А пошлетъ Богъ у кого дѣти, сынове и дощери: имѣти попеченіе отцу и матери о чадѣхъ своихъ: снабдѣвати[2] и воспитати въ добре наказаніи, и учити ихъ страху Божію и вѣжеству и всякому благочинію; и, по время[3] и по дѣтемъ смотря, и по возрасту учити ихъ рукодѣлію; отцу сынове а матери дщери; кто чему[4] достоинъ, каковъ кому просугъ[5] Богъ дастъ; а любити ихъ и беречи и страхомъ спасати, уча и наказуя, и разсуждая и раны возлагати: наказуи дѣти во юности покоютъ тя на старость твою; и хранити и блюсти о чистотѣ тѣлеснои, и отъ всякого грѣха[6], якоже зеницу ока, и якожъ своя душа; аще дѣти согрѣшаютъ отцовымъ и материнымъ небреженіемъ, и о тѣхъ грѣсѣхъ отвѣтъ дати[7] имъ самѣмъ за дѣти своя въ день страшнаго суда; аще дѣти небрегоми будутъ и не наказаны отъ отца и матери, аще согрѣшаютъ или что зло сотворятъ и отцу, и матери, и съ дѣтми отъ Бога грѣхъ, а отъ людеи укоръ и посмѣхъ, а имѣнію нищета, а себѣ скорбь[8], а отъ сосѣди[9] продажа и срамота[10]. Аще у богобоязненныхъ родителеи, и у разумныхъ, и у разсудныхъ, чада воспитани въ страсѣ Божіи, и въ добрѣ наказаніи, и въ благоразсудномъ ученіи, всякому разуму, и вѣжеству, и промыслу и рукодѣлію; и тѣ чада, съ родители своими бываютъ отъ Бога помиловани, а отъ священнаго чина благословени и отъ добрыхъ людеи хвалимы, и егда[11] будутъ въ совершеніе возраста, и добрые люди, съ радостію и со благодареніемъ сынове у нихъ женятъ, а дщери вдаютъ, прибирая по своеи верстѣ и по суду Божію; аще отъ таковыхъ которое чадо Богъ возметъ, въ покаяніи и съ причастіемъ, то отъ родителя безкровная[12] жертва Богу принесится, и въ вѣчныя кровы вселяются; и имѣютъ дерзновеніе у Господа[13], прося милости и оставленія грѣховъ о родителяхъ своихъ.
