Къ церквамъ Божіимъ всегда съ вѣрою приходи[2], и безъ гнѣва, и безъ завѣсти, и безъ всякія злобы, и во всякои смиренои мудрости и кротости и въ чистотѣ тѣлеснои[3] съ приношеніемъ со свѣщею, и съ просфирою, съ фимиямомъ[4] и съ ладономъ, и съ кануномъ, и съ кутіею, и съ милостынею за здравіе и за упокои, и къ праздникомъ, и по монастыремъ тако же съ милостынею и съ приношеніемъ приходи[5], и егда принесши даръ твои олтарю, воспомяни евангельское слово: егда нѣчто имать братъ твои на тя, остави ту даръ твои предъ олтаремъ, и шедъ, преже-смирися съ братомъ своимъ, и тогда принеси даръ твои къ Богу отъ праведнаго имѣнія своего; а отъ неправды непріятна милостыня. Къ симъ речено бысть: луче не грабити, неже милостыню даяти отъ неправды; удобнѣе отдати обидимому приятние милостыни неправедныя; къ Богу пріятна милостыня отъ праведнаго имѣнія[6] и отъ добрыхъ дѣлъ.
