Како[2] подобаетъ святителемъ и священническому и иноческому чину, и царемъ и княземъ и всѣмъ христіяномъ поклонятися образу Спасову и животворящему кресту и пречистой Богородицѣ и святымъ небеснымъ силамъ и всѣмъ святымъ и священнымъ[3] сосудомъ и святымъ честнымъ мощемъ[4]. Правая рука устроити персты первыи краинеи да два нижнихъ концы сомкнуты, ино Святая Троица вообразится, среднеи перстъ съ другимъ прямо поставити мало надклоненъ, а другіи повыше, а не разпростерты, ти приобразуютъ Божество и человѣчество, тако прекрестити лице свое; первое возложити рука на чело, потомъ на перси, тажъ на правое плеще, таже на лѣвое[5] и по существу воображенъ крестъ Христовъ; потомъ главою поклонитися до пояса; а великіи поклонъ въ землю главою, а молитву и моленіе во устѣхъ, а въ сердцы умиленіе и во всѣхъ удехъ сокрушеніе о грѣсехъ, и отъ очію слезы, а отъ душа воздыханіе: усты Бога слави, а умомъ и сердцемъ и дыханіемъ молитися о полезныхъ, рукою перекрестися, а тѣломъ поклонися въ землю или до пояса, всегда тако твори. А святительскому чину и священническому такожъ рукою прекрестити всякого христіанина, требующа отъ нихъ благословеніе о крестѣ Христове, и о воображеніи и о поклоненіи во отечнице пишетъ извѣстно, тамъ почетъ уразумѣеши силу креста Христова.[6]
Поученіе святого Ѳеодорида, како благословити рукою и перекрестися. Три персты равны имѣти концы соединены вкупѣ, по образу Троическу Богъ Отецъ, Богъ Сынъ, Святыи Духъ не три суть Бози, но единъ Богъ въ Троицы имены раздѣляется Божество едино. Отецъ не рожденъ, а Сынъ рожденъ, а не созданъ, а Духъ Святыи ни рожденъ ни созданъ, но исходящъ, тріе во единомъ Божествѣ, едина сила, едина Божества честь, едино поклоненіе отъ всея твари, отъ ангелъ и человѣкъ, тако тѣмъ перстомъ указъ, а два перста наклонена, а не распростерта и тѣмъ указъ тако то образуютъ, два естества Христова Божество и человѣчество; Богъ по Божеству, а человѣкъ по вочеловѣченію, а по обоемъ совершенъ; вышніи перстъ образуетъ Божество, а нижніи человѣчество, понеже сшедъ отъ вышнихъ спасе нижняя, чтожъ согбеніе толкуетъ перстомъ преклонь небеса сниде, нашего ради спасенія, да тако достоитъ крестится и благословити: тако святыми отцы узаконено.
О томъ же Афонасія и Петра Дамаскина.
Яко начертаніемъ честного и животворящего креста отгонимы бываютъ нечистіи бѣси, и различныя недуги безъ цѣны убо и безъ труда, и похвалу его убо кто можетъ изрещи. Святіи отцы предаша намъ на сопротивъ глаголанія невѣрнымъ и еретикомъ, яко два перста убо а едина рука являетъ Христа Бога нашего во двою естеству и единомъ составѣ позноваема, десница жъ неизреченную его силу и одесную отцѣ сѣденіе возвѣщаетъ и свыше наченше и отъ небеснаго его круга къ намъ сошествіе являетъ, и паки отъ десныя страны на лѣвую отгоняти врага являетъ, яко непобѣдимою своею силою побѣди діявола Господь шуя и мрачна и не крѣпка.
Примѣчанія править
- ↑ Ibid.=образу спасову.
- ↑ Ibid.=тако.
- ↑ Ibid.=освященнымъ.
- ↑ Въ Пог. Арх. Цар. Болш. здѣсь идетъ слѣдующее: И еще долженъ есть творити кійждо благочестивыи христіанинъ крестъ свой первѣе убо да совокупитъ три персты своя за Святую Троицу: великій перстъ и другіе два, сущіе близь его. Первѣе убо да положитъ ю на челѣ своемъ, второе на чревѣ своемъ, третіе на правомъ рамѣ и четвертое на лѣвомъ рамѣ. Егда творитъ тако, тогда знаменуетъ истинныи крестъ. И слышите кій есть разумъ креста: егда полагаемъ руку нашу на челѣ, та же низводимъ ю на чрево, хощемъ рѣщи: яко Господь нашъ Іисусъ Христосъ Сынъ Божій, бѣ и есть Богъ; убо нашего ради спасенія и да вѣруемъ мы въ Него, сниде съ небесъ долу, на землю и паки иде дальнѣише земли, сіи рѣчь: въ муку, и свободи тамошнія мучимыя души. Егда же паки по сихъ положимъ ю на десномъ рамѣ, та же на лѣвомъ: хощемъ рѣщи, яко, отнеле же свободи души праведныхъ отъ муки, вознесся на небеса, и седѣ отдесную Бога и Отца; и паки имать пріити, судія всего міра, поставити праведныя убо одесную Своея страны, грѣшныя же отъ лѣвыя; сего ради молимъ Его, да не поставитъ насъ въ лѣвой Своей странѣ; но да поставитъ насъ стати въ дѣсной Своей странѣ со Святыми. Сіе знаменуетъ крестъ, егда творитъ и на лицѣ нашемъ; и сего ради должни есьмы, яко есть лѣно творити, и да дѣйствуетъ и сила его.
- ↑ Ibid. слѣдуетъ продолженіе согласное съ нашимъ текстомъ.
- ↑ Ibid. за тѣмъ слѣдуетъ окончаніе главы:
О благословленіи архіерейскомъ и священническомъ: отъ посланія блаженнаго Паисія Патріарха, вопроса 25-го толкованіе. О двадесять же пятомъ еже вопрошаете: которыми персты подобаетъ начертовати Архіерею или священнику благословеніе, еже даетъ, глаголетъ: яко понеже обѣща Богъ съ клятвою Аврааму да благословятся вси языцы въ сѣмени его, еже есть Іисусъ Христосъ, еже Давидъ къ Мессію вознося глаголетъ: и да благословятся въ Немъ вся колена земная: благословляетъ церковь всѣхъ, начертывающи рукою имя Мессіево, еже есть Іисусъ Христосъ, изображающи І. И. С. еже есть являетъ Іи҃съ и—Х, И, С.: еже глаголетъ Хр҃тосъ, и сіе вкратце, и которыми персты начертываетъ, и то сія письменна четыре ничто же разньствуетъ; токмо да имать мысли благословляй и благословляемый, яко благословленіе сіе сходитъ отъ Іисуса Христа рукою священническою, и Іисусъ Христосъ, иже даетъ дарованіе благословленія, къ прошенію онаго, иже проситъ и съ вѣрою; но пристойнѣе является, яко же живописуе Христа и благословляетъ, ибо чище показуетъ, еже Іисусъ Христосъ: вторый и третій перста совокупляетъ, знаменуета Іисусъ, а первый и четвертый совокупляема, знаменуема Х, и малый и послѣдній С, — еже являюта вкупѣ Хс҃ъ.