5.—1382. Уставная грамота Суздальскаго Архіепископа Діонисія Снѣтогорскому монастырю, о соблюденіи правилъ иноческаго общежитія.
Богу споспѣшающу[1] и слово угвержающу, Слова ради, и Святымъ Духомъ свершающу, якоже заповѣда всесвятый Патриярхъ Вселенскый, пекійся душами человѣчьскыми, учити и наказати и управити, по божественнымъ заповѣдемъ Еуангельскымъ добрѣ живущаа укрѣпляти и благословити, съвратившаяжеся възвратити на путь правый, спрѣчь, на добродѣтелное житіе, еже уставиша святіи и богоносніи Отци общее житіе, по великому Пахомію, еже Ангелъ Божій[2], и по Великому Василію, еже два чина вписа мнишьскаго житія, пустынный и общее житіе, еже похвалили паче пустыннаго, и святый Ефремъ тако пишетъ, и святый Іоанъ божественыя Лѣствица списатель наипаче утверди и украси различно премудростьными наказаніи. Пришедьшю же ми, посланіемъ всесвятаго Патріарха Вселенскаго, въ богохранимый градъ Пьсковъ, о исправленіи отлучшихся отъ съборныя апостольскыя Христовы церкви и на утверженіе и на исправленіе священникомъ и честнымъ монастыремъ и всѣмъ христоименитымъ людемъ, и слышахомъ о честномъ манастыри Пресвятыя Богородица, иже именуется Снѣтная Гора, общеживущимъ, и възрадовахся душею зѣло и възвеселихся по премногу; съ тщаніемъ идохъ, и видѣхъ, и благословихъ отъ Вселенскаго Патріарха, и обрѣтохъ я неисправляющася въ всемъ божественаго Писаніа и богоносныхъ Отець уставы, ово творящя, ово же оставляющя. О божественомъ общемъ житіи и о свершеніи мнишскаго устава и о высотѣ безстрастія, умоленъ быхъ отъ преподобнаго игумена, ту[3] суща и яже о Христѣ братьи, направити съвратившаяся и наказати ненаказанныя. Азъ Діонисій Архіепископъ Сужьдалскый, по повелѣнію всесвятаго Патріарха Вселенскаго, възрѣвъ въ Номоканонъ, во правила святыхъ Отець, яже о божественомъ общемъ житіи, поповихъ и уставихъ препущенаа небреженіемъ, въ обиду святыхъ Отець уставы. Якоже рече правило еже въ 5-мъ Сборѣ: «мнихомъ ничтоже подобаетъ своего имѣти, но все свое предати монастырю въ власть.» Рече богогласный Лука о вѣровавшихъ Христу и мнишское житіе исправившихъ: «яко ни единъ кто что отъ своего глаголаше его быти, но бѣша всѣмъ обща». Тѣмъже, хотящимъ мнишствовати, дати сущаа и пріимати потребы; по постриженіи же, впадающимъ къ нему всѣмъ манастырю имѣти властъ: ни о чемъ же о своемъ пещися или рядити симъ попущаеться. Аще кто купитъ стяжаніе кое, еже непричастно монастыреви, свое творя; си убо игуменомъ или епископомъ да въспріимется, и многимъ дерзновеніемъ продаемо и убогимъ и немощнымъ, клоснымъ да раздается таковое стяжаніе. Поне когда Ананью, украсти поучившася, о приносимомъ запрещеніемъ повелѣ святый Сборъ уцѣломудрити; аще бо часть сребра уемъ отъ своихъ, не всего у ногъ апостольскыхъ положивъ, умре: что подобаетъ рещи о тѣхъ, иже не всего себе[4] приносяще Богу, часть же своимъ похотемъ работающе, ихже обрящетъ болшее томленіе, якоже силну сущу Богу душу и тѣло и погубити? Иже въ мнишьскый святый образъ одѣяни, и въ монастырѣхъ сущимъ, и ни словомъ лѣтъ рещи: се твое, а се мое, или сего и оного; ибо 5000 суще простьци, и вся обща имяху, никтоже свое ему что быти вѣща: болѣ паче въ общемъ житіи, въ монастыри не нарицати: а се мое. Кдѣ[5] же суть отъ плевелъ сѣющаго діавола възрастъша въ общемъ житіи, глаголемая итарица, не достоитъ нарицати общимъ, но разбойникъ сѣдалища, и священнокраденіа и всеа злобы непріязнъны здѣльници. Сего бо ради наречется обьщее житіе, да все обще имуть, и ни единому имѣти діаволска начинанія и своя попеченіа, пакостнаа и безумнаа, яко иже во святыхъ Великіи Василій глаголеть: «яко имѣяй въ монастыри свое что въ келіи, велико или мало, чюжаго себе Божія церкви створи, и Господни любве такожъ чюжъ есть: полезнѣе убо есть съ малыми разумными жити, неже съ многими безщинными, преобидящи заповѣди Господня.» Нынѣ же впадшаа въ сія великаа съгрѣшенія, и прежереченаа правила святыхъ Отець преступльшаа невѣдѣніемъ, аще начнутъ каятися достойно и обѣщаются въ та же великаа съгрѣшеніа не впадати, азъ смиреный Архіепископъ Діонисій Суждальскый, съ благословеніемъ всесвятаго Патріарха, прощаю. Отселѣ, по повелѣнію всесвятаго Патріарха Вселенскаго, въ честнѣмъ семь монастыри Святыя Богородица, на Снѣтной Горѣ, уставихомъ ти[6], въ монастыри семъ честнѣмъ, ничтоже своего[7], ни игумену ни братіи, но все отдати Богу и Святѣй Богородици въ монастырь: ни ѣсти въ келіи ни пити, не у келаря просити; а келарю не дати, ни клучнику не дати никомуже ничегоже безъ игуменова слова; ѣсти жъ и пити въ трапезѣ вкупѣ всѣмъ; опрочь же тряпезѣ ни ясти ни пити никакожъ, ни до обѣда ни по обѣдѣхъ; а допіяна никакожъ не пити. А одѣніе потребное имати у игумена, обычныи, а не Нѣмечскыхъ суконъ; а шюбы бораньи носити безъ пуху, и обувь и до онущь имати у игумена; а лишнихъ одѣжъ не держати. А въ церкви по правилу и по уставу святыхъ Отець да поютъ. А на службу идѣже аще послеть мниха, безъ ослушанія да идетъ; а безъ благословеніа игуменя никакожъ не ходить никуды. Послушаніе же и покореніе имѣти[8] въ всемъ игумену: аще кто въпреки начнетъ глаголати игумену и въздвигати начнетъ свары, запертъ таковый да будетъ въ темници, дондеже покается; а непокориваго мниха, по первомъ и вторѣмъ и третіемъ наказаніи, выженутъ его изъ монастыря, да не вдадутъ ему отъ внесенаго въ монастырь ничтоже. Се же отъ многа мало писахомъ вамъ; а прочее же обрящете въ книгахъ святаго Великаго Василіа Кесарійскаго, и святаго Ефрема, и святаго Ивана Лѣствичника, и святаго Ѳеодора Студійскаго и прочихъ святыхъ Отець, о послушаніи и о смиреніи и прочихъ добродѣтелѣхъ, яже свершивше, милость Божію получите и Святыя Богородица, и благословеніе всесвятаго Патріарха Вселенскаго, и она будущаа благаа, яже уготова Богъ любящимъ его. Приде же въ слухи наша и се, яко ктиторъ сего честнаго монастыря, рекше, создатель, создавъ сій монастырь и братью совъкупивъ, и уставъ въведе святыхъ Отець, общее житіе, яже многымъ наказаніемъ извѣстивъ и клятвами утвердивъ, еже есть на спасеніе душамъ человѣчъскымъ, пребывающимъ во монастыри семъ честнѣмъ, и всѣмъ христоименитымъ людемъ на пользу и похвалу, пребывающимъ въ богохранимомъ семъ градѣ Пьсковѣ: се азъ, поновляя, пишю на утверженіе сей грамотѣ, яко кто дерзнетъ помышлити, благое се уставленіе превратити лукавымъ обычаемъ, будетъ подъ тягостію отлученія пресвятаго Патріарха Вселенскаго.
Изъ рукописи подъ заглавіемъ: Посланія Россійскихъ Митрополитовъ и другихъ лицъ (in 4°, XVI вѣка, грам. 126, л. 415 об.—418), хранящейся въ Московской Синодальной библіотекѣ подъ № 562.
