Кое общеніе свѣту со тмою—яко же рече апостолъ,—или кое сложеніе церкви Божіи со идолы[1] или какая часть вѣрному съ невѣрньмъ и кое совѣщаніе Христова со діяволомъ.
Иже послѣдуютъ пагубнымъ обояніемъ и къ волхвомъ или ко обавникомъ[2] ходятъ, или въ домъ свои тѣхъ призываютъ, хотяще увѣдѣти неизреченная; такоже и кормяще, и храняще медвѣди, или иная нѣкая псы и птицы ловчіи на ловленіе и на глумленіе и на прельщеніе простѣишихъ человѣкъ или въ получаи[3] вѣруютъ и въ родословіе: рекше въ роженицы, и во обояніе, по звѣздословіи иже глаголетъ облаки гонящеи: таковая творящимъ повелѣ соборъ 6 лѣтъ запрещеніе даяти; яко же за 4 лѣта да стоятъ[4] съ вѣрными и тако сподобятся божественныхъ даровъ; аще неисправни[5] будутъ и по запрещеніи, еленскихъ сихъ хитростеи неостанутся отъ церкви вездѣ всячески да отженутся. О волхвѣхъ же и обавницѣхъ[6] рекоша Богоносніи[7] отцы церковніи учителіе; паче же инѣхъ Іоаннъ Златоустъ[8], яко волшествующе и обавленіе творяще, аще и святая Троица имя нарицающе[9], аще и знаменіе честнаго креста Христова творя[10], бѣгати оть нихъ подобаетъ и отвращатися.
