А въ пивоварнюю поварню[2], на пиво, и на брагу, и на кислые шти, солоду, и муки, и хмѣлю отдати; то бъ было все въ писмѣ, и смѣрено, и въ счетѣ. А коли пиво затираютъ,—ячное, или овсяное, или ржаное, или хмѣль парятъ, и у квашня[3], и у сливная[4] дозирати самому, все было бережно и чисто, и не разкрадено, и неизпрокужено, и за посмѣхъ не выпито[5]. А коли пиво варятъ,—ино отпаривъ пиво, и силенъ толко солодъ, ино бочку и болши другова пива нарядятъ[6], а послѣ всякаго пива водою на гущу поливаютъ; воды взогрѣвъ ведеръ съ тридцать и съ сорокъ на ячную гушу, и съ пятдесятъ и шестдесятъ взогрѣвъ възлити, или болши по вари[7] смотря; и тотъ истокъ приквасишь,—добрѣ хорошо семьѣ пити; а исперва, послѣду приквасивъ, на кислые шти пригодится. А уксусъ ставити изъ добраго сусла, и въ береженіи, и въ теплѣ держати, и въ чистотѣ приходити къ нему. А хмѣлины пивные копити на винную брагу, и беречи лѣте на леду съ сусломъ, чтобы не испортити, а дрожи такожде копити на винную брагу, и въ перепускъ, и бережно держати; а на тотъ запасъ ветчаные суды пригожаются, толко бъ были въ запасѣ, даи перекрѣплены. А медъ сытити самому[8], а какъ кишитъ хоромина та запечатати, самому толко назирати, и ни кто бъ тутъ не ходилъ; а сливати самому же; а на сливанье не были. А вино курити, самому неотступно же быти, или кто вѣренъ[9] и приказати; и у перепуска потому же[10]; да смѣчать по сколку изъ котла ораки, первой и другой, и послѣду уточатъ; а у перепуску потому же смѣчать: колко изъ котла укуритъ,—перваго, и средняго, и послѣду. И на погребъ, и на ледникъ, и въ сушило и въ житницы,—безъ себя никого не пускати; и вездѣ самому отдавати, и отмѣрити, и отвѣсити; и сколко кому чего дастъ, то все записати.
