6.—1388—1395. Посланіе Константинопольскаго Патріарха Антонія Псковичамъ; о обличеніи стригольниковъ.
Патріархъ Антоній, милостію Божіею Архіепископъ Костянтинаграда, новаго Рима, и Вселеньскый Патріархъ. О боголюбивый Епископе Великаго Новаграда и подъдръжащася твоей архіепископіи Плскова града и прочихъ предѣлъ, ты же благородный посадникъ и тысяцькый и всѣ бояре, и священници и иноци, и вси людіе христоименитіи Господни! Смиреніе наше и божественый и священый Съборъ яже о васъ промысляюще, по долгу своему же, вездѣ вселеныя крестіаны не престаетъ еже писати и учити о вѣрѣ, елика къ миру и спасенію ихъ: сего ради съ многымъ въвести[1] потщаніемъ и прилежаніемъ, еже Рускаго многочеловѣчьскаго наказати и умирити многыхъ и великыхъ съблазненій, предварившихъ завистію лукаваго бѣса. Понеже възвѣщено ми бысть о васъ, моему смиренію и всему священному Събору предсѣдящу, о преже варившихъ въ васъ ересѣхъ, яже суть расколы, занеже съблазнистеся въ время оного Карпа, діакона отлученаго отъ службы, стриголника, и глаголете: недостойни суть презвитери по мьздѣ поставляеми, недостойно отъ нихъ причащатися, ни каятися къ нимъ, ни крещеніа отъ нихъ пріимати. Но мы немало смутихомся и оскорбѣхомъ о семъ, вѣдуще душевную бѣду, въ ну же[2] впадосте, и недоумѣхомъ клюкаваго бѣса кознемь его, и удивихомся, и въ иныя вложи пакы насъ искушеніа. Сего ради, посла наше смиреніе и великый Съборъ боголюбиваго Архіепископа Суздальскаго Дионисіа[3] къ вамъ съ грамотами, мужа честна и благочестива и добродѣтелна, и священныхъ канунъ извѣстна хранителя, да видить вы отъ насъ и благословить вы, и поучить и понакажеть[4], и съвокупить вы вси съборнѣй и апостолстѣй церкви: да увѣсте вси, яко отлучаяся отъ церкви, самого того Христа отлучается; нѣсть имъ участіа, ни жребіа священнымъ отъ него, ни въ семъ вѣцѣ ни въ будущемъ, якоже рече Господь въ святыхъ Еуангеліехъ своимъ ученикомъ и Апостоломъ, и еже по нихъ учителемъ крестіанскымъ: «слушая васъ, мене слушаетъ; а отметаяся васъ, мене ся отметаетъ». Святіи бо и богоносніи Отци изложиша и[5], вдухновени бывше Святымъ Духомъ, и по еже пасти и въстати по прелщеніи, на непрелестный, и правый пойти путь. Исправите же убо и вы себе, стриголници, наипаче еретици, увѣдѣвше, въ кое зло впадосте: покоритеся презвитеромъ вашимъ и покайтеся въ нихъ же съгрѣшисте, и отступите отъ ересей своихъ. Азъ бо глаголю се, отецъ вашъ, Патріархъ: съединитеся въ благое, въ смиреніе любовь къ ереомъ, слугамъ Божіимъ: въздадите церкви Божіи должное покореніе. И понеже нѣсть грѣха, побѣжаа человѣколюбіе Божіе, и аще исповѣсте въ нихъ же съгрѣшили есте, и просите прощеніе и милосердіе отъ службьниковь святыхъ церквій; и Богъ, иже Апостолы законъ полагая, якоже Апостолъ Павелъ глаголеть: «покаряйтеся старѣйшинамъ вашимъ, ти бо бдять о душахъ вашихъ, яко слово въздати имутъ о васъ въ день судный» (благо вѣмь), простить вамъ[6] вся елика съгрѣшисте. Аще бо се не будетъ отъ васъ съкрушенымъ сердцемъ и смиренымъ, но пребудете даже и до конца несмирени, въ первомъ непокорьствѣ вашемъ и жесточествѣ: и никтоже отъ насъ раздрѣшитъ васъ, еже на васъ възглашено отлученіе. И аще кто, възмя рѣчь на презвитеры, расколъ учинитъ кто отъ крестіанъ, проклять да будеть. И[7] речеть Богъ: преже уготовахъ тобѣ жилище едемъ, а не рай; рай бо мѣсто свято есть, якоже церкви олтаръ. Церкви бо всѣмъ входна есть, та бо ны есть мати порожающи вся крещеніемъ святымъ и питающи вся живущая нетрудно въ ней, одѣвающи же и веселящи вся въсельшася въ ну[8]; глаголеть бо Пророкъ: «се работающіи церкви ясти имутъ и насытятся.» И пакы: «о чада церковная, съсуще отъ сосцю ея тукъ и масть, помажете веселіемъ главы своя.» И Давыдъ рече: «упіются отъ обиліа дому твоего и потокомъ пища твоея напоиши я.» И пакы о одежи священникъ и о' оболченіи: «іереи твои облекутся въ правду.» И пакы рече Господь: «якоже Каинъ, не сый освященъ, на священный санъ поревновавъ священну Авелю, его же завистію уби.» И пакы рече Господь: «о горе въ разумѣ съгрѣшающимъ! сего ради погубихъ я духновеніемъ духа животнаго.» Но якоже отъ древа разумнаго аще снѣси
не разумѣти ни добра ни зла. Такымъ злохытрьствомъ и лживыми словесы прелстилъ[9] діаволъ родъ человѣчь, и тѣмь древа животнаго удалихомся. Сътворивый же насъ Богъ, неизреченными щедротами подаде намъ причащеніе святыхъ пречистыхъ таинъ, истиннаго животнаго плода, еже снѣдъ, живу быти въ вѣкы. И нынѣ діаволъ не престаетъ прельщая родъ человѣчь: тогда бо отпаде самъ славы Божіа и отдалися отъ древа животнаго; нынѣ же отъ службы отлучена и отъ церкъви изгнана Стриголника въздвиже на правовѣрную вѣру; и оклеветалъ весь Вселенскый Съборъ, Патріарховъ и Митрополитовъ и Епископовъ, и игуменовъ и поповъ и весь чинъ священны, и глаголеть, яко не по достоянію поставляеми; и таковою виною прельщаху худоумныя, отлучаху отъ причастіа святыхъ пречистыхъ животворящихъ таинъ Христовыхъ, и пуще зміиныя прелести постави прелесть: зміа бо прелсти, ино смертію умирають; а сего прелестію въ муку вѣчную идуть. Самъ бо Господь рече: «небо и земля мимо идетъ, а словеса моя не мимо идуть.я «Ядый плоть мою и піа кровь мою, въ мнѣ пребываеть и язъ въ немъ.» «Аще не снѣсте плоти Сына человѣча, ни, піете крови его, живота не имате въ себѣ.» Стриголници же, противници Христу, повелѣваютъ, яко отъ древа животнаго, отъ причащеніа удалятися
…[10]показа имъ писаніе книжное, еже списа, на помощь ереси своей, дабы чимъ уставити народъ на священникы, уподобляяся оному Корею и Дафану и Авирону, иже въставиша[11] на Моисея и на Арона, глаголюще: «освященіи приносити Богу теміанъ, и мы такоже священници есмы[12]»; и отлучиша народъ 200 и 50 въ слѣдъ себе; и рече имъ Моисій: «искусите[13] себѣ кадилницѣ новы и вложите въ нихъ огнь и положите на ня теміанъ, принесите я предъ Бога: якоже Господеви угодно, тако будеть.» Они же, непокоривіи, взяша на себе святительство и санъ, принесоша теміанъ и покадиша предъ храмомъ свидѣніа; и разгнѣвася на ня Господь Богъ, и повелѣ земли зпнути и пожрети я и съ женами и съ дѣтми ихъ, и снидоша живи въ адъ; а оставшихъ огнемъ съжже. Тогда убо Моисій и Аронъ ветхый законъ уставиша: стѣнь и образъ бысть новому закону Христову. Тогда убо Корей, и Дафанъ и Авиронъ, сами мниміи священніи, въставиша народъ на святителя, живыхъ сведоша въ адъ. Тако же и нынѣ стриголници, ни священіа имуще ни святительскаго сана, сами ся поставляють учители народомъ, отъ тщеславіа и высокоуміа, и слушающая ихъ съводять въ погыбель. Христосъ Богъ Спасъ нашъ избра 12 ученикъ и сія Апостолы постави, помолився Богу и Отцу, възложи на ня рукы своя и повелѣ имъ учити народы: Апостоли же видѣвше вѣру Христову пространяющуся, ученіа Слова растуща, избираху своя ученикы и поставляху, ового попомъ, ового Епископомъ, ового Патріархомъ (и тако правила положиша: «Епископы два или три поставять Епископа»); Епископы же нарекоша Патріархомъ: занеже смертни[14] быша, того дѣля тако уставиша, да не умруть съ ними священьство. Сами Апостоли взяша рукоположеніе отъ Христа Сына Божіа, и тоже рукоположеніе даша Патріархомъ и Митрополитомъ и прочимъ священникомъ. По тому правилу, и доселѣ избирають Патріарси и Митрополиты въ которуюждо область и поставляють Патріарха, а Патріархъ съ Митрополиты поставляеть Митрополита; Митрополитъ съ Епископы поставляеть Епископа, а Епископъ съ попы и діаконы поставляеть попы и діаконы: и тако достоитъ намъ имѣти всякого священника яко Апостола Христова[15]. Егда священникъ службу служить, тогда имѣти его яко Христа въ Сіонѣ и съ ученикы вечеревавша, и тако достоитъ причаститися[16] отъ рукы его, яко отъ рукы Христовы вечеревавша. И не разсужай и не распытовай о ѣреи Божіи, аще достоинъ или ни; всемірный бо учитель Павелъ къ Къренъѳеомъ[17] пиша глаголеть: «преже разсужаеть себе человѣкъ, ти отъ хлѣба да ясть и отъ чаши да піеть, да не въ судъ собѣ ясть и піеть, не разсужая тѣла и крови Христовы». Смотрите же, стриголници наипаче же еретици, како ти Апостолъ Павелъ рече, себе расмотряти, а не ѣрея Божіа. Или речеши: недостойніи суть духопродавци? Христосъ, вѣдый Іюду, хотяща предати его на вечери, отъ тряпезы, не осуди его преже суда; а ты кто еси осужаяй чужего раба? Своему Господеви или стоитъ или падетъ: силенъ Богъ въставити[18] его. Рцѣте, еретици, гдѣ хощете попа взяти себѣ? Аще глаголете: недостоинъ есть Патріархъ и недостойни суть Митрополити; то по вашему, нынѣ, слову, ни единого нѣсть попа на земли, аще бо который, нищеты дѣля, позна себе, безъ даровъ церковныхъ поставленъ есть. Но мыслію и вѣрою исповѣдаемся и вси причащаемся къ соборнѣй и апостолстѣй церкви; а егоже Митрополита освятить намъ Патріархъ, того вси чтемъ яко Христова намѣстника, такоже и Епископъ въ коемъждо градѣ и области презвитеры яко Апостолы Христовы. Вамъ же гдѣ есть поставити попа, по своей окааной вѣрѣ? Не приде бо Христосъ второе въпдотитися на землю, ни снидетъ Ангелъ освятити вамъ попа; аще бы вамъ Ангелъ освятилъ попа[19], то и тому не подобаетъ вѣровати, по Апостолу Павлу рекшему: «аще ангелъ вамъ благовѣститъ паче проповѣданаго, еже пріасте, проклятъ да будетъ». Како дръзнусте уничижити Святителя проторы церковными, еже взимаютъ у поставляющихся, укоръ[20] церковный, по Апостолу Павлу глаголющю: «церковникъ церковію питается и олтарници съ олтаремъ съдѣляются? Кто насадить виноградъ, отъ плода его да не ястъ ли; илн пасеть кто стадо, отъ млека его да не ястъ ли? Достоинъ есть дѣлатель мьзды своея пріати». Христосъ Богъ Спасъ нашь егда възва Матѳея отъ мытници и въ Апостолы его причте, и сътвори въ дому своемъ чреженіе велико, не токмо единого Христа чтяше, и Апостоловъ и народъ многъ, грѣшниковъ и мытаревъ; тогда самъ Христосъ рече: «не пріидохъ праведныхъ призвать, но грѣшныхъ на покааніе». Аще вы, стриголници и еретици, праведници мнитеся, не слышите ли Апостола глаголюща: «аще речемъ, грѣха не имамъ, лжемъ и истины нѣсть въ насъ»? Завѣстію бо стрѣкаеми вы, стриголици, въстасте на святыхъ и на поповъ, самн себѣ хотяще честь прехватити. Изучисте словеса книжная, яже суть сладка слышати крестіаномъ, и поставистеся учители народомъ. А не помянусте слова Христова, еже рече: «не входяй дверми въ дворъ овчій, но пролазя инудя, тать есть и разбойникъ». Всякъ бо не имѣя поставленіа святительска, учити покушаяся, и учителя укорити, сій не дверми вшелъ есть. Тати и разбойници убивають человѣкы оружіемъ; а вы, стриголници, убиваете[21] человѣкы разумно[22] смертію, удаленіа ради отъ пречистыхъ таинъ тѣла и крови Христовы, Христу Богу глаголющю: «аще кто не снѣстъ плоти моея, ни піеть крови моея, не имать свѣта ни живота; ядый мя, той имать въ послѣдній день». Уподобистеся вы онѣмъ отмѣтникомъ: «и се слово слышавше, идоша вспять отъ Хриета и ктому не ходиша съ нимъ.» Не разумѣете ли, стриголници, еже въ святѣмъ Еуангеліи написано есть: «егда вечеряше Христосъ съ ученикы своими, пріимь хлѣбъ, преломль и даяше ученикомъ, глаголя: пріимѣте и ядите, се есть тѣло мое, ломимое за вы за многы, въ оставленіе грѣховъ; потомъ же пріимъ чашю вина и хвалу въздавъ, рече своимъ ученикомъ: пійте отъ нея вси, се есть кровь моя Новаго Завѣта: се творите въ мое въспоминаніе»? Тако же и донынѣ іереи службу сътворяють, въ споминаніе спасеныа страсти Христовы. Аще ли кто отъ сихъ пречистыхъ таинъ удаляется, то нѣсть истинный христіанинъ, не послушаетъ Господа Бога глаголюща: «ядый плоть мою и піа кровь мою, въ мнѣ пребываетъ и язъ въ немъ». Глаголють стриголници о нынѣшнихъ Святителѣхъ и о попѣхъ: недостойны тѣхъ службы, яко.......... имѣніемъ възимаютъ у христіанъ подаваемое имъ приношеніе, и за живыя и за мертвыя; а не разумѣютъ окаанныи, оже достойно пріимати отъ подавающихъ милостыню: самъ бо Христосъ въ домъ Закхеевъ вниде обѣдать и подаваемая пріимаше. Аще бы не пріялъ Христосъ ни отъ кого же имѣніа, чимъ бы ученици шли купить хлѣбовь въ градъ Самарейскый, егда сѣдѣ Христосъ на кладязи? И кое бы сребро носилъ Іюда въ ковчежцѣ? И по възнесеніи Христовѣ, Апостоли проповѣдающе имя Христово, пріимаху отъ приносящихъ: мнози бо продааху села и стяжаніа, и цѣны ихъ полагаху предъ ногами апостолсками; Ананіа же унятъ отъ цѣны села, злѣ умре съ женою своею Самфирою предъ ногами Апостола Петра. Апостоли бо пріимаху отъ приносящихъ, и подаваху отъ того требующимъ, и сами оттолѣ стяжаху себѣ пищу и одѣніе: не камена имъ тѣлеса бѣяше[23]. Вы же, еретици стриголници, укаряете ядущихъ и піющихъ Святителевъ и поповъ, рекуще, яко Жидове Христови, трутни, глаголюще: «си человѣкоядци суть и винопивци, друзи мытаремъ и грѣшникомъ»; а вы еретици тако глаголете: сіи учители піаници суть, ядять и піють съ піаницами, и възимаютъ отъ нихъ злато и сребро и порты, отъ живыхъ и мертвыхъ; и такыми злыми словесы окаанными прельщаете народъ. И аще будутъ[24], по вашему слову, недостойни Святители и попове, но помяните слово Господне, еже рече; «на престолѣ Моисеовѣ сѣдоша книжници и Фарисіи; все еже глаголють вамъ творити, творите, по дѣломъ же ихъ не творите; глаголють бо вамъ, а не творять.» Вы же, стриголници, почитающе святое Еуангеліе, то слово преступаете, которое речено: «покаряйтеся учителемъ»; а которое самъ Христосъ изреклъ ученикомъ, то почитаете на укоръ священникомъ, а не разумѣя слова Христова реченнаго въ святомъ Еуангеліи: «что видиши сучецъ въ очеси брата своего, а у себе бръвна не чюеши? Изми, лицемѣре, певѣе бръвно изъ очесе своего.» Помяни Павла глаголюща: «аще быхомъ сами себе разсужали, не быхомъ осужени были.» И пакы рече: «меншій отъ болшаго да благословитея,» якоже Авраамъ отъ Мелхиседека. Не о себѣ кто честь пріемълетъ, но званный отъ Бога. Не о себѣ, того дѣля, Христосъ далъ Еуангеліе въ міръ, чтобы, почитая, смотрити того слова, чимъ бы кого укорити, но того дѣля далъ Христосъ Еуангеліе, да почитаемъ себѣ, и укоряемъ и преже себе управляемъ. И ту писано слово видимъ :«о семъ разумѣють вси, яко ученици мои есте, аще любовь имате межи собою.» И пакы речено бысть : «да просвѣтится свѣтъ вашь предъ человѣкы и да видять дѣла ваша добра, и прославять Отца вашего иже есть на небесѣхъ.» Се же слышавше, не мнимъ, яко предъ человѣкы добродѣтелію не велѣно намъ хвалитися: но въ томъ же Еуангеліи обрящемъ написано: «егда постишися, да не буди яко лицемѣри, просмражающе лице свое и являются человѣкомъ; ты же егда постишися, умый лице свое и помажеши главу свою олеемъ, да не явишися человѣкомъ постяся.» Тако же молитися Христу вътайнѣ повелѣ, всякаго тщеславіа и высокоуміа убѣгати, не молитися на распутіахъ и на ширинахъ градныхъ, ни выситися словесы книжными; не рече бо Христосъ: просвѣтитъ свѣтъ свой, но «да просвѣтится свѣтъ вашь; ничтоже бо тайно, еже не откровено будеть; не самъ бо кто прославится, но самъ Богъ прославитъ святыа своя.» Вы же, стриголници, глаголете, еже Павелъ и простому человѣку повелѣ учити: тогда бо вси невѣрни быша, а не вамъ еретикомъ то речено бысть, како вы нынѣ правовѣрныхъ христіанъ смущаете, Святители и церкви Божіи преобидѣли. Не боителися въ Манаконѣ[25] писанаго: «всякъ иже учить приобидѣнѣ быти церкви Божіи, да будеть проклять.» Вы, стриголници, уловляете христіанъ тѣмъ словомъ, еже Христосъ реклъ Апостоломъ: «не имайте влагалища, ни мѣди при поясѣхъ вашихъ.» Предъ страстію же своею, рече имъ: «егда послахъ вы безъ влагалища и безъ мѣшца, требоваете ли чего? Они же рекоша къ нему: не требовахомъ ничтоже; рече имъ Іисусъ: нынѣ же имѣйте влагалища и мѣхъ.» Аще повелѣ Христосъ держати влагалище и мѣхъ ученикомъ, то порозно лн держати влагалище и мѣхъ? Аще ли речете еретици: се много събираете[26] имѣніа; то не вы, стриголници, судите имъ: судятся отъ Бога, или отъ болшаго Святителя. Что ся творите главою, нога сый; овчя будя, пастухомъ творишися? А не слушая Григоріа Богослова, рекшаго: «овци не пасти пастуховъ.» Еще же и сію ересь прилагаете, стриголници, велите[27] къ земли каятися человѣку, а не къ попу. Не слышите ли Господа глаголюща: «исповѣдайте грѣхы своя, молитеся другъ за друга, да исцѣлѣете?» Потому[28] же святіи Отци уставиша духовныхъ отець, да исповѣдаются имъ крестіани, Якоже бо болный человѣкъ объявить врачю вредъ свой, и врачь приложитъ ему зеліе, по достоянію вреда того, и исцѣлѣетъ: такоже и духовному отцу исповѣдаетъ грѣхы своя человѣкъ, и духовный отець отъ грѣха того престати повелить, и противу грѣха того въ здасть ему епитемью понести; того дѣля ему Богъ отдасть грѣха того. А кто исповѣдается къ земли, то исповѣданіе нѣсть ему въ исповѣданіе: земля бо бездушная тварь есть, и не слышить и не умѣеть отвѣщати, и не въспретить съгрѣшаемъ[29]. Того дѣля, не подасть Христосъ Богъ прощеніа грѣховъ къ земли кающемуся. Сію бо злую сѣть положи діаволъ Карпомъ діакономъ, что не велѣлъ каатися къ попомъ, дабы отъ поповъ честь іерейскую отъялъ, еже далъ Христосъ вязати и раздрѣшати грѣхы. Самъ бо стриголникъ связанъ бысть и отлученъ отъ церкви, своея дѣля ереси; того дѣля иныхъ въ ту неисповѣданую погыбель ведетъ. Еще въ животѣ своемъ уразумѣлъ то, оже тѣло его не будетъ погребено съ псалмы и пѣснми; того дѣля почалъ людемъ глаголати: недостоитъ надъ умръшими пѣти, ни поминати, ни службы творити, ни приноса за мертвыя приносити къ церкри, ни пировъ творити, ни милостыни давати за душю умершаго. Діаволъ отпаде ангелскаго сана; того дѣля многы люди прельщаетъ, дабы не единого свелъ въ погыбель: тако и стриголници, связани бывше, инѣхъ въ свой съузъ неправедный привлачаютъ, дабы не едини связани[30] на небеси и на земли, и отлучены отъ соборныя церкви, злыа ихъ ереси ради. Въ Апостольскыхъ бо правилѣхъ писано есть, творити память по умершихъ; такоже и святіи Отци уставиша въ всякой службѣ поминати усопшихъ, и понахида по нихъ пѣти, и кануны заупокойныя уставиша; а по еретицѣ же не повелѣша никако приношеніа приносити, ни заупокой поминати его. Великый же учителъ церковный Іоанъ Златоустый написа: «аще еси въ животѣ не далъ милостыни, поне по смерти дай, и отпусти раба своего на свободу; аще бо дѣтемъ имѣніе свое оставляеши, напиши часть Христу съ дѣтми своими, да что дадять по души твоей.» Пакы же въ Пролозѣ написано есть: «Пріиде прозвитеръ въ баню мыться, и обрѣтеся ту человѣкъ служа ему; прозвитеръ пода ему 2 проскуры; онъ же рече: сій хлѣбъ святъ есть, не имамъ его ясти, но хлѣбъ сій за мя къ Всемогущему Богу принеси: азъ бо есмь человѣкъ, отшедый свѣта сего; аще будеть услышана молитва твоя за мя, то не обрящеши мене въ новую суботу: и се изглаголавъ, невидимъ бысть.» Посему же разумѣемъ, яко ти сами души просять отъ насъ приношеніа къ Богу. Въ книгахъ Григоріа Папы Римьскаго писано есть: «Единъ мнихъ умре, имѣя 3 златници; бысть же обычай въ монастыри томъ, ничтоже дръжати въ келіи своей, того дѣля въ опитемьи умре; егда же душа та смилися Святителю, и посла приставника, повелѣ на всякъ день приносити о немъ проскуру; въ 30-й же день мнихъ той въ снѣ видѣ о немъ и старѣйшинѣ сказа: молитвами отець, прощена бысть душа моя.» А въ Печерѣ Кыевьской Антоніевѣ единъ мнихъ умре въ грѣсѣхъ и положенъ бысть въ пещерѣ; злый смрадъ исхожаше изъ него, и явлено бысть о немъ: повелѣ игуменъ пзврещи псомъ на снѣдь, послѣди же молитвами святаго[31] Антоніа и Ѳеодосіа и прочихъ святыхъ, положеныхъ въ печерѣ той, и ту сущихъ живыхъ въ монастыри томъ святыхъ отець молитвами, отслана[32] бысть злая таа его воня и преложися на благоуханіе; се бысть знаменіе ослабѣ его. Мы, живіи, того дѣля створяемъ молитвы за мертвыхъ; того ради Богъ повелѣ молитву творити другъ за друга. Христосъ Богъ нашь имаеть власть и по смерти влещи въ муху или пощадѣти. Слава великому человѣколюбію его и праведному суду! Подобно есть христіаномъ слышати слова Христова: «блюдитеся отъ книжникъ хотящихъ ходити въ одежахъ овчихъ, внутрь суть волци и грабители; отъ плодъ ихъ познаете я.» А еретици, стриголници нѣціи, безумни, глаголють: си не грабятъ имѣніа, не сбираютъ. Фарисіи таци же бѣша: постишася двожды на недѣли, весь день не ядуще; мытари же, грѣшници, съ исповѣданіемъ придоша къ Христу и спасошася[33]. Фарисеомъ глаголеть Христосъ: «горе вамъ книжници, фарисеи и лицемѣри! яко проходите море и сушу, сътворити единого пришелца; а егда будеть, сътворите его пришелца геонѣ огненѣй, сугубѣйша вамъ[34].» Такови же бѣша и вси еретици, постници, молебници и книжници, лицемѣрници, предъ людми чисти творящесь: аще бо бы нечисто житіе ихъ видѣли люди; то кто бы вѣровалъ ереси ихъ? Или бы не отъ книжнаго писаніа глаголали, кто бы послушалъ ихъ? Но въ книжномъ писаніи сами еретици съблазнишася, тѣмь иныхь неразумныхъ съвратиша; о сихъ бо Пророци прорекоша: «камень претыканіа и съблазненію невѣрующимъ въ Христа.» Книжное почитаніе, рекша, правовѣрнымъ недвижимо спасеніе: всякъ бо почитая книжное писаніе, безъ смѣреніа и кротости, аще кого укорити чимъ, и тѣмъ впадаеть въ ересь и бываетъ ему съблазненію камень, и на жизнь вданаа ему заповѣдь обрѣтаеться ему въ смерть. Еіце бо нѣчто и дивнѣе того реку: и бесерменове постятся и отъ книгъ глаголють, но неподобаетъ внимати ихь. О самопоставляющихся учителѣхъ Апостолъ рече: «яко мнози лжипророци изидоша въ міръ, но не послушайте словесъ ихъ и въ домы своя не пріимайте ихъ, да не пріобѣщаетеся дѣломъ ихъ злымъ; слугы бо льстивыя преображаются яко слугы истины, и самъ сотона преображается въ ангелъ свѣтелъ.» Тѣмже недостойно естъ слушати стриголническыхъ ученій: никаковому крестіанину, да не уловленъ будетъ въ діаволѣ пруглѣ, да не отлучится отъ безсмертнаго источника, отъ тѣла и крови Господа Бога Спаса нашего Іисуса Христа, да не будеть осуженъ въ вѣчную муку. Достойно всякому хрпстіанину приходити къ церкви Божіи и слушати пѣніа и чтеніа, еже есть въ святыхъ церквахъ, и внимати писаному въ апостолѣ и въ еуангеліи, еже почитаютъ священицы; а недостойно ихъ осужати, по реченому: «не осужайте, да не осужени будете: имъ же судомъ судите, осудится вамъ.» А кто по стриголничьской ереси, начнеть священникъ осужати, нетокмо неподобно ихъ послушати, но и отъ градъ ихъ отгнати: рече бо Писаніе: «извержете злое сами отъ себе; малъ квасъ все смѣшеніе квасить.» Христосъ же Спасъ нашь своимъ ученикомъ рече: «блюдѣтеся отъ кваса фарисейска,» сирѣчь, отъ ученіа тщеславна. О всѣхъ сихъ и славимъ Господа Бога Спаса нашего Іисуса Христа, давшаго намъ плоть свою ясти и кровь свою пити, емуже сдава съ пресвятымъ и благымъ и животворящимъ ти Духомъ, нынѣ и .. (и проч.).
Изъ рукописи подъ заглавіемъ: Іосифа Волоколамскаго о Новгородскихъ еретикахъ, и Посланія Митрополитовъ Кипріана и Фотія во Псковъ (in fol., XVI вѣка, л. 304—315), хранящейся въ Румянцовскомъ Музеумѣ подъ № 204. — Свѣрено съ манускриптомъ Московской Синодальной библіотеки in 4°, XVI вѣка, подъ № 562 (л. 315—326 об.).
Примѣчанія
править- ↑ Такъ стоить въ обоихъ манускриптахъ, Синод. и Румянц.
- ↑ Въ Синодал. «внюжъ.»
- ↑ Здѣсь явный анахронизмъ: ибо Архіепископъ Діонисій скончался въ 1385 г. См. Ник. Лѣт. IV, 174. Ист. Карамз. V, прим. 124. А Антоній IV вступилъ на патріаршую каѳедру въ 1387 или 1388 г. и правилъ церковію 8 лѣтъ. См. Dict. histor. Морер, I, 551, Orien. Christ. Лекеня I, 304. Можетъ быть, Патріархъ ссылается только на грамоту предшественника своего Нила, и припоминаетъ Псковичамъ прежнія его увѣщанія; или это позднѣйшая вставка.
- ↑ Въ Синод. «покажеть.»
- ↑ Здѣсь, въ обоихъ манускриптахъ, замѣтенъ пропускъ: потому и смыслъ рѣчи неясенъ.
- ↑ Въ Синод. рук. сихъ двухъ словъ недостаетъ.
- ↑ Въ Синод. и Румянц. сп. здѣсь пропускъ.
- ↑ Въ Синод. «вню.»
- ↑ Въ Синод., по ошибкѣ «прелстися.»
- ↑ Здѣсь, въ обоихъ спискахъ еще пропускъ.
- ↑ Должно бы сказать «въсташа:» но въ Синодальн. сп. прибавлено «народъ.» Слич. ниже.
- ↑ Въ нынѣшней Библіи текстъ сей читается такъ: «довлѣетъ вамъ, яко весь сонмъ вси святи.» См. кн. Числъ гл. 16. ст. 3.
- ↑ Въ Синодальн. правильнѣе: «искуйте.»
- ↑ Въ подл. «смерти,» въ обоихъ спискахъ.
- ↑ Четыре слова сіи приписаны внизу страницы.
- ↑ Въ подл. «причастися.»
- ↑ То есть: «Коринѳяномъ.»
- ↑ Поправлено по Синод. списку; въ Румянц. «въстати.»
- ↑ «Аще бы — попа» словъ сихъ въ Синодальн. недостаетъ.
- ↑ Въ Синод. сп. «урокъ.»
- ↑ Въ подл. «убивайте.»
- ↑ Въ Синод. сп. «разумною.»
- ↑ Надлежало бы сказать: «бѣяху или бяху.»
- ↑ Въ Синодальн. рукоп. «буди.»
- ↑ Т. е. «въ Номоноконѣ.»
- ↑ Въ Синодальн. сп. «събираютъ.»
- ↑ Въ подл. «велить,» въ обоихъ спискахъ.
- ↑ Тамъ же «потомъ»
- ↑ Въ подл. «не въспритить.» Должно читать: «и не въспретить (земля), да не съгрѣшаемъ.»
- ↑ Въ Синодальн. сп. прибавлено: «были.»
- ↑ Въ Синод. сп. прибавлено: «отца.»
- ↑ Тамъ же: «ослаба.»
- ↑ Послѣднія три слова въ Румянцовск. сп. приписаны вверху страницы; а въ Синодальн. стоятъ въ ряду текста.
- ↑ Въ Синодальн. сп. Евангельскій текстъ имѣетъ пропуски.
