Въ дѣто 6619 (1111). Вложи Богъ Володимеру въ сердце, и нача глаголати брату своему Святополку, понужая его на поганыя, на весну… И рече Святополкъ: «се язъ, брате, готовь есмь съ тобою»; и посласта ко Давидови Святославичю, велячи ему съ собою. И въста Володимеръ и Святополкъ, и цѣловастася, и поидоста на Половцѣ… И поидоша во 2-ю недѣлю[1] поста, а въ пятокъ быша на Сулѣ; въ суботу поидоша и быша на Хоролѣ, и ту и сани пометаша; а въ недѣлю поидоша, въ нюже хрестъ цѣлують, и придоша на Пс(ё)лъ и оттуди сташа на рѣцѣ Голти, ту пождаша и вои, и оттудо идоша Върьскла, ту же завътра въ среду хрестъ цѣловаша и възложиша всю свою надежю на хрестъ, со многими слезами; и оттудѣ преидоша многи рѣки, въ 6-ю недѣлю поста, и поидоша[2] къ Донови во вторникъ. И оболчишася въ бронѣ, и полки изрядиша, я поидоша ко граду Шаруканю; и князь Володимеръ пристави попы своя, ѣдучи предъ полкомъ, пѣти тропари и кондакы хреста честнаго и канунъ святой Богородици. Поѣхаша ко граду, вечеру сущю, и въ недѣлю выидоша изъ города, и поклонишася княземъ Рускымъ, и вынесоша рыбы и вино; и перележаша нощь ту. И завътра, въ среду, поидоша къ Сугрову, и пришедше зажьгоша и́, а в четвергъ поидоша съ Дона, а в пятницю, завътра, мѣсяца марта въ 24 день, собрашася Половци; изрядиша Половци полки своя и поидоша къ боеви. Князи же наши възложиша надежю свою на Бога и рекоша: «убо смерть намъ здѣ, да станемъ крѣпко!» И цѣловаша другъ друга, възведше очи свои на небо, призываху Бога вышняго. И бывшю же соступу и брани крѣпцѣ, Богъ вышній возрѣ на иноплеменникы съ гнѣвомъ, падаху предъ хрестьяны; и тако побѣжени быша иноплеменьници, и падоша мнози врази наши супостати предъ Рускыми князи и вои на потоцѣ Дегѣя, и поможе Богъ Рускымъ княземъ. И въздаша хвалу Богу въ тъ день, и заутра, суботѣ наставшѣ, празноваша Лазарево воскресенье и Благовѣщенья день, и похваливше Бога, проводиша суботу, и в недѣлю пріидоша. Наставило же понедѣлнику страстныя недѣли, паки иноплеменницы собраша полки своя многое множество, и выступиша яко борове велиции, и тмами тмы и оступиша полкы Рускыи. И посла Господь Богъ ангела в помощь Русьскымъ княземъ; и поидоша Половецьстии полъци и полъцѣ(и) Русьстѣи(ии), и сразишася первое съ полкомъ (Святополка), и трѣсну аки громъ сразившимася челома, и брань бысть люта межи ими, и падаху обои. И поступи Володимеръ с полки своими, и Давыдъ, и возрѣвше Половци вдаша плещи свои на бѣгъ; и падаху Половци предъ полкомъ Володимеровомъ, невидимо бьеми ангеломъ, яко се видяху мнози человѣци, и главы летяху, невидимо стинаемы на землю. И побиша я́ въ понедѣлникъ страстный, мѣсяца марта въ 27 день, избьени быша иноплеменницѣ многое множество на рѣцѣ Салницѣ, и спасе Богъ люди своя. Святополкъ же, и Володимеръ, и Давыдъ прославиша Бога, давшаго имъ побѣду таку на поганыя, и взяша полона много, и скоты, и кони, и овцѣ, и колодниковъ много изоимаша рукама. И въпросиша колодникъ, глаголюще: «како васъ толика сила и многое множество, не могостеся противити, но вскорѣ побѣгосте?» Си же отвѣщеваху, глаголюще: «како можемъ бітися с вами? а друзии ѣздяху верху васъ въ оружьи свѣтлѣ и страшни, иже помогаху вамъ?» Токмо се суть ангели, отъ Бога послани помогать хрестьяномъ. Се бо ангелъ вложи въ сердце Володимеру Манамаху пустити братью свою на иноплеменникы, Русьскии князи; се бо, яко же рекохомъ, видинье видиша в Печерьскомъ манастыри, еже стояше столпъ огненъ на тряпезници, таже преступѣ(и) на церковь и оттуда къ Городцю; ту бо бяше Володимеръ в Радосыни, и тогда се ангелъ вложи Володимеру въ сердце, нача понужати, якоже рекохомъ… Съ Божею помощью, молитвами святыя Богородица и святыхъ ангелъ, възвратишася Русьстии князи въсвояси, съ славою великою, къ своімъ людемъ; и ко всимъ странамъ далнимъ, рекуще[3] къ Грекомъ, и Угромъ, и Ляхомъ, и Чехомъ, дондеже и до Рима пройде, на славу Богу, всегда и ныня и присно во вѣки, аминь.
Битва на Сальнице/Поучение детям 1893 (ДО)
| ← Поученіе Св. Василья | Поученіе дѣтямъ Владиміра Мономаха : съ приложеніемъ Посланія Владиміра Мономаха къ Олегу, Поученій — Ксенофонта, Нѣкоего отца, Св. Василія Великаго и матеріаловъ для характеристики Мономаха — Битва на Сальницѣ | Вступленіе Владиміра Мономаха на великое княженіе кіевское → |
См. Оглавленіе. Изъ сборника «Поученіе дѣтямъ Владиміра Мономаха / Ред. и прим. В. А. Воскресенскаго — СПб.: Типографія и Литографія В. А. Тиханова, 1893.». Опубл.: 1893. Источникъ:  Владимир Мономах, С. М. Соловьёв и др. Поучение детям Владимира Мономаха. — СПб.: Типография и литография В. А. Тиханова, 1893. |
Б. Къ характеристикѣ Мономаха.
1. Битва на Сальницѣ.
Ип. Л., стр. 191—193, 196.
|
Это произведение перешло в общественное достояние в России согласно ст. 1281 ГК РФ, и в странах, где срок охраны авторского права действует на протяжении жизни автора плюс 70 лет или менее.
Если произведение является переводом, или иным производным произведением, или создано в соавторстве, то срок действия исключительного авторского права истёк для всех авторов оригинала и перевода. |