Аще Богъ пошлетъ на кого болѣзнь или какую скорбь ино врачеватися Божіею милостію, да слезами и молитвою, и постомъ, и милостынею къ нищимъ, да истиннымъ покаяніемъ; да благодареніе и пощеніе и милосердіе и нелицемѣрную любовь ко всякому; аще кого чѣмъ преобидѣлъ отдати сугубо и впредь не обидѣти; да отцевъ духовныхъ и всякъ священническіи чинъ и мнишескіи подвизати на моленіе къ Богу; и молебны пѣти и вода святити честнымъ и животворящимъ крестомъ[3] и со святыхъ мощеи и чюдотворныхъ образовъ; и масломъ святитися, да по чюдотворнымъ по святымъ мѣстомъ обѣщеватися, и, приходяще молитися со всякою чистою совѣстію; тѣмъ цѣлба всякимъ различнымъ недугомъ отъ Бога получити, да отъ всякихъ грѣховъ удалятися, и впредь никакова зла не творити: и отцевъ духовныхъ заповѣди хранити и епитеміи исправляти, тѣмъ очиститися отъ грѣха, и душевная и тѣлесная болѣзнь исцѣляти, и къ Богу молитва сотворити[4]. Всякому христіанину цѣлити себя отъ всякихъ различныхъ недуговъ душевныхъ и тѣлесныхъ, и ду̀шетлѣнныхъ, и болѣзненныхъ страстеи;—жити по заповѣди Господни, и по отеческому преданію и по христіанскому закону; якожъ въ началѣ писано книги сея отъ первая главы вся пятьнадесять главъ и прочая главы книги сея такожъ[5] прочести, и внимати, и творити достоитъ. Ино Богу угодитъ, и душу спасетъ, и грѣха избудетъ и здравіе получитъ душевное и тѣлесное, и вѣчныхъ благъ наслѣднихъ будетъ. А кто безстрашенъ и безвиненъ[6] страха Божія не имѣетъ, и воли Божіи не творитъ, и закона христіянскаго и отческаго преданія не хранитъ, о церкви Божіи, и о церковномъ пѣніи и о кѣлеиномъ правилѣ, и о молитвѣ и о всякомъ славословіи Божіи не радитъ, ястъ[7] и піетъ безъ воздержанія, и во объяденіе и пьянство, и не въ подобно время, и законнаго жительства не хранитъ; недѣли воскресенія Христова и среды и пятка и праздниковъ не почитаетъ и великаго поста и Богородична непостится; безъ воздержанія блудитъ, и не въ подобно время, и чрезъ естество, и чрезъ законъ, или отъ женъ своихъ блудятъ, или содомскіи грѣхъ содѣваютъ, и всякое скаредіе творятъ, и всякія богомерзскія дѣла: блудъ, нечистоту, сквернословіе, срамословіе, пѣсни бѣсовскія, плясаніе, скаканіе, гуденіе, трубы, бубны, сопѣли, и медвѣди и птицы и собаки ловчія, творяще конское уристаніе, всякое бѣсовское угодіе и всяко безчиніе и безстрашіе; къ семужъ чарованіе и волхвованіе, и наузи, и звѣздочетіе, рафли, алманахи, чернокнижіе, воронограи[8], шестокрылъ, стрѣлки громныя[9], топорки, усовники, два каменіе[10], кости волшебныя; и иныя всякія козни волшебныя бѣсовскія; или кто чародѣйствомъ, и зеліемъ, и кореніемъ, и травами на смерть, или на потворство окормляетъ, или бѣсовскими словами и мечтами и кудесомъ чаруетъ на всякое зло и на прелюбодѣиство; или клянется именемъ Божіимъ во лжу, или клевещетъ на друга, такожъ прочести и двадесять шестую[11] главу. Въ тѣхъ во всѣхъ дѣлехъ, и во обычаехъ, и нравѣхъ востаетъ въ человѣцѣхъ гордость, ненависть, злопомнѣніе, гнѣвъ, вражда, обида, лжа, татба, клятва, срамословіе[12], чарованіе, и волхвованіе, смѣхъ, кощуны, объяденіе, піянство безвременное рано и поздно и всякая злая дѣла, и всякіи блудъ и всякая нечистота. И благій человѣколюбецъ Богъ, не терпя въ человѣцѣхъ такихъ злыхъ нравовъ и обычаевъ, и всякихъ неподобныхъ дѣлъ, яко же чадолюбивыи отецъ скорбми и бѣдами спасаетъ, и ко спасенію приводитъ; показуя[13] наказуетъ[14] за премногія грѣхи наша, смерти же не придаетъ, не хощетъ смерти грѣшникомъ, но ожидаетъ покаянія, еже обратитися и живу быти ему. Аще не обратятся и не покаются отъ злыхъ дѣлъ, наводитъ на насъ, грѣхъ ради нашихъ: овогда моромъ, овогда гладомъ, овогда пожаръ, овогда потопъ, овогда плѣненіе и посѣченіе отъ поганыхъ, и градовъ разореніе и церквамъ Божіимъ и всякои святыни потребленіе, и всякому стяженію расхищеніе и отъ друговъ оклеветаніе, овогда отъ царьскаго гнѣва разграбленіе имѣнію и самому казнь безъ милости и паличная[15] смерть, и отъ разбоиниковъ[16] убіиство и грабежъ, и отъ татеи окраденіе, и отъ судеи продажа и мученіе, ово бездождіе, ово безвременныи дождь[17], и нестроины лѣта, и неугодна зяма, и лютые мразы, и земли безплодіе, и всякому скоту животному падежъ, и звѣремъ, и птицамъ, и рыбамъ и всякому обилію скудость; родителемъ, женѣ и чадомъ нужными и напрасными и скорыми смертьми лишеніе; отъ многоразличныхъ и нужныхъ и тяжкихъ недугъ страданіе[18]. Многи[19] убо праведницы истинно Богу работаютъ, по заповѣдемъ Господнимъ живутъ межу нами грѣшными; но на семъ свѣтѣ равно со грѣшники казнима суть отъ Бога, да свѣтлѣишихъ вѣнцовъ отъ Бога сподобятся, намъ же грѣшнымъ на большее мученіе, яко праведницы казними быша всякими скорбьми за наше беззаконіе[20] и о всѣхъ сихъ настоящихъ бѣдахъ не уцѣломудримся и не накажемся въ покояніе, и въ чювство, и въ страхъ Божіи не внидемъ, видя таковаго праведнаго гнѣва Божія наказанія за премногія грѣхы наша. И паки Господь, наказуя ны, и обращая къ покаянію, яко же праведнаго и долготерпѣливаго Іова искушая, посылая различныя скорби, и болѣзни, и тяжкія недуги отъ духовъ лукавыхъ мучими, тѣлу согнитіе, костемъ ламота, отокъ и опухоль на всѣ уды, проходомъ обоимъ закладъ, и камень въ удахъ[21], и кила и таинымъ удомъ согнитіе и отоки[22] и глухота, и слѣпота, и нѣмота; во утробѣ терзаніе и блеваніе злое; и на низъ во оба прохода и кровь и гнои, сухотная, и кашель и главоболіе[23] и зубная болѣзнь, и грыжа, и усови, и камчюгъ и френьчюгъ, и разслабленіе и трясеніе[24], и желви, и железы, и шелуди, и горбы, и глава, и щеки, и руки и ноги закорчены, и очи искривлены[25] и всякіе тяжкіе различные недуги наказаніе гнѣва Божія. И сія вся презрѣхомъ и въ покояніе не внидохомъ; ничто же не уцѣломудри насъ и не устраши насъ, и накажемся о семъ, видя Божіе наказаніе на себѣ и болѣзни тяжкіе, за премногія грѣхи наша. Оставя Бога создавшаго ны, и милости, и прощенія грѣховъ отъ него не требуя, еже злѣ содѣяхомъ, и приступихомъ къ нечистымъ бѣсомъ отъ нихъ же отрекохомся во святомъ крещеніи, и всѣхъ дѣлъ его и призываемъ къ себѣ чародѣевъ, и кудесниковъ, и волхвовъ и всякихъ кудесниковъ[26] и зелеиниковъ и съ кореніемъ: отъ нихъ же чаемъ душетлѣнныя помощи, временныя и готоваемъ[27] себя діаволу во дно адова во вѣки мучитися. О безумніи человѣци! Оле неразумія вашего! не разсуждаемъ своихъ грѣховъ за что ны Богъ наказуетъ и казнитъ и не каемся о нихъ, и не престаемъ отъ злобъ и отъ всякихъ неподобныхъ дѣлъ; не помышляемъ вѣчнаго, но желаемъ тлѣнного и временного. Молю, и паки молю престаните отъ злобъ и отъ всякихъ душетлѣнныхъ дѣлъ и очистимъ себя истиннымъ покаяніемъ, яко да милостивъ Господь помилуетъ отъ грѣхъ и подастъ тѣлесамъ здравіе и душамъ спасеніе и вѣчныхъ благъ не лишитъ. Аще кто и потрудится въ семъ вѣцѣ со благодареніемъ въ различныхъ болѣзнѣхъ и во всякихъ скорбехъ за очищеніе грѣховъ своихъ, царства ради небеснаго, не токмо грѣховъ свободу улучитъ, но и вѣчныхъ благъ наслѣдникъ будетъ. Написано[28] бо есть во святомъ Апостолѣ: многими скорбми подобаетъ намъ внити въ царство небесное и во святомъ Евангеліи речено бысть: узкіи и прискорбныи путь, вводя въ животъ, а широкіи вводя въ пагубу и паки рече Господь: нужно есть царство небесное и нужницы восхищаютъ е[29].
Воспомянемъ святыхъ мужеи страданія Бога ради и много различныхъ недугъ и болѣзнеи терпѣнія со благодареніемъ, не презывающе къ себѣ ни чародѣевъ, ни кудесниковъ, и волхвовъ, ни зелеиниковъ и никакихъ бѣсовскихъ чарованіи, но все упованіе возлогающе на Бога и со благодареніемъ[30] терпяще, очищенія ради грѣховъ своихъ и вѣчныхъ благъ наслажденія, яко долготерпѣливыи Іовъ и нищыи Лазарь, иже предъ враты богатого на гноищы лежалъ, гноенъ и червми ядомъ; а нынѣ на лонѣ Авраамле почивая и якожъ Симеонъ столпникъ самъ гноя тѣло свое, червьми кипя. И мнози праведніи, отъ вѣка Богу угодивше, всякими болѣзньми и различными недуги страждуще, со благодареніемъ терпяще спасенія ради душа своея, и жизни ради вѣчныя; и тѣми скорбьми внидоша въ царство небесное. Мнози богатіи и убозіи, христіянского рода, во всякихъ чинѣхъ княжеска и болярска, и священническаго и мнишеского, много различными болезньми и недуги страждуще, и всякими одержими бываху скорбьми и обиды, Бога ради терпяще, и у Бога милости просяще, и милости[31] чающе и милосердныи Господь многоразличныя милости на рабы своя излияетъ и исцѣленіе даруетъ, и грѣховъ свобождаетъ, и отъ скорби спасаетъ овыхъ отъ животворящихъ крестовъ, и отъ чюдотворныхъ иконъ святыхъ и образовъ Христовыхъ и Богородичныхъ и Архангельскихъ и всѣхъ Святыхъ мощеи, и отъ освященія воды, и отъ масленаго освященія и отъ молебнаго соборнаго пѣнія, и на божественныхъ литургіяхъ и на всенощномъ предстояніи во святыхъ Божіихъ церквахъ, и во святыхъ честныхъ монастырехъ, и въ чюдотворныхъ мѣстехъ, и въ дому, и на пути, и на водахъ и вездѣ; призывающе вѣрою Господа Бога и пречистую Богородицу и ихъ угодниковъ милость получающе, здравіе тѣлеси и душамъ спасаніе. Мнози искончашася въ тѣхъ недузѣхъ и въ тяжкихъ болѣзнехъ и въ различныхъ скорбехъ, тѣми очистишася отъ грѣховъ, и жизнь вѣчную получиша. Вонмемъ себѣ опасно и подражаемъ тѣхъ житію и терпѣнію, и поревнуемъ святыхъ отецъ житію, пророкомъ и апостоломъ, святителемъ и мученикомъ, и преподобнымъ уродивымъ Христа ради, и святымъ женамъ и православнымъ царемъ, и княземъ и священническому, и мнишескому чину и всѣмъ христіаномъ Богу угодившимъ[32] отъ вѣка: како въ житіи семъ скорбми пострадаша Христа ради, ова постомъ и молитвами и всякимъ долготерпѣніемъ, гладомъ и жаждею, наготою и мразомъ, и солнечнымъ сженіемъ, поруганіемъ и оплеваніемъ и всякими укоризнами и біеніемъ и мученіемъ различныхъ мукъ отъ нечестивыхъ цареи Христа ради усѣкаеми, и огнемъ сожигаеми, и звѣрми снѣдаеми, и каменіемъ побиваніемъ, и въ водахъ потопляеми, и въ вертепехъ и въ пустыняхъ, и въ пропастяхъ земныхъ скончавшихся, во юзахъ, и въ темницахъ заключаеми, и плѣненіи и всякія терпѣша скорби и труды различная муки ихъ кто исповѣеть—яко же кто повѣстуетъ святое писаніе; и сихъ ради различныхъ страданіи и всякихъ мукъ како возмѣздіе пріяша отъ Христа въ семъ вѣцѣ и въ будущемъ вѣчныхъ благъ наслажденіе,—ихъ же око не видѣ и ухо не слыша и на сердце человѣку не взыде—яже уготова Богъ любящимъ Его. Како прославляются нынѣ, якожъ церковь Божія вопіетъ. Мы же убо тѣхъ святыхъ молимъ и на помощь призываемъ къ Богу молитися о насъ; и, отъ тѣхъ чюдотворныхъ образовъ и честныхъ мощеи цѣлбу получаемъ. Поревнуемъ тѣхъ святыхъ житію и страданію со благодареніемъ и долготерпѣніемъ; такову жь благодать отъ Бога обрящемъ.
Вдавшимся волшбамъ или глаголющемъ мудрецемъ и сотникомъ или кимъ таковымъ: аки отъ тѣхъ навыкиути хотяще, аще открыти хотятъ: по первому отъ святыхъ отецъ отъ нихъ же заповѣданію да повинуются правила канону 6 лѣтъ. Тацѣмъ же запрещеніемъ покорити подобаетъ и влачащая медвѣди или какова животная; нѣкако наруганіе простѣяшимъ людемъ, и полученіе, рожество и родословіе по[33] звѣздословію и таковыхъ нѣкихъ глаголы народопрелестное блядство приглашающая. Глаголемые же облакопрогонники, и чаровники, и хранительники, и волшебники; пребывающая же въ тѣхъ, и неотъбѣгающая пагубныхъ тѣхъ еллинскихъ начинаніи вся вездѣ отъ церкви отмѣтати заповѣдаемъ[34] яко же священницы нынѣ[35] повелѣвають. Кое общеніе свѣту со тмою—яко же рече апостолъ,—или кое сложеніе церкви Божіи со идолы[36] или какая часть вѣрному съ невѣрньмъ и кое совѣщаніе Христова со діяволомъ.
Иже послѣдуютъ пагубнымъ обояніемъ и къ волхвомъ или ко обавникомъ[37] ходятъ, или въ домъ свои тѣхъ призываютъ, хотяще увѣдѣти неизреченная; такоже и кормяще, и храняще медвѣди, или иная нѣкая псы и птицы ловчіи на ловленіе и на глумленіе и на прельщеніе простѣишихъ человѣкъ или въ получаи[38] вѣруютъ и въ родословіе: рекше въ роженицы, и во обояніе, по звѣздословіи иже глаголетъ облаки гонящеи: таковая творящимъ повелѣ соборъ 6 лѣтъ запрещеніе даяти; яко же за 4 лѣта да стоятъ[39] съ вѣрными и тако сподобятся божественныхъ даровъ; аще неисправни[40] будутъ и по запрещеніи, еленскихъ сихъ хитростеи неостанутся отъ церкви вездѣ всячески да отженутся. О волхвѣхъ же и обавницѣхъ[41] рекоша Богоносніи[42] отцы церковніи учителіе; паче же инѣхъ Іоаннъ Златоустъ[43], яко волшествующе и обавленіе творяще, аще и святая Троица имя нарицающе[44], аще и знаменіе честнаго креста Христова творя[45], бѣгати оть нихъ подобаетъ и отвращатися. Иже во Акирѣ[46] и правило 24: волшествующе[47] и обычаю язычныхъ послѣдьствующе вводяще[48] въ домы своя на испытанія, потворъ или на требленіе, закономъ запрещеніе примутъ 6 лѣтъ по заповѣданнымъ степенемъ; рядомъ 3 лѣта внутрь, пребываніе внѣ церкви 2 лѣта; молитвы безъ просфиры и комканія[49]. Аще кто къ волхвомъ или обавникомъ[50], или зелеиникомъ, или другимъ таковымъ себѣ вдастъ, и сія призываетъ въ домъ свои; да открыютъ и повѣдятъ ему о нихъ же желаніе имать; или очаровану ему бывшу, обрѣсти: хотя таковое смыти[51] яко зломъ злѣе[52] исцѣляя,—3 лѣта да припадаетъ и за 2 лѣта да стоитъ съ вѣрными токмо молитва съ ними приобщая[53]; и тако по сконьчаніи пяти лѣтъ причастится святыхъ таинъ.
Правило 61-е 6 собора иже въ Турлѣ полатнемъ: 6 лѣтъ таковымъ не повелѣваетъ отпущенія пріимати; рекше,—не причащатися 6-го собора въ Константинѣ градѣ въ Турлѣ[54] Полатнемъ правила II. Ни едино есть пріобщеніе христіаномъ къ жидомъ, сего ради[55], аще обращется тѣхъ опресноки ядя, или врача ихъ призывая на цѣлбу себѣ, или мыяся съ ними въ банѣ, или инако како присвояся[56], аще есть причетникъ, да извержется или мирянинъ да отлучится. 19 Василия Великаго правило 72-е. Волшебникомъ себя вдастъ[57] или кимъ таковымъ дѣтоубіицы[58] и то запрѣтится. Вдавыи[59] себе волхвомъ или обавникомъ или чародѣемъ на ученіе злохитръства ихъ, яко волею убивыи запрещеніе да пріиметъ; вѣруя же въ волхвы, или вводяи ихъ въ домъ свои обрѣтенія ради нѣкоего очищенія, отправленія, или откровеніи ради нѣкихъ, неизреченныхъ,—6 лѣтъ запрещеніе да пріимутъ[60], яко же 61 правило повелѣваетъ 6-го вселенскаго собора, иже въ Константинѣ градѣ въ Турлѣ Полатнемъ и 73-е правило въ семъ посланіи Великаго Василія.
Примѣчанія
править- ↑ Въ Р. Т. № 38 глава КІ Конш. глава XXIII.
- ↑ Ibid. здѣсь оканчивается заглавіе.
- ↑ Конш.=съ честныхъ крестовъ.
- ↑ Р. Т. № 38=Бога милостива сотворити.
- ↑ Конш.=25 главу Болш. и Цар. 10 и 29 Арх. и Погод. 29.
- ↑ Р. Т. № 38=безчиненъ.
- ↑ Конш.=ѣстъ.
- ↑ Конш.=ворограи.
- ↑ Болш.=громовыя.
- ↑ Конш.=дна каменіе.
- ↑ Р. Т. № 38 и Конш. 24. Арх. Пог. Болш. 28.
- ↑ Конш. и сквернословіе.
- ↑ Конш. и
- ↑ Болш. Арх. наказаніемъ.
- ↑ Р. Т. № 38=поносная Пог. печальная Арх. Болш. плачевная.
- ↑ Ibid. и отъ татеи.
- ↑ Болш. безведріе дожду.
- ↑ Р. Т. № 38 и Конш. и злѣ скончаніе.
- ↑ Ibid. этого мѣста нѣтъ.
- ↑ Ibid. продолжается глава.
- ↑ Въ Р. Т. № 38 нѣтъ.
- ↑ Ibid. продолжается.
- ↑ Конш.=главоболѣніе.
- ↑ Въ Р. Т. № 38 и Конш. этого мѣста нѣтъ.
- ↑ Ibid. далѣе продолжается Р. Т. № 38.
- ↑ Р. Т. № 38 и Конш.=мечетниковъ.
- ↑ Конш.=уготоваемъ.
- ↑ Конш.=писано.
- ↑ Въ Р. Т. № 38 Конш. здѣсь оканчивается кі глава.
- ↑ Арх. Болш.=со благотерпѣніемъ.
- ↑ Арх. Болш. Пог. Цар.=помощи.
- ↑ Ibid.=богоугодно жившимъ.
- ↑ Болш. звѣздочетію и
- ↑ Болш.=заповѣданіемъ.
- ↑ Арх. Болш. Цар. Погод.=и они.
- ↑ Ibid.=кумиры.
- ↑ Цар.=обоянникомъ.
- ↑ Болш.=получася.
- ↑ Болш. Пог. Цар. Арх.=приподающе а друзіи два лѣта да стоятъ.
- ↑ Ibid.=исправлени.
- ↑ Цар.=обоянницѣхъ.
- ↑ Арх. Пог. Болш.=божественніи.
- ↑ Ibid. глаголетъ.
- ↑ Ibid.=нарицаютъ.
- ↑ Ibid.=творятъ.
- ↑ Пог. Арх.=Анкирѣ. Болш. Агкирѣ.
- ↑ Въ Пог. ркиси это правило читается такъ: иже волхвомъ вѣруя и вводя таковыя въ домъ свои, на обрѣтеніе чародѣянія, или на очищеніе, пять лѣтъ да покаятся.
- ↑ Арх. Болш. Цар. нѣкія.
- ↑ Въ ркс. Цар. слѣдуетъ заглавіе: сказаніе Арх. Бол. Пог. толкованіе.
- ↑ Цар.=обоявникомъ.
- ↑ Болш. Арх.=смѣти.
- ↑ Болш. Арх. Цар. Пог.=злѣ.
- ↑ Ibid. пріобщаясь.
- ↑ Арх. Болш.=Тулѣ.
- ↑ Арх. Болш. Пог. Цар. убо.
- ↑ Ibid. съ ними.
- ↑ Ibid.=вдавъ.
- ↑ Болш. Пог.=дѣтоубійца.
- ↑ Болш. Пог. Цар. Арх. убо.
- ↑ Ibid.=пріеметъ.
