Статут Великого княжества Литовского 1566 года/Раздел 12

Статут Великого княжества Литовского 1566 года — Роздѣлъ дванадацтый о головщызнахъ и навезкахъ людей посполитыхъ

Дата создания: 1566. Источник: Статут Вялікага княства Літоўскага 1566 года. — Мінск, 2003. — С.35-263. За виданням 1855 року; [1].

РОЗДѢЛЪ ДВАНАДАЦТЫЙ О ГОЛОВЩЫЗНАХЪ И НАВЕЗКАХЪ ЛЮДЕЙ ПОСПОЛИТЫХЪ.

АРТЫКУЛЪ 1.

О головщинахъ и навезкахъ людей простого стану.

Головщызна панцерному слузѣ пятдесятъ копъ грошей, путному слузѣ тридцать копъ грошей, бортнику двадцать пять копъ грошей, тяглому двадцать копъ грошей, паробку десеть копъ грошей, а жонамъ ихъ совито. А навезка панцерному слузѣ шесть рублей грошей, бортнику два рубли грошей, тяглому рубль грошей, паробку полтина грошей, а жонамъ ихъ совито, а жонца, которая мужа не маеть и не мѣла, полтина грошей.

АРТЫКУЛЪ 2.

Головщизны и навезки тивуномъ, ключникомъ, войтомъ, старцомъ, лавникомъ сельскимъ.

Тивуну, ключнику, войту, старцу головщизна сорокъ копъ грошей, естьли бы невольникъ въ которомъ съ тыхъ врядовъ былъ, тогды ему во врядѣ головщизны двадцать копъ грошей, а навезки рубль грошей. А пакли бы въ ключохъ або у войтовствѣ которій шляхтичъ былъ; таковому предсе головщизна маеть быти водле стану шляхецского. А навезка тивуну, ключнику, войту, старцу по три рубли грошей, а лавнику два рубли грошей.

АРТЫКУЛЪ 3.

Головщизна ремеснымъ людемъ.

Золотару, органистѣ, пушкару, гафтару, малерови, сокольнику, машталору, кравцу, гафтарцѣ, коверникутымъ всимъ головщизна по тридцати копъ грошей, а навезки по три рубли грошей, а жонамъ ихъ совито. Дойлидѣ, ковалю, столяру, псарцу, возницы, мулеру, шевцу, гончару тымъ всимъ головщизны по двадцати копъ грошей, а навезки три рубли грошей, а жонамъ ихъ совито. Потомужъ и иншыхъ ремесникомъ, которыхъ тутъ не написано, маеть быти плачоно яко дойлидѣ и жонамъ ихъ совито.

АРТЫКУЛЪ 4.

О ношенью жидовскомъ.

Жидове въ коштовныхъ шатахъ зъ ланцуги золотыми сами и жоны ихъ въ золотѣ и въ серебрѣ, такъ тежъ и сребра на пасахъ и на кордахъ носити не мають; але уберъ ихъ маеть быти значный: шапки або биретъ жолтый, такъ тежъ и завиванья бѣлыхъ головъ полотно жолтое, або тому подобное, ижъ бы знакъ и певное розознанье было христіянина отъ жида.

АРТЫКУЛЪ 5.

Жидъ, татаринъ и кождыи бесурмянинъ на врядъ преложонъ и хрестіянъ въ неволи мѣти не маетъ.

Уставуем, ижъ отъ того часу мѣти хочемъ, абы жидъ, татаринъ и кождый бесурмянинъ на достоенство а ни на который врядъ отъ насъ Господаря а ни отъ пановъ радъ нашихъ преложонъ не былъ и хрестіянъ въ неволи не мѣлъ. А естьли бы который зъ нихъ христіянина купилъ у вѣчную неволю; таковый пенези тратитъ, а тотъ хрестіянинъ маеть быти воленъ. А естьлибы хлопа або жонку закупилъ, тогды маеть прійти передъ врядъ и въ чомъ закупилъ, або тежъ и зъ суда въ заплатѣ яко будеть выданъ, до книгъ записати; и будеть ли сума невеликая, тогды тотъ закупъ и закупня за семъ лѣтъ съ тыхъ пенязей маеть выробитися, а кгды бы сума великая была, ино с тыхъ пенязей на кождый годъ выпуску маеть быти хлопу полтину грошей а жонцѣ пол-копы грошей. Нижли маючи таковыхъ закуповъ и дѣтей ихъ въ жидовство а ни въ бесурмянство намовляти а ни обрѣзовати не мають, а который бы смѣлъ то вчинити, а было бы то на него переведено передъ врядомъ; тогды безъ кождого милосердья таковый огнемъ маеть быти каранъ, чого врядъ нашъ съ пильностью стеречи и о томъ вывѣдоватися достаточнѣ маеть. А мамками христіянки у дѣтей жидовскихъ и тежъ кождыхъ дѣтей бесурмянскихъ быти не мають; а хтобы хрестіянокъ ку тому приневолялъ, а то бы слушнѣ ведле права на него было переведено, таковый горломъ маеть быти каранъ. Тымъ же обычаемъ хотя бысмы которому татарину або жиду або которому бесурмянину дворъ нашъ або имѣнье зъ людьми дали; таковые мають се жидове и бесурменинъ на выслугахъ своихъ противъ христіянскихъ людей якъ выступныхъ такъ и тяглыхъ заховати, абы ихъ ку подачкомъ и службам незвыклымъ не приневоляли. А пакли бы тые люди наши за таковымъ зневоленьемъ прочъ отошли и засѣли на земляхъ нашихъ або князкихъ панскихъ и шляхецскихъ; таковыхъ за вольныхъ мѣти хочем, нижли земли ихъ мають зостати при таковыхъ, кому дано водле данины нашое.

АРТЫКУЛЪ 6.

Навезка татаромъ.

Уставуемъ, которые князи и мурзы татарове закону бесурмянского мають оселости имѣнья земскіе зъ наданья продковъ нашихъ и насъ самыхъ, и естли тые бывають на службахъ нашихъ господарскихъ и земскихъ и в ротахъ, або при гетманехъ нашихъ, и въ реестрахъ военныхъ суть написаны; таковымъ навезка маеть быти яко шляхтичу, а жонамъ ихъ совито, а головщизны сто копъ грошей кромъ седѣнья. А которые татарове форминомъ ся жывять, и огородные речы справують, быдломъ торгують, кожы дубять, и якими кольвекъ речами жывность собѣ заробляють; таковымъ навезки рубль грошей, а жонамъ ихъ совито, а головщизна дванадцать копъ грошей.

АРТЫКУЛЪ 7.

Человѣкъ вольный за жаденъ выступокъ въ неволю выданъ быти не маетъ.

Тежъ уставуемъ, ижъ человѣкъ волный за жадный выступокъ въ неволю вѣчную выданъ быти не маеть, а естли бы въ сумѣ великой выданъ былъ; маеть съ тое сумы выроблятися, и выпуску на каждый годъ мужику полтина, а жонцѣ пол-копы грошей. А естьлибы съ тое сумы до смерти выслужитися не могъ, а будетъ ли мѣти дѣти; тогды дѣти не мають се съ тое сумы выробляти. А выпуску дорослымъ дѣтем потомужъ маеть быти, яко вышей описано. А закупнымъ людемъ тымъ же обычаемъ изъ сумы пенежное выпусть быти маеть.

АРТЫКУЛЪ 8.

О человѣку отчизномъ.

Кгды бы который человѣкъ отчизный, отшедши отъ пана своего и заложившися за кого иншого, не далеко въ пети або въ десети миляхъ мѣшкалъ; тогды вже о такового человѣка вѣчнѣ молчати маеть. Пакли бы тотъ человѣкъ отчизный отшедшы отъ пана своего и мѣшкалъ далеко въ колькодесяти миляхъ, а панъ его о немъ не вѣдалъ, а по томъ бы засе пришолъ и перемѣшкивалъ поблизу; тогды хотябы въ ономъ часѣ и давность земская зашла, вольно будеть ему того человѣка за отчича правомъ доходити, только бы давности не омѣшкалъ отъ того часу, якъ ближей прійдетъ.

АРТЫКУЛЪ 9.

Хто бы на человека вольного и невольного права доходити не хотѣлъ.

Тежъ еслибы который человѣкъ не похажалый або челядинъ невольный за кого зашолъ, а повѣдился быти вольнымъ, а онъ панъ, чій человѣкъ або челядинъ, просилъ у въ оного пана права, а тотъ панъ ему на него права дати не хотѣлъ; тогды таковый маеть притягненъ быти ку праву земскому. А естьли тотъ панъ, чій человѣкъ непохожій або челядинъ, зыщетъ правомъ ижъ его отчичъ або невольникъ, а на оного пана, въ кого тотъ человѣкъ, переведетъ правомъ, ижъ въ него просилъ справедливости разъ и два, а онъ не далъ; тогды тотъ панъ маеть навезати оного человѣка або челядина отъ того часу, якъ въ него права просилъ, за кождую недѣлю по шести грошей, а естли бы втекъ, тогды маеть платити потому, яко вышей о головщизнах написано.

АРТЫКУЛЪ 10.

О челядь невольную, которая втечеть отъ пана своего.

Уставуемъ, кгды бы хто чію челядь невольную вывелъ, або вѣдаючи заказъ въ себе переховывалъ, а то бы на него правомъ было переведено; тогды таковый повиненъ будеть ту челядь отъискати, а одыскавши тому пану отдати. А гдѣ бы не могъ одыскати, або не хотѣлъ; будеть повиненъ тую челядъ самъ цѣною платити, яко выше написано, и шкоду оправити отъ того часу, отъ которого ему тая челядь не робила, мужику и жонцѣ за кождую недѣлю по шести грошей.

АРТЫКУЛЪ 11.

О вольныхъ людехъ, которые въ голодъ продають.

Хто бы въ голодъ самъ себе або сына або тежъ которого человѣка вольного въ неволю продалъ, и листъ на то далъ; таковый листъ не маеть быти держанъ, але яко голодъ минеть, а онъ пенезей добудеть, маеть ему пенези отдати. Нижли естли бы хто челядь свою неволную продалъ; тая ведле продажи маеть вѣчнѣ держана быти.

АРТЫКУЛЪ 12.

Хто бы в голодъ челядь свою выгналъ.

Тежъ уставуемъ, естьли бы хто в голодъ челядь свою неволную выгналъ або выбилъ зъ дому своего прочъ, не хотечи ее кормити и переховывати; таковые вжо не мають быти невольными, але вольными. А вѣдьже тымъ обычаемъ, ижъ коли тую челядь выбьеть, тогды се они оповѣдати мають врядникомъ въ повѣтѣ або вряду мѣстскому бурмистромъ або мѣщаномъ, ижъ ихъ выбилъ а кормити не хотѣлъ; а тые, которимъ се оповѣдають, мають обослати того пана, чія челядь, естьли зознаеть, же для голоду выгналъ ихъ изъ дому не хотечи кормити, тогды оная челядь вѣчнѣ маеть быти вольна.

АРТЫКУЛЪ 13.

Невольницы мають быти троякихъ причинъ.

Тежъ уставуемъ, ижъ неволницы мають быти троякихъ причинъ: первые которые суть здавна въ неволи, або зъ невольныхъ се родятъ; другіе которые полономъ заведены суть изъ земли непріятельское; третіе коли бы се сами въ неволю поддали, а хто бы, ведаючы жонку неволную, въ малженство понялъ, хотя человѣкъ вольный, тогды таковый самъ и дѣти ихъ въ неволи быти мають. А естьли бы се невѣдоме поняли, а одинъ зъ нихъ будучи вольнымъ не хотѣлъ въ въ томъ быти; тогды того жъ часу мають се втечи до права духовного, ведле которого ихъ мають розвести, а по розводѣ таковый вольный маеть зостати вольнымъ, а невольный, неволнымъ.

АРТЫКУЛЪ 14.

Если бы хто до кого слугу приказалъ, а тотъ слуга зашкодивши втекъ отъ него прочъ.

Хто бы кому приказалъ слугу, а тотъ слуга шкоду вчинивши тому пану своему втекъ отъ него прочъ; тогды тотъ, хто его приказалъ, маеть ку праву стати, а судъ маеть ему рокъ зложити, на которій маеть его доискавшися ку праву поставити. А естьли жъ бы тотъ на оный рокъ, которій судьи положатъ, того не постановилъ; тогды онъ самъ повиненъ будеть тую шкоду оправити, на чомъ слушный доводъ учиненъ будеть. А естлибы се потомъ оному пану, за кого слуга втечеть, пригодить ли его видѣти на торгу або поткаеть въ дорозѣ; тогды вжо онъ самъ не маеть имати, нижли того приказцы своего смотрѣти маеть. А гдѣ бы хто мѣлъ слугу не приказного, а онъ ему шкоду учинивши прочъ втечеть; тогды онъ, гдѣ кольвекъ его увидитъ або поткаеть, маеть его поймати и вести до оного права гдѣ поймаеть, а передъ правомъ маеть на немъ шкодъ своихъ до доходити.