Въ дому своемъ, всякому христіанину, во всякои храминѣ святыя и честныя образы, написанныя на иконахъ, по существу ставити на стѣнахъ, устроивъ благолѣпно мѣсто со всякимъ украшеніемъ и со свѣтилники, въ нихъ же свѣщи предъ святыми образы вжигаются[3] на всякомъ славословіи Божіи; и по пѣніи погашаются и завѣсою закрываются, всякія ради нечистоты а отъ пыли благочинія ради и береженія; а всегда чистымъ крыльцемъ[4] обметати и мяхкою губою вытирати ихъ, и храмъ тотъ всегда чистъ имѣти[5], паче иныхъ храминъ. А святыхъ образовъ касатися достоинымъ, въ чистои совѣсти; и на словословіи Божіи и на святомъ пѣніи, и на молитвѣ свѣщи вжигати и кадити благовоннымъ ладаномъ и фимияномъ; а образы святыя поставляются иже въ началѣ[6], свято почитаеми суть, имяны прежеречеными; въ молитвахъ и во бдѣніи, и въ поклонехъ и во всякомъ славословіи Божіи, всегда почитати ихъ; со слезами и рыданіемъ и съ сокрушеннымъ сердцемъ исповѣдаемся о своихъ согрѣшеніяхъ,—и просяще отпущенія грѣховъ.
