1. Азъ худый[пр.2] дѣдомъ своимъ Ярославомъ[пр.3], благословленымъ, славнымъ, нареченъ есмь[1] въ крещении Василий, Русьскымь именемь Володимиръ, отцемь[пр.4] возлюбленымь и матерью своею Мьномахы[2][пр.5]…
2. Сѣдя на санехъ, помыслихъ в души своей и похвалихъ Бога, иже мя сихъ дневъ грѣшнаго допровади[пр.6].
3. Да дѣти мои, или инъ кто[пр.7], слышавъ сю грамотицю, не посмѣйтеся, но ему же люба дѣтий моихъ, а приметь ю в сердце свое, и не лѣнитися начнеть, такоже и тружатися: первое, Бога дѣля и душа своея, страх имѣйте Божий в сердци своемь, и милостыню творя неоскудну, то бо есть начатокъ всякому добру. Аще ли кому не люба грамотиця си, а не поохритаються[3], но тако се рекуть: на далечи пути, да на санехъ сѣдя, безлѣпицю (е)си молвилъ.
4. Усрѣтоша бо мя слы[4] от братья моея на Волзѣ, рѣша: «Потъснися[5] к намъ, да выженемъ Ростиславича[6] и волость ихъ отъимемъ; еже ли не поидеши с нами, то мы собѣ будемъ, а ты собѣ», и рѣхъ: «аще вы ся и гнѣваете, не могу вы я ити, ни креста преступити[пр.8]».
5. И отрядивъ я, вземъ Псалтырю[пр.9], в печали разгнухъ я́[7]: и то ми ся выня: вскую печалуеши, душе? вскую смущаеши мя[пр.10]? и прочая.
6. И потомъ собрахъ словца си любая, и складохъ по ряду и написахъ: аще вы послѣдняя не люба, а передняя приимайте.
7. а) Вскую печална еси, душе моя? вскую смущаеши мя? упова(й) на Бога, яко исповѣмся ему[пр.10].
б) Не ревнуй лукавнующимъ, ни завиди творящимъ безаконье, зане лукавнующии потребятся, терпящии же Господа, ти обладають землею. И еще мало, и не будетъ грѣшника; взищеть мѣста своего, и не обрящеть. Кротции же наслѣдять землю, насладяться на множьствѣ мира. Назираеть грѣшный праведнаго, и поскрегчеть на нь зубы своими; Господь же посмѣется ему, и прозрить, яко придеть день его. Оружья извлекоша грѣшьници, напряже лукъ свой истрѣляти нища и убога, заклати правыя сердцемь. Оружье ихъ внидеть въ сердця ихъ, и луци ихъ скрушатся. Луче есть праведнику малое, паче богатства грѣшныхъ многа. Яко мышца грѣшныхъ сокрушатся, утвержаеть же праведныя Господь[пр.11]. Яко се грѣшници погыбнуть[пр.12],.... праведныя же милуя и даеть [пр.13]. Яко благословящии его наслѣдять землю, кленущии же его потребятся[пр.14]. Отъ Господа стопы человѣку исправятся[пр.15]… Егда ся падеть, и не разбьеться, яко Господь подъемлеть руку его. Унъ бѣхъ, и сстарѣхся, и не видѣхъ праведника оставлена, ни сѣмени его просяща хлѣба. Весь день милуетъ и в заимъ даеть праведный, и племя его благословлено будеть. Уклонися отъ зла, створи добро, взищи мира и пожени, и живи в вѣкы вѣка[8][пр.16].
в) Помилуй мя, Боже, яко попра мя человѣкъ, весь день боряся, стужи ми. Попраша мя врази мои, яко мнози борющиися со мною с выше[пр.17].
г) Возвеселится праведникъ, и егда видить месть; руцѣ свои умыеть в крови грѣшника. И рече убо человѣкъ: аще есть плодъ праведника, и есть Богъ судяй земли[пр.18].
д) Измий мя отъ врагъ моихъ, Боже, и отъ встающихъ на мя отъими мя. Избави мя отъ творящихъ безаконье, и отъ мужа крови спаси мя; яко се уловиша душу мою[9][пр.19]…
е) Яко лучьши милость твоя, паче живота моего, и устнѣ моя похвалита тя. Тако благословлю тя в животѣ моемь, и о имени твоемь воздѣю руцѣ мои[пр.20].
ж) Покры мя отъ соньма лукаваго, и отъ множьства дѣлающихъ неправду[пр.21].
з) Възвеселитеся вси праведнии сердцемь[пр.22].
и) Благословлю Господа на всяко время, воину хвала его,[пр.23] и прочая.
8. а) Яко же бо Василий[пр.24] учаше, собравъ ту уноша, душа чисты, нескверньни, тѣлеси худу, кротку бесѣду и в мѣру слово Господне; яди (и) питью бесъ плища[10] велика быти, при старыхъ молчати, премудрыхъ слушати, старѣйшимъ покорятися, с точными и меншиими любовь имѣти; без луки бесѣдующе, а много разумѣти; не сверѣповати словомь, ни хулити бесѣдою, не обило смѣятися, срамлятися старѣйшихъ, к женамъ нелѣпымъ не бесѣдовати, долу очи имѣти, а душу горѣ;[11][пр.25].... легкыхъ власти ни в кую же имѣти, еже отъ всѣхъ честь[пр.26].
б) Аще ли кто васъ можеть инѣмь услѣти[12], отъ Бога мьзды да чаеть и вѣчныхъ благъ насладится.
в) О Владычице Богородице! отъими отъ убогаго сердца моего гордость и буесть, да не възношюся суетою мира сего в пустошнѣмь семь житьи.
г) Научися, вѣрный человѣче, быти благочестию дѣлатель, научися, по евангельскому словеси, очима управленье, языку удержанье, уму смѣренье, тѣлу порабощенье, гнѣву погубленье, помыслъ чистъ имѣти, понужаяся на добрая дѣла, Господа ради; лишаемъ — не мьсти, ненавидимъ любо гонимъ — терпи, хулимъ — моли[пр.27].
9. Умертви грѣхъ… Избавите обидима, судите сиротѣ, оправдайте вдовицю; придѣте, да сожжемъся, глаголеть Господь; аще будутъ грѣси ваши яко оброщени[13] яко снѣгъ обѣлю я́,[пр.28] и прочее.
10. Восияеть весна постная и цвѣтъ покаянья; очистимъ собе, братья, отъ всякоя крови плотьскыя и душевныя, Свѣтодавцю вопьюще рцѣмъ: Слава тобѣ, человѣколюбче!
11. По истинѣ, дѣти моя, разумѣйте, како ти есть человѣколюбець Богъ милостивъ и премилостивъ; мы, человѣци, грѣшни суще и смертни, то оже ны зло створить, то хощемъ и́ пожрети[14] и кровь его прольяти вскорѣ; а Господь нашъ, владѣя животомъ и смертью, согрѣшенья наша выше главы нашея терпить, и пакы и до живота нашего, яко отець, чадо свое любя, бья, и пакы привлачить е к собѣ.
12. Такоже и Господь нашъ показалъ ны есть на врагы побѣду, 3-ми дѣлы добрыми избыти его и побѣдити его: покаяньемъ, слезами и милостынею[пр.29]; да то вы, дѣти мои, не тяжька заповѣдь. Божья оже тѣми дѣлы 3-ми избыти грѣховъ своихъ и царствия не лишитися. А Бога дѣля не лѣнитеся, молю вы ся, не забывайте 3-хъ дѣлъ тѣхъ: не бо суть тяжка; ни одиночьство, ни чернечьство, ни голодъ, яко инии добрии терпять, но малымъ дѣломь улучити милость Божью[пр.30].
13. Что есть человѣкъ, яко помниши и́?[пр.31].
14. Велий еси, Господи, и чюдна дѣла твоя, никакже разумъ человѣческъ не можеть исповѣдати чюдесъ твоихъ; и пакы речемъ: велий еси, Господи, и чюдна дѣла твоя, и благословлено и хвално имя твое в вѣкы по всей земли. Иже кто не похвалить, ни прославляеть силы твоея и твоихъ великыхъ чюдесъ и добротъ, устроеныхъ на семь свѣтѣ; како небо устроено, како ли солнце, како ли луна, како ли звѣзды, и тма и свѣтъ, и земля на водахъ положена, Господи, твоимъ промысломъ! Звѣрье розноличнии, и птица и рыбы, украшены твоимъ промысломъ, Господи! И сему чюду дивуемъся, како отъ персти создавъ человѣка, како образи розноличнии въ человѣчьскихъ лицихъ, аще и весь миръ совокупить, не вси въ одинъ образъ, но кыйже своимъ лица образомъ, по Божии мудрости; и сему ся подивуемы, како птица небесныя изъ ирья[15] идуть, и первѣе (въ) наши руцѣ, и не ставятся на одиной земли, но и силныя и худыя идуть по всѣмъ землямъ, Божиимь повелѣньемь, да наполнятся лѣси и поля; все же то далъ Богъ на угодье человѣкомъ, на снѣдь, на веселье. Велика, Господи, милость твоя на насъ, яже та угодья створилъ еси чедовѣка дѣля грѣшна. И ты же птицѣ небесныя умудрены тобою, Господи, егда повелиши, то вспоють, и чедовѣкы веселять тобе; и егда же не повелиши имъ, языкъ же имѣюще онемѣють[пр.32].
15. А благословенъ еси, Господи, и хваленъ зѣло! всяка чюдеса и ты доброты створивъ и здѣлавъ, да иже не хвалить тебе, Господи, и не вѣруеть всѣмъ сердцемь и всею душею во имя Отца и Сына и святаго Духа, да будетъ проклятъ.
16. Си словца прочитаюче, дѣти моя, божествная, похвалите Бога, давшаго намъ милость свою, и се отъ худаго моего безумья наказанье[16]; послушайте мене, аще не всего приімете, то половину.
17. Аще вы Богъ умякчить сердце, и слезы своя испустите о грѣсѣхъ своихъ[пр.33], рекуще: якоже блудницю и разбойника и мытаря помиловалъ еси, тако и насъ грѣшныхъ помилуй.
18. Не грѣшите ни одіну же ночь, аще можете, поклонитися до земли; аще ли вы ся начнеть немочи[17], а трижды; а того не забывайте, не лѣнитеся, тѣмь бо ночнымъ поклономъ и пѣньемъ человѣкъ побѣжаеть дьявола, и что въ день согрѣшить, а тѣмъ человѣкъ избываеть[пр.34].
19. Аще и на кони ѣздяче не будеть ни с кымъ орудья[18], аще инѣхъ молитвъ не умѣете молвити, а «Господи помилуй» зовѣте бес престани, втайнѣ; та бо молитва всѣхъ лѣпши, нежели мыслити безлѣпицю ѣздя[пр.35].
20. Всего же паче убогыхъ не забывайте, но елико могуще по силѣ кормите, и придавайте сиротѣ, и вдовицю оправдите сами, а не вдавайте силнымъ погубити человѣка[пр.36].
21. Ни права, ни крива не убивайте, ни повелѣвайте убити его; аще будеть повиненъ смерти, а душа не погубляйте никакояже хрестьяны[пр.37].
22. Рѣчь молвяче, и лихо и добро[19], не кленитеся Богомь, ни хреститеся, нѣту бо ти нужа никоеяже; аще ли вы будете крестъ цѣловати к братьи, или к кому[пр.38], а ли управивъше сердце свое, на немже можете устояти, тоже цѣлуйте, и цѣловавше блюдѣте, да не, приступни, погубите душѣ своеѣ.
23. Епископы, и попы и игумены, с любовью взимайте отъ нихъ благословленье, и не устраняйтеся отъ нихъ, и по силѣ любите и набдите, да приимете отъ нихъ молитву отъ Бога[пр.39].
24. Паче всего гордости не имѣйте в сердци и въ умѣ[пр.40], но рцѣмъ: смертни есмы, днесь живи, а заутра в гробѣ; се все, что ны еси вдалъ, не наше, но твое, поручилъ ны еси на мало дний; и в земли не хороните[пр.41]: то ны есть великъ грѣхъ.
25. Старыя чти яко отца, а молодыя яко братью[пр.42].
26. В дому своемь не лѣнитеся, но все видите; не зрите на тивуна, ни на отрока[20][пр.43], да не посмѣются приходящии к вамъ и дому вашему, ни обѣду вашему.
27. На войну вышедъ, не лѣнитеся, не зрите на воеводы; ни питью, ни ѣденью не лагодите, ни спанью; и сторожѣ сами наряживайте, и ночь, отвсюду нарядивше около вои, тоже лязите, а рано встаньте; а оружья не снимайте с себе вборзѣ, не розглядавше лѣнощами, внезапу бо человѣкъ погыбаеть.
28. Лжѣ блюдися и пьянства и блуда, в томь бо душа погибаеть и тѣло[пр.44].
29. Куда же ходяще путемъ по своимъ землямъ, не дайте пакости дѣяти отрокомъ, ни своимъ, ни чюжимъ, ни в селѣхъ, ни в житѣхъ, да не кляти васъ начнуть[пр.45]. Куда же поидете, идеже станете, напойте, накормите унеина[21][пр.46]; и боле же чтите гость[пр.47], откуду же к вамъ придеть, или простъ, или добръ, или солъ, аще не можете даромъ, — брашномъ и питьемь: ти бо мимоходячи[22] прославлять человѣка по всѣмъ землямъ любо добрымъ, любо злымъ.
30. Болнаго присѣтите; надъ мертвеця идѣте, яко вси мертвени есмы; и человѣка не минѣте, не привѣчавше, добро слово ему дадите[пр.48].
31. Жену свою[23] любите, но не дайте имъ надъ собою власти[пр.48].
32. Се же вы конець всему: страхъ Божий имѣйте выше всего[пр.50].
33. Аще забываете всего, а часто прочитайте: и мнѣ будеть бе — сорома, и вамъ будеть добро.
34. Егоже умѣючи[24], того не забывайте добраго, а его же не умѣючи[24], а тому ся учите, яко же бо отець мой, дома сѣдя, изумѣяше 5 языкъ[пр.50а], в томъ бо честь отъ инѣхъ земль. Лѣность бо всему мати: еже умѣеть, то забудеть, а его же не умѣеть а тому ся не учить[пр.51].
35. Добрѣ же творяще, не мозите ся лѣнити ни на что же доброе, первое к церкви: да не застанеть васъ солнце на постели; тако бо отець мой дѣяшеть блаженый и вси добрии мужи свершении; заутренюю отдавше Богови хвалу, и потомъ солнцю въсходящю, и узрѣвше солнце, и прославити Бога с радостью, и рече: просвѣти очи мои, Христе Боже, и(же) далъ ми еси свѣтъ твой красный, и еще: Господи, приложи ми лѣто къ лѣту, да прокъ, грѣховъ своихъ покаявъся, оправдивъ животъ, тако похвалю Бога[пр.53].
36. И сѣдше думати с дружиною, или люди оправливати, или на ловъ ѣхати, или поѣздити, или лечи́ спати: спанье есть отъ Бога присужено полудне, о тъ чинъ[25] бо почиваеть и звѣрь, и птици, и человѣци[пр.53].
37. А се вы повѣдаю, дѣти моя, трудъ свой, оже ся есмь тружалъ, пути дѣя и ловы 13 лѣтъ[пр.54].
38а. Первое к Ростову идохъ, сквозѣ Вятичѣ, посла мя отець, а самъ иде Курьску…[пр.55].
…А на зиму (6585) с Святополкомъ подъ Полтескъ; ожгоша Полтескъ; онъ иде Новугороду, а я с Половци на Одрьскъ, воюя; та Чернигову…
б. Всеславъ Смолнескъ ожьже, и азъ всѣдъ с Черниговци о двоюконю[26], и не застахомъ в Смолиньскѣ; тѣмже путемъ по Всеславѣ пожегъ землю и повоевавъ до Лукамля и до Логожьска, та на Дрьютескъ воюя, та Чернигову.
в. А на ту зиму повоеваша Половци Стародубъ весь, и азъ шедъ с Черниговци и с Половци, на Деснѣ изьимахомъ князи Асадука и Саука, и дружину ихъ избиша…
г. И на ту же осень идохомъ с Черниговци и с Половци, с Читѣевичи, к Мѣньску: изъѣхахомъ[27] городъ, и не оставихомъ у него ни челядина, ни скотины…
д. И Стародубу идохомъ на Олга, зане ся бяше приложилъ к Половцемъ…
е. И се нынѣ иду Ростову…
ж. По Рождествѣ створихомъ миръ съ А(е)пою, и поимъ у него дчерь[пр.56], идохомъ Смоленьску; и потомь идохъ Ростову.
з. И потомь ходихомъ къ Володимерю на Ярославця, не терпяче злобъ его[пр.57].
и. А изъ Чернигова до Кыева нестишь[28] ѣздихъ ко отцю, днемъ есмъ переѣздилъ до вечерни[пр.58].
39. А всѣхъ путий 80 и 3 великихъ, а прока не испомню меншихъ. И мировъ есмъ створилъ с Половечьскыми князи безъ единого 20, и при отци и кромѣ отца[29].
40. А се тружахъся ловы дѣя[30]… А се в Черниговѣ дѣялъ есмъ: конь дикихъ своима рукама связалъ есмь въ пушахъ 10 и 20 живыхъ конь, а кромѣ того же по Роси ѣздя ималъ есмъ своима рукама тѣже кони дикиѣ. Тура мя 2 метала на розѣхъ и с конемъ, олень мя одинъ болъ[31], а 2 лоси, одинъ ногами топталъ, а другый рогома болъ, вепрь ми на бедрѣ мечь оттялъ, медвѣдь ми у колѣна подъклада укусилъ, лютый звѣрь скочилъ ко мнѣ на бедры и конь со мною поверже; и Богъ неврежена мя съблюде[пр.60а].
41. И с коня много падахъ, голову си розбихъ дважды, и руцѣ в нозѣ своя вередихъ, въ уности своей вередихъ, не блюда живота своего, ни щадя головы своея.
42. Еже было творити отроку моему, то самъ есмь створилъ, дѣла на войнѣ и на ловѣхъ, ночь и день, на зною и на зимѣ, не дая собѣ упокоя[пр.61]; на посадникы не зря, ні на биричи, самъ творилъ, что было надобѣ, весь нарядъ и в дому своемь то я творилъ есмь; і въ ловчихъ ловчий нарядъ самъ есмь держалъ, и въ конюсѣхъ, и о соколѣхъ и о ястребѣхъ.
43. Тоже и худаго смерда[32] и убогыѣ вдовицѣ не далъ есмъ силнымъ обидѣти, и церковнаго наряда и службы самъ есмъ призиралъ.
44. Да не зазрите ми, дѣти мои, ни инъ кто, прочетъ, не хвалю бо ся ни дерзости своея, но хвалю Бога и прославьляю милость его, иже мя грѣшнаго и худаго селико лѣтъ сблюдъ отъ тѣхъ часъ смертныхъ, и не лѣнива мя былъ створилъ, худаго, на вся дѣла человѣчьская потребна.
45. Да сю грамотицю прочитаючи, потъснѣтеся на вся дѣла добрая, славяще Бога с святыми его.
46. Смерти бо ся, дѣти, не бояще, ни рати, ни отъ звѣри, но мужьское дѣло творите, како вы Богъ подасть; оже бо язъ отъ рати, и отъ звѣри и отъ воды, отъ коня спадаяся, то никто же васъ не можеть вредитися и убити, понеже не будетъ отъ Бога повелѣно; а иже отъ Бога будеть смерть, то ни отець, ни мати, ни братья не могуть отьяти: но оче[33] добро есть блюсти, Божие блюденье леплѣѣ есть человѣчьскаго.
Примѣчанія
править- ↑ Въ Лавр. спискѣ — нареченѣмь; въ изд. Арх. К. — нареченый.
- ↑ Начала Поученія не достаетъ: послѣ слова Мьномахы пробѣлъ въ 4½ строки и затѣмъ: …и хрестьяныхъ людий дѣля, колико бо сблюдъ (д. быть: съблюдъ) по милости своей и по отни молитвѣ отъ всѣхъ бѣдъ. Сѣдя на санехъ и пр.
- ↑ (По)охритатися — (по)гнѣваться, (по)досадовать; глумиться.
- ↑ Сѣлъ — посолъ.
- ↑ Потъснися — отъ стар. тъснути съ предл. по — поспѣшить, постараться («корень тъск. — тъщати, тщиться». Миклошичъ).
- ↑ Ростиславича — вин. двойств. числа: (Василько и Володаря) Ростиславичей.
- ↑ я = ю, винит. ж. р. — ее.
- ↑ Затемъ: Внегда стати человѣкомъ, убо живы пожерли ны быша; внегда прогнѣватися ярости его на ны, убо вода бы ны потопила.
- ↑ Затѣмъ: И яко гнѣвъ въ ярости его, и животъ в воли его; вечеръ водворится плачь, а заутра радость.
- ↑ Плищь — шумъ, крикъ.
- ↑ <Пребѣгати, не стрѣкати учить, легкыхъ власти и пр.
- ↑ Услѣти — сдѣлать, принести пользу.
- ↑ Оброщати — обагрять, ц. = сл.
- ↑ Пожрѣти — приносить жертву, въ жертву, ц. — сл.
- ↑ Ирій (отъ aёr) — воздухъ, воздушное пространство. См. прим. 31а.
- ↑ Наказаніе — наставленіе, ц.—сл.
- ↑ Немочи = немощи — немощь, им. пад. Въ изд. Арх. К.: не мочѝ.
- ↑ Орудіе — дѣло, ц.—сл.
- ↑ Быть можетъ: и лиху и добру (прим. ред.,) — лихому и доброму.
- ↑ Тіунг, тивунъ — судья низшей инстанціи, приказчикъ, управитель. — Отрокъ — служитель, слуга; царедворецъ.
- ↑ Унеина — бѣдняка, просящаго. См. прим. 46.
- ↑ Т. е.: мимоходяще.
- ↑ Должно быть: жены своя.
- ↑ а б Должно быть: умѣюще… не умѣюще.
- ↑ Въ Л. чина. О тъ чинъ — О ту пору, въ то время.
- ↑ О двою-коню = о дву-конь, на двухъ коняхъ, съ конемъ въ поводу.
- ↑ Изъѣхахомъ = изъѣздили, исколесили (Въ примѣч. ред. изданія Арх. К.: и взяхомъ).
- ↑ Нестишь (отъ стьзя?) — бездорожицей, прямымъ путемъ? По контексту: нестишь (честь, считать?) = несчетно, многократно.
- ↑ И далѣе:.. а для скота[пр.59] много и многы порты своѣ; и пустилъ есмъ Половечскыхъ князь лѣпшихъ изъ оковъ толико: Шаруканя 2 брата, Багубарсовы 3, Овчины братьѣ 4, а всѣхъ лѣпшихъ князий инѣхъ 100; а самы князи Богъ живы в руцѣ дава: Коксусь с сыномь, Акланъ, Бурчевичь, Таревьскый князь Азгулуй, и инѣхъ кметий мододыхъ 16, то тѣхъ живы ведъ, исѣкъ, вметахъ в ту рѣчку Славлий[пр.60]; по чередамъ избьено не съ 200 в то время лѣпшихъ.
- ↑ И далѣе: понеже сѣдохъ въ Черниговѣ, а изъ Чернигова вышедъ и д… (здѣсь, на срединѣ листа прорванъ пергаментъ)… о лѣта по сту уганива(лъ) и имь даромъ всею силою кромѣ иного лова, кромѣ Турова, иже со отцемь ловилъ есмъ всякъ звѣрь.
- ↑ Болъ — бости — бодать.
- ↑ Смердъ — простолюдинъ, человѣкъ низкаго званія.
- ↑ Въ Лѣт. отче; слѣдуетъ: аще.
