Во дни неки посла Господь ангелов взяти души бражникову, и поставити ю у врат пречистого рая повеле. Бражник же нача талк(ит)ися во врата пречистого рая. И прииде ко вратам рая Петр апостол и рече: «кто талкийся во врата пречистого рая?» И отвеща ему «аз ес(м)ь бражник, и желаю с вами в раю жити». И рече Петр апостол: «отыде отсюда, человече; здесь бражники не водворяюца, ибо им изготовна мука вечная со блудниками вместе». И отвеща ему бражник: «господине, глас твой слышу, а лица не вижу, и имени твоего не вем». — Аз ес(м)ь Петр апостол, который имею(ет) ключи сего царствия славы. «Помнишь ли ты, господине Петре, когда Господа нашего І(и)суса Христа иудеи на судилище к Каиафе поведоша и тебе вопрошали: ученик есть сего І(и)суса назарянина? — а ты трикраты от него отрекся. Аще бы не слезы твои и покаяние, и тебе не быть в раю; а я хоша и бражник — по вся дни Божие пил и за всяким корцом имя Господне прословлял, а не отрекался от него.» Слыша Петр ответ бражников, отыде от врат пречистого рая и сомнися о сем человеце бражнике.
Вторицею нача бражник талкитися у врат пречистого рая, и прииде ко вратам царь и пророк Давыд и рече: «кто талкийся у врат пречистого рая?» И бысть глас к нему: «аз есмь бражник, и желаю с вами в раю жити». И рече к нему царь Давыд: «отыде, человече, отсюда; здесь бражники не водворяютца, ибо им уготовано место в муку вечную со блудниками вместе». И отвеща бражник: «господине, глас твой слышу, а лица твоего не вижу, и имени твоего не вем». И рече к нему царь Давыд: «аз есмь царь и пророк, который седяй со Авраамом и Исааком на лоне царствия сего, и состави псалтырь и песни троичные». И бысть ответ бражников: «помнише ли ты, царю Давыде, когда бысть брань на Голиафы, тогда ты слугу своего Урию на войну услал, и тамо его смерти предати повелел, а жену его к себе в прелюбодеяние приял? Аще бы не были твои слезы и покаяние, и тебе не быть бы в раю». Слыша сие, царь Давыд отыде и сомнися о сем человеце.
Бражник же нача третицею талкитися у врат пречистого рая. И прииде ко вратам Иоанн Богослов и рече: «кто талкийся у врат пречистого рая?» И отвеща ему: «аз есмь бражник, и желаю с вами вместе в раю жити». И рече Иоанн Богослов: «отыде отсюда, человече; здесь бражники не водворяютца, ибо им уготовано место во огнь кромечный с прелюбодеями вместе». Отвеща бражник: «господине, глас твой слышу, а лица твоего не вижу, и имени не вем». — Аз есмь Иоанн Богослов, друг Христов, наперсник, возлюбленник и девственник. «О господине Иоанне Богослове! не сам ли ты написал во евангелие(и), что любите друг друга, а ты ныне меня ненавидишь и в раю жити не водворяешь; или отрекися от письма руки своея, или вырви из книги лист тот, который написал ты сам!» Отыде Иоанн Богослов и сомнися о сем человеце, и повеле апостолу Петру впустити его во царствие небесное. — (Заимствована из рукописи XVIII-го столетия.)
