Викитека

Домострой. По рукописям Императорской Публичной Библиотеки (Яковлев 1867)/I/30/ДО

< Домострой. По рукописям Императорской Публичной Библиотеки (Яковлев 1867)‎ | I/30

 

[77]
ГЛАВА Л[1].
КАКО ПОУЧАТИ МУЖУ СВОЯ ЖЕНА[2] БОГУ УГОДИТИ И МУЖУ СВОЕМУ НАРОВИТИ[3], КАКЪ ДОМЪ СВОИ[4] СТРОИТИ И ВСЯКАЯ ДОМАШНЯЯ ПОРЯДНЯ И РУКОДѢЛІЕ ЗНАТИ, И СЛУГЪ УЧИТИ, И САМОМУ ДѢЛАТИ.

Подобаетъ убо мужемъ поучати женъ своихъ съ любовію и благоразсуднымъ наказаніемъ. Жены мужеи своихъ вопрошаютъ о всякомъ благочиніи, како душа спасти, и Богу и мужу угодити, и домъ свои добре строити, и во всемъ мужу[5] покорятися и, что онъ накажетъ, то съ любовію и со страхомъ внимати и творити по сему писанію. Первое имѣти страхъ Божіи и чистота тѣлесная, якожъ и преже[6] указано бысть. Воставъ отъ ложа своего и очистивъ[7] себя, и [78]молебная совершивъ, слугамъ[8] дѣло указати дневное, и всякому рукодѣлію и что работа дневная: ясти варити, и которой хлѣбъ печи сытнои или рѣшетнои; и сама бы знала какъ мука сѣяти, какъ квашня поставити, и притворити, и замѣсити, и хлѣбы валяти и испечи, квасны и убухны[9] и выпеклися; калачи и пироги такожъ и колко муки возмутъ, и колко испекутъ, и колко родится изъ четверти и изъ осмины, или решета, и сколко высѣвковъ[10] мѣра и счетъ знати во всемъ. А ѣству мясную, и рыбную, и всякую, пироги, и блины, и кашки, и кисель и всякой приспѣхъ печи и варити все бы сама государыня умѣла; ино и слугъ научати умѣетъ и все сама знаетъ. Коли хлѣбы печи[11], тогда и платіе мыти[12], ино съ одною стряпня и дровамъ неубыточно; и дозирати како рубахи красныя мыютъ и лучее платье; и колко мыла и золы поидетъ и на колко рубашекъ, и хорошо бы вымыть и выпарено[13], и изсушено и изкатано, и скатерти, и убрусы, и ширинки и утиральники все такожъ: и всему тому самои счетъ знати, и отдати и взяти все сполна бѣло и чисто. А ветчаное поплатити вѣжливо; ино[14] пригодится нищему дати. А коли хлѣбъ пекутъ, ино того тѣста велѣти отняти и пирогъ сдѣлати[15], или[16] пшеничныя пекутъ[17] и изъ [79]межьситки велѣти пироговъ же начинити[18], въ скоромныя дни со скоромною начинкою, какова лучится, а въ посныя дни съ кашею, или съ горохомъ, или съ сокомъ, или съ рѣпою, или грибки, и съ рыжички, и съ капустою или что Богъ лучитъ; ино семьѣ потѣшеніе. А всякую бы ѣству мясную и рыбную и всякои приспѣхъ скоромнои и постнои, сама бы знала и умѣла сдѣлати, и слугъ[19] научити; тѣ государыни добры[20] и домовицы[21]. Тако жъ бы знала пивнои, и медовои, и бражнои, и кваснои, и уксуснои, и кислымъ щамъ и всякои обиходъ какъ дѣлаютъ и поваренои и хлѣбнои, и въ чемъ что родится и колко съ чего будетъ. Кали знаетъ все добрая жена мужнимъ[22] наказаніемъ и грозою, и своимъ добрымъ разумомъ и наукою, ино будетъ споро и всего полно[23]. А которая женщина или дѣвка рукодѣльна тѣмъ дѣло указати: рубашка дѣлати, и убрусъ брати и шити, или поставъ ткати, или золотное и шелковое пялешное дѣло и которая чему учена, того всего досматривати и дозирати; а всякои мастерицы самои государыни прядело, и шелкъ[24], и золото и серебро отвѣсити, и тафты отмѣрити, и смѣтити, и наказати сколко чего надобѣ и сколко чего дастъ, и прикроити и примѣрити самои, и все рукодѣліе знати. А малыхъ дѣвокъ учити, которая чему пригожа; а мужнимъ женкамъ, которыя черное дѣло дѣло дѣлаютъ: избу топятъ, хлѣбы пекутъ, и платье мыютъ[25] [80]тѣмъ даютъ ленъ на себя, и на мужа, и на дѣти прясти; а одинокая женка[26] и дѣвка на государя ленъ прядутъ, а изъ греби и пачеси на себя, или какъ пригоже. Все бы вѣдала сама государыня, которои какое дѣло дасть, и колко чего возметъ; и сколко выдѣлано и кто днемъ, мало ли много ли сдѣлаетъ[27], то бы сама все знала и въ счетѣ было бъ все. А сама бы государыня, отнюдь ни какожъ, ни которыми дѣлы опричь немощи, или по мужни воли безъ дѣла не была; ино и слугамъ, на нее смотря, повадно дѣлати. Мужъ ли придетъ или гостья обычная придетъ, а она бъ всегда сидѣла надъ рукадѣліемъ сама: то еи честь и слава, и мужу похвала. А николижъ бы слуги государыни не будили, а ложилася бы всегда отъ рукодѣлія, молебная совершивъ, такожъ бы слугъ учила[28].

 

Примѣчанія править

  1. ↑ Р. Т. № 38 и Конш. глава КѲ № 1 ЛД.
  2. ↑ Конш. какъ.
  3. ↑ Ibid.=унаровити.
  4. ↑ Ibid. добре.
  5. ↑ Ibid.=ему.
  6. ↑ Ibid.=впреди.
  7. ↑ Ibid.=предочистивъ.
  8. ↑ Р. Т. № 38 и Конш.=женамъ и дѣвкамъ.
  9. ↑ Конш.=бухоны.
  10. ↑ Ibid. и колко испекутъ.
  11. ↑ Ibid.=пекутъ.
  12. ↑ Ibid.=моютъ.
  13. ↑ Ibid. и начисто выполоскати.
  14. ↑ Р. Т. № 38 сиротинкѣ.
  15. ↑ Конш.=начинити.
  16. ↑ Ibid.=а коли.
  17. ↑ Ibid. и семъе.
  18. ↑ Р. Т. № 38 и 1 и Конш.=сдѣлати.
  19. ↑ Конш.=слушку.
  20. ↑ Ibid.=домовная.
  21. ↑ Ibid. добрые.
  22. ↑ Ibid.=добраго мужа.
  23. ↑ Ibid.=будетъ много.
  24. ↑ Ibid.=и тафта и камка.
  25. ↑ Р. Т. № 38 и Конш.=моютъ.
  26. ↑ Конш.=женочка.
  27. ↑ Ibid.=и сколко изъ чево выидетъ.
  28. ↑ Пог. дѣіати, а не гуляти и не спати.


Это произведение перешло в общественное достояние в России согласно ст. 1281 ГК РФ, и в странах, где срок охраны авторского права действует на протяжении жизни автора плюс 70 лет или менее.

Если произведение является переводом, или иным производным произведением, или создано в соавторстве, то срок действия исключительного авторского права истёк для всех авторов оригинала и перевода.

Источник — https://ru.wikisource.org/w/index.php?title=Домострой._По_рукописям_Императорской_Публичной_Библиотеки_(Яковлев_1867)/I/30/ДО&oldid=1185300