12. 1399—1402. Посланіе Бѣлозерскаго монастыря игумена Кирилла Великому Князю Василію Димитріевичу, о томъ чтобы онъ примирился съ Суздальскими Князьями.
Господину благовѣрному и боголюбивому Князю Великому Василью Дмитеевичу, Кирило черньчищо многогрѣшный съ своею братійцею, на твоей, господине, доволной еже къ намъ милости[1], много челомъ бьемъ, и радуемся, господине, о тебѣ, что имѣеши сицеву вѣру къ Пречистой Богородици и нашей нищетѣ и о велицемъ твоемъ смиреніи. О семъ же, господине, радуемся и скорбимъ, что паче слова и смысла, безмѣрное твое смиреніе: посылаеши ко мнѣ грѣшному и нищему и всякого дѣла блага удалившемуся. Ты, господине, Князь Великій всея земля Русскія, и смиряяся, ко мнѣ посылаешъ грѣшному и страстному и недостойному небеси и земля и того самого иноческаго житія; и язъ, господине, грѣшный истинно о семъ скорблю, недостоинства ради своего, радуемъ же ся, господине, благаго ради твоего произволеніа и смирьно-мудраго нрава, яко симъ подобишися, господине, преблагому нашему Владыцѣ и Господу, отъ толикіа неизреченныа славы и съ высоты сшедшему, насъ ради грѣшныхъ и смирившуся даже и до рабія образа. Сице, господине, и ты отъ толикія славы міра сего преклонися смиреніемъ къ нашей нищетѣ, и отъ сего, господине, познаваемъ великую твою любовь къ Богу и Пречистѣй его Матери. Елико бо приближаются Святіи къ Богу любовію, толико видятъ себе грѣшны; ты бо, господине, симъ смиреніемъ велико себѣ пріобрѣтаешь спасеніе и ползу душевную. Тѣмъ, господине, язъ грѣшный паче печалую душею, что мене недостойнаго и покоршагося всякому грѣху сице ублажаете, не притяжавша ни единоа добродѣтели, но всякой страсти повиннаго, и таково, господине, моленіе посылаеши ко мнѣ, немогущему и о своихъ грѣсѣхъ Бога умолити. И како о тебѣ, господине, Бога умолю, самому ми сущу исполненну всякого дѣла зла? Но, господине, писано, что не велитъ отрицатися и грѣшнымъ молити Бога о велящихъ за ся, вѣры ради ихъ. Тѣмъ же, господине, вѣры ради твоея великія, не оставитъ тебе Богъ, но помилуетъ, и Пречистая Госпожа Богородица и Царица наша поможетъ ти вся дни живота твоего и подастъ ти исцѣленіе души жъ и тѣлу, что насъ нищихъ ея, господине, не забываеши въ пустомъ семъ мѣстѣ, събравшихся во обители ея, но часто призираеши доволными милостынями. Мы же, господине, не можемъ о семъ тобѣ воздати ничтоже, но Пречистая Госпожа Богородица, надежа и упованіе наше, испроситъ на тя милость у Сына своего въ сій вѣкъ и въ будущій. А язъ грѣшный съ своею братицею, господине, елика сила, радъ Бога молити о тебѣ нашемъ господинѣ, и о твоей Княгинѣ и о твоихъ дѣткахъ и о всѣхъ крестьянехъ, Богомъ порученныхъ тебѣ. Ты же господине, самъ, Бога ради, внемли себѣ и всему княженію твоему, въ немъ же тя постави Духъ Святый пасти люди Господня, еже[2] стяжа честною си кровію. Якоже бо великіа власти сподобился еси отъ Бога, толикимъ болшимъ и возданіемъ долженъ еси. Въздай же убо Благодателю долгъ, святыа его храня заповѣди, всякого укланяясь пути ведущаго въ пагубу. Якоже бо о кораблѣхъ есть, егда убо наемникъ, еже есть гребецъ, съблазнится, малъ вредъ творитъ плавающимъ съ нимъ; егда же кормчій, тогда всему кораблю сътворяетъ пагубу: такоже, господине, и о Князехъ. Аще кто отъ бояръ согрѣшитъ, не творитъ всѣмъ людемъ пакость, но токмо ссбѣ единому; аще ли же самъ Князь, всѣмъ людемъ, иже подъ нимъ, сотворяетъ вредъ. Ты же, господине, съ многою твердостію храни собе въ добрыхъ дѣлѣхъ; рече бо святый Апостолъ: «миръ имѣйте и святыню, безъ нея же никтоже узритъ Господа.» Возненавиди, господине, всяку власть[3], влекущую тя на грѣхъ; непреложенъ имѣй благочестія помыслъ и не возвышайся, господине, временною славою къ суетному шатанію: малъ же убо и кратокъ сущій здѣ животъ и съ плотію съпряжена смерть. И сія убо помышляя, не впадеши въ ровъ гордостный: но бойся, господине, Бога, истиннаго Царя, и блаженъ будеши: «блажени бо, рече, боящеися Господа.» Въспоминай же, господине, надежу будущаго вѣка и царство небесное, радость Святыхъ, веселіе съ Ангелы, надо всѣми же зрѣніе пресладкаго лица Божіа; той бо въистину доброта неизреченная, весь сладость и желаніе и любовь несытная всѣмъ любящимъ его и творящимъ пресвятую волю его. — Да слышелъ есми, господине Князь Великій, что смущеніе велико межу тобою и сродники твоими Князми Суждальскими. Ты, господине, свою правду сказываешь, а они свою; а въ томъ, господине, межи васъ крестьяномъ кровопролитіе велико чинится[4]. Ино, господине, посмотри того истинно, въ чемъ будетъ ихъ правда предъ тобою, и ты, господине, своимъ смиреніемъ поступи на себе; а въ чемъ будетъ твоя правда предъ ними, и ты, господине, за себе стой по правдѣ. А почнуть ти, господине, бити челомъ, и ты бы, господине, Бога ради, пожаловалъ ихъ, по ихъ мѣрѣ; занеже, господине, тако слышелъ есмь, что доселѣ были у тебе въ нужи, да отъ того ся, господине, и возбранили[5]. И ты , господине, Бога ради, покажи къ нимъ свою любовь и жалованъе, чтобы не погибли въ заблуженіи въ Татарскихъ странахъ, да тамо бы не скончались. Занеже, господине, ни царство, ни княженіе, ни иная каа власть не можетъ насъ избавити отъ нелицемѣрнаго суда Божія; а еже, господине, възлюбити ближняго яко себе, и утѣшити душа скорбящая и озлобленыя, много, господине, поможетъ на страшнѣмъ и праведнѣмъ судѣ Христовѣ, понеже пишетъ Апостолъ Павелъ ученикъ Христовъ: «аще имамъ вѣру горы преставляти, и аще имамъ раздати все имѣніе свое, любве же не имамъ, ничтоже полза ми есть.» Възлюбленный же пишетъ Іоанъ Богословъ: «аще кто речетъ, Бога люблю, а брата своего ненавижу, ложь есть.» Тѣмже и ты, господине, възлюби Господа Бога отъ всея душа своея; тако възлюби и братію твою и вся крестьяне: и тако, господине, вѣра твоя къ Богу и милостыня твоя къ нищимь Богомъ пріятна будетъ. А милость Божія и Пречистыя Богородицы на тебѣ на моемъ господинѣ на Великомъ Князѣ Василъѣ да будетъ, и на твоей Великой Княгинѣ, и на вашихъ дѣткахъ, и мое благословеніе и молитва и моей братіи. Аминь.
Изъ Сборника, бывшаго въ архивѣ Кирилло-Бѣлозерскаго монастыря (in 4°, разныхъ почерковъ, XVI вѣка, л. 288—292). — Хранится въ Новгородской Софійской библіотекѣ подъ № 454. — Свѣрено съ напечатаннымъ въ Ист. Рос. Іерархіи Ч. IV. стр. 403—408, гдѣ однако встрѣчается множество подновленій, особливо въ древней орѳографіи.
