хоулимъ — моли, оумьртви грѣхы, распьнися съ Христъмь, любовь възложи на Господа, да обрящеши (англа), иде[1] же англъ тмы соуть и пьрвѣньць сбори, апльстии прѣстоли и патриаршьстии жьзли, вѣньци мчнць, стии похвалы, — правьдныхъ тѣхъ самъ ся причти и въжелѣи, егда придѣть на тя напасть отъ искоушения Божія, ли нагота, ли скърбь, лі гладъ, ли ино что, ли недоугъ, исоушая тѣло твое, ли кръвопролитие Господа ради, — тьрпи съ похвалою бжиею, надѣяся на нь, яко на млства, да дьрзновеньно и несрамно речеши: проидохомъ скозѣ огнь и водоу, изведѣны въ оутѣхоу.
Въ дѣто 6619 (1111). Вложи Богъ Володимеру въ сердце, и нача глаголати брату своему Святополку, понужая его на поганыя, на весну… И рече Святополкъ: «се язъ, брате, готовь есмь съ тобою»; и посласта ко Давидови Святославичю, велячи ему съ собою. И въста Володимеръ и Святополкъ, и цѣловастася, и поидоста на Половцѣ… И поидоша во 2-ю недѣлю[2] поста, а въ пятокъ быша на Сулѣ; въ суботу поидоша и быша на Хоролѣ, и ту и сани пометаша; а въ недѣлю поидоша, въ нюже хрестъ цѣлують, и придоша на Пс(ё)лъ и оттуди сташа на рѣцѣ Голти, ту пождаша и вои, и оттудо идоша Върьскла, ту же завътра въ среду хрестъ цѣловаша и възложиша всю свою надежю на хрестъ, со многими слезами; и оттудѣ преидоша многи рѣки, въ 6-ю недѣлю поста, и поидоша[3] къ Донови во вторникъ. И оболчишася въ бронѣ, и полки изрядиша, я поидоша ко граду Шаруканю; и князь Володимеръ пристави попы своя, ѣдучи предъ полкомъ, пѣти тропари и кондакы хреста честнаго и канунъ святой Богородици. Поѣхаша ко граду, вечеру сущю, и въ недѣлю выидоша изъ города, и поклонишася княземъ Рускымъ, и вынесоша рыбы и вино; и переле-
