1. Аз худый[пр.2] дедом своим Ярославом,[пр.3] благословленым, славным, наречен есмь[1] в крещении Василий, Русьскымь именемь Володимир, отцемь[пр.4] возлюбленымь и матерью своею Мьномахы…[2][пр.5]
2. Седя на санех, помыслих в души своей и похвалих Бога, иже мя сих днев грешнаго допровади.[пр.6]
3. Да дети мои, или ин кто,[пр.7] слышав сю грамотицю, не посмейтеся, но ему же люба детий моих, а примет ю в сердце свое, и не ленитися начнеть, такоже и тружатися: первое, Бога деля и душа своея, страх имейте Божий в сердци своемь, и милостыню творя неоскудну, то бо есть начаток всякому добру. Аще ли кому не люба грамотиця си, а не поохритаються[3], но тако се рекуть: на далечи пути, да на санех седя, безлепицю (е)си молвилъ.
4. Усретоша бо мя слы[4] от братья моея на Волзе, реша: «Потснися[5] к нам, да выженем Ростиславича[6] и волость их отимем; еже ли не поидеши с нами, то мы собе будем, а ты собе», и рех: «аще вы ся и гневаете, не могу вы я ити, ни креста преступити».[пр.8]
5. И отрядив я, взем Псалтырю,[пр.9] в печали разгнух я́:[7] и то ми ся выня: вскую печалуеши, душе? вскую смущаеши мя?[пр.10] и прочая.
6. И потом собрах словца си любая, и складох по ряду и написах: аще вы последняя не люба, а передняя приимайте.
7. а) Вскую печална еси, душе моя? вскую смущаеши мя? упова(й) на Бога, яко исповемся ему.[пр.10]
б) Не ревнуй лукавнующим, ни завиди творящим безаконье, зане лукавнующии потребятся, терпящии же Господа, ти обладають землею. И еще мало, и не будет грешника; взищеть места своего, и не обрящеть. Кротции же наследять землю, насладяться на множьстве мира. Назираеть грешный праведного, и поскрегчеть на нь зубы своими; Господь же посмеется ему, и прозрить, яко придеть день его. Оружья извлекоша грешьници, напряже лук свой истреляти нища и убога, заклати правые сердцемь. Оружье их внидеть в сердця их, и луци их скрушатся. Луче есть праведнику малое, паче богатства грешных многа. Яко мышца грешных сокрушатся, утвержаеть же праведные Господь.[пр.11] Яко се грешници погыбнуть,…[пр.12] праведныя же милуя и даеть.[пр.13] Яко благословящии его наследять землю, кленущии же его потребятся.[пр.14] От Господа стопы человеку исправятся…[пр.15] Егда ся падеть, и не разбьеться, яко Господь подъемлеть руку его. Ун бех, и сстарехся, и не видех праведника оставлена, ни семени его просяща хлеба. Весь день милует и в заим даеть праведный, и племя его благословлено будеть. Уклонися от зла, створи добро, взищи мира и пожени, и живи в векы века.[8][пр.16]
в) Помилуй мя, Боже, яко попра мя человек, весь день боряся, стужи ми. Попраша мя врази мои, яко мнози борющиися со мною с выше.[пр.17]
г) Возвеселится праведник, и егда видить месть; руце свои умыеть в крови грешника. И рече убо человек: аще есть плод праведника, и есть Бог судяй земли.[пр.18]
д) Измий мя от враг моих, Боже, и от встающих на мя отыми мя. Избави мя от творящих безаконье, и от мужа крови спаси мя; яко се уловиша душу мою…[9][пр.19]
е) Яко лучьши милость твоя, паче живота моего, и устне моя похвалита тя. Тако благословлю тя в животе моемь, и о имени твоемь воздею руце мои.[пр.20]
ж) Покры мя от соньма лукаваго, и от множьства делающих неправду.[пр.21]
з) Взвеселитеся вси праведнии сердцемь.[пр.22]
и) Благословлю Господа на всяко время, воину хвала его,[пр.23] и прочая.
8. а) Яко же бо Василий[пр.24] учаше, собрав ту уноша, душа чисты, нескверньни, телеси худу, кротку беседу и в меру слово Господне; яди (и) питью бес плища[10] велика быти, при старых молчати, премудрых слушати, старейшим покорятися, с точными и меншиими любовь имети; без луки беседующе, а много разумети; не свереповати словомь, ни хулити беседою, не обило смеятися, срамлятися старейших, к женам нелепым не беседовати, долу очи имети, а душу горе;…[11][пр.25] легкых власти ни в кую же имети, еже от всех честь.[пр.26]
б) Аще ли кто вас можеть инемь услети[12], от Бога мьзды да чаеть и вечных благ насладится.
в) О Владычице Богородице! отыми от убогаго сердца моего гордость и буесть, да не взношюся суетою мира сего в пустошнемь семь житьи.
г) Научися, верный человече, быти благочестию делатель, научися, по евангельскому словеси, очима управленье, языку удержанье, уму смеренье, телу порабощенье, гневу погубленье, помысл чист имети, понужаяся на добрая дела, Господа ради; лишаем — не мьсти, ненавидим любо гоним — терпи, хулим — моли[пр.27].
9. Умертви грех… Избавите обидима, судите сироте, оправдайте вдовицю; придете, да сожжемся, глаголеть Господь; аще будут греси ваши яко оброщени[13] яко снег обелю я́,[пр.28] и прочее.
10. Восияеть весна постная и цвет покаянья; очистим собе, братья, от всякоя крови плотьскыя и душевныя, Светодавцю вопьюще рцем: Слава тобе, человеколюбче!
11. По истине, дети моя, разумейте, како ти есть человеколюбець Бог милостив и премилостив; мы, человеци, грешни суще и смертни, то оже ны зло створить, то хощем и́ пожрети[14] и кровь его прольяти вскоре; а Господь наш, владея животом и смертью, согрешенья наша выше главы нашея терпить, и пакы и до живота нашего, яко отець, чадо свое любя, бья, и пакы привлачить е к собе.
12. Такоже и Господь наш показал ны есть на врагы победу, 3-ми делы добрыми избыти его и победити его: покаяньем, слезами и милостынею;[пр.29] да то вы, дети мои, не тяжька заповедь. Божья оже теми делы 3-ми избыти грехов своих и царствия не лишитися. А Бога деля не ленитеся, молю вы ся, не забывайте 3-х дел тех: не бо суть тяжка; ни одиночьство, ни чернечьство, ни голод, яко инии добрии терпять, но малым деломь улучити милость Божью[пр.30].
13. Что есть чедовек, яко помниши и́?[пр.31].
14. Велий еси, Господи, и чюдна дела твоя, никакже разум человеческ не можеть исповедати чюдес твоих; и пакы речем: велий еси, Господи, и чюдна дела твоя, и благословлено и хвално имя твое в векы по всей земли. Иже кто не похвалить, ни прославляеть силы твоея и твоих великых чюдес и доброт, устроеных на семь свете; како небо устроено, како ли солнце, како ли луна, како ли звезды, и тма и свет, и земля на водах положена, Господи, твоим промыслом! Зверье розноличнии, и птица и рыбы, украшены твоим промыслом, Господи! И сему чюду дивуемся, како от персти создав человека, како образи розноличнии в человечьских лицих, аще и весь мир совокупить, не вси в один образ, но кыйже своим лица образом, по Божии мудрости; и сему ся подивуемы, како птица небесные из ирья[15] идуть, и первее (в) наши руце, и не ставятся на одиной земли, но и силные и худые идуть по всем землям, Божиимь повеленьемь, да наполнятся леси и поля; все же то дал Бог на угодье человеком, на снедь, на веселье. Велика, Господи, милость твоя на нас, яже та угодья створил еси чедовека деля грешна. И ты же птице небесные умудрены тобою, Господи, егда повелиши, то вспоють, и чедовекы веселять тобе; и егда же не повелиши им, язык же имеюще онемеють.[пр.32]
15. А благословен еси, Господи, и хвален зело! всяка чюдеса и ты доброты створив и зделав, да иже не хвалить тебе, Господи, и не веруеть всем сердцемь и всею душею во имя Отца и Сына и святаго Духа, да будет проклят.
16. Си словца прочитаюче, дети моя, божествная, похвалите Бога, давшего нам милость свою, и се от худого моего безумья наказанье;[16] послушайте мене, аще не всего приимете, то половину.
17. Аще вы Бог умякчить сердце, и слезы своя испустите о гресех своих,[пр.33] рекуще: якоже блудницю и разбойника, и мытаря помиловал еси, тако и нас грешных помилуй.
18. Не грешите ни одину же ночь, аще можете, поклонитися до земли; аще ли вы ся начнеть немочи,[17] а трижды; а того не забывайте, не ленитеся, темь бо ночным поклоном и пеньем человек побежаеть дьявола, и что в день согрешить, а тем человек избываеть.[пр.34]
19. Аще и на кони ездяче не будеть ни с кым орудья,[18] аще инех молитв не умеете молвити, а «Господи помилуй» зовете бес престани, втайне; та бо молитва всех лепши, нежели мыслити безлепицю ездя.[пр.35]
20. Всего же паче убогых не забывайте, но елико могуще по силе кормите, и придавайте сироте, и вдовицю оправдите сами, а не вдавайте силным погубити человека.[пр.36]
21. Ни права, ни крива не убивайте, ни повелевайте убити его; аще будеть повинен смерти, а душа не погубляйте никакояже хрестьяны.[пр.37]
22. Речь молвяче, и лихо и добро,[19] не кленитеся Богомь, ни хреститеся, нету бо ти нужа никоеяже; аще ли вы будете крест целовати к братьи, или к кому,[пр.38] а ли управивше сердце свое, на немже можете устояти, тоже целуйте, и целовавше блюдете, да не, приступни, погубите душе своее.
23. Епископы, и попы, и игумены, с любовью взимайте от них благословленье, и не устраняйтеся от них, и по силе любите и набдите, да приимете от них молитву от Бога.[пр.39]
24. Паче всего гордости не имейте в сердци и в уме,[пр.40] но рцем: смертни есмы, днесь живи, а заутра в гробе; се все, что ны еси вдал, не наше, но твое, поручил ны еси на мало дний; и в земли не хороните:[пр.41] то ны есть велик грех.
25. Старыя чти яко отца, а молодыя яко братью.[пр.42]
26. В дому своемь не ленитеся, но все видите; не зрите на тивуна, ни на отрока,[20][пр.43] да не посмеются приходящии к вам и дому вашему, ни обеду вашему.
27. На войну вышед, не ленитеся, не зрите на воеводы; ни питью, ни еденью не лагодите, ни спанью; и стороже сами наряживайте, и ночь, отвсюду нарядивше около вои, тоже лязите, а рано встаньте; а оружья не снимайте с себе вборзе, не розглядавше ленощами, внезапу бо человек погыбаеть.
28. Лже блюдися и пьянства, и блуда, в томь бо душа погибаеть и тело.[пр.44]
29. Куда же ходяще путем по своим землям, не дайте пакости деяти отроком, ни своим, ни чюжим, ни в селех, ни в житех, да не кляти вас начнуть.[пр.45] Куда же поидете, идеже станете, напойте, накормите унеина;[21][пр.46] и боле же чтите гость,[пр.47] откуду же к вам придеть, или прост, или добр, или сол, аще не можете даром, — брашном и питьемь: ти бо мимоходячи[22] прославлять человека по всем землям любо добрым, любо злым.
30. Болнаго присетите; над мертвеця идете, яко вси мертвени есмы; и человека не минете, не привечавше, добро слово ему дадите.[пр.48]
31. Жену свою[23] любите, но не дайте им над собою власти.[пр.48]
32. Се же вы конець всему: страх Божий имейте выше всего.[пр.50]
33. Аще забываете всего, а часто прочитайте: и мне будеть бе — сорома, и вам будеть добро.
34. Егоже умеючи,[24] того не забывайте добраго, а его же не умеючи,[24] а тому ся учите, яко же бо отець мой, дома седя, изумеяше 5 язык,[пр.50а] в том бо честь от инех земль. Леность бо всему мати: еже умееть, то забудеть, а его же не умееть а тому ся не учить.[пр.51]
35. Добре же творяще, не мозите ся ленити ни на что же доброе, первое к церкви: да не застанеть вас солнце на постели; тако бо отець мой деяшеть блаженый и вси добрии мужи свершении; заутренюю отдавше Богови хвалу, и потом солнцю всходящю, и узревше солнце, и прославити Бога с радостью, и рече: просвети очи мои, Христе Боже, и(же) дал ми еси свет твой красный, и еще: Господи, приложи ми лето к лету, да прок, грехов своих покаявся, оправдив живот, тако похвалю Бога.[пр.52]
36. И седше думати с дружиною, или люди оправливати, или на лов ехати, или поездити, или лечи́ спати: спанье есть от Бога присужено полудне, о т чин[25] бо почиваеть и зверь, и птици, и человеци.[пр.53]
37. А се вы поведаю, дети моя, труд свой, оже ся есмь тружал, пути дея и ловы 13 лет.[пр.54]
38а. Первое к Ростову идох, сквозе Вятиче, посла мя отець, а сам иде Курьску…[пр.55]
…А на зиму (6585) с Святополком под Полтеск; ожгоша Полтеск; он иде Новугороду, а я с Половци на Одрьск, воюя; та Чернигову…
б. Всеслав Смолнеск ожьже, и аз всед с Черниговци о двоюконю[26], и не застахом в Смолиньске; темже путем по Всеславе пожег землю и повоевав до Лукамля и до Логожьска, та на Дрьютеск воюя, та Чернигову.
в. А на ту зиму повоеваша Половци Стародуб весь, и аз шед с Черниговци и с Половци, на Десне изьимахом князи Асадука и Саука, и дружину их избиша…
г. И на ту же осень идохом с Черниговци и с Половци, с Читеевичи, к Меньску: изъехахом[27] город, и не оставихом у него ни челядина, ни скотины…
д. И Стародубу идохом на Олга, зане ся бяше приложил к Половцем…
е. И се ныне иду Ростову…
ж. По Рождестве створихом мир с А(е)пою, и поим у него дчерь,[пр.56] идохом Смоленьску; и потомь идох Ростову.
з. И потомь ходихом к Володимерю на Ярославця, не терпяче злоб его.[пр.57]
и. А из Чернигова до Кыева нестишь[28] ездих ко отцю, днем есм переездил до вечерни.[пр.58]
39. А всех путий 80 и 3 великих, а прока не испомню менших. И миров есм створил с Половечьскыми князи без единого 20, и при отци и кроме отца.[29]
40. А се тружахся ловы дея…[30] А се в Чернигове деял есм: конь диких своима рукама связал есмь в пушах 10 и 20 живых конь, а кроме того же по Роси ездя имал есм своима рукама теже кони дикие. Тура мя 2 метала на розех и с конем, олень мя один бол,[31] а 2 лоси, один ногами топтал, а другый рогома бол, вепрь ми на бедре мечь оттял, медведь ми у колена подклада укусил, лютый зверь скочил ко мне на бедры и конь со мною поверже; и Бог неврежена мя сблюде.[пр.60а]
41. И с коня много падах, голову си розбих дважды, и руце в нозе своя вередих, в уности своей вередих, не блюда живота своего, ни щадя головы своея.
42. Еже было творити отроку моему, то сам есмь створил, дела на войне и на ловех, ночь и день, на зною и на зиме, не дая собе упокоя;[пр.61] на посадникы не зря, ни на биричи, сам творил, что было надобе, весь наряд и в дому своемь то я творил есмь; и в ловчих ловчий наряд сам есмь держал, и в конюсех, и о соколех, и о ястребех.
43. Тоже и худаго смерда[32] и убогые вдовице не дал есм силным обидети, и церковнаго наряда и службы сам есм призирал.
44. Да не зазрите ми, дети мои, ни ин кто, прочет, не хвалю бо ся ни дерзости своея, но хвалю Бога и прославьляю милость его, иже мя грешнаго и худаго селико лет сблюд от тех час смертных, и не ленива мя был створил, худаго, на вся дела человечьская потребна.
45. Да сю грамотицю прочитаючи, потснетеся на вся дела добрая, славяще Бога с святыми его.
46. Смерти бо ся, дети, не бояще, ни рати, ни от звери, но мужьское дело творите, како вы Бог подасть; оже бо яз от рати, и от звери и от воды, от коня спадаяся, то никто же вас не можеть вредитися и убити, понеже не будет от Бога повелено; а иже от Бога будеть смерть, то ни отець, ни мати, ни братья не могуть отьяти: но оче[33] добро есть блюсти, Божие блюденье леплее есть человечьскаго.
Примечания править
- ↑ В Лавр. списке — нареченемь; в изд. Арх. К. — нареченый.
- ↑ Начала Поучения не достает: после слова Мьномахы пробел в четыре с половиной строки и затем: …и хрестьяныхъ людий деля, колико бо сблюд (должно быть: съблюд) по милости своей и по отни молитве от всех бед. Седя на санех и пр.
- ↑ (По)охритатися — (по)гневаться, (по)досадовать; глумиться.
- ↑ Сел — посол.
- ↑ Потснися — от старинного «тснути» с предлогом по — поспешить, постараться («корень тск. — тщати, тщиться». Миклошич).
- ↑ Ростиславича — вин. двойств. числа: (Василько и Володаря) Ростиславичей.
- ↑ я = ю, винит. ж. р. — ее.
- ↑ Затем: Внегда стати человеком, убо живы пожерли ны быша; внегда прогневатися ярости его на ны, убо вода бы ны потопила.
- ↑ Затем: И яко гнев в ярости его, и живот в воли его; вечер водворится плачь, а заутра радость.
- ↑ Плищь — шум, крик.
- ↑ <Пребегати, не стрекати учить, легкых власти и пр.
- ↑ Услети — сделать, принести пользу.
- ↑ Оброщати — обагрять, ц. = сл.
- ↑ Пожрети — приносить жертву, в жертву, ц.-сл.
- ↑ Ирий (от aёr) — воздух, воздушное пространство. См. прим. 31а.
- ↑ Наказание — наставление, ц.-сл.
- ↑ Немочи = немощи — немощь, им. пад. В изд. Арх. К.: не мочи́.
- ↑ Орудие — дело, ц.-сл.
- ↑ Быть может: и лиху и добру (прим. ред.,) — лихому и доброму.
- ↑ Тиунг, тивун — судья низшей инстанции, приказчик, управитель. — Отрок — служитель, слуга; царедворец.
- ↑ Унеина — бедняка, просящего. См. прим. 46.
- ↑ То есть: мимоходяще.
- ↑ Должно быть: жены своя.
- ↑ а б Должно быть: умеюще… не умеюще.
- ↑ В Л. чина. О т чин — О ту пору, в то время.
- ↑ О двою-коню = о дву-конь, на двух конях, с конем в поводу.
- ↑ Изъехахом = изъездили, исколесили (В примеч. ред. издания Арх. К.: и взяхом).
- ↑ Нестишь (от стьзя?) — бездорожицей, прямым путем? По контексту: нестишь (честь, считать?) = несчетно, многократно.
- ↑ И далее: …а для скота[пр.59] много и многы порты свое; и пустил есм Половечскых князь лепших из оков толико: Шаруканя 2 брата, Багубарсовы 3, Овчины братье 4, а всех лепших князий инех 100; а самы князи Бог живы в руце дава: Коксусь с сыномь, Аклан, Бурчевичь, Таревьскый князь Азгулуй, и инех кметий мододых 16, то тех живы вед, исек, вметах в ту речку Славлий;[пр.60] по чередам избьено не с 200 в то время лепших.
- ↑ И далее: понеже седох в Чернигове, а из Чернигова вышед и д… (здесь, на средине листа прорван пергамент) …о лета по сту уганива(л) и имь даром всею силою кроме иного лова, кроме Турова, иже со отцемь ловил есм всяк зверь.
- ↑ Бол — бости — бодать.
- ↑ Смерд — простолюдин, человек низкого звания.
- ↑ В Лет. отче; следует: аще.
