12. 1399—1402. Посланіе Бѣлозерскаго монастыря игумена Кирилла Великому Князю Василію Димитріевичу, о томъ чтобы онъ примирился съ Суздальскими Князьями.
Господину благовѣрному и боголюбивому Князю Великому Василью Дмитеевичу, Кирило черньчищо многогрѣшный съ своею братійцею, на твоей, господине, доволной еже къ намъ милости[1], много челомъ бьемъ, и радуемся, господине, о тебѣ, что имѣеши сицеву вѣру къ Пречистой Богородици и нашей нищетѣ и о велицемъ твоемъ смиреніи. О семъ же, господине, радуемся и скорбимъ, что паче слова и смысла, безмѣрное твое смиреніе: посылаеши ко мнѣ грѣшному и нищему и всякого дѣла блага удалившемуся. Ты, господине, Князь Великій всея земля Русскія, и смиряяся, ко мнѣ посылаешъ грѣшному и страстному и недостойному небеси и земля и того самого иноческаго житія; и язъ, господине, грѣшный истинно о семъ скорблю, недостоинства ради своего, радуемъ же ся, господине, благаго ради твоего произволеніа и смирьно-мудраго нрава, яко симъ подобишися, господине, преблагому нашему Владыцѣ и Господу, отъ толикіа неизреченныа славы и съ высоты сшедшему, насъ ради грѣшныхъ и смирившуся даже и до рабія образа. Сице, господине, и ты отъ толикія славы міра сего преклонися смиреніемъ къ нашей нищетѣ, и отъ сего, господине, познаваемъ великую твою любовь къ Богу и Пречистѣй его Матери. Елико бо приближаются Святіи къ Богу любовію, толико видятъ себе грѣшны; ты бо, господине, симъ смиреніемъ велико себѣ пріобрѣтаешь спасеніе и ползу душевную. Тѣмъ, господине, язъ грѣшный паче печалую душею, что мене недостойнаго и покоршагося всякому грѣху сице ублажаете, не притяжавша ни единоа добродѣтели, но всякой страсти повиннаго, и таково, господине, моленіе посылаеши ко мнѣ, немогущему и о своихъ грѣсѣхъ Бога умолити. И како о тебѣ, господине, Бога умолю, самому ми сущу исполненну всякого дѣла зла? Но, господине, писано, что не велитъ отрицатися и грѣшнымъ молити Бога о велящихъ за ся, вѣры ради ихъ. Тѣмъ же, господине, вѣры ради твоея великія, не оставитъ тебе Богъ, но помилуетъ, и Пречистая Госпожа Богородица и Царица наша поможетъ ти вся дни живота твоего и подастъ ти исцѣленіе души жъ и тѣлу, что насъ нищихъ ея, господине, не забываеши въ пустомъ семъ мѣстѣ, събравшихся во обители ея, но часто призираеши доволными милостынями. Мы же, господине, не можемъ о семъ тобѣ воздати ничтоже, но Пречистая Госпожа Богородица, надежа и упованіе наше, испроситъ на тя милость у Сына своего въ сій вѣкъ и въ будущій. А язъ грѣшный съ своею братицею, господине, елика сила, радъ Бога молити о тебѣ нашемъ господинѣ, и о твоей Княгинѣ и о твоихъ дѣткахъ и о всѣхъ крестьянехъ, Богомъ порученныхъ тебѣ. Ты же господине, самъ, Бога ради, внемли себѣ и всему княженію твоему, въ немъ же тя постави Духъ Святый пасти люди Господня, еже[2] стяжа честною си кровію. Якоже бо великіа власти сподобился еси отъ Бога, толикимъ болшимъ и возданіемъ долженъ еси. Въздай же убо Благодателю долгъ, святыа его храня заповѣди, всякого укланяясь пути ведущаго въ пагубу. Якоже бо о кораблѣхъ есть, егда убо наемникъ, еже есть гребецъ, съблазнится, малъ вредъ творитъ плавающимъ съ нимъ; егда же кормчій, тогда всему кораблю сътворяетъ
