Задонщина/1858 (ДО)/Задонщина

Задонщина : Великаго Князя господина Дмитрія Ивановича и брата его Владиміра Андреевича
авторъ Чтеніе И. И. Срезневскаго (1812—1880)

См. Оглавленіе. Опубл.: 1858. Источникъ: Задонщина / Чтеніе И. И. Срезневскаго — Санктпетербургъ, 1858.

ЗАДОНЩИНА

ВЕЛИКАГО КНЯЗЯ ГОСПОДИНА ДИМИТРІЯ ИВАНОВИЧА И БРАТА ЕГО КНЯЗЯ ВОЛОДИМЕРА ОНДРѢЕВИЧА.

---

I. Пойдемъ, братіе, въ полꙋночнꙋю странꙋ, жребій Афетовъ^[1], сына Ноева, отъ него же родися Рꙋсь преславная, отъ толѣ взыдемъна горы Кіевскыя — и посмотримъ съ ровнаго Нѣпра по всей земли Рꙋской, и отъ толя на восточнꙋю странꙋ, жребій Симовъ, сына Ноева, отъ него же родішася^[2] Хиновя, поганые Татаровя, Бꙋсꙋрмановя. Тѣ бо на Каялѣ одолѣша родъ Афетовъ. И отъ толя Рꙋская земля сѣдитъ невесела, а отъ Калатьскія рати до Мамаева побоища тугою и печалію покрылася, плачющися, чады своя поминающи^[3]. Князи и бояря и удалые люди, иже оставиша вся домы своя, и богатство, жены, и дѣти, и скотъ, честь и славꙋ міра сего полꙋчивши, главы своя положиша за землю за Рꙋскꙋю и за вѣрꙋ христіяньскꙋю....

II. Снидемся, братія и дрꙋзи, и сынове Рꙋскіи, составимъ слово къ словꙋ, возвеселимъ Рꙋскꙋю землю, возверземъ печаль на восточнꙋю странꙋ, въ Симовъ жребій, и воздадимъ поганомꙋ Мамаю побѣдꙋ, а великомꙋ князю Дмитрею Ивановочю похвалꙋ и братꙋ его князю Владимерꙋ Андреевичю. И рцемъ таково слово: Лудчи бо намъ, братіе^[4], начати повѣдати иными словесы отъ похвальныхъ сихъ и о нынѣшнихъ повѣстехъ похвалꙋ великого князя Дмитрея Ивановича и брата его князя Владимера Андреевича, а внꙋки святаго великаго князя Владимера Кіевскаго, начати^[5] повѣдати по дѣломъ и по былинамъ. Не проразимса мыслію, но землями помянемъ первыхъ лѣтъ времена — восхвалимъ^[6] вѣщаго Бояна^[7], въ городѣ Кіевѣ горазда^[8] гꙋдца. Той бо вѣщій Боянъ, воскладая свои златыя персты на живыя стрꙋны, пояше славꙋ Рꙋсскыимъ княземъ, первомꙋ князю Рюрикꙋ, Игорю Рюриковичю и Святославꙋ, Ярополкꙋ, Владимирꙋ Святославичю^[9], Ярославꙋ Володимеровичю, восхваляя ихъ пѣсьми и гꙋслеными бꙋйными словесы. — Азъ же восхвалю пѣснеми (и) гꙋслеными словесы — (господи)на Рꙋсскаго, господина князя Дмитрія Ивановича и брата его князя Володимера Ондреевича, занеже ихъ было мꙋжество и желаніе за землю Рꙋскꙋю и за вѣрꙋ христіаньскꙋю^[10]. Се бо^[11] князь великыи Дмитрій Ивановичъ и братъ его князь Володимеръ Ондрѣевичь поостриша сердца свои мꙋжествꙋ, ставше своею крѣпостью, помянꙋвше прадѣда князя Володимера Кіевскаго, царя Рꙋскаго.

III. Оле жаваронокъ птица, въ красныя дни ꙋтѣха. взыди подъ синіе облакы, — посмотри къ сильномꙋ градꙋ Москвѣ, — пой славꙋ великомꙋ князю Дмитрію Ивановичю и братꙋ его Володимерꙋ Ондрѣевичю. Они бо взнялися какъ соколи со земли Рꙋсскыя на поля Половецкія^[12]. Кони ржꙋтъ на Москвѣ, бꙋбны бьють на Коломнѣ, трꙋбы трꙋбятъ въ Серпꙋховѣ; звенитъ слава по всей земли Рꙋсьскои. Чюдно стязи стоять ꙋ Донꙋ великаго, пашꙋтся хорꙋгови^[13] берчати, свѣтятся калантыри злачены^[14]. Звонятъ колоколи вѣчніи въ великомъ въ Новѣгородѣ. стоять мꙋжи Ноꙋгородци ꙋ святыя Софіи, а ркꙋчи таковꙋ жалобꙋ: Ꙋже намъ, братіе^[15], къ великомꙋ князю Дмитрею Ивановичю на пособь не поспѣти. Тогды аки орли слѣтошася со всея полꙋнощныя страны: то ти не орли слꙋтошася — выѣхали посадники изъ великаго Новагорода, 7000 войска, кь великомꙋ князю Дмитрею Ивановичю и къ брату его князю Владимерꙋ Андреевичю. — Съѣхалися всѣ князи Рꙋсьскыя къ великомꙋ князю Дмитрію Ивановичю на пособь, а ркꙋчи такъ: Господине князь великыи. ꙋже погании Татарове на поля на наши настꙋпаютъ, а вотчинꙋ нашю ꙋ насъ отнимаютъ. Стоятъ межю Дономъ и Днѣпромъ на рѣцѣ на Мечѣ^[16]. И мы, господине, поидемъ за быстрꙋю рѣкꙋ Донъ. ꙋкꙋпимъ землямъ диво, старымъ повѣсть, а младымъ память. Тако рече князь великыи Дмитріе Ивановичъ своеи братіи Рꙋсскимъ княземъ: Братьеца моя милая, Рꙋсскіе князи, гнѣздо есмя были едино князя великаго Ивана Данильевича. Досюды есмя были, братіе^[17], никꙋды не изобижены, ни соколꙋ, ни ястребꙋ, ни бѣлу кречатꙋ, ни томꙋ псꙋ поганомꙋ Мамаю.

IV. Славій птица, что бы еси выщекотала сія два брата, два сына Вольярдовы, Андрѣя Полотскаго^[18], Дмитріа Брянскаго. Ти бо бѣша^[19] въ сторожевыя полкы на щитѣ рожены, подъ трꙋбами повити^[20], подъ шеломы въвзлелѣяны, конець копія вскормлены, съ востраго меча поены, въ Литовской земли. Молвяше Андрѣи къ своемꙋ братꙋ Дмитрею: Сама есма два брата, дѣти Вольярдовы, внꙋчата ’Едиментовы, правнꙋчата Скольдимеровы. Сядемъ, брате, на свои борзи комони. испіемъ, брате, шеломомъ своимъ воды быстрого Донꙋ, испытаемъ мечи свои бꙋлатныя. — И рече емꙋ́ Дмитрей: Брате Андрей, непощадимъ живота своего за землю за Рꙋскꙋю и за вѣрꙋ христіянскꙋю и за обидꙋ великого князя Дмитрея Ивановича —. Ꙋже бо, брате, стукъ стꙋчить и громъ гръмить въ славнѣ городѣ Москвѣ. То ти, брате, не стꙋкъ стꙋчить, ни громъ гремить; стꙋчить силная рать великого князя Дмитрія Ивановича^[21] — и брата его князя Владимера Андреевича, — гремятъ ꙋдалци золочеными шеломы, черлеными шиты. Сѣдлай, брате Ондрей, свои борзыи^[22] комони, а мои готови, на преди твоихъ осѣдлани. — Выѣдемъ, брате, въ чистое поле, и посмотримъ своихъ полковъ, сколько съ нами храбрые Литвы, а храбрые Литвы съ нами 7000 окованые’ рати.

V. Ꙋже бо всташа сильніи вѣтри съ моря, прилелѣяша тꙋчю великꙋ на ꙋсть Нѣпра, на Рꙋсскꙋю землю, изъ тꙋчи выстꙋпиша^[23] кровавыя облока, а изъ нихъ пашꙋть синіе молньи. Быти стꙋкꙋ и громꙋ великꙋ межю Дономь и Нѣпромь — пасти трꙋпꙋ человѣческомꙋ на полѣ Кꙋликовѣ, пролитися крови на рѣчкѣ Напрядѣ. Ꙋже бо скрипѣли телѣги межꙋ Дономъ и Нѣпромъ. — Идетъ Хинова^[24] на Рꙋсскꙋю землю. Сѣріе волци воютъ — на рѣкѣ хотятъ на Мечи постꙋпити въ Рꙋскꙋю землю. — То ти были не сѣріе волци. придоша поганые Татарове. хотятъ проити воюючи^[25], взяти всю землю Рꙋсскꙋю. Тогда же гꙋси гоготаша^[26] и лебеди крилы въсплескаша. Се бо поганыи Мамай, приведе вои свои на Рꙋсь. Птици небесныя пасꙋщеся тꙋ^[27] подъ синіе оболока — летять —. ворони грають, галици свои рѣчи говорять, орли восклегчють, волци грозно воють, лисици часто брешють, чають побѣдꙋ на поганыхъ, а ркꙋчи такъ: Земля еси Рꙋсская, какъ еси была доселева за царемъ за Соломономъ, такъ бꙋди и нынѣча за княземь великимъ Дмитріемъ Ивановичемъ. Тогда же соколи и кречати Бѣлозерскіе ястреби — отъ златыхъ колодицъ изъ камена града Москвы возлетѣша подъ синіе небеса — позвонять своими злачеными колоколци.

VI. Уже бо стꙋкъ стꙋчитъ и громъ гремить рано предъ зорею. То ти не стꙋкъ стꙋчить, ни громъ гремить: князь Володимеръ Ондрѣевичь — полки перебираетъ и — ведеть вои свои, сторожевыя полкы къ быстромꙋ Донꙋ, а ркꙋчи такъ: Господине князь Дмитрей, не ослабляи. Ꙋже, господине, поганыя Татарове на поля на наши настꙋпають, а вои наши отнимають. Тогда же князь великыи Дмитрей Ивановичь стꙋпи въ свое златое стремя, всѣдъ на свои борзыи конь, пріимая копіе въ правꙋю рꙋкꙋ — и помолися Богꙋ и Пречистой его Матери. — Солнце ему на встоцѣ^[28] ясно свѣтить, пꙋть ему повѣдаетъ. Борисъ, Глѣбъ молитвꙋ творять за сродники свои.

VII. Тогда соколи и кречети, Бѣлозерскія ястреби борзо за Донъ перелетѣша. ꙋдариша на гꙋси и лебеди. Грянуша копія харалꙋжныя, мечи бꙋлатныя, топори легкія, щиты Московьскыя, шеломы Нѣмецкія, байданы^[29] бесерменьскыя. Тогда поля костьми насѣяны, кровьми поліяны^[30], бѣды^[31] возпиша. вѣсть подаваша порожнымъ землямъ за Волгꙋ, къ Желѣзнымъ вратомъ, къ Риму, до Черемисы, до Чеховъ, до Ляховъ, до Устюга, (до) поганыхъ Татаръ, за Дышꙋщеемъ моремъ. —

VIII. На томъ полѣ (Куликовѣ) сильныи тучи ступишася, а изъ нихъ часто сіяли молыньи, и загремѣли громы велиціи: то ти ступишася Рꙋскіе удальцы съ погаными Татарами за свою великую обиду. а въ нихъ сіяли сильные доспѣхи злаченые, а гремѣли князи Рꙋскіе мечьми булатными о шеломы Хиновскіе. А билися изъ утра до полудни въ суботу на Рожество Святѣй Богородици.

IX. То года же было лѣпо^[32] старꙋ помолодитися. Хоробрый Пересвѣтъ поскакиваетъ на своемъ вѣщемъ сивцѣ. свистомъ поля перегороди, а ркꙋчи таково слово: Лꙋчши бы есмя сами на свои мечи наверглися, нежели намъ отъ поганыхъ положенымъ пасти. И рече Ослебя братꙋ своемꙋ Пересвѣтꙋ: Ꙋже брате, вижю раны на сердци твоемь тяжки. Уже твоей главѣ пасти на сырꙋю землю, на бѣлꙋю ковылꙋ моемꙋ чадꙋ Іяковꙋ.

X. Ꙋже, братіе^[33], — по Резанской землѣ около Донꙋ ни ратаи ни — пастꙋси не кличють, ни трꙋбы не трꙋбять. толко часто ворони грають, зогзици кокують, на трꙋпы падаючи. Тогда же не тꙋри возрыкають на полѣ Кꙋликовѣ, на рѣчкѣ Непрядкѣ: взопиша^[34] избіеніи отъ поганыхъ. (Помянемъ) князій великыхъ и боляръ сановныхъ, князя Феодора Романовича Бѣлозерскаго и сына его князя Ивана, Микꙋлꙋ Васильевича… (Падоша) Феодоръ, Мешко^[35], Иванъ Сано, Михаило Вренковъ, Іаковъ Ослебятинъ, Пересвѣтъ чернецъ и иная многа дрꙋжина.

XI. Тогда же восплакашася горко жены болярыни по своихъ осподарѣхъ въ краснѣ градѣ Москвѣ. Восплачется жена Микꙋлина Марія, а ркꙋчи таково слово: Доне, Доне, быстрыи Доне. прошелъ еси землю Половецкую, пробилъ еси береги^[36] харалоужныя. прилелѣи моего Микꙋлꙋ Васильевича. Восплачется жена Иванова Феодосія: Ꙋже наша слава пониче въ славнѣ городѣ Москвѣ. Не одина мати чада изостала, и жены болярскыя мꙋжеи своихъ и оспадаревъ остали, глаголюще къ себѣ: Ꙋже, сестрици наши, мꙋжеи нашихъ въ животѣ нѣтꙋ: покладоша головы свои ꙋ быстрого Донꙋ за Рꙋсскꙋю землю, за святыя церкви, за православнꙋю вѣрꙋ, съ дивными ꙋдальци, съ мꙋжескыми сыны.

XII. Того же дни въ суботу на Рождество Святыя Богородицы иссѣкоша^[37] христіани поганые полки на полѣ Куликовѣ, на рѣкѣ Напрядѣ. И нюкнувъ князь великій Владимеръ Андреевичь гораздо, и скакаше во полцѣхъ поганыхъ въ Татарскихъ, а злаченымъ тымъ шеломомъ посвѣчиваетъ, а скакаше^[38] со всѣмъ своимъ войскимъ. и загремѣли мечьми булатными о шеломы Хиновскіе. И восхвалитъ брата своего великаго князя Дмитрея Ивановича: Брате Дмитрей Ивановичь, туто у....шна времени.... а забрала не оставай, и свои полки понужай коромольщикамъ. уже бо поганые Татары поля наступаютъ, и храбрую дружину у насъ истеряли, а въ трупи человѣчьѣ борзи кони не могутъ скочити, а въ крови по колѣно бродять, а уже бо, братье, жалостно видѣти кровь крестьянская. И князь великій Дмитрей Ивановичь рече своимъ боярамъ: Братія бояра и воеводы и дѣти боярскіе, то ти ваши Московскіе сладкіе меды и великіе мѣста. туто добудете себѣ мѣста и своимъ женамъ. туто, брате стару помолодѣть, а молодому чести добыть. И рече князь великій Дмитрей Ивановичь: Господи Боже мой! на тя уповахъ да непостыжуся въ вѣкъ, ни да посмѣютъ ми ся враги моя мнѣ. И помолися Богу и Пречистой Его Матери и всѣмъ Святымъ Его, и прослезися горько, и утеръ слезы. И тогда аки соколи борзо полетѣли. И поскакиваетъ князь великій Дмитрей Ивановичь съ своими полками и со всею силою. И рече: Брате, князь Владимеръ Андреевичь. тутъ, брате, испити медвяна чара, наѣждяемъ, брате, своими полки сильными на рать Татаръ поганыхъ.

XIII. Тогда великій князь наступаетъ на рать силу Татарскую. и гремятъ мечи булатные о шеломы Хиновскіе, и поганые бусурманы покрыша главы своя руками своими, тогда поганые борзо вся отступиша. И отъ великаго князя Дмитрея Ивановича стязи ревутъ, а поганые бѣжатъ, а Рускіе князи и бояры и воеводы и все великое войско широкіе поля кликомъ огородиша, и злачеными доспѣхами освѣтиша. Уже бо ста туръ на боронь: тогда князь великій Дмнтрей Ивановичъ и братъ его князь Владимеръ Андреевичь полки поганыхъ вспять поворотили. И нача ихъ бусормановъ бити и сѣчи горазно безъ милости. и князи ихъ падоша. съ коней загремѣли, а трупьми Татарскими поля насѣяша, и кровію ихъ рѣки протекли. Туто поганые разлучишася розно, и побѣгше неуготованными дорогами въ лукоморье, скрегчюще зубами своими, дърущи^[39] лица своя, а ркуще такъ: Уже намъ, братіе^[40] въ земли своей не бывать и дѣтей своихъ не видать, а въ Русь ратью намъ не хаживать, и выхода намъ у Рускихъ людей непрашивать. Ꙋже бо востона земля Татарская; бѣдами и тугою покрыта бо сердца ихъ хотеніе княземъ и похвала Руской земли.. ходити^[41]. Уже бо веселіе наше пониче. уже бо Рускіе сынове разграбиша Татарскія узорочья, и доспѣхи, и кони, и волы, и верблуды, и вино, и сахаръ, и дорогое узорочіе. уже жены Рускіе восплескаша Татарскимъ златомъ.

XIV. Уже 6о по Руской землѣ прострѣся веселіе и буйство. вознесеся слава Руская по всей земли, а на поганыхъ Татаръ злыхъ бусормановъ промчеся хула и пагуба. уже бо вержено диво на земли. и уже грозы великаго князя Дмитрея Ивановича и брата его князя Владимера Андреевича, по всѣмъ землямъ текутъ грозы. И князь великій своею храбростію и дружину Мамая поганаго побилъ за землю Рускую и за вѣру крещеную. уже поганые оружія своя повергоша на землю, а главы своя подклониша подъ мечи Рускіе. и трубы ихъ не трубятъ, и уныша гласи ихъ. И отскача поганый Мамай отъ своея дружины, сѣрымъ волкомъ взвылъ, и притече къ Хаѳестѣ граду^[42]. Молвяше же ему Ѳрязовѣ: Чему ты, поганый Мамай, посягаешь на Рускую землю. то тя била орда Залѣская. А не бывати тебѣ въ Батыя царя. у Батыя царя было четыреста тысячь кованные рати, а воевалъ всю Рускую землю отъ востока и до запада. а казнилъ Богъ Рускую землю за своя согрѣшенія. И ты пришелъ на Рускую землю, царь Мамай, съ многими силами, съ девятью ордами и семидесятью князьями. а нынѣ ты поганый бѣжишь самъ-девятъ въ лукоморье. Не съ кѣмъ тебѣ зимы зимовати въ полѣ. не што тебя князи Рускіе горазно подчивали. Ни князей съ тобою ни воеводъ. не что гораздо упилися у быстраго Дону на полѣ Куликовѣ, на травѣ ковылѣ. Побѣжи ты, поганый Мамай отъ насъ, позаденешь и намъ отъ земли Руской. Уподобился еси милому младенцу у матери своей.

XV. Тако Господь Богъ помиловалъ князей Рускихъ, великаго князя Дмитрея Ивановича и брата его князя Владимира Андреевича межъ Дона и Нѣпра. И сталъ великій князь Дмитрей Ивановичь съ своимъ братомъ съ княземъ Владимеромъ Андреевичемъ и съ остальными своими воеводами на костѣхъ, на полѣ Куликовѣ на рѣчкѣ Напрядѣ. Грозно бо и жалостно, братіе^[43], въ то время посмотрѣти, иже лежатъ трупи крестьянскіе у Дона^[44] великаго на брезѣ, и Донъ рѣка три дни кровію текла. И рече князь великій Дмитрей Ивановичъ: Считайтеся, братія, сколько у васъ воеводъ нѣтъ, и сколько молодыхъ людей нѣтъ. Тогды говоритъ стоя Михайло Александровичъ, Московскій бояринъ, князю Дмитрею Ивановичю: Государь князь великій Дмитрей Ивановичь. нѣту, государь, у насъ сорока бояриновъ Московскихъ, двѣнадцати князей Бѣлозерскихъ, тридцати Новгородскихъ посадниковъ, двадцати бояриновъ Коломенскихъ, сорока бояръ Серпуховскихъ, тридцати пановъ Литовскихъ, двадцати бояръ Переславскихъ, двадцати пяти бояръ Костромскихъ, тридцати пяти бояръ Володимеровскихъ, осми бояръ Суздальскихъ, сорока бояръ Муромскихъ, семидесяти бояръ Рязанскихъ, тридцати четырехъ бояриновъ Ростовскихъ, двадцати трехъ бояръ Дмитровскихъ, шестидесяти бояръ Можайскихъ, тридцати бояръ Звѣнигородскихъ, пятнадцати бояръ Углецкихъ. и посѣчено отъ безбожнаго Мамая полтретья ста тысечь и три тысячи. Слава Тебѣ, Господи Боже нашь, помиловалъ насъ. И рече князь великій Дмитрей Ивановичь: Братія бояра и князи и дѣти боярскіе. то вамъ сужено мѣсто межъ Дономъ и Нѣпромъ на полѣ Куликовѣ, на рѣчкѣ Напрядѣ и положили еста головы своя за святыя церкви, за землю Рускую, за вѣру крестьянскую. Простите мя братія и благословите. всѣмъ вѣнецъ въ будущемъ. И пойдемъ, брате, князь Владимеръ Андреевичь, во свою Залѣскую землю, къ славному граду Москвѣ, и сядемъ, брате, на своемъ княженіи. а чти есми, брате, добыли и славнаго имени. Богу нашему слава.

---

Примѣчанія

1. Въ подл.: у вмѣсто ъ.
2. Въ подл.: родися.
3. Въ подл.: поминаюты.
4. Въ подл.: брате.
5. Въ подл.: начаша ти.
6. Въ подл.: первѣе всѣхъ вшедъ, восхалимъ.
7. Въ подл.: вѣщаго гобояна. Очевидно, что го повторено по опискѣ.
8. Въ подл.: гораздо.
9. Въ подл.: Святославу Яро—славичю: писецъ, очевидно, пропустилъ цѣлую строку: я дополнилъ ее по смыслу. Срав. въ сп. Унд.
10. Въ подл. еще прибавлено: отъ тоя рати и до Мамаева побоища. Въ спискѣ: Унд. А отъ Калатьскіе рати до Мамаева побоища 170 лѣтъ. Вѣроятно эта приписка вставлена въ текстъ съ поля.
11. Въ подл.: азъ, и во все не кстати; въ спискѣ Унд. правильнѣе: бо.
12. Въ подл.: Половетция.
13. Въ подл.: хоригови.
14. Въ подл.: каланты ризачены.
15. Въ подл.: брате.
16. Въ подл.: на рицѣ на Чечѣ.
17. Въ подл.: брате.
18. Въ подл.: Половетцаго.
19. Въ подл.: бяше.
20. Въ подл.: поютъ. Ср. въ Сл. о полку Игоря.
21. Въ подл. по опискѣ: Ивана Дмитріевича.
22. Въ подл.: борчи.
23. Въ подл.: выступи.
24. Въ подл.: хинела.
25. Въ подл.: воючи.
26. Въ подл.: гоготаше.
27. Въ подл.: то.
28. Тутъ неумѣстная вставка писца: Сентября 8 въ среду на Рожество пресвятыя Богородица.
29. Въ подл.: боданы.
30. Въ подл.: поліано.
31. Въ подл.: воды.
32. Въ подл.: нелѣпо; но въ Унд. спискѣ надо, въ Мам. поб. лѣпо.
33. Въ подл.: брате.
34. Въ подл.: взопаша.
35. Въ подл.: Мемко.
36. Въ подл.: берези.
37. Въ подл.: иссѣкша
38. Въ подл.: скакаша.
39. Въ подл.: доруши.
40. Въ подл.: брате.
41. Тутъ долженъ быть, кажется, пропускъ. Срав. въ Прил. II.
42. Не описка ли вмѣсто: къ Каѳестѣй земли?
43. Въ подл.: брате.
44. Въ подл.: Дуная.