А которой служка въ которой службѣ[2] береженъ и по приказу[3] живетъ, въ которомъ приказѣ и въ службѣ чисто ходитъ безхитросно: за посмѣхъ не отдастъ и самъ не украдетъ, а вездѣ ѣства и питіе и всякая потреба покрыта, и не сгнило, и не поплѣсневело, и не прокисло, и вездѣ подмѣтено, и вытерто, и не намочено, и не налито, и не нагрязнено, и не насорено; и суды всякіе чисты, и перемыты, и устроено хорошо; и ѣства остатки перебрано цѣло и въ предь блюсти про государя и про гость, а початое въ расходъ давати и въ столъ, кому что достойно и какъ ему велено отъ государя; и во всякой службѣ добро и бережно служитъ, и по приказу чинитъ и того пожаловати, и добрымъ словомъ привѣчать, и ѣсти и пити подати и нужда его всякая исполнити; а чего безхитросно, или недогадкою, или неразуміемъ не гораздо сдѣлалъ, или попортилъ что, и въ томъ словомъ наказати передо всѣми, всѣ бъ того береглись и вины отдати; а въ другіе и въ третіе проступить, или лѣнится ино, по винѣ и по дѣлу смотря, по разсуждедію наказати и побити доброму; была бъ честь, а худому и наказаніе, а всему тому наукъ. А государыня женокъ и дѣвокъ въ своемъ обиходѣ такожде сзираетъ, и смѣчаетъ[4] и наказуетъ такожде, какъ выше сего[5] писано.
