Статут Великого княжества Литовского 1566 года/Раздел 9

Статут Великого княжества Литовского 1566 года — Роздѣлъ девятый о правахъ земскихъ

Дата создания: 1566. Источник: Временник Московского о-ва истории и древностей российских. — 1855. Кн.25. С. 133 − 145; Статут Вялікага княства Літоўскага 1566 года. — Мінск, 2003. — С.35-263. За виданням 1855 року; [1].

РОЗДѢЛЪ ДЕВЯТЫЙ О ПРАВАХЪ ЗЕМСКИХЪ.

АРТЫКУЛЪ 1.

О отнятье имѣней въ границахъ.

Уставуемъ, еслибы которые княжата, панове бискупове закону Рымского такъ и Греческого, и кнегини панни, вдовы, и земяне мѣли имѣнья люди и земли ловы и лѣсы озера и бобровые гоны у границахъ або иежахъ; а хотѣлъ бы одинъ другого перешедши границу або межу въ землю уступоватися, або люди и земли ловы и лѣсы озера и сѣножати и бобровые гоны отнимати, хотѣчы его съ того имѣнья вытиснути; тогды мають зъ обу сторонъ по осмнадцати свѣдковъ передъ правомъ поставити на кгрунтѣ земляномъ, и кого найдуть судьи близшого ку доводу, тогды кождого стану вышеймененыхъ маеть и зъ шестма свѣдками самъ семый на своемъ кгрунтѣ присегнуть.

АРТЫКУЛЪ 2.

О рокъ завитый на землю выѣхатъ.

Тежъ уставуемъ, ижъ рокъ ку граниченью и всякой копе судомъ положоный маеть быти завитыи, а про то черезъ жадную причыну не маеть далей отложонъ быти, толко съ тыхъ причынъ, которые особливыми артыкулами суть описаны: моромъ, соймомъ вальнымъ, службою нашою господарскою, то есть посельством або войною, и немоцъю правдивою. И коли бы которая сторона кромъ тыхъ причынъ не стала; тогды сторона за своимъ слушнымъ врядовымъ доводомъ передъ судомъ земскимъ маеть речь свою одержати подлѣ заведенья свѣдковъ присяглыхъ, на мѣстцу граничномъ постановеныхъ, и присяги своей, и тымъ же речъ свою маеть не вѣчность одержати. А естли бы передъ тымъ рокомъ былъ немоцонъ, маеть дати вѣдомостъ судьям и сутяжому, а судъ маеть отложыти, поки онъ выздоровѣеть, а коли выздоровѣеть, мають его судьи листомъ обослати и рокъ зложыти; а онъ на другомъ року передъ судомъ первей маеть присегнути на на томъ, ижъ справедливе былъ немоцонъ и для тое форобы на томъ року стати не могъ. Также судья передъ тымъ рокомъ естли бы ся рознемогъ; тогды мають подсудокъ и писаръ на тотъ рокъ предся выѣхати и то судити и отправовати, а тотъ судъ ихъ маеть моцонъ быти яко бы и всихъ трехъ. Такъ тежъ кгды бы ся трафило о граниченье о речъ важную вышей двадцати бочокъ земли; тогды судья або подсудокъ съ писаремъ у повѣтѣ, маючы при собѣ людей добрыхъ, а тую землю объѣхавшы, справовати кончыти и ограничити мають.

АРТЫКУЛЪ 3.

Въ свѣдѣцствѣ жадного закону не маетъ быти кромъ Хрестіянского Рымского, Греческого закону.

Тежъ уставуемъ, ижъ свѣдки о речъ земскую и доводъ держаня земли, а такъ тежъ и о кождую речъ, не мають у свѣдѣцтва припущоны быти жыдове а ни Татарове, одно Хрестіянского Рымского або Гречоского закону. И вшакъ же може съ тыми Хрестіяны, которые бы патеръ умѣли и вѣрою во единого Бога, на кождый годъ у плебановъ або у поповъ своихъ на сповѣди бывали, тѣло Божое пріймовали, а въ жадномъ подойзрѣнью не бывали, а ни в поволаню у воколицы а ни фальшерствѣ, тые мають допущоны быти свѣдѣцства; а хотя бы и хрестіяне будь Рымского або Греческого закону, которые божего тѣла не пріймують, сведѣцства передъ не мають допущоны быти.

АРТЫКУЛЪ 4.

Хто бы кому свѣдки ганилъ.

Коли бы хто своволнѣ сторонѣ поводовой свѣдки ганилъ, а онъ если бы подлугъ права поставилъ осмнадцать свѣдковъ, а тотъ бы межы тыми осмнадцатма свѣдками не обралъ шести вѣры годныхъ, а оставлялъ хотечы имъ тымъ право конченя переказити, а тотъ яко поводовая сторона другими ся свѣдками не опатрилъ, мѣлъ бы тымъ на одномъ року завитомъ речъ свою упустити; тогды таковый моценъ маеть быти о тое наганенье свѣдковъ своихъ тамъ же передъ судьями первей очыщати. А коли судьи вызнають, ижъ ему тыхъ свѣдковъ свовольнѣ ганилъ и оставилъ, а они се выведутъ; тогды таковый оставуючы тыхъ свѣдковъ, кождого зганеного водлѣ стану повиненъ будеть навезати водлѣ роду ихъ, шляхтича яко шляхтича, холопа яко холопа, такъ яко бы его ранилъ.

АРТЫКУЛЪ 5.

Коли бы хто свѣдковъ наганеныхъ передъ судомъ не очыстилъ.

Коли бы хто тыхъ же свѣдковъ передъ тымъ судомъ своимъ зганеныхъ всихъ не очыстилъ; тогды хто свѣдковъ наганить, а оные свѣдки зганеные не очыстилися, ино тые свѣдки которые не приганеные мають присегнути. А если бы зъ обудву сторонъ межы собою свѣдки одны другимъ наганили; тогды свѣдки тые на обѣдвѣ стороны мають оставлены быти, а знову иншыхъ свѣдковъ зъ обохъ сторонъ поставити мають неподойзреныхъ, и межы тыми которые будуть годнѣйшіе, тые мають быти пріймованы, и сами зъ свѣдками присегати.

АРТЫКУЛЪ 6.

О землю обрубную.

Тежъ уставуемъ, естли которой сторонѣ о землю обрубную доводъ права былъ сказанъ, тотъ свѣдковъ своихъ маеть подлѣ обычаю права осмнадцати передъ правомъ постановити, и якъ тотъ панъ або земянинъ поколе съ тыми свѣдками заведшы присягу вчынить, по толь маеть граница вдѣлана быти. Нижли естли бы право мѣли о землю сумѣсную, а не въ одномъ мѣстцѣ порозну, одна земля отъ другое въ пол-мили або и далей; тогды на кождой таковой далекой межы маеть свѣдковъ особныхъ мѣти, и на кождой межи самъ и зъ шестма свѣдки повонинъ будеть присегнути, а тые свѣдки, которые на первой межи присегнуть, на другой межи того жъ часу свѣдчыти и присегати не могутъ, окромъ тыхъ земль которые тужъ понедалеку отъ себе, на таковые межи тыхъ же свѣдковъ поставити и доводъ подлѣ права чынити можеть.

АРТЫКУЛЪ 7.

О рокъ завитый шестъ недѣлъ.

Уставуемъ, абы на кождый кгрунтъ земляный отъ суду земского заочнѣ рокъ не быдъ зложонъ, лечъ первей сторона жалобливая маеть передъ судъ земскій припозвати, а судъ зъ очевистого мовенья маеть имъ обоимъ сторонамъ рокъ зложыти завитый за шесть недѣль, на который судья съ подсудкомъ и писаремъ мають выѣхавши, яко на року завитомъ мають справедливость чынити, а стороны обѣ двѣ будуть повинни передъ ими права достояти и сказанье пріймовати. А по сказанью будеть ли ся которой сторонѣ видѣти зъ уближенемъ, тогды по сказанью мають выписъ отъ суду земского вземшы до пановъ радъ нашихъ апелевать.

АРТЫКУЛЪ 8.

Хто бы будучи урядникомъ господарскимъ, маючы имѣнье въ томъ повѣтѣ, мѣлъ зъ штяхтичомъ право о землю.

Тымъ тежъ обычаемъ если бы который урядникъ нашъ, маючы имѣнье въ томъ же повѣтѣ державы своей, мѣлъ зъ которымъ шляхтичомъ копу вести; теды маеть справоватьсе о кгрунтъ земный, яко вышей описано, и маеть ставить осмнадцать свѣдковъ шляхту и иншыхъ людей добрыхъ вѣры годныхъ, а не того уряаду присуду своего, але иншыхъ постороннихъ, и такъ тежъ судьи мають гледѣть листовъ границъ знаковъ, а чыи будуть листы лѣпшые и границы, тая сторона маеть быти припущона ку доводу.

АРТЫКУЛЪ 9.

Хто бы кому граниу або межу сказилъ.

Коли бы шляхтичъ шляхтичу границу сказилъ, або огнемъ выжогъ, або вырубалъ кгвалтовнѣ, або яко кольвекъ инакъ выказилъ, або копцы роскопалъ, або межу сказилъ, а было бы то на него переведено правомъ; тогды таковый маеть заплатити ображоному дванадцать рублевъ грошей, а суду земскому копу грошей, а за кождый копецъ скажоный три копе грошей. А естли бы шлихтичъ шляхтичу межу переоралъ; тогды за переоранье межи три рубли грошей и на судъ земскій пол-копы грошей, а границу або межу черезъ него скажоную маеть за се передъ урядомъ направити по старому. А если бы холопъ простый холопу то учынилъ; тогды за скаженье холопское межы рубль грошей. А пакли бы граница або межа здаласе ему ку кривдѣ, ино маеть правомъ спирати а не кгвалтомъ.

АРТЫКУЛЪ 10.

О лѣсъ сумесный и о проробки.

Уставуемъ, если бы хто лѣсъ сумесный мѣлъ; тогды маеть кождый поля своего гледѣти и противъ себе проробки чинити, а отъ лѣса одинъ другого не маеть заходити, и якъ зоткнутьсе топоры, тутъ маеть быти граница. А вѣдже естли бы одинъ дубъ былъ и большей проробилъ нижли другій, а оному се видѣла бы кривда, и потегнулъ его о то до права; тогды маеть быти выслано и осмотрѣно, и естьли будеть большей проробилъ, таковый маеть на тое мѣстце лѣсу дати противъ проробковъ, хто большъ проробилъ, хотя не такъ доброго якъ тотъ выробленый. А кгды оный сяберенъ его лѣсу только приробить яко оный, тогды иаеть у мѣру лихое и доброе подѣлити на полы; если бы оны съ того лѣсу ему отвести, который большей приробилъ, ино маеть тые проробки свое, што будеть большъ выробилъ, на полы або на ровные части, иле ихъ будеть, роздѣлити.

АРТЫКУЛЪ 11.

О рѣки, где граничать.

Тежъ гдѣ бы рѣка граничыла, тогды кождый съ берега своего маеть до половицы вжывати. А кгды бы рѣка которая граничная на чый берегъ песокъ незначнѣ сыплючы прибавокъ чынила, тотъ прибавокъ маеть быть того пана, чый берегъ естъ; а естли бы рѣка кгвалтомъ идучи инуды пошла, тогды старое рѣчыще маеть быти предсе границою, а того рѣчыща будеть ли въ ней пожытокъ, такъ кождый съ берега своего на половицы уживати маеть. А тая рѣка граничная, которая инуды се обернеть, оба два береги того мають, чыимъ кгрунтомъ пойдеть. А естли хто рѣку прокопалъ умыслнѣ ку шкодѣ сусѣду своему, и о то бы его ку праву позвалъ, и то бы на него перевелъ ведле права, тогды маеть оному право сказати; абы зась рѣку по старому загаиовалъ, и за то будеть повиненъ жалобливой сторонѣ кгвалтъ дванадцать рублей платити, яко бы границу сказилъ, и вси шкоды, што въ пожыткохъ тое речы шкодовалъ, зъ розсудку оправити маеть.

АРТЫКУЛЪ 12.

Коли бы хто своимъ ставомъ иншый ставъ або сѣножати затопилъ.

Тежъ уставуемъ, коли бы хто въ дѣдизнѣ сполную рѣку мѣлъ, то есть оба два бы береги мѣлъ и его были, а на ней ставъ и млыны поставилъ, а сусѣдній выше млынъ затопилъ своимъ ставомъ, хотя бы опослѣ збудовалъ былъ, а онъ поднемшы греблю затопилъ; тогды маеть возного зъ уряду взяти, а вознымъ и сторонами маеть спустити воду, и што будеть шкоду учинилъ, тую шкоду затопленому оправити водлугъ слушного доводу маеть. А естли бы сѣножати затопилъ безъ воли того пана, чыя сѣножать естъ; тогды будеть ли его воля отмѣну взяти, а онъ маеть ему отмѣну дати, а пакли бы на то воли его не было, тогды онъ нехай воду потому держить, яко бы его сѣножати шкоды не было и верхнего млына не затопилъ. Естли бы тежъ половицу рѣки мѣлъ, а присыпалъ греблю къ чужому берегу або сѣножать затопилъ безъ его дозволенья; тотъ тую греблю роскопати маеть и за то не повиненъ будеть кгвалту платити, бы нихто не маеть безъ дозволенья къ чужому берегу греблю засыпати а ни ставу займовати.

АРТЫКУЛЪ 13.

Хто бы на чыей земли посѣялъ збожъе, тежъ коли бы хотѣлъ сѣно косити альбо бы и покосилъ, якъ маетъ заповѣдати вознымъ, абы не звозилъ до права.

Уставуемъ, хто на чыей земли жыто посѣетъ; тогды тотъ, хто свою землю менуетъ, маеть взяти возного зъ уряду, въ чыемъ повѣтѣ се дѣеть, маеть запозвати подъ закладомъ на насъ Господаря и на судъ земскій, штобы онъ жыта не звозилъ и пожавшы поставилъ на той же земли до права, и рокъ положившы, маеть зъ обу сторонъ судъ земскій вывести. А естли бы тотъ, хто заповѣдалъ, правомъ перевелъ, штожъ онъ тое жыто будеть сѣялъ на его власной земли; тогды маеть быти ему такъ земли яко и оное жыто; а гдѣ бы тотъ черезъ заповѣдь або закладъ пожавшы оное жыто и звезъ прочъ, тогды маеть закладъ заплатити и жыто зъ навезкою отдати. А если бы хто будеть на своей власной земли сѣялъ, а онъ ему то заповѣдалъ, а тотъ правомъ не переведетъ, ижъ бы то земля его была; таковый закладъ тотъ самъ платитъ до скарбу нашого господарского и шкоды оному оправити маеть, то естъ, если бы чые жыто за заповѣдью погнило. Або тежъ хто судъ земкій вывелъ и на него наложылъ, а то што жаловалъ не довелъ, тогды тое жыто маеть тому платити и тую шкоду оправити. А хто бы хотѣлъ черезъ границу кому шкоду вчынити; тогды въ таковыхъ речахъ закладъ маеть быти на насъ Господара сто рублевъ грошей, а на державцу двадцать рублевъ грошей; а если бы о межахъ была заповѣдь, тогды закладъ маеть быти на насъ Господара дванадцать рублевъ грошей, а на державцу три рубли грошей, нижли заповѣдь жыту и сѣножатемъ маеть трывати до Божьего нароженья.

АРТЫКУЛЪ 14.

Хто бы земли въ держанью былъ три годы, а другій правомъ не переконавшы жыто пожалъ, або жатое побралъ, або бой учынилъ, або соху зрубалъ барону и колеса.

Тежъ уставуемъ, ижъ коли бы хто которую землю держалъ въ упокою три годы, а съ покоемъ ее сѣялъ або оралъ, а другій пришедшы на тое поле жыто пожалъ, або жатое побралъ и вдарилъ самого або человѣка его, або которого кольвекъ стану, або соху колеса борону зрубалъ и сошники взялъ; таковый маеть платити кгвалтъ дванадцать рублей грошей, а если возметъ безъ бою, то маеть шкоду платити зъ навезкою, коня конемъ вола воломъ навезати, а за соху десеть грошей, а за нароги дванадцать грошей, за колеса дванадцать грошей, за борону шесть грошей заплатити, а потомъ, кгды похочеть, держачого о тую землю маеть правомъ урядовнѣ спирати. А если бы хто въ кого отнималъ, а другій того боронилъ, и въ держанье не далъ; тому маеть быть право, и хто въ земли будеть виненъ, тотъ маеть шкоды и кгвалтъ оправити.

АРТЫКУЛЪ 15.

О увезанье въ имѣнье за долги, або за иншую причыну, якъ се мають справовати.

Уставуемъ, если бы отъ насъ Господара былъ посланъ дворенинъ нашъ увезатисе въ чые имѣнье за суму пенезей, которая бы прислушала до скарбу нашого господарского, тогды тотъ посланецъ маеть пріехати до того имѣнья, и вземшы зъ уряду земского або замкового возного и людей добрыхъ шляхту, и оного имѣнья людей всихъ маетности списати, одинъ реестръ дати до скарбу нашого, а другій до замку або до суду земского, а третій у себе маеть зоставити, для того абы въ часъ помовки мѣлъ ся чимъ выправовати. Нижли естли бы што на комъ было присужоно зъ выроку нашого або пановъ радъ нашихъ; тогды въ таковой речи зи листы нашими маеть судъ земскій увязанье дати, а гдѣ бы ся спротивлено суду земскому, ино замокъ ино повѣтъ маеть моцно увезати, пестерегаючи и заховываючися ведле того, яко о томъ вышей въ роздѣлѣ о судъяхъ естъ написано.

АРТЫКУЛЪ 16.

О имѣнье, которое зволившыся дадутъ до рукъ нашихъ господарскихъ.

Тежъ уставуемъ, ижъ коли бы обѣ двѣ стороне зволившися и дали имѣнье до рукъ нашихъ господарскихъ до росправы, а мы быхмо которому вряднику нашому господарскому або черезъ листы наши або черезъ увяжчого оное имѣнье до води и науки нашое въ держанье дали; тогды врядникъ воленъ будеть въ томъ имѣнью слушную жывность собѣ мѣти, а зъ двора индей ничого не маеть возити, але будеть повиненъ оное имѣнье со всими речами рухомыми, такъ тежъ и зъ росходы часу держанья собраными, оной сторонѣ, которой прислушаеть, вѣрнѣ а зуполнѣ за листомъ нашимъ господарскимъ отдати, и дозрѣти того, же въ ономъ имѣнью за держанья его жадная шкода и спустошенье не сталося. А естли бы тотъ врядникъ иначей чинилъ; повиненъ будеть оной сторонѣ шкодной всю шкоду и згубу платити, а мы и потомки наши винни будемъ зъ нимъ той сторонѣ справедливостъ учинити на первомъ року яко на завитомъ, а въ небытности нашой ино панове рада наши.

АРТЫКУЛЪ 17.

О имѣнье нероздѣльное межи братьею.

Тежъ уставуемъ, ижъ коли бы братья рожоная, альбо и и дальшая въ роду нижли братья рожоная, лѣта зуполные маючи, мѣли которое имѣнье сумѣстное нероздѣльное, а потомъ передъ правомъ собѣ зровнали и роспишавши подѣлили, або и подѣлившы и передъ врядъ пришедши сознали, або листы и реестры межи себе дали; тогды тотъ вжо дѣлъ промежку себе вѣчнѣ держати мають, а хотя бы и не передъ правомъ але передъ сполными пріятельми своими также во имѣнью собѣ дѣлъ учинили, а тотъ дѣлъ промежку себе давность земскую десеть годъ держали, таковый дѣлъ вжо за таковою давностью земскою мають промежку себе деражати. А если бы братья або кровные якій дѣлъ промежку себе хотя и мѣли, а передъ врядомъ того дѣлу своего сполечнѣ не сознали, а листовъ або реестровъ дѣлчихъ межи себе такъ и листовъ прислучаючихъ на то не розобрали; таковый дѣлъ за вѣчный держанъ быти не маеть, и никоторая давность шкодити не можеть, а то для того, же бы одинъ на другого большей собѣ не привлащалъ части.

АРТЫКУЛЪ 18.

У чужого человѣка не маеть нихто земли закуповати безъ воли пана его.

Тежъ уставуемъ, ижъ не маеть жаденъ бояринъ а ни человѣкъ въ чужого человѣка земли закуповати безъ воли пана своего; а естли бы хто въ чужого человѣка безъ воли пана его закупивъ и што на ней посѣялъ, тогды тое сѣенье и пенези тратитъ. А тотъ человѣкъ, чія земля маеть безъ откладанья пенезей всю землю къ своимъ рукамъ взяти; а онъ на томъ его, въ которого будетъ землю закупилъ, и на поручнику, черезъ чіи руки давалъ будеть, пенезей искати не маеть, для того ижъ онъ то учинилъ надъ тую уставу нашу. Также и чужого человѣка не маеть нихто закуповати безъ воли пана.

АРТЫКУЛЪ 19.

Которые люди приходятъ на волю и засѣдевши волю втекають прочъ.

Уставуемъ, коли бы человѣкъ вольный пришолъ за которого князя або пана и земенина, а сѣлъ на воли, а высѣдевши волю хотѣлъ прочъ засе пойти; тогды первей маеть заслужити тому пану своему только, колько на воли седѣлъ, тожъ пойти прочъ. А естли бы не хотѣлъ заслужити толькожъ; тогды маеть пенези заплатити на кождую недѣлю по шести грошей. А естли жъ бы онъ, заседѣвши волю, втекъ за кого кольвекъ иного; тотъ за кого втечеть, маеть его ему выдати не мнѣй яко отчича, пакли жъ бы на обсыланье его того человѣка выдати не хотѣлъ, а тотъ человѣкъ потомъ отъ него втекъ прочъ, а то бы на него правомъ переведено, тогды за него маеть платити за кождую недѣлю, колко на воли седѣлъ а не робилъ, по шести грошей.

АРТЫКУЛЪ 20.

О найденью скарбу захованого въ земли або у якомъ поклаженю.

Уставуемъ, коли бы ся трафило кому налѣзти въ земли якій скарбъ, гроши, золото, серебро, або иншое яко се трафляеть находити; тогды естьли найдеть на своемъ кгрунтѣ, маеть тому быти чій кгрунтъ, а естли бы на чіемъ иншомъ нашолъ, тогды половицу маеть тому дати, на чіей земли нашолъ, а половицу собѣ взяти, такъ тежъ и на заставной земли на полы роздѣлити мають. Нижли хто бы умыслнѣ на чужой земли кладу искалъ и нашолъ; тогды маеть што будеть найдено все тое отдати, чій кгрунтъ естъ. А вѣдьже таковому найденью хтобы се знати не хотѣлъ, тогды ку праву притягивати ани ку присязѣ его примушати не маеть.

АРТЫКУЛЪ 21.

О портехъ водныхъ и о товарехъ стонулыхъ на водахъ.

Кгды бы ся трафило, воднымъ путемъ везучи якіе товары съ прыгоды судно се розбило, або стонуло при чіемъ кольвекъ берегу; тогды оный товаръ стонулый купецъ або хто кольвекъ маеть добровольнѣ зъ воды выбирати и на берегъ выносити, а врядники наши князи и панове и ихъ врядники земяне и люди простые, и чій кольвекъ берегъ есть, не мають отъ того ничого брати. А хто бы хотѣлъ въ томъ онымъ стонулымъ трудность задавати; тогды тотъ будеть повиненъ всю шкоду, што будеть на томъ шкодовати, совито оправити.

АРТЫКУЛЪ 22.

О дорогахъ старовѣчныхъ.

Уставуемъ, ижъ дороги звѣчные мають быти водлѣ стародавного обычаю такъ широки, абы два возъ форманскихъ розминулися, а возъ порожній маеть уступити возу наложоному, пѣшій ѣздному, возовому ѣздный, естли бы тѣсна дорога была яко у мѣстехъ, або естьли бы хто передъ непріятелемъ утекалъ, тогды возъ застановеный маеть быти, ажъ обминуеть. А часу зимнего кгды снѣгъ бываетъ велкиій, мають поткавшися дорогою половицы дѣлити, а одинъ другого спихати не маеть съ дороги.

А вѣдьже на томъ соймѣ зъ росправы господарское его милость придати рачилъ урядъ подкоморого ку тымъ справамъ судовъ земляныхъ, а то для большое и поспѣшнѣйшое отправы въ справедливости людской, про то што судъ земскій мѣлъ отправовати ведлѣ артыкуловъ урядовныхъ вышей описаныхъ въ томъ статутѣ.