11.—1395. Поученіе Митрополита Кипріана духовенству, о церковныхъ службахъ, о недопущеніи къ св. тайнамъ татей и душегубцевъ безъ покаянія, о епитимьяхъ, кумовствѣ, необщеніи съ растригами, о чистотѣ ставленниковъ и случаяхъ воспящающихъ въ службѣ.
Кипріянъ, мидостью Божіею Митрополитѣ Кіевьскый[1] и всея Руси. Что мя есте въпросили о службахъ Великаго Василіа, буди же вамъ вѣдомо: служба Великаго Василія починается вторыя недѣли поста; а въ недѣлю сыропустную Златаустова служба, такоже и въ недѣлю сборованіа, занеже на сборъ синодикь чтется, того дѣля Златоустова служба; а отъ вторыя недѣли поста, въ великій постъ, на всякую недѣлю, Великаго Василья служба служити; а на верьбницу Златоустова служба; и на канонъ Рожества Христова, и на канонъ водокрещеніа Василья же Великаго служба. Мнози же чти дѣля Великаго Василіа, и на его празникъ службою служатъ. А въ среду масленыя недѣли и въ пятницю нѣтъ никакоя службы, но толко часы съ вечернею; такоже и въ великую пятницю потомужъ. А татемъ и душегубцемъ при смерти дати причастіе, но аже что каются, вся своя согрѣшенія чисто повѣдаютъ; а некающемусь какъ ему причастіе дать? А церкви нѣсть второго священіа никаковаго, кромѣ аже престолъ святый попортится, тогды и священіе надобѣ, тогды и всякаа порядня изнова надобна. А въ великую суботу, вечеръ, меѳимона нѣсть никакожъ. А что мя есте въпросили: аже коли діаконъ не пригодится, а надобѣ многымъ попомъ пѣти вмѣстѣ, чтобы отъ поповъ которому молодшему діяконовати? Нѣсть въ поповьствѣ ни младости ни старости, того дѣля неслично тому быти; а колико бы то было, чтобы попу діаконовати, ино потомъ будетъ ни попъ ни діаконъ, того дѣля нелзѣ тому такъ быти: попъ есть попъ, а діаконъ дьяконъ; а коли не пригодится дьякона, и попъ служитъ одинъ. А что въпрошаете, пѣти ли «Святый Боже» въ олтари: ино гды бываютъ сборныя церкви, а суть попы крилошане съ діяконы[2] безъ перемѣны
на выходъ, въ олтари: и пѣвци поютъ «Святый Боже,» и «Слава,» поютъ «и нынѣ,» и попы поютъ въ во олтари одну толко послѣднюю «Святый Боже.» А на Въздвиженіе честнаго Креста въ всякой церкви, по всей земли, гдѣ христіяне живутъ, Крестъ въздвизаютъ, хотя бы одинъ попъ былъ, на славу честнаго и животворящаго Креста. А которого человѣка отець душевный не благословить за его непослушаніе, а онъ живетъ лѣта, а не знается, ни кается, а придетъ къ смерти да такъ и не кается, недостоитъ ему дать святаго причастья; а почнетъ каатись предъ смертію и плакати, исповѣдаа своя вины, ино пріяти его въ покааніе и причастіе дати ему, да оже смерть ся ему пригодитъ, тогды въ томъ пакы волно будетъ, въ чемъ его поставитъ; а толко востанеть отъ тое болѣсти и здравъ будеть, ино ему опитемья подняти за предніи своя дѣла. Про кумовьство, что дѣтя крестити куму съ кумою, нѣсть того: неслично двѣма крестити, ни мужю съ чужею женою, ни съ своею женою, но одиному годится крестити, или отъ мужьскаго полу, или отъ женьскаго. А что ми въпрошаете про ростриги, и язъ дивлюся сему: всякій христіянинъ вѣдаетъся, аже который христіянинъ, а отвержется Христа, съ тѣмъ негодится ни ясти ни пити, ни цѣловатись съ нимъ, ни стрѣтитися бы съ нимъ, такъ отъ него бѣгати; такожъ пакы кто посмѣется ангельскому образу, а съ себе свержетъ, и тотъ таковый тому подобенъ, и божественаа правила такъ повелѣваютъ, съ таковыми ни ѣсти ни пити, ни обчины никакой не держати; а иже такъ и не кается, не возметъ на себе опять ангельскаго образа, проклинаютъ его божественаа правила. А къ поповьству и діяконьству аже кому ставитись, надобѣ чисту быти, какъ отъ чрева матерьня родитися, не было бы зарока тому сгоже ставиться. А случится пакы какова напасть въ поповьствѣ или въ дъяконствѣ, по навоженью діаволскому, ино ему въ тотъ часъ престати отъ службы; нѣсть ему никакой опитемьи, но толко не пити и до смерти. Сіе вамъ поученіе отъ мене. А милость Божія на васъ. А данъ списокъ въ Новѣградѣ, въ лѣто 6903.
Изъ рукописи подъ заглавіемъ: Посланія Россійскихъ Митрополитовъ, и другихъ лицъ (in 4°, XVI вѣка, грам. 129, л. 423—424), хранящейся въ Московской Синодальной библіотекѣ подъ № 562.
