А на погребѣхъ, и на ледникѣхъ, и въ житницахъ и въ сушилѣхъ, и въ клѣтѣхъ, и въ анбарѣхъ, и въ конюшняхъ по вся дни въ вечере въ кой любо день: пересмотрити самому государю всякого питія и ѣствы, и всякаго обиходу, и всякаго запасу, и всякой рухляди; и въ конюшнѣ, и въ хлѣбнѣ, и въ поварнѣ, и въ чьемъ приказѣ или у ключника, или у повара, или у хлѣбника, или у конюха всего пересмотрити самому, по тому чину и стройно[1], какъ въ сей памяти[2] писано; и перепытати колько чего есть; и всему ли есть счетъ и мѣра, и писмо; да все то смѣтити и сгадати самому: и сколько чего сдѣлано и сколько чего разошлося, и кому что отдано[3], и все бы то умѣли сказати именно. Иного вечера повара и хлѣбника, иного вечера[4] пивовара и конюха смотрити и смѣтити во всемъ, а ключнику туто же быти. И, только вездѣ стройно, по наказу и все соблюдено, и счетъ сойдется; и устроено хорошо и счетъ отдастъ подлинно и памятной прямо, ино того, за его службу жаловати; а кто небереженіемъ или истерялъ, или испортилъ, или сломалъ, или покралъ, ино посмотря по винѣ: наказывати и пѣня чинити[5]. И въ поварняхъ, а въ хлѣбняхъ и во всякихъ хоромѣхъ, и въ конюшнѣ у всякой животины, и въ сѣнникахъ; у мастеровъ, и у мастерицъ, и учениковъ[6], и у торговцевъ, и у всякихъ своихъ прикащиковъ, всегда всего пересматривати и пытати; только все по наказу, ино добро, а не потому наказаніе, по винѣ смотря, по прежеписанному. А за доброе устроеніе и бреженіе любити и жаловати всячески доброму была бъ честь, а худому гроза[7].
