Благословляю азъ многогрѣшныи (им. рекъ) и поучаю и наказую и вразумляю единочадаго сына своего, (им. рекъ) и его жену, и ихъ домочадцевъ быти во всякомъ христіанскомъ законѣ, и во всякои чистѣи совѣсти[1] и въ правдѣ; съ вѣрою творяще волю Божію, и храняще заповѣди Его; себѣ утвержающе во всякомъ страхѣ Божіи и въ закономъ жительствѣ; и жену поучающе, тако жъ и домочадцевъ своихъ[2] наказующе не нуждою[3], ни ранами, ни работою тяжкою; имѣюще яко дѣти, во всякомъ покое,—сыты и одѣты, и въ тепломъ храму и во всякомъ устрои. И вдаю вамъ христіанскому жительству писаніе[4] на память и вразумленіе вамъ и чадомъ вашимъ. Аще сего моего писанія не внемлюще[5], и нашего наказанія[6] не слушаете, и по тому не учнете жити, и не тако творити, якоже есть писано,—сами за себя отвѣтъ дадите въ день страшнаго суда; а азъ вашимъ винамъ, и грѣху не причастенъ, кромѣ моея душа; азъ[7] о всякомъ[8] благочиніи благословлялъ, и плакалъ и молилъ[9], и писаніе предлагалъ[10]; и аще воспріимете сіе мое худое ученіе и грубое наказаніе со всею чистотою душевною[11] и прочитая, прося у Бога милости и помощи и разума поелико возможно, какъ васъ Богъ вразумитъ и начнете дѣломъ творити вся сія: будетъ на васъ милость Божія и пречистыя Богородицы и всѣхъ святыхъ[12] и наше благословеніе отъ нынѣ и до вѣку; и домъ вашъ, и чада ваши, и стяжаніе ваше, и обиліе, что вамъ подаровалъ Богъ отъ нашего благословеніе и отъ своихъ трудовъ да будетъ благословенно во всякихъ благихъ во вѣки аминь.
