- ↑ Слово написано на полях тем же почерком, как вся страница.
- ↑ Слово это повторено два раза.
- ↑ Написано: «хотб».
- ↑ В оригинале: «начегоже».
- ↑ Написано: «крестиянис».
- ↑ Слова: «а будет» повторены два раза.
- ↑ Переправлено из «убытка».
- ↑ Далее зачеркнуто: «любую».
- ↑ Переправлено из «до семи».
- ↑ Переправлено из «его».
- ↑ Написано неясно, переправлено из «волу».
- ↑ Переправлено из «справит».
- ↑ В рукописи: «перокосит».
- ↑ Зачеркнуты буквы «ры», повторяющиеся два раза.
- ↑ Слова: «а пожи» — последние на листе 68 об.; очевидно здесь пропуск, что-то недописано. Листы в сей тетради все целы, и потому нужно думать, что здесь недостает только нескольких слов или фраз. Ср. в Судебнике царя Федора ст. 88-ую‚ по изданию М. 1878 г., стр. 58.
- ↑ Написано «алтыны»; далее зачеркнуто: «по 2 де(нги)».
- ↑ №-ра этой статьи в рукописи нет.
- ↑ Написано: «выпуститит».
- ↑ Буквы «бе» написаны с росчерками.
- ↑ Впереди сего слова зачеркнуты буквы: «вне».
- ↑ Написано «давати».
- ↑ Далее зачеркнуто: «на».
- ↑ Далее зачеркнуто: «жаловалным»
- ↑ Слово это повторено два раза.
- ↑ Так написано; вероятно надо читать: «бояре».
- ↑ Лист 87 вырван; остался только небольшой уголок нижней его части. На лицевой стороне листа можно прочесть следующие начальные буквы и слоги последних трех строк: «и», «го», «ся»; на оборотной стороне можно прочитать следующие окончания последних 4-х строк: «угу», «у», «говоры».
- ↑ Очевидно, между листами 88 и 89 находился еще лист; теперь утраченный.
- ↑ Написано «истепнетъ».
- ↑ Переправлено из «земъмя».
- ↑ Переправлено из «утеоет».
- ↑ Написано: «какокову».
- ↑ Написано: «деле».
- ↑ Написано: суддитися.
