Моли́тва Манасси́и, царя Иуде́йска
Го́споди Вседержи́телю, Бо́же отец на́ших, Авраа́мов, и Исаа́ков, и Иа́ковль, и се́мене их пра́веднаго. Сотвори́вый не́бо и зе́млю со все́ю ле́потою их, сопны́й мо́ре сло́вом повеле́ния Твоего́. Затвори́вый бе́здну, и запечатле́в ю́ стра́шным и сла́вным и́менем Твои́м. Его́ же вся боя́тся, и трепе́щут от лица́ сла́вы Твоея́. Я́ко непостоя́нна велеле́пота сла́вы Твоея́, и нестерпи́м гнев, е́же на гре́шники преще́ния Твоего́. Безчи́слена же и неизсле́дованна ми́лость, обеща́ния Твоего́. Ты бо еси́ Госпо́дь Вы́шний милосерд, долготерпели́в и многоми́лостив, и ка́яйся о зло́бах челове́ческих. Но ты Го́споди по мно́жеству бла́гости Твоея́, обеща́ еси́ покая́ние и оставле́ние согреши́вшим к Тебе́. И мно́жеством щедро́т Твои́х, нарече́ покая́ние гре́шником во спасе́ние. Ты у́бо Го́споди Бо́же пра́ведных, не́си положи́л еси́ покая́ние пра́ведным Твои́м, Авраа́му и Исаа́ку и Иа́кову, несогреши́вшим пред Тобо́ю. Но положи́л еси́ покая́ние мне гре́шному, зане́ согреши́х ти па́че числа́ песка́ морьска́го. Умно́жишася беззако́ния моя́ Го́споди умно́жишася, и несмь досто́ин воззре́ти и ви́дети высоту́ небе́сную. От мно́жества непра́вд мои́х сля́чен есмь мно́гими ю́зами желе́зными. Яко не возвести́ главы́ моея́, и несть ми восклоне́ния. Зане́ прогне́вах я́рость Твою́, и лука́вое пред Тобо́ю сотвори́х. И не сотвори́х во́ли Твоея́, и не сохрани́х повеле́ний Твои́х. И ны́не приклоня́ю коле́на се́рдца, и молю́ я́же от Тебе́ бла́гость. Согреши́х Го́споди согреши́х, и беззако́ния моя́ аз свем. Но прошю́ моля́ся Тебе́, огради́ ми Го́споди, огради́ ми, и не погуби́ мене́ со беззако́ньми мои́ми. Ниже́ в век враждова́в соблюде́ши зол мои́х. И не осуди́ мене́ в преиспо́дних земли́. Зане́ Ты еси́ Бо́же Бог ка́ющихся, да и на мне яви́ши всю бла́гость Твою́, я́ко недосто́йна су́ща спасе́ши мя, по мно́зей ми́лости Твое́й. И восхвалю́ Тя всегда́ во днех живота́ моего́. Я́ко Тя пою́т вся си́лы небе́сныя, и Твоя́ есть сла́ва во́ веки, ами́нь.
