По семъ же возлюби Господа Бога своего отъ всея душа своя и отъ всея крѣпости своея; и подвигни вся дѣла твоя и обычаи и нравы угодная творити[1] Господеви. Паки же искреняго си возлюби: и всякаго человѣка по образу Божію созданнаго, рекше: всякого христіанина. Страхъ Божіи всегда имѣи въ сердцѣ своемъ и память смертную и любовь не лицемѣрную ко всѣмъ; всегда волю Божію твори и по заповѣдемъ его ходи. Рече бо Господь: въ чемъ тя застану, въ томъ тя и сужду; того ради достоитъ всякому[2] готову быти въ добрыхъ дѣлехъ; въ чистотѣ и въ покаяніи, и во всякомъ исповѣданіи, всегда чающе часа смертнаго[3]. О томъ же. Возлюби[4] Господа отъ всея душа и страхъ его да будетъ въ сердцѣ твоемъ; праведенъ буди и истенъ[5] и смиренъ; очи долу понича, умъ же къ небеси простирая, умиленъ къ Богу, и къ человѣкомъ привѣтливъ. Печалнаго утѣши; терпѣливъ въ напастяхъ, и недосадитель всякому человѣку,—щедръ и милостивъ; и нищимъ кормилецъ[6], и страннопріемникъ; скорбенъ грѣха ради[7]; веселъ о Бозѣ; алченъ буди отъ объяденія и жажденъ ото піянства; кротокъ не славохотенъ[8] не златолюбецъ, но друголюбецъ; не гордъ; боязнивъ предъ царемъ, готовъ въ повеленіи его; во отвѣтехъ сладокъ; частомолитвенникъ; разуменъ трудникъ къ Богу, и не осудникъ всякому человѣку; поборникъ обидимымъ; нелицемѣренъ; чадо Евангелія; сынъ воскресенія; наслѣдникъ будущія жизни о Христѣ Ісусѣ Господе нашемъ[9], нынѣ и присно и во вѣки вѣкомъ аминь.
