Статут Великого княжества Литовского 1566 года/Раздел 8

Статут Великого княжества Литовского 1566 года — Роздѣлъ осмый о тестаменьтехъ

Дата создания: 1566. Источник: Статут Вялікага княства Літоўскага 1566 года. — Мінск, 2003. — С.35-263. За виданням 1855 року; [1].

РОЗДѢЛЪ ОСМЫЙ О ТЕСТАМЕНЬТЕХЪ.

АРТЫКУЛЪ 1.

Хто можеть и не можеть о речахъ своихъ рухомыхъ тестаментъ чинити.

Уставуемъ, ижъ кождый маеть мѣти моцъ о речахъ своихъ рухомыхъ тестаментъ чинити, кромъ тыхъ парсунъ нижей описаныхъ, которые парсуны ижъ подлѣ права не мають ничого вольного, для того тестаментомъ никому ничого отдати не могуть: наипервей дѣти лѣтъ зуполныхъ не маючіе, законники будучи въ законѣ не привильеваномъ, принемши и потвердившися въ законѣ, сынове зъ отцемъ недѣльные окромъ речей набытья своего властного або выслугъ, бо тежъ въ чужую моцъ поданые, то естъ тотъ кого бы кому выдано зъ его статки, шаленые, кацеры, невольники, отъ розуму отходячіе, а вѣдьже тые, коли къ собѣ прійдуть, моцны тестаментъ свой чинити, такъ тежъ и чти отсужоные не могуть тестаментовъ чинити.

АРТЫКУЛЪ 2.

О тестаментехъ на речи рухомые на имѣнъя набытые, якъ маютъ чинены быти.

Коли бы хто на речы рухомые або на имѣнье набытое хотѣлъ тестаментъ чинити; тогды таковый будь здоровъ або форъ, коли бы только былъ при доброй памети, моцомъ будеть речы свое и имѣнье набытое таковое отказовати, кому хочеть такъ духовнымъ парсунамъ яко и свѣцкимъ, призвавшы къ тому врядъ земскій судью подсудка писара каплана, а гдѣ бы вряду иѣти не могъ, ино передъ трема свѣдками вѣры годными можеть тестаментъ чинити. А коли сам потомъ умретъ, а тую волю свою остатнюю смертью потвердить, хотя бы и печати не приложилъ; таковый тестаментъ маеть при моцы зостати, только бы по смерти его не омѣшкали тестаменту передъ нами Господаремъ або передъ врядомъ земскимъ оповѣдати на рокохъ першыхъ судовыхъ. Пакли бы хто учиненью тестаменту живъ зосталъ, вольно таковому тестаментъ свой колько кроть хочеть отмѣнити, а остаточный тыхъ двохъ тестаментовъ смертью потвержоный врядовнѣ учиненый въ кождого права при моцы зостати маеть. А именье набытое тестаментомъ яко рухомую речъ кождый можеть записати, коли хочеть, нижли хтобы хотѣлъ имѣнье набытое на церковь записати маеть тымъ обычаемъ: которые кольвекъ духовные будуть тое имѣнье держати, мають съ того имѣнья службу земскую служити конно збройно водле уставы и уфалы земское. И вже отъ того часу уставуемъ, хто записалъ имѣнье на костелъ, тогды съ того имѣнья потомужъ маеть быть служба, яко и первей бывало. А а вѣдже тые свѣдки, которые при справованью тестаментовъ бывають, мають въ собѣ слова, которые слышать отъ того, хто тестаментъ чинить, правдиве до тестаменту казати вписовати и выразити значнѣ безъ кождого охиленья, тежъ и тотъ, хто тестаментъ чинить, маеть меновите кождую речъ у тестаментѣ докладати.

АРТЫКУЛЪ 3.

О сведкахъ, которые мають быти при справованью тестаментовъ.

Тежъ уставуем, при тестаментѣ мають быти три свѣдки вѣры годныхъ и неподойзреныхъ, про то тые свѣдки нижей менованые быти не мають: наипервей тые, которые тестаментовъ своихъ чынити не годни, тежъ невѣсты и екзекуторове або опекунове того тестаменту, такъ тежъ и тые, которымъ въ томъ тестаментѣ што будеть описано. А вѣдже если бы ся приходило кому тестаментъ на войнѣ и въ дорозѣ и въ дому а у пригодѣ, або не могли бы трехъ свѣдковъ мѣти; тогды колко можеть быти, только бы вѣры годни, а при таковыхъ можеть тестаментъ чыненъ быти, нижли скоро по вчыненью маеть тотъ тестаментъ объявленъ быти передъ нами Господаремъ або передъ судомъ земскимъ на первыхъ рокохъ судовыхъ, а на войнѣ передъ гетманомъ альбо хоружымъ повѣтовымъ, а тые свѣдки присегою своею мають тотъ тестаментъ потвердити. А трафитъ ли ся таковый тестаментъ чынити въ чужія земли; тогды тестаментъ маеть быти объявенъ передъ тымъ врядомъ, гдѣ ся пригодить, а пріѣхавшы до того панства и вказавшы отъ оного вряду выписъ, предсе маеть передъ врядомъ земскимъ оповѣдати, яко вышей описано.

АРТЫКУЛЪ 4.

Ни хто не можеть невольнику своему ничого записати, вольнымъ не вчынившы.

Уставуемъ, ижъ кождый якого кольвекъ стану невольнику своему, не вчинившы его на передъ вольнымъ, ничого тестаментомъ записати не может, абы его первей вольнымъ учинилъ. А вѣдьже тестаментомъ ижъ каждымъ листомъ явнымъ можетъ невольника своего вольнымъ учынити, а учинившы, тымъ же тестаментомъ можеть ему што рухомого водлѣ воли своее записати.

АРТЫКУЛЪ 5.

Кождый слуга путный и мѣщанинъ мгъстъ неупривилъеваныхъ, и тежъ человѣкъ простый якъ маетъ тестаментъ чынити.

Уставуемъ, ижъ кождый съ таковыхъ людей воленъ тестаментъ чынити о речы свое рухомые и описати третюю часть маетности своее всее кому хочеть, а двѣ части тыхъ же рухомыхъ речей маеть зоставити дитяти въ дому своемъ, для отслугованя съ тое земли свое, на которой сѣдить; а не будеть ли мѣти дѣтей ино предсе тые двѣ части маетности его маеть зостати въ дому его ку службѣ оного пана, на чыей земли сѣдить. А естли бы дѣти будучи вольные, а хотѣли прочъ пойти, тогды тую двѣ части маетности вземшы мають пойти прочъ, только землю мають пану своему подати и съ жытомъ засѣянымъ и съ хоромами съ тымъ всимъ, съ чымъ будеть тую землю пана своего на службу взялъ.

АРТЫКУЛЪ 6.

Если бы тестаментъ въ чомъ не былъ достаточнѣ справованъ.

Коли бы въ которомъ тестаментѣ якимъ незначнымъ або якимъ закрытымъ письмомъ который артыкулъ въ немъ былъ написанъ, або тежъ на мѣстцу значномъ або на датѣ было скробано, тогды таковый тестаментъ маеть быти никчемный; а гдѣ бы на мѣстцу мало потребномъ было скробано не ку шкодѣ сторонѣ, тогды шкодить не можеть. Такъ тежъ хто бы хотѣлъ бурить тестаментъ, а если бы въ въ одномъ або въ кольку артыкулехъ былъ нарушонъ, а иные вси поряднѣ водлѣ статуту справлены; тогды однымъ або колько артыкуловъ всего тестаменту касовать не можеть. Такъ тежъ о записехъ всякихъ на кождую речъ розумѣно и сужено быти маеть.

АРТЫКУЛЪ 7.

Причыны для которое отецъ сына можеть отъ имѣней выдѣлити або отдалити.

Уставуемъ ижъ съ причинъ тыхъ, гдѣ сынъ кгвалтовну руку поднесетъ на родичовъ, альбо имѣнье за жывота зъ рукъ отцовскихъ кгвалтовнѣ отыйметь. Другая кгды значную кривду вчынить родичу, альбо которымъ обычаемъ на горло стоитъ. Третяя кгды сынъ або дѣвка правнѣ не для Речы Посполитое а зе злостью або зъ ненависти стоитъ на горло родичу або матцѣ. Четвертая кгды часъ потребы рукоемства, або взятья зъ везенья, ку постановенью своей руки на рокъ въ речы, кгды идетъ о горло отцу або которому кольвекъ, речъ отмовялъ або зборонялсе взяти. Пятая кгды дѣвка нерядные учынки чынить, чыстость свою ображаючы, а родичы малженства и вѣна ее не забороняли, а въ той нерядности передъ лѣты двадцатма и петма въ малженство не пошла, а нерядности своее уживати хотѣла; тогды родичове могутъ отъ имѣнья выдѣдичыть, а то для того, ажъ ихъ послушна быть и въ малженство пойти не хотѣла. Шестая кгды родичовъ опущаютъ взешстью розумовъ ихъ. Семая коли бы родичовъ въ непріятельскихъ рукахъ будучыхъ окупити або чымъ иншымъ вызволити не хотѣли, маючы имѣнье и маетность въ рукахъ своихъ. Осмая кгды упорнѣ кацерства не слѣдують, або ку вѣрѣ Хрестіянской пристать не хотятъ. А вѣдже и за тыми причынами первей жадныхъ записомъ а ни тестаментомъ выдѣдичити не можеть, ижъ бы тые причыны або которою зъ нихъ передъ врядомъ оповѣдалъ и до книгъ записалъ.

АРТЫКУЛЪ 8.

О человѣку слѣпомъ.

Если бы се тежъ пригодило человѣку слѣпому тестаментъ чынити, таковый при тестаментѣ своемъ маеть мѣтъ осмъ свѣдковъ а не мнѣй, при таковыхъ свѣдкохъ тестаментъ подлѣ права справованый маеть быти и за слушный принятъ.