Статут Великого княжества Литовского 1566 года/Формуляры

Статут Великого княжества Литовского 1566 года — Формуляры

Дата создания: 1566. Источник: Статут Вялікага княства Літоўскага 1566 года. — Мінск, 2003. — С.35-263. За виданням 1855 року; [1].

[ФОРМЫ ЗАПИСЕЙ]

Даровизна речей рухомыхъ отъ мужа жонѣ правомъ дожывотнымъ.

Я Н. зезнавамъ тымъ моимъ листомъ добровольнымъ записомъ всимъ вобецъ, кому бы о томъ вѣдати належало, теперъ и на потомъ завжды, ижъ я дознавшы противъ себе хути и упріймость и милость и зычливость малжонки мое милое, урожоное панеи Н. хотечи ей то заемною милостью и зычливостью нагородить, зъ упріймой милости мои ку ней малженскей, нынѣшнимъ записомъ моимъ записую доживотье на маетности моей дѣдичной, въ повѣтѣ Н. лежачый въ селѣ Н. и всѣхъ ее принадлежностяхъ, такимъ способомъ: ижъ она помененая малжонка моя милая тые вышъменованые добра, такъ яко се въ собѣ мають, зо всими ихъ доходами и приналежностями, поддаными, ставами, млынами, корчмами и згола зо всимъ тымъ, яко самъ теперъ уживамъ, обнявшы, безъ вшелякое перешкоды и импедыменту близкихъ кровныхъ и повинныхъ моихъ, спокойнѣ ажъ до остатнего кресу живота моего держать уживать маеть. До того той же малжонцѣ моей милой по животѣ маоемъ даю даруе и тымъ листомъ добровольнымъ записомъ моимъ на вѣчность записую вси речи мои рухомые, то естъ: золото, сребро, пенези готовые на имѣнье уданые и мнѣ якимъ кольвекъ правомъ служачое, перла, шаты, коберцы, кони ѣздные, возники, стада быдла рогатое и не рогатое малое и великое, цынъ, мѣдь и увесь спрятъ домовый, што се тылько речъю рухомою назвать и меновать може, все посполитостью завираючы, што теперъ зъ ласки Божое маю, и што еще зъ нею мѣшкаючы прибавлю, прикуплю, и якимъ кольвекъ способомъ набуду, отдаляючи отъ того всихъ близкихъ кревныхъ и повинныхъ моихъ, вольно теды есть и буде помененая пани малжонка моя милая отъ даты того запису моего тое маетности вышей менованое въ спокойнымъ держанью, яко вышей, ажъ до остатнего кресу живота своего тримать. А по смерти моей тые вси речи мои рухомые, отъ мала до велика, што се едно кольвекъ по животѣ моемъ зостане, черезъ мене ей нынѣшнимъ записомъ моимъ вѣчнѣ дарованое, взять, держать, и оныхъ ку потребѣ своей уживать и оборочать, кому хотечы отдать, даровать, продать, записать, и яко хотечы по воли своей шафовать. Въ чымъ помененой малжонцѣ моей милой по животѣ моемъ нихто зъ братьи сестръ близкихъ кревныхъ и повинныхъ моихъ о тые речи рухомые, презъ мене ей по животѣ моемъ вѣчнѣ дарованые и записаные, жадное трудности правное задавать и оное импедіовати не мають подъ закладомъ.

Способъ запису замѣны добръ.

Ставши обличнѣ передъ судомъ шляхетный Н. дѣдичъ Н. зъ одное стороны, и шляхетный. Н. зъ другое стороны, здоровый на умыслѣ и на тѣлѣ и при добромъ розумѣ будучы, явнѣ и презъ вызнанье свое вызнали, ижъ межи собою учинили добръ дѣдичныхъ вѣчною и неодзовною замѣну, давшы собѣ зъ обо полные добра за добра, земли за земли. Такъ, ижъ преречоный Н. далъ и заменилъ добра свои дѣдичные, то естъ весь Н. зо всимъ тое вси дѣдицством и зо всимъ правомъ панствомъ властностью и титиломъ дѣдичнымъ, Н. зъ Н. Который Н. за его добра дѣдичные, то естъ весь Н. преречона, также тежъ зо всимъ дѣдицствомъ тые вси далъ и заменилъ зо всимъ правомъ панствомъ и властностью и титуломъ дѣдичнымъ, такъ ижъ преречоный Н. преречоне добра Н. то есть весь Н. зъ своими потомкаии будеть держалъ мѣлъ обычаемъ дѣдичнымъ, посядѣ такъ широко довго и въ кругъ, яко преречоные добра або дѣдиуство, преречоные вси Н. въ своихъ границахъ зъ стародавна естъ роздѣлено и ограничено зо всимъ и каждому зособна, пожитки которіе зъ стародавна къ тому Н. дѣдицству приналежали и зо всими, ничого не вымуючи, присеглостями. И также преречоный Н. преречоные добра свои, то естъ весь Н. зо всими тое вси Н. дѣдичствомъ, зо всимъ правомъ панствомъ и властностью и титуломъ дѣдичнымъ, зо всими потомками своими, буде держалъ мѣлъ и въ дѣдизнѣ, осядѣ такъ широко довго и въ кругъ, яко речоные добра або дѣдицство вси Н. въ своихъ границахъ и межахъ зъ стародавна естъ роздѣлено и розграничоно, и также весполъ зо всими и каждему зособна пожитками и прилеглостями, которіе зъ стародавна ку маетности Н. приналежитъ, ничого не выймуючы. И южъ тые преречоные замѣну чынечые дали собѣ зобополнѣ въ преречоные добра такъ одмененые истотные и въ везанье и речоное держанье презъ возные земскіе, будучи повинни и обовязани сполнѣ собѣ и потомки свои взглядомъ преречоныхъ добръ такъ замененыхъ боронить, шчитити, и зобополнѣ се высвобожать, и въ спокояхъ отъ всихъ правныхъ трудностей и першыхъ обовязковъ записовъ позвовъ занесеныхъ, и которые занесены быть мають зысковъ, презысковъ которихъ кольвекъ, и все замыкаючы отъ вшелякого пренагабанья правного, и отъ всихъ особъ стану обое плоти презъ давности земскіе, яко на кототорой особѣ давность належитъ, подъ шкодами земскими або закладомъ ста гривенъ пенезей монеты Польское. О которые шкоды або закладъ одинъ отъ другого взглядомъ преречоное обороны позваное и потомкве его позвани до суду земского Е. або замкового Н. на першомъ року яко завитымъ стать обличне, и занехавши всихъ вымовокъ зволокъ, съ которое кольвекъ причины, або тежъ квитовъ, которіе съ права звыкли быти давани и позволяны, и всихъ инныхъ правныхъ зволокъ, и также рушенья судьи отповѣдать, и отъ суду не отходечи декретови судовому быти послушонъ, то естъ заступить, и о вси сужоные речи досыть учинить буде повиненъ, и потомкове его будуть повинни тыле кроть, иле кроть имъ нихто потомкомъ будеть потреба.

Мужъ жонѣ, жона мужови сполне доживотье учинить тымъ способомъ.

Ставши обличнѣ передъ судомъ шляхетный Н. одтулъ ажъ дотуль, и также шляхетная Н. малжонкове, здоровы на умыслѣ и на тѣлѣ, уживши пріятельское рады, явнѣ и меновите вызнали, ижъ всихъ добръ своихъ дѣдичныхъ и заставныхъ рухомыхъ и нерухомыхъ, которіе теперъ маю и по тымъ мѣти буду, зобополнѣ и сполечнѣ позволили собѣ уживанье до часу живота своего такимъ обычаемъ. Ижъ если бы преречоному Н. первей, нижли преречоной Н. придалосе умерть; теды она Н. вси добра такъ рухомые яко нерухомые преречоного Н. будеть тримать, и оные посядѣ зо всимъ правомъ панствомъ властностью, ничого не выймуючы, и будеть ихъ уживать ажъ до часу живота своего. А по смерти преречоной Н. добра преречоные такъ рухомые яко не рухомые цалѣ зуполнымъ правомъ на потомки преречоного Н. вернесе, безъ вшелякое переказы и спору потомковъ преречоное Н. И также гдѣ бы се преречоной Н. придало первей умерть нижли самому; и теды преречоный Н. добра вси такъ рухомые яко и нерухомые преречоной Н. будеть держать, и посядѣ зо всимъ правомъ властностью зо всими ку тымъ добромъ речами приналежными, и буде ихъ уживать до часу тылько живота своего. А по смерти преречоного Н. добра преречоные, которіе кольвекъ оной Н. приналежали, на потомки преречоное Н. цалѣ вернутъ се, безъ вшелякое переказы и спору преречоного негды мужа потомковъ.

Записъ отъ мужа жонѣ на суму.

Я Н. одступившы свое властное собѣ потомкомъ и добрамъ моимъ належное юрысдыцый, а подъ той листъ добровольный записъ мой собе самого потомки и добра мои вси лежачые рухомые и сумы пенезей добровольнѣ поддавшы, зезнавамъ тымъ листомъ добровольнымъ записомъ моимъ, кому бы то вѣдать належало теперъ и на потомъ завжды, ижъ зосталомъ виненъ урожоной ей милости паней Н. малжонцѣ моей истотней сумы пенезей Н. на долгу позычоного, въ каждый золотой по 30 грошей Польскихъ личечи, которое сумы пенезей, абы такъ при животѣ яко и по животѣ моемъ, оная малжонка моя Н. певна тылько на всихъ добрахъ и маетностяхъ моихъ лежачыхъ рухомыхъ дѣдичныхъ и набытыхъ, сумахъ пенежныхъ и на маетностяхъ, въ сумахъ обычаемъ зоставнымъ заведеныхъ, так тутъ Н. и гдѣ кольвекъ будучыхъ, теперъ презъ мене маючихъ, и на потомъ за ласкою Божею набытыхъ и приспособеныхъ, на всихъ огуломъ, жадныхъ не выймуючы а ни зоставуючы, записую, и утверждаю, и заразъ въ моцъ держанье и уживанье подаю и поступую. Волно естъ и будеть помененая пани малжонка моя тыхъ добръ, которіе теперъ маю и на потомъ мѣти буду, отъ даты того листу моего, такъ при животѣ посполу зо мною, яко и по животѣ моемъ зоставившысе, держать, и того всего яко властности свое ажъ до отданья тое сумы пенезей Н. зол. Поль. уживаю, (sic) кромъ жадное перешкоды одъ мене самого. А по смерти моей дѣти близкіе кревные и повинные мои, не отдавши помененой еи иилости пани малжонцѣ моей, албо тому кому бы то она зъ великое милости свое тую суму пенезей Н. зол. Польск. отдала албо даровала, и кому бы то отъ нее и по ней належало, въ тые добра по мнѣ зосталые уступовать. И никоторое переказы и трудности ей и держачему тыхъ добръ задавать не маю и мочи не буду, и о вшемъ отъ кождого такового, хтобы трудность якую задавалъ, все огуломъ замыкаючы одъ вшелякого пренагабанья правного, и отъ всихъ особъ я самъ а по мнѣ потомкове мои боронить и заступовать, не выймуючи, своимъ властнымъ коштомъ и накладомъ.

Отъ того жъ тойже на доживотье.

Я Н. зезнавамъ тымъ листомъ добровольнымъ записомъ моимъ, кому о томъ вѣдать належало теперъ и на топомъ завжды, ижъ я не будучи до того ни от кого примушоный а ни намовленый, але самъ зъ доброе воли мое, а за радою ихъ милости п.п. пріятелей моихъ и зъ милости моей малженское доживотье на добрахъ моихъ лежачихъ и рухомыхъ, въ Н. на Н. и гдѣ кольвекъ будучихъ, и сумахъ пенежныхъ гдѣ кольвекъ и у кого кольвекъ будь на заставахъ, будь за записами, и якимъ кольвекъ способомъ презъ мене маючыхъ и держачихъ, и речахъ всихъ рухомыхъ: золото, сребро, клейнотахъ, шатахъ, рыштункахъ, конехъ, стадо, быдло, цынъ, мѣдь, збожъю озимнымъ яримъ, такъ въ гумнахъ зложонымъ, яко и на полю засѣенымъ и всимъ, што бы едно речъю рухомою названо и выражоно быть могло, жадное и наменшое речы не выймуючы, ей милости панеи Н. малжонцѣ моей записую такимъ способомъ. Ижъ естли бы Панъ Богъ впередъ на мене смерть допустить рачылъ; мае и вольна буде преречоная пани малжонка моя милая по смерти моей добръ моихъ лежачихъ и рухомыхъ, ойчистыхъ и материстыхъ, спадковыхъ теперъ, и на потомъ по комъ кольвекъ на мене припадаючыхъ, и набытыхъ, также сумъ пенежныхъ, гдѣ кольвекъ будь на заставахъ альбо за записами мнѣ служачыхъ, и всихъ речей рухомыхъ, золота, сребра, клейнотовъ, шатъ, рыштунковъ, кони, стада быдла, цыну, мѣди, збожъя озимнего и ярего, такъ въ гумнахъ зложоного, яко и на поляхъ засѣяного, и всего што бы едно речъю рухомою назвать и выразить се могло, жадное и намнѣйшей рече не выймуючи, спокойнѣ держать и уживать и оными вольно шафовать ажъ до остатнего кресу живота своего, безъ жадное перешкоды въ спокойномъ держанью и уживанью того всего помененой пришлой малжонцѣ моей милой, и трудности правное задаванья отъ потомковъ моихъ. А по смерти ее, теды тое зась иаеть вернуть на потомки мои.

Записъ на вечистую продажу.

Я Н. дѣдичъ, я Н. зезнавамъ и ознаймуе листомъ добровольнымъ записомъ моимъ всимъ вобецъ и каждому зособна, кому то вѣдать належало теперъ и на потомъ завжды. Ижъ я маючи вольность, съ права посполитого и статуту земского, добрами и маетностями своими ведлугъ воли и уподобанья своего шафовать, ку доброму и пожитечному своему оборочать, теды маетность мою ойчистую фолварки село Н. въ воеводствѣ Н. повѣтѣ Н. лежачое, зъ дворомъ зъ людми зъ боярами поддаными осядлыми, подворишными огородниками и подсусѣдками, зъ ихъ повинностями работами подводами чыншами подачками пенежными медовыми и осыпными, зъ кгрунтами зъ землями тамошними пашными и не пашными, зъ полями зъ сеножатьми зъ пущами борами лѣсами дубровами гаями, запустами зарослами вшелякими, садами пасеками зъ бортями , зъ деревомъ бортнымъ и зо бчелами и безъ пчолъ, зъ ловы звѣриными пташими и бобровыми гоны, зъ потоками рѣками рѣчками болотами, съ ставищами зъ ставами зъ млынами, рудами озерами сажалками, корчмами мытами гребельными и мостовыми, и вшелякими пожитками и приналежностями, такъ яко се тая маетность село Н. сама въ себѣ въ кгрунтахъ пожиткахъ при належностяхъ и обходехъ своихъ здавна мѣла и теперъ маеть и завираетъ, ничого на себе малжонки потомки кревные и повинные мои не зоставуючы а ни выймуючы, такъ ижъ менованый не менованому а менованый менованому шкодити не маеть, все огуломъ яко мнѣ служило и належало зъ титуломъ вечистымъ предаломъ, и тымъ листомъ доброволнымъ записомъ моимъ записаломъ правомъ вечистымъ некгды неотзовнымъ и назадъ неворочаючимсе урожоному его милости пану Н.Н. за певную готовую суму пенезей, то есть Н. золличбы и монеты Польское, хотечи въ кождый золотый по 30 грошей Польскихъ, которую суму заразъ отъ его милости одобраломъ. И жонѣ и его милости тымъ же записомъ моимъ квитую и вольнымъ чиню вѣчнѣ, въ которой маетности Н. Н. позволями допущамъ заразъ его милости пану Н. потомкомъ его милости увезанья и увойстя въ вечыстую посесыю презъ возного и шляхту, которихъ собѣ его милостъ способитъ. Также вси права листы и записы на тую маетность належачую его милости пану Н.Н. отдать маю, которіе на его милость и потомки его милости вливаю, а самъ се зъ нихъ зрекаю вѣчнѣ. За чимъ его милостъ панъ Н.Н. и потомство его милости волны тую маетность, помененое село Н. зо всимъ яко се вышей поменило, спокойнѣ держать уживать розмножать и розшырать, пожытковъ собѣ примножать и причинять, любо кому хотечи отдать, даровать, продать, записать, фримарчить, заставить и ведлугъ воли и налепшего уподобанья своего яко властностью своею шафовать. А я молжонка и потомкове мои, отъ даты того запису моего вечистое продажи, въ той маетности вышъпомененой въ кгрунты пожитки и приналежности въ намнѣйшой ихъ хути уступовать, и жадное трудности перешкоды и пренагабанья правного и неправного въ спокойное посесыи его милости самъ презъ себе, малжонку, потомки, кревные повинные близкіе и далекіе, слуги, подданые и направные особы чинить и задавать не маю и не буду моглъ. А по мнѣ потомки мои не будуть о вшемъ отъ вшелякихъ и импедиментовъ правныхъ и неправныхъ зъ екое кольвекъ мѣри отъ кольвекъ заходячыхъ, также отправъ записовъ першихъ и послѣднихъ ручныхъ и зезнаныхъ, отъ вѣнъ привѣнковъ, декретовъ екзекуцый отъ каждое особы его милости пана НН. и потомство его милости и кождого тую маетность отъ его милости держачого, у кождого права суду и уряду и на каждымъ мѣстцу своимъ коштомъ боронити и заступовати, и тые добра очищати и освобожати, и вольными отъ каждое особы отъ всихъ импедиментовъ и тежаровъ учинить (такъ яко бы его милость панъ Н. и потомки его милости въ той маетности въ спокойной посесыи зоставалъ и жадное трудности и шкодъ не поносилъ) маю и повиненъ буду, а по мнѣ потомкове мои мають и повинни будуть тыле кроть, иле бы того потреба указывала. Што все и каждую речъ зособна маю и повиненъ буду зыстить и выконать, а по мнѣ потомкове мои подъ закладомъ Н.Н. зол. Пол. и подъ нагороженьемъ шкодъ за тымъ поднятыхъ, кромъ вшелякого доводу и присеги голымъ словомъ презъ его милость пана Н. и потомки его милости ошацованыхъ. О который закладъ и о шкоды, взглядемъ каждое не досыть учиненью ее приходячые и припадаючіе, и до учиненья досыть тому записови моему добровольного вечистое продажи и кондыцый въ немъ выражонымъ, волно буде его милоети пану НН. и потомковъ его милости мнѣ самого, а по мнѣ потомковъ моихъ, позвать до каждого права суду и уряду, хоть инѣ добромъ и потомкомъ моимъ неналежного, кгродского зеиского и трибуналского, въ которіе кольвекъ повѣты воеводстве, альбо до суду коптурового, которимъ се я съ потомками и добрами моиии вшелякими, отступивши свое власное юрисдицыи воеводства повѣту суду и уряду, добровольнѣ поддаю и форумъ тамъ собѣ, гдѣ тылько буде позваный, назначаю. Гдѣ за позвомъ першимъ, яко на завитымъ року, ставши противко тому листови добровольному записови моему и его кондыцыямъ и ликгаментомъ ничого не мовечи, пленипотентови пленипотенцый стороны поводовое, положенью позву, хотя бы невчесне было, ани позвами ничого не жадаючы, термену ничимъ не збіяючи и боронъ жадныхъ не вносячы а ни зажываючы до того мужа кладаючисе, послугою его Королевское Милости Речы Посполитое лекгатами до посторонныхъ панствъ войною ексцептами сеймовым вальными сеймиками повѣтовыми, вторгненьемъ до короны непріятеля креста светого и моровымъ повѣтремъ не вымовляючисе, деляцыи правдивое хоробы свое и умоцованыхъ своихъ большей справы на муиимерта на виктора не заживаючи, малыхъ лѣтъ потомковъ не щитечисе, иншими припадками не вымовляючисе отъ декрету суду и уряду оного, до которого буде позваный, не апелюючы, апеляціи презъ припозвы не попираючы, и освѣдчанья жадного на судъ и сторону не чынечы, и вшелякихъ згола и каждое зособна менованыхъ а неменованыхъ оборонъ и добродѣйствъ правныхъ съ права посполитого походячыхъ и зъ довтепу людского знайденого не заживаючы, и на помочъ собѣ не беручы, закладъ и шкоды отъ суду и уряду оного до которого буде позваный не подходячый его милости пану НН. и потомкомъ его милости и каждому тые добра держачему и о тое правомъ чинячему, заплатить и его милости винковать и добра очищать и весь тежаръ справы, отъ кого колвекъ взглядомъ тое маетности и ее приналежности, его милости пану НН. або потомкомъ его милости и каждому отъ его милости держачему, жадное на себе взять и за разъ за ихъ милость респендовать маю и повиненъ буду, а по мнѣ потомкове мои будуть повинни. Гдѣ бымъ тежъ будучи позваный о которую кольвекъ речъ въ томъ записѣ моемъ выражоно до права не сталъ, або ставши въ томъ се не усправедливилъ и далъ бымъ на себе право перевести; теды тое все, што буде позванъ, на мене на потомкахъ моихъ и на добрахъ моихъ не порядкомъ статувымъ але разомъ всказано и присужоно быть маеть, а судъ або врядъ вшелякихъ екзекуцый на мене и добрахъ моихъ за речъ осужоную ведлугъ права уживати буде повиненъ. Которіе кгды бымъ самъ альбо презъ кого кольвекъ заборонилъ; теды судъ одослать мене маеть на дальшую якзекуцыю, то естъ на баницыю до суду головного трибуналю Любельского, на воеводство которое кольвекъ, Кіевское, Волынское и Браславское, и въ который кольвекъ повѣтъ Луцкій, Влодимерскій або Кременскій, любо на консерваты тыхъ воеводствъ напервей припадаючихъ. За которимъ одосланьемъ процесу правного презъ злое отриманье и присегу на невѣдомость зносити не маемъ и не буду моглъ, и отъ суду ми тое позволено быти не маеть; але баницыя за спротивненье се праву посполитому на мене презъ судъ головный трибунальскій, хочъ безъ бытности стороны поводовое, всказана и публикована быть маеть, по которой баницыи моцная экзекуцыя и за тую суму закладъ шкоды и презыски всказанье на мене потомкахъ и добрахъ моихъ вшелякихъ лежачыхъ и рухомыхъ и сумахъ пенежныхъ, которые тымъ листомъ добровольнымъ записомъ моимъ онарую презъ судъ и урядъ належный одправа его милости пану НН. або потомству его милости або кому бы то право отъ его милости належало, тежъ моцно учинено быть маеть. При которой отправѣ если бы се якіе шкоды кому кольвекъ стали, будъ крови розленья або забойство, того такъ на сторонѣ яко и на врядѣ правнымъ и ни якимъ способомъ доходить не маю и потомкове мои не будуть, и о вшемъ зо всего квитовать, кгды бы того потреба была, маю а по мнѣ потомкове мои мають и будуть повинни. А гдѣ бы тежъ за противнымъ всказаньемъ судовымъ пришло его милости пану Н.Н. и потомкомъ его милости, албо держачему добра мои и кождому той записъ мой маючему въ декрету аппелевать; теды тая апеляцыя яко сторонѣ поводовой отъ кождого суду на воеводство Кіевское Волынское и Браславское, або на консерваты тыхъ воеводствъ наипервей пропадаючихъ, для прудшое справедливости допущона быть маеть. Которому то листови записови моему добровольному вечистое продажи и всимъ его кондыцыямъ и ликгаментамъ досыть чинить маю и повиненъ буду съ потомками моими тыле кроть.

Даровизна вѣчистая сумъ записаныхъ и речей рухомыхъ отъ мати дѣтемъ.

Я НН. одступивши свое власное належное юрыздыцыи права и повѣту, а теперешнему записови моему доброволному и всимъ его кондыцыямъ съ добрами и потомками моими подаючисе, сознавамы и ознаймуе тымъ листомъ записомъ моимъ добровольнымъ вливковымъ кому о томъ вѣдать належы теперь и на потомъ завжды. Ижъ я маючи часто молестоване отъ малжонка моего теперешнего его милости пана Н. а бымъ вси суммы добра и права мои, которыи кольвекъ мнѣ належать, на его милость влила, забѣгаючи я теды тому абымъ потомкомъ моимъ милымъ пану Н. сынови и паннѣ НН. цорцѣ вси суммы и добра мои вцалѣ зоставила, суммы мои вси и вшелякіе гдѣ кольвекъ якимъ кольвекъ способомъ и правомъ ленѣ належачымъ, то естъ перше сумму Н. которую маю записаную отъ зошлого урожоного его милости пана НН. малжонка моего, на дворѣ фальварву и селѣ Н. дожывотье собѣ зоставивши; другую суму которую маю НН. прыселку до Н. належачымъ; третее которій ми виненъ НН. Н. которую ми виненъ на листы записы свои добровольные водлугъ права справеные, о чимъ шырей одъ остатнего запису помененые, въ собѣ обмовляе тые иншые всы сумы огуломъ добра лежачые милуючи дѣти мои, которыемъ мѣла о зешлымъ урожонымъ его милостью паномъ Н. даю дарую и на сына моего пана Н. вливамъ. Также томужъ сынови моему На. Н. перше суму Н зол. Пол. а особливе другую суму Н. которую На. Н. отъ пана Н. за вливкомъ права належачого. зол. Поль. которую ми виненъ ННН. 4-хъ суму, которую мнѣ виненъ НН. тое сынови моему вѣчнѣ даю и на его вливаю, до того тежъ сынови моему пану НН. кони стадо быдло вшелякіе цынъ мѣдь, и што кольвекъ речъю рухомою нижей быть названо, даю дарую и не выймуючы, ани зоставляючи записую вѣчнѣ. А цорцѣ моей, паннѣ НН, тую суму Н. зол. Пол. которую маю отъ малжонка маего пана Н. даровано зъ маетности НН. учтивой, даю дарую и на цорцу мою вливаю мѣсто посагу такимъ еднакъ зпособомъ, же бы тыхъ Н. зол. отъ отца своего тестаментомъ ей записаныхъ у брата своего а сына моего, пана Н. не брала и оного первей урядовнѣ квитовала. А гдѣ бы се цорца моя панна НН. упоминала Н. зол. Пол. зъ отчызны отъ отца ей записаныхъ; теды тылько ей сумы Н. мнѣ записаное половину панъ НН. сынъ мой маеть дать сестрѣ своей, а цорцѣ моей, а половину тую другую Н. зол. при собѣ доставити, абы сполна Н. выносила сума посагу цорцѣ моей НН. особливѣ въ золотѣ , въ сребрѣ, въ штукахъ, въ клейнотахъ, шатахъ; то я сама повинна дать цорцѣ моей, зоставиши собѣ однакъ того всего такъ сумъ яко и речей рухомыхъ доживотное уживанье. А естли бы, стережи Боже, сынъ мой панъ Н. безъ потомнѣ съ того свѣта зышолъ, на паннѣ НН. цорцѣ моей вливамъ и ступуе, сама се зъ нихъ вызуваючысе и вырекаючысе на особу ихъ цедую. Мають и волны будуть помененые потомкове мои, и меновите сынъ мой, вышеречоное сумы всее и каждое зособна поднести, съ подвероныхъ кгвинтовать, и оными ведлугъ воли и уподобанья ихъ и пановъ опекуновъ ихъ диспоновать, о чымъ отъ мене и отъ жадного зъ близкихъ кревныхъ повинныхъ и иншихъ потомковъ моихъ жадное препедицыи и пренагабанья мѣть не мають, и на томъ дала.