[83]51.—1658, генваря 5. Письмо Кіевскаго духовенства къ царю Алексѣю Михайловичу о варварскомъ притѣсненіи православныхъ Русскихъ отъ католиковъ и уніятовъ въ Польшѣ и Литвѣ и съ предложеніемъ овладеть этими сторонами.
Божіею милостію великому государю царю и великому князю Алексѣю Михайловичю, всеа Великія и Малыя и Бѣлыя Росіи самодержцу, Московскому и многихъ государствъ и земель облаадателю, нашему жъ великому князю Кіевскому, мы, смиренный Инокентій Гизель, [84]архимаритъ великіе чюдотворные Кіева-печерскіе лавры, и многогрѣшный Іосифъ Нелюбовичъ Тукальскій, архимаритъ Лесчинскій, вашего царьского величества, государя нашего, всегдашніе богомолцы и недостойные рабы, до лица земли челомъ бьемъ.
Простираяй слово недостойныхъ молитвъ нашихъ предъ всевидящимъ царемъ господемъ и Богомъ нашимъ Исусъ Христомъ о пресвѣтломъ скипетрѣ державы вашего царского величества, государя нашего, да во здравіи долгоденственномъ и многолѣтномъ государствованіи державою крѣпости своея, вашего царьского величества, побѣды на враги даровати и покорити подъ нозѣ вашего царского величества вся супостаты изволитъ, усердно желаемъ. Къ сему аще и нѣсмы достойны начертаніемъ симъ, за смиреніе и недостоинство наше, аки непотребные рабы, принадати къ пресвѣтлому престолу вашего царского величествомъ,—всяко бо уничижаяй себе, съ Давидомъ святымъ рещи, понужденны есми; что есть Давидъ? сице мы грѣшны—развѣ песъ здохлъ,—но понеже ко всѣхъ царей кесарю возвращеніе наше есть, егоже не токмо царемъ, но и отцемъ своимъ, о немже живемъ и движемся и есмы, наречемъ; вѣмы, яко сіе дѣло, на неже подвигохомся, въ буеесть и тщеславіе вмѣненно намъ не будетъ; разсужденіе бо вещи, о нейже писати дерзнухомъ, явитъ истинну, истинна объявитъ ревность, а сія лукавыхъ человѣкъ, глаголющихъ вашему царскому величеству миръ и утверженіе,—ярость, крамолу, лукавство и вся хитростная льщенія скажетъ; тіи же, видя въ сынѣхъ Израилевыхъ Левитскаго рода ревнитель Ѳинеэста поразивъ зло творящихъ, и вмѣнися ему въ правду; а Илія ревнуя поревновахъ по Господѣ Бозѣ, рекше злыхъ злѣ погубляше, не токмо огненна сподобися на небо шествія, но и еще во свидѣтельство имъ и языкомъ пріити имать прежде втораго пришествія Спасителя нашего. Не сіе тщаніе се наше, пресвѣтлый благочестивый и Богомъ вѣнчанный государю нашъ царю, да меча и вся оружія воинская изнешне на враги церкве Христовы восточныя, отмщенія ихъ, аки отмстители по правиламъ святыхъ отецъ Божіихъ нареченны бывше, воспріимемъ и мзды каковыя-либо сподобимся, но да явятца нами злоправныхъ людей, се есть Ляховъ и Литвы, вашему царскому величеству лесть. Тѣ убо жестосерды и жестоки исперва бывше, вся злая, не аки раб(ы), симъ же образомъ вашего царского величества милость обрѣтохомъ, но яко враги, всегда лукавно устрояютъ; державою же вашего царского величества защищенны, цѣлы пребывающе, на разореніе области вашего царского величества согласующеся, не токмо сами на брань противу вашего царского величества
устремлятися хощутъ, но и окрестныя себе, си есть Западного цесаря,—сему жъ всуе титлу христіянского предаютъ нѣкіе: не бѣ бо прежде вражды на христіанъ Греческихъ, отъ Римлянъ вознесенныя, ему сіе николиже дано,—сему бо королевство Польское дати обѣщаша и договорными грамоты утвердиша, такожъ Пруского, Курлянского и прочихъ подвизаютъ и съ Свейскимъ миръ имѣти хощутъ, аще съ ними ратовати грады и державы вашего царского величества обѣщаютца; къ тому жъ и Крымскихъ поганъ готовыхъ имѣти тщатца. Сему злу и дѣлу всѣхъ повѣтовъ, въ державѣ вашего царского величества сущихъ, шляхту Литовскую единомышленно врученныхъ, лукавнующихъ, со Христомъ водворяющеся, а со Іюдеи совокупляющеся, а имянно же сіи: Новгородка Литовского, въ немже по древнему обычаю вящше 6,000 ратныхъ людей именуетца, Минскіе, Слонимскіе, Волковицкіе, Гроденскіе и прочіе всѣ, идѣже ересію Римскою прельщены живутъ, отъ нихже всѣ яко православію святому, такожде роду всему Російскому, искони быша силнѣе, паче въ нынѣшнее время, вашему царскому величеству вся злая слагающе въ [85]сердцахъ своихъ, суть враги. Глаголютъ же Новгородцкіе, яко имъ отъ умертвія Обринского, судьи ихъ, и Моклока, что по крестному цѣлованью обѣщался никакова дѣла вашему царскому величеству нѣсть, чего ради съ гетманы и съ желныри Литовскими всегда о воздвиженіи брани противу вашего царского величества совѣтують, да вскорѣ вооружшеся, въ невѣдомо время ратовать грады вашего царского величества начнутъ. Но аще кто речетъ: гдѣ есть истинна?—сію, егда умолчатъ людіе, явѣ скажетъ, по словеси спасителному, каменіе, глаголя: всякъ творяй ложь, сынъ лжи и отъ непріязни есть. Сицевыми суть лживы Ляхове, гнѣвъ имуще къ вашему царскому величеству и всему православію; гнѣвъ же правды Божія не содѣловаетъ , и аще умяхчиша словеса своя паче елея, виждь ваше царское величества, яко сія суть стрѣлы. Что бо ихъ слово, развѣ да ульстятъ и убіютъ и погубятъ православныхъ? Уже бо явѣ напрязаютъ лукъ свой сострѣляти во мрацѣ правыя сердцемъ, се есть любовію къ нимъ подвигшеся вашего царского величества. Любовь же аще и всему вѣруетъ, но и разсужденія требуетъ, его же Богословъ учитъ: не всякому духу вѣруйте, но испытайте духи, аще отъ Бога суть. Разсужденіе жъ се испытовати начнетъ, чесо ради договоръ подъ Вильномъ бывшій не токмо доселѣ не имать кончины своея,—прежде бо совѣтъ общій сице, съ чѣмъ великій на избраніе на королевство Польское вашего царского величества сложити обѣщавшеся, королемъ Польскимъ и великимъ княземъ Литовскимъ титлу писать рекше, никако сего не сотвориша, но паче раздоръ явѣ творяще и злохитрый нравъ свой являюще, Западному цесарю и наслѣдникомъ его со всею коруною въ рабы вдашася; уже бо сей Краковъ и варницы сольные, Велички и Бохни нареченные, въ своя взялъ есть руцѣ. Сія злохитрыхъ враговъ дѣла, ревнующимъ намъ по благочестіи святомъ и о всякой чести и цѣлости вашего царского величества, яки православного царя, емуже доброхотству любовь должны есмы усердно стоящимъ, видяще, яко солга себѣ неправда, возвѣстити вашему царскому величеству достойно судихомъ. Разсмотри прилѣжно, ваше царское величество, великій государю царю, и прежде лѣта времени храни ся и всю свою державу отъ псовъ; врагу же твоему не ими вѣры николиже. Премудраго бо есть преди размышляти, некогдаже не надѣяхся не глаголати, а понеже о семъ къ вашему царскому величеству писати дерзнухомъ,—со Авраамомъ молящеся, да не вмѣнится намъ въ грѣхъ. Вѣмы бо, яко милостивъ еси, ваше царское величество, приклоняяся ко слезамъ нищихъ и воздыханію убогихъ, и на ино подвигшеся, благочестивыхъ всѣхъ въ бѣдѣ и скорби и нуждѣ сущйхъ, усты и гласомъ возопити намъ къ вашему царскому величеству достоитъ: доколѣ, праведный царю, вземлеши душа наша? Мы надѣяхомся, яко ваше царское величество, хотяй спасти Христова Израиля, да не токмо десницею Господнею, молитвами пресвятыя Дѣвы Богородицы, въ десницу вашего царского величества крѣпкую вданные грады и люди въ православіи святомъ укрѣпятца, но и ненаказанные супостаты, отъ церкве святыя восточные отпадше, пришедше въ чювство, пріимутъ жалость о суетной крамолѣ своей, и либо съ пшеницею—сице съ православными смѣшшеся, се есть проклятую ту свою отвергше, въ житницу Господню соберутца, либо огнемъ праведныя ярости. Сего же, по ложному изволенію своему, пріяти въ чистцы, сирѣчь во огни чистительномъ, душамъ своимъ, вѣрую, искусятца и явятъ, аще ихъ дѣло и намѣреніе есть отъ Бога, а не по угожденію человѣческому. Любящимъ убо Бога вся поспѣшествуютъ во благое; отъ любве бо ни огнь, ни мечь, ни раны, ни настоящая, ни будущая, по апостолу, боголюбца отлучити немогутъ. О семъ всѣ православные, духомъ и вѣрою къ Спасителю своему горяще, отъ пятидесятъ лѣтъ и [86]вящше въ Вильнѣ, во Львовѣ, въ Люблинѣ, въ Брести, въ Пинску, въ Минску, въ Сокалю, въ Красномъ-ставѣ, въ Трубешевѣ, въ Бѣльску, въ Каменцѣ, въ Новогродку, въ Полотцку, во Витебску, въ Оршѣ, въ Могилевѣ и прочіихъ, идѣже православніи житія своя имѣша, вся напасти, не токмо сокровищъ , честій , имѣней своихъ отчюждени бывше, но и темницы и раны и біенія, узы желѣзны, наруганія, клеветы и досады о укрѣпляющемъ ихъ Іисусъ Христѣ терпѣша. Имъ бо дано бысть не токмо вѣровати въ него, но и еже по немъ пострадати. Озлоблени же бывше, отъ лица собору радующеся отхождаху; но и до крове ставше мужественнѣ. Богаты зѣло два житія Виленскіе, Ольшаница и Захарій, къ нимже и Угринъ нѣкій, видя безъ правды озлобленіе ихъ, присовокупися,—на уды розсѣцанія, прокленше и поплевавше проклятую унѣю, что изъ воля пострадати людьми Божіими, неже нарицатися сыны, дщери Фараоновы, сирѣчь—достоинства всякихъ честей, аще бы уніяты быти изволили, имъ обѣщанныя, отвергше, подъяша. Витебскихъ и Полотцкихъ людей, въ Витебску 24 изящныхъ, мечемъ скончашася; Афанасія игумена Берестейского, который ко блаженной памяти вашего царского величества родителю на Москву духомъ пророчествія, со иконою чюдотворною пречистыя госпожи нашея Дѣвы Богородицы Купятицкою дошедше, его царскому величеству побѣду на враги и умноженія державы православныхъ царей Московскихъ, ясне же скипетры короля Польского и княженія Литовского вашему царскому величеству, тогда родившуся, даннымъ быти отъ Господа Бога прорече и вся бывшая уже,—еще король Вдадиславъ усты и съ писаніемъ дерзновенно въ позорѣ всѣхъ, на соймѣ сущихъ, изъяви—
сего езувиты, Жиды и уніяты, всегда о безбожіи своемъ обличаемы, лютою смертію,—гвоздь въ главу убивше, умориша, а его же честное тѣло ста на мѣстѣ Божіимъ судомъ и чюдомъ, яко и свѣту надъ нимъ многажды облистати, откровенно бывши и доселѣ дивну Богу во святыхъ своихъ, въ Брестѣ пребываетъ нетлѣнно. Въ Люблинѣ и въ Сокалю мужей православныхъ, жителей тѣхъ мѣстъ, аки злодѣевъ каты и муки и мечи множае 100 человѣкъ избиша зле сіи беззаконніи уніяты и Ляхи, святымъ Божіимъ за православіе святое повсюду содѣлаша и доселѣ творять. Не точію хартіею извѣстити, но языкомъ изрещи вящше силы и пямяти есть нашея; нѣкая же токмо предъ вашимъ царскимъ величествомъ, государемъ нашимъ, воспомянувше, не хощемъ, да воздастся имъ по мѣрѣ, еюже мѣриша, но да престанутъ отъ зла и начнутъ благая творити. Еще и се извѣстно ли есть вашему царскому величеству, что въ сей вашего царского величества державѣ Литовской, въ Новгородку, въ Слонимѣ, въ Журовичахъ, идѣже чюдотворная икона Пресвятыя отъ православныхъ нуждою съ монастыремъ тѣмъ короли Польскими отнята есть доселѣ, такоже въ Вольковиску, въ Гроднѣ, въ Трокахъ, въ Лидѣ, въ Битенѣ и прочіихъ всѣ церкви уніяты, враги православію святому и вашему царскому величеству, съ частію большею вотчинъ митрополіихъ имѣютъ; православныхъ же по древнему своему напаствуютъ обычаю. А сіе аще есть угодно предъ Господемъ и ващимъ царскимъ величествомъ угодно и праведно, разсмотри и разсуди, ваше царское величество, его же всему міру, побѣдивши поганыя языки и злохитрые враги церкви Христовы, яко Костянтина Великого крестомъ Христовымъ укрѣпляема быти чаемъ и Спасителя нашего съ пречистою его матерію. О сіе усердно молимъ; вашего же царского величества церковь православная, аки невѣста украшенная, краснѣйшая паче всѣхъ человѣкъ, Іисусъ Христу жениху своему обрученна, отмести мене отъ соперника моего молитъ. Сего ради, зане имаши себѣ, ваше царское величество, [87]данныя труды, по обѣщанію намъ данномъ, евангельскимъ гласомъ ей глаголю вамъ, яко сотвори отмщеніе ея вскорѣ, подвигнися правою ревностію, ваше царское величество, и аки Господемъ оправданъ царствовати на землѣ, препояши оружіе свое по бедрѣ своей, сильне красотою твоего[1] и добротою твоею, и наляцы и успѣвай и царствуй истинны ради и кротости и правды, и наставитъ тя десница твоя. И прочая псаломски вашему царскому величеству вѣщаемъ; въ семъ же страстотерпецъ ради, ихже прежде воспомянухомъ православныхъ, кровопролитія поможетъ ти Богъ утро за утро, праведный нашъ царю. Едино же есть се на потребу, да вскорѣ ваше царское ведичество своихъ ратныхъ людей, понеже нынѣ есть время дѣлателно, дондеже оружія враги оскудѣша, пославше, грады и люди, обещавшаяся быти подъ крѣпкою вашего царского величества рукою, обьемше, владѣти имъ не по ихъ жестосердію, и избраннымъ воеводамъ, яко до сего дне бысть, но своимъ ближнимъ, иже всякихъ ихъ дѣлъ досмотрити должны будутъ, повелиши и Пинской повѣтъ, людми повѣтными и всякими вещи неоскуденъ, въ немъ же люди вашего царского величества ратные здѣшные бывше, напрасно оставиша своимъ властемъ. А угодно
ли се вашему царскому величеству, государю нашему, будетъ: сему благородному и богобоязному мужу, вашего царского величества доброхотну слугѣ господину Андрѣю Васильевичю Бутурлину, вашего царского величества окольничему воеводѣ здѣшнему, на ваше царское величество взяти и крѣпко держать повелѣлъ; яко лукавнующіи скорымъ симъ дѣломъ вскорѣ потребятца. Вѣруемъ Господеви и, кромѣ пролитія крови, чаемъ милости Господни: молитвами пречистыя Дѣвы Богородицы вся враги своя, подвигшимся токмо воемъ православнымъ, подъ нозѣ своя ваше царское величество, государь нашъ, покориши, и не токмо вѣнцемъ, сего же имаши, кесарей Греческихъ, но и областію ихъ державы восточныя и западныя, истиннымъ христіянскимъ цесаремъ ваше царское величество будеши. Еже получити безнапастно вашему царскому величеству Господа Бога молимъ усердий и
множицею желаемъ. Прочее за сіе дерзновеніе наше прощенія просяще, предъ нозѣ престола вашего царского величества, государя нашего, себе поверзаемъ. Данъ въ святой чюдотворной лаврѣ Печерской Кіевской, лѣта Господня 1658-го, генваря 5-го дня.
Переводь письма, находящійся въ двухъ экземплярахъ, черневомь и переписанномъ начисто, озаглавленъ такъ: Списокъ съ листа зъ Бѣлоруского писма, что писали къ великому государю царю и великому князю Алексѣю Михайловичю, всеа Великія и Малыя и Бѣлыя Росіи самодержцу, изъ Кіевопечерского монастыря архимаритъ Инокентей Гизель да Іосифъ Тукальскій, архимаритъ Лещинскій. Списанъ тотъ листъ въ нынѣшнемъ во 166-мъ году, генваря въ 15 день.
Акты, относящіеся къ исторіи Южной и Западной Россіи. Томъ 4. — Санктпетербургъ. Въ типографіи П. А. Кулиша. 1863. 