Благословеніе отъ благовещенскаго попа Силиверста[2], возлюбленному и единородному моему сыну, Анѳиму. Милое мое чадо, дорогое! послушай отца своего наказанія, рождьшаго тя, и воспитавша въ добрѣ наказаніи и въ заповѣдѣхъ Господнихъ; и страху Божію, и божественному писанію изучену, и всякому закону христіянскому; и промыслу доброму во всякихъ торговляхъ, и во всякихъ товарѣхъ наказану; и святительское благословеніе на себѣ имѣешъ, и царьское Государево жалованіе, и Государыни царицы, и братіи его, и всѣхъ боляръ; и съ добрыми людями водишся; и со многими иноземцы великая торговля и дружба есть; все еси доброе получилъ, умѣй сіе[3] совершити о Бозѣ: яко же начато при нашемъ попеченіи, и по насъ такожде бы Богъ соблюлъ по тому жити. И законному браку сочтахъ тебѣ, и добру родителю благородную[4] дщерь; и благословилъ есми тебя всякою святынею, и честными кресты, и святыми образы, и благословеннымъ стяжаніемъ, яко же мню отъ праведныхъ трудовъ; а въ невѣданіи Богъ правитель. И нынѣ убо, сыну Анѳимъ, предаю тебѣ и поручаю, и оставляю Создателю нашему, доброму блюстителю, Ісусу Христу, и его матери причистыя Богородоцы заступницы нашея, помощницы и всѣмъ Святымъ: яко же рече писаніе: «потщися дѣти оставити наказаны заповѣдемъ Господнимъ, лутче неправеднаго богатства; аще и въ праведномъ убожествѣ нежели въ неправеднемъ богатствѣ.» И ты чадо блюдися неправеднаго имѣнія, а твори добрая дѣла. Имѣй, чадо, великую вѣру къ Богу; все упованіе возлагай на Господа; ни кто же надѣяся на Христа не погибнетъ. И прибѣгай съ вѣрою къ святымъ Божіимъ; заутрени не просыпай; обѣдни не прогуливай; вечерни не погрѣши и не пропивай; повечерница, и полунощница, и часы въ дому своемъ всегда, по вся дни, пѣти: то всякому христіанину Божій долгъ. Аще возможно по времени правила прибавить[5],—на твоемъ произволеніи; болшую милость отъ Бога пріобрящеши. А въ церкви Божіи, и въ дому, на правилѣ, и на всякомъ пѣніи и моленіи самъ, и жену, и дѣтей учи и всѣхъ домочадцевъ со страхомъ стояти, Богови молитись и со вниманіемъ слушати, отнюдь въ тѣ поры ни о чемъ не бесѣдовати, ни обзиратись, развѣ великія[6] нужды. А говорити правило кѣлейное и церковное единогласно, чисто, а не въ двое. Священническій и иноческій чинъ почитай: тѣ бо суть Божіи слуги, тѣми очищаемся отъ грѣховъ, тѣ имѣютъ дерзновеніе молитися Господу о грѣсѣхъ нашихъ и Бога милостива сотворятъ. Повинуйся, чадо, отцу духовному, и всякому священническому чину во всякомъ духовномъ наказаніи; а жена такожде. Въ домъ свои ихъ призывай молитися о здравіи, за Царя и Государя, и за Царицу, и чада ихъ, и за братію его, и за вся хрестіяне; и о своемъ согрѣшеніи, и о своихъ домочадцахъ молебная совершаи; и воду бы святити съ животворящаго креста и со святыхъ мощей, и съ чюдотворныхъ образовъ; аще болѣзни ради, за здравіе и масло свѣщаютъ. И въ церквахъ Божіихъ такожде твори; приходи съ милостынею, и съ приношеніемъ, и за здравіе, и породителехъ преставльшихся, память твори, со всякою чистотою: и самъ воспамяновенъ будеши отъ Бога. Церковниковъ, и нищихъ, и маломожныхъ, и бѣдныхъ, и скорбныхъ, и странныхъ, и пришельцевъ призываи въ домъ свои, и по силѣ накорми, и напои, и согрѣй, и милостыню давай, отъ праведныхъ своихъ трудовъ, и въ дому, и въ торгу, и на пути,—тою бо очищаются грѣхи, тѣ убо ходатаи къ Богу о грѣсѣхъ нашихъ. Имѣй, чадо, истинную правду и любовь нелицемѣрную ко всѣмъ; не осуждай никого ни въ чемъ: свои грѣхи разсуждай, како избыти ихъ. Чего себѣ[7] не любишъ, того и другу не твори, и храни чистоту тѣлесную паче всего; да наступи на совѣсть свою, на лютаго врага; и возненавиди, якоже милаго душетлѣнаго друга, хмѣльнаго питія; Господа ради, отверзи отъ себя піянство,—въ семъ недугѣ и вся злая рождаются обычаи отъ него. Аще отъ сего сохранитъ тя Господь, вся благая и полезная отъ Бога получишъ, и отъ человѣкъ честенъ будеши, и души своей просвѣтъ сотвориши на вси добрая дѣла. Воспомяни, чадо, апостольское слово: «не прельщайтеся ни піяницы, ни блудницы, ни прелюбодѣи, ни содомлянинѣ, ни тать, ни клеветникъ, ни хищникъ царствія Божія не наслѣдяты». Аще которою страстію побѣдился еси, чадо, или въ которое грѣхопаденіе впалъ, о семъ прибѣгни къ Богу, съ теплою вѣрою, и ко отцу духовному, съ горкими слезами; и плачися грѣховъ своихъ[8], и кайся истиннѣ, еже таковая не творити; и заповѣдь отца духовнаго храни, и епитимію держи: милостивъ Господь, праведныхъ любитъ, грѣшныхъ всѣхъ зоветъ ко спасенію. И паки храни и блюди себѣ въ христіанскомъ праведномъ законѣ жити; удержи языкъ свой отъ зла, и устнѣ свои, еже не глаголати льсти; храни себя отъ лжи, и похвалы, и отъ клеветы; и самъ ни въ чемъ не величайся; уничижи себѣ всѣхъ паче[9], узриши славу Божію; всякаго, чадо, не презри во всякой нужди; помятуй, чадо како мы жихомъ вѣкъ: ни кто же изыде отъ дому нашего тощъ или скорбенъ; по силѣ, вся потребная, всякому человѣку, Бога ради, давано и скорбнаго словомъ пользовано и аще кому, въ чемъ возможно, и мы помогали, Бога ради, и ссужали всячески; а намъ не видимо Христосъ изобильно посылалъ милость Свою всякихъ благихъ. А не помыслихомъ ни на кого да ни кому[10] на зло развѣ не доразумія, безъ лукавства. Чадо, люби монашескій чинъ, и странники, и пришельцы, всегда въ дому твоемъ питались; и въ монастыри съ милостынею и съ кормлею приходи; и въ темницахъ и убогихъ и больныхъ посѣщай, и милостыню по силѣ давай. А домочадцевъ своихъ одѣвай и корми довольно. А жену свою люби, и въ законѣ живи и по заповѣди Господни. Въ недѣлю и въ среду, и въ пятокъ, и въ праздники Господни, и въ великій постъ въ чистотѣ пребывати, въ постѣ и въ молитвѣ и въ покаяніи, и во всякихъ добродѣтѣлехъ. Законно жительство въ славу Богу и въ животъ вѣчный[11]; а любодѣемъ и прелюбодѣемъ судитъ Богъ. Да самъ, чадо, что твориши, того и жену учи: всякому страху Божію, и вѣжеству, и промыслу, и рукодѣлію, и всякому домашнему обиходу и всякой поряднѣ; умѣла бъ[12] и печи, и варити, и всякую домашную порядню умѣла, и всякое бъ женское рукодѣліе знала; и коли сама все знаетъ и умѣетъ, ино умѣетъ дѣтей и слугъ всему научити[13], и наказати во всемъ; а сама бы хмѣльнаго питія отнюдь не любила, и дѣти, и слуги у ней того не любили же. А всегда бъ жена безъ рукодѣлія сама, ни на часъ не была, кромѣ[14] немощи, а слуги у ней такожде. А въ гостяхъ будетъ, или у ней гости, отнюдь бы сама пьяна не была, а а съ гостьями бесѣдовала о рукодѣліи, и о домашней поряднѣ, и о законномъ христіанскомъ житіи; а не пересмѣивала бъ[15] ни о комъ ни чего. Въ гостяхъ, и въ дому пѣсней бѣсовскихъ, и всякаго срамословія, и блядливыхъ рѣчей, и блудныхъ пословицъ, сама, и слуги, не говорила, и не творила бъ того бы, и ни у кого не слушала. И волхвовъ, и кудесниковъ и всякаго чарованія не знала бы; и въ домы не пущали ни мужиковъ ни жинокъ.
Аще не внимаетъ сего, всячески наказуй[16] на единѣ, да наказавъ и примолви, и жалуй люби ея. Такожде и дѣтей и домочадцевъ своихъ учи страху Божію и всякимъ добрымъ дѣломъ; понеже тебѣ отвѣтъ дати о нихъ въ день страшнаго суда. Аще по нашему наказанію и по сему писанію учнете жити, велію благодать отъ Бога обрящете, и жизнь вѣчную наслѣдити и домочадцы своими: да держится, чадо, добрыхъ людей во всякихъ чинѣхъ и ревнуй добрымъ дѣломъ; внимай словеса добрыя и твори я. Почитай часто божественное писаніе, и влагай въ сердце себѣ на пользу. Видѣлъ еси, чадо, како въ житіи семъ жихомъ во благословеніи и страсѣ Божіи, и въ простотѣ сердца и церковномъ прилежаніи со страхомъ божественнымъ писаніемъ ползуючися всегда; и како были Божіею милостію отъ всѣхъ почитаемъ, и всѣми любимъ, и всякому и въ потребныхъ уноровилъ: и рукодѣліемъ и службою и покореніемъ; а не гордынею, ни прикословіемъ; не осуждахъ никого, не просмѣивалъ, ни укаривалъ ни кого, ни бранивалъся ни съ кѣмъ, а пришла отъ кого обида, и мы, Бога ради, терпѣли и на себя вину полагали; и тѣмъ и врази друзи[17] быша; и аще которою виною, душевною или тѣлесною согрѣшихъ предъ Богомъ и предъ всѣми человѣки, и въскорѣ о томъ плакахся къ Богу грѣха своего; и у отца духовнаго каяся со слезами, и умилне прощеніе прося, и заповѣди его духовныя съ любовію храняхъ, якоже повелитъ ми; и аще кто мя въ моемъ прегрѣшеніи, или въ каковѣ невѣжествѣ обличитъ, или кто духовнѣ накажетъ, или кто въ посмѣхъ поноситъ мя и укоряетъ, все сія съ любовію пріимахъ, и себѣ внимахъ; аще по дѣломъ, о семъ каяхся и отъ таковыхъ дѣлъ удаляхся, Богу поспѣшествующу ми; аще, что неповинио, и не по дѣлу, молва или поношеніе, или посмѣхъ, или укоризна, или удареніе,—во всемъ томъ винихся и не оправдахся предъ человѣки: Богъ сіе праведнымъ своимъ милосердіемъ исправитъ. Воспоминахъ Евангельское слово: «любите враги ваша, творите добро ненавидящимъ васъ, благословите клянущая васъ[18] молите за творящая вамъ пакости и изгоняющая вы; бьющему тя въ ланиту обрати ему и другую, и отъ взимающаго ти ризу и срачицу не возбрани; всякому просящему у тебя дай; и отъ взимающаго твоя не истязай; и аще кто тя поиметъ по силѣ поприще едино, иди съ нимъ или два. И паки еще воспоминая и причастную молитву:» Господи, даждь ми милость, ненавидящимъ мя, и враждующимъ ми[19] такожде и оклеветающимъ мя; да ни кто же ни какоже, отъ нихъ меня ради нечистаго и грѣшнаго, зло нѣкако постраждетъ, ни въ нынѣшнемъ вѣцѣ ни въ будущемъ; но очисти ихъ милостію своею и покры ихъ благодатію своею благіи. Тѣмъ же утѣшахъ себѣ. Непогрѣшихъ никогда же церковнаго пѣнія отъ юности своея и досего времени, кромѣ немощи; ни нища, ни странна, ни убога, ни скорбна, ни печальна никогда же не презрѣхъ, кромѣ невѣдѣнія. И въ темницы, и больна, и плѣнена, и изъ работы, и должна[20] и во всякихъ нуждахъ, по силѣ окупихъ, и гладныхъ по силѣ накормихъ. Работныхъ своихъ всѣхъ свободихъ и надѣлихъ; и иныхъ окупихъ изъ работы на свободу попущахъ. И всѣ тѣ работные наши свободны, и добрыми домама живутъ, яко видиши, молятъ за ны Бога и доброхотаютъ намъ всегда, а кто забылъ насъ,—Богъ его проститъ во всемъ. А нынѣ домочадцы наши всѣ свободны, живутъ у насъ по воли. Видѣлъ еси чадо[21]: многихъ пусточныхъ сиротъ и работныхъ и убогихъ, мужеска поду и женска, и въ Новѣ градѣ и здѣся[22] на Москвѣ въскормихъ и въспоихъ до совершенна возраста; и изучихъ кто чего достоинъ; многихъ грамотѣ, и писати, и пѣти, и иныхъ иконнаго писма, инѣхъ книжнаго рукодѣлія, овехъ серебрянаго мастерства, и иныхъ всякихъ рукодѣлій, а иныхъ всякими многими торговли изучихъ торговати. А мати твоя многія дѣвицы и вдовы пустошныя и убогія воспитала въ добрѣ наказаніи, изучила рукодѣлію и всякому домашнему обиходу и, надѣливъ, замужъ повыдавала[23], а мужескіи полъ поженили у добрыхъ людеи. И всѣмъ тѣмъ, далъ Богъ, свободны: домами своими живутъ; много въ священническомъ и въ дьяконскомъ чину, и въ дьяцехъ, и въ подъячихъ, и во всякихъ чинѣхъ, кто чего дородился и въ чемъ кому Богъ благословитъ быти: ови рукодѣлничаютъ всякими промыслы; а многіе торгуютъ въ лавкахъ; мнози гостьбу дѣютъ въ различныхъ странахъ всякими торговлями. А Божіею милостію, во всѣхъ тѣхъ нашихъ вскормленникехъ[24] и въ послуживцахъ ни соромота, ни убытокъ, ни какая продажа отъ людеи не бывала, ни людямъ отъ насъ ни тяжба ни съ кѣмъ не бывала, во всемъ Богъ соблюдалъ по ся мѣста; а отъ кого намъ отъ своихъ скормленниковъ досада и убытки многи и велики бывали, ино то все на себѣ понесено, ни кто того не слыхалъ, а намъ Богъ исполнилъ. И ты, чадо, тому же ревнуй и тако твори: на себѣ всякую обиду претерпи,—Богъ сугубо исполнитъ. Не познахъ другіи жены, развѣ матери твоея, а еже съ нею і обѣщаховѣ, то и сотворихъ о Бозѣ. Соверши[25], христіански скончати животъ мой въ заповѣдехъ твоихъ. Живи, чадо, по христіанскому закону, во всякихъ обычаяхъ безъ всякія хитрости ко всемъ. А не всякому слуху вѣруй: доброму ревнуй, лукавыхъ и законопреступныхъ во всякихъ обычаяхъ, отнюдъ не люби; а законный бракъ со всякимъ опасеніемъ храни: до кончины живота своего; чистоту тѣлесную храни; кромѣ жены своей незнай никого. И пьянственнаго недуга такожде берегись; въ двухъ сихъ главизнахъ—вся злая свидятся, до ада преисподняго; и домъ пустъ, имѣнію тщета и отъ Бога непомилованъ будетъ, и отъ людей безчестенъ и посмѣянъ и укоренъ и отъ родителю проклятъ. Аще, чадо, тебя отъ сего злаго Господь сохранитъ законъ сохраниши по заповѣди Господни, отъ хмельнаго питія воздержися, и во всякихъ добродѣтелехъ поживеши, якоже есть богобоязливіи людіе, и ты отъ Бога помилованъ будеши, а отъ людеи честенъ; и исполнитъ Господь домъ твой всякою благодатію. И еще воспомяну ти: гостей пріѣзжихъ у себя кормити; а на сосѣдствѣ и знаемыми любовно жити[26] о хлѣбѣ и о соли, и о доброй сдѣлкѣ и о всякой ссудѣ. А поѣдешъ куды въ гости поминки недороги вози за любовь. А въ пути отъ стола ѣсть подавай домашнимъ государемъ, и приходящимъ, и ихъ съ собою сажай за столъ, а маломожнымъ милостыню давай. Аще сія твориши, то вездѣ тебя ждутъ и встрѣчаютъ[27], и отъ всякаго лиха берегутъ; не стану не подадутъ, и на дорогѣ не разобьютъ; того ради кормятъ добраго за добро, и лихаго отъ лиха; тотъ ся на добро обратитъ, во всемъ въ томъ убытка не будетъ[28]; въ добрыхъ людехъ хлѣбъ соль заемное дѣло, а поминки такожде, а дружба въ вѣкъ, а слава добрая. А на дорогѣ, и въ пиру, и въ торговлѣ, отнюдь самъ брани не зачни; а кто излаетъ терпи, Бога ради, отъ брани уклонись; добродѣтель злобу преодолѣваетъ. Господь гордымъ противится смиренна Богъ любитъ, а покорному Богъ благодать дастъ. Аще людемъ твоимъ лучится брань съ кѣмъ гдѣ ни буди и ты на свои[29] брани; а кручиновато дѣло и ты удари, хоти твои и правы тѣмъ брань утолиши, такожде убытокъ и вража не будетъ. Да еще недруга напоити и накормити хлѣбомъ и солью, ино вмѣсто вражды дружба. Воспоминай сыну великое Божіе милосердіе къ намъ и заступленіе: отъ юности и до сего времени, на поруку не давывалъ ни кого, ни меня не давалъ ни кто, во всякихъ вещахъ, и на судѣ не бывалъ ни съ кѣмъ, ни искивалъ, ни отвѣчивалъ.
А видѣлъ еси самъ: въ рукодѣліяхъ, и во многихъ во всякихъ вещѣхъ: мастеровъ всякихъ было много: иконники, книжные писцы, серебренные мастеры, кузнецы, и плотники, и каменщики, и всякіе рукодѣлники; деньги имъ даваны на рукодѣлье напередъ, по рублю, по два, и по три, и по пяти, и по десяти и болше; а многи были чмуты и бражники; и со всѣми тѣми мастеры, въ сорокъ лѣтъ, далъ Богъ, разлѣлнося безъ остуды, и безъ пристава, и безъ всякія кручины. Все то мирено хлѣбомъ да солью, да питьемъ, да подачею, и всякою добродѣтелью, да своимъ терпѣніемъ. А самъ у кого что купливалъ, ино ему отъ меня милая разласка: безъ волокиты платежъ, да еще хлѣбъ да соль, сверхъ. Ино дружба въ вѣкъ; ино всегда мимо меня не продастъ, и у всего недойметъ. А кому что продавывалъ, все въ любовь, а не въ оманъ,—не любитъ кто моего товару, и азъ назадъ возму, а денги отдамъ; а о купли и о продажѣ, ни съ кѣмъ брани ни тяжи не бывало; ино добрые люди во всемъ вѣрили, и здѣшніи[30], и иноземцы. Никому ни въ чемъ, ни слыгивано, ни манено, ни пересрачивано, ни въ рукодѣліи, ни въ торговлѣ, ни кабалы, ни запись на себѣ, ни въ чемъ не бывала; а видѣлъ еси самъ, какіи и великіи сплетки со многимя людми были; да все, далъ бы Богъ, безъ вражды скончалось; а вѣдаешъ самъ, не богатствомъ жити съ добрыми людьми, правдою, да ласкою, да любовію, а не гордостію, и безъ всякія лжи. Чадо мое любимое, Анѳимъ! Еже тя поучахъ, и всячески наказывахъ, о всякомъ добродѣтелномъ и богодохновеннымъ житіемъ[31], и грубое сіе писаніе худаго моего ученія предахъ[32], молю тя, чадо, Господа ради, и Пресвятыя Богородицы, и великихъ чюдотворцовъ, почитай себѣ, съ любовію и со вниманіемъ, и напиши на сердцы своемъ, и прося у Бога помощи, и разума, и крѣпости, и вся предиреченная сія съ любовію и дѣломъ твори; такожде, посему писанію, жену поучай и наказуй; такожде и дѣтей своихъ и домочадцевъ; всѣхъ учи страху Божію и добродѣтелному житію. И аще вся сія самъ твориши, и жену, и дѣти, и рабъ, и рабынь, и всѣхъ ближнихъ своихъ, и знаемыхъ такожде научи, и домъ свои добре устроиши, вся благая отъ Бога обрящеши, и жизнь вѣчную наслѣдиши, со всѣми одержимыми тобою. Аще, сыну, моего моленія и поученія не внемлеши, и по сему писанію не учнешъ жити, яко и прочіе добрые люди, и богобоязнивіи мужіе, и отца духовнаго заповѣди не учнешъ хранити, и отъ богодухновенныхъ мужей не пользуешися поученіемъ, и почитаніемъ святаго писанія, и христіанскаго праведнаго закона не храниши, и о домочадцехъ своихъ не радиши, и азъ твоему грѣху не причастенъ: самъ о себѣ, и женѣ, и о домочадцѣхъ своихъ, отвѣтъ даси въ день страшнаго суда. Аще чадо мое возлюбленное, и малые сія заповѣди, худаго моего ученія сохраниши, и по нашему пути поидеши, и словесъ моихъ послушаеши, и дѣломъ творити начнеши[33], и наслѣдникъ небесному царствію; и будетъ на тебѣ милость Божія, и Пречистые Богородицы заступницы нашея, и великихъ чюдотвордевъ: Николы, Петра, Алексія, и Сергія, и Никона, Кирилла, и Варлаама, и Александра, и всѣхъ Сватыхъ, и родительская молитва, и мое вѣчное на тебѣ благословеніе, отъ нынѣ и до вѣка. И благословляю тебя чада своего и прощаю въ семъ вѣцѣ и въ будущемъ; и буде на тебѣ Божія милость, и на женѣ твоей, и на чадѣхъ вашихъ[34], и на всѣхъ доброхотахъ вашихъ, отъ нынѣ и до вѣка.
Чадо мое, единородное и любимое, Анѳимъ! произволилъ Богъ, и благочестивый, православный Царь Государь велѣлъ послужити тебѣ въ своей царьской казнѣ, да у таможнихъ дѣлъ; и нынѣ молю тя, чадо, и со слезами глаголю: Господа ради, памятуй царьское наказаніе, прося у Бога помощи и разума, отъ всеи души и отъ всего помышленія; служи вѣрою и правдою, безъ всякія хитрости, и безъ всякаго лукавства; во всемъ Государьскомъ: другу не дружи, недругу не мсти, и волокита бъ людемъ ни въ чемъ отъ тебя не была; всякаго отдѣлай съ любовію, безъ брани; а не поспѣется и добрымъ словомъ отвѣщай, и присрочивъ не изволоча отпусти.
А въ торговлѣ прямую розласку чини: душевредная бо твоя служба государю не была ни въ чемъ; а самъ благословеннымъ государьскимъ урокомъ сытъ буди; и все бы у тебя государьское было всегда въ счетѣ, и въ смѣтѣ, и въ писмѣ и приходѣ и расходѣ; къ казначеемъ буди послушенъ, а съ товарищами совѣтенъ, а и подъячимъ, и къ мастеромъ и къ сторожемъ, грозенъ и любовенъ и ко всякимъ людемъ привѣтенъ, а побѣдныхъ, и скорбныхъ, и нужныхъ, и полонениковъ отнюдь безволокитно управляй[35] и отъ себя по силѣ накорми, напой и милостыню дай, по человѣку смотря; а и случится судъ: всякому человѣку богату и убогу, другу и недругу, и аще свое дѣло истинно и праведно, безволокитно, и безъ всякія хитрости соверши: по евангельскому словеси: «и не на лица судите, сынове человѣчестіи, но праведенъ судъ судите, имъ же бо судомъ судите, судится вамъ; въ ню же мѣру мѣрите, возмѣрится.»
Примѣчанія
править- ↑ Главы ѮВ и ѮГ (62 и 63) отсутствуют. — Примечание редактора Викитеки.
- ↑ Конш.=Силивестра.
- ↑ Ibid.=еси.
- ↑ =благодарную.
- ↑ Ibid.=прибавить.
- ↑ =кія.
- ↑ Ibid.=самъ.
- ↑ Ibid.=о грѣсехъ своихъ.
- ↑ Ibid. человѣкъ.
- ↑ Ibid.=никогда.
- ↑ Ibid.=жизнь вѣчную.
- ↑ Ibid. сама.
- ↑ Ibid. и наряжати.
- ↑ Ibid.=развѣ.
- ↑ Ibid. и не переговаривала бы.
- ↑ Ibid. страхомъ и спасая; а не гневаися на жену, а жена на тебѣ, наказуй на единѣ;
- ↑ Ibid.=други.
- ↑ Ibid.=вы.
- ↑ Ibid. и поношающимъ ми.
- ↑ Ibid.=изъ работы должьна,
- ↑ Ibid. мое.
- ↑ Ibid.=здѣ.
- ↑ Ibid.=давала.
- ↑ Ibid.=скормленикехъ.
- ↑ Ibid. Христе.
- ↑ Ibid.=живи.
- ↑ Ibid. а въ путь провожаютъ.
- ↑ Ibid. нѣтъ.
- ↑ Ibid.=своихъ
- ↑ Ibid.=здѣ.
- ↑ Ibid.=богодухновенномъ житіи.
- ↑ Ibid. ти.
- ↑ Ibid. и будеши сынъ свѣту.
- ↑ Ibid.=твоихъ.
- ↑ Ibid.=управь.
