10. — 1395. Мая 12. Грамота Митрополита Кипріана Псковичамъ, о уничтоженіи грамоты (дополнительной), данной имъ Суздальскимъ Владыкою Діонисіемъ, и соблюденіи устава Великаго Князя Александра по старинѣ.
Се язъ Кипріянъ Митрополитъ Кіевьскій и всея Руси. Что есмь слышилъ, ажь Владыка Суждальскій Денисей списалъ грамоту, коли былъ во Пьсковѣ, а приписалъ къ грамотѣ Князя Великого Александровѣ, по чему ходити, какъ ли судити, или кого какъ казнити, да въписалъ[1] и проклятье, кто иметь не по тому ходити; ино то Денисій Владыка не свое дѣло дѣдалъ, не по закону и не по правиломъ. Ажь будеть какову грамоту сппсавъ, положилъ Князь Великій Александръ, по чему ходити: инъ въ томъ воленъ всякій Царъ въ своемъ царствѣ, или Князь въ своемъ княженьи, всякая дѣла управливаеть и грамоты записываетъ; также и тотъ Князь Великій Александръ въ своемъ княженьи, а списалъ такову грамоту, по чему ходити, на христіаньское добро, воленъ въ томъ. А что Денисій Владыка въплелъся не во свое дѣло, да списалъ неподобную грамоту, и язъ тую грамоту рушаю. А вы, дѣти мои, Псковици, ажь будеть преже сего ходили по той грамотѣ Князя Великого Александровѣ, а будеть то у васъ старина: и вы по той старинѣ и ходите; а что владычня грамота Денисьева, а ту грамоту пошлите ко мнѣ, да тое[2] я самъ подеру: та грамота не въ грамоту. А что вписалъ проклятіе и неблагословенье патріарше, а то язъ съ васъ снимаю и благословляю васъ: то былъ Суждальскій Владыка, а дѣялъ то въ мятежное время; а Патріярхъ ему того не приказалъ дѣяти. А вы, дѣти мои, ходите по своей пошлинѣ, и по старинѣ суды судите; а кого виноватого пожалуете ли, волни есте, показните ли противу какое вины, волни же есте; дѣйте по старинѣ, чисто и безъ грѣха, какъ и всякіи христіане дѣють. А милость Божья на васъ и мое благословенье. А дана грамота въ Великомь Новѣгородѣ, мѣсяца Маія 12, индикта 5, въ лѣто 6903.
Изъ рукописи подъ завлавіемъ: Іосифа Волоколамскаго о Новгородскихъ еретикахъ, и Посланія Митрополитовъ Кипріана и Фотія во Псковъ (in fol., XVI вѣка, грам. 6, л. 427—428), хранящейся въ Румянцовскомъ Музеумѣ подъ № 204.
