Повесть о житии Мартирия Зеленецкого

Повесть о житии
автор Прп. Мартирий Зеленецкий

Дата создания: XVI-XVII вв., опубл.: 1897 г.. Источник: Бычков И. А. Каталог собрания рукописей Ф. И. Буслаева. СПб., 1897. С. 342—351.

Повесть о житии преподобнаго отца Мартириа, жившаго во области Великаго Новаграда в Обонежской пятины, в Зеленой пустыни, тако нарицаемей, яже сам о себе исповеда отцу своему духовному и учеником своим: како и где жителствоваше прежде вселения его в пустыню ту, и како обрете ю, како же и вселися, и храмы созда, и обитель состави. Всели же ся он в пустыню ту при благочестивом царе и великом князе Иване Васильевиче всеа Русии самодержце и жил многие лета, преставися же в той же обители в царство Бориса Годунова.

1. Духовный брате Досифею! Тайна убо царева добро есть хранити, дела же Божия велегласно проповедати. Повем ти о себе, о еже како и где жителствовах аз прежде вселения моего в сию пустыню, сице. Жил бо есм прежде на Луках на Великих в Сергиеве монастыре, в новоначалном месте, у строителя тоя обители священоинока Боголепа. В той же обители аз власов отъятие и мира отречение сотворих и восприях святый ангельский образ от руки того же священоинока Боголепа. Онем же поставлен бых келарем, и вручи мне службу казначейства и пономарства, и суды умывах, тако же и во всех службах монастырскых послужил в послушании отцу своему и братии во обители оной седм лет.

2. И прииде мне помысл еже возлюбити ми пустынное жителство, и совещахся с некоторым поваром белцем ити в пустыню, аможе Бог наставит. Внезапу же приде ко мне в келию мою некий урод ся творя, именем Михаил, и рекл ко мне: «Мартирие, поиди един». Тако же иде и к повару оному и рече ему то же слово: «Поиди един». Паки же аз совещахся со оным поваром ити в пустыню в день архистратига Михаила. В той же день на Луках было священие церкви архистратига Михаила. Егда же начаша священие церкви творити, мы же втай поидохом из монастыря и отидохом от Лук шестьдесят поприщ. На ту же нощь паде снега в колено, и нашли пустыню глубоку, и помыслили в той пустыни создати хижицу, но невозможно, понеже снегом мох запал, мшить нечим. И подле потока некоего во брегу в земли, в глине выкопали себе хижицу да окрыли ея прутием еловым. Повелел же аз дойти своему подругу до веси некоего ради орудиа, имже сотворяется какова любо скважня. Он же пойде и не возвратися ко мне ктому, в веси же оной поведа о мни к единому християнину, глаголя: «Онсица старец живет во оном сице месте». Христианин же он приходя ко мне и посещая мя. Аз же живях в пустыни той и питахся рукоделием моим, плетох бо калиги лычны и со онем христианином посылах по весем христианом, они же такожде посылаху со онем же христианином потребная мне. Аз же, грешный, приимах со благодарением приносимая от них, за них же Бога моля.

3. В той же пустыни от бесов велика страхования принях. Прихождаху бо ко мне и страшаху мя вне хижици моей пред дверми, глаголюще к себе: «Спит он». Един же бес влезе в хижу мою и хотя ко мне прикоснутися, аки хотя меня удавити. Молитва же Иисусова изо уст моих исхождаше беспрестани, он же отбеже от мене. Инии же беси вне келии пред дверми глаголюще оному бесу: «Чему ты не дерзаеши на оного?» Бес же им отвеща: «Поидете вы к нему и дерзайте!» Аз же молитву творя и глаголя к нему сице: «О, отпадшие беси, что сотворих вам аз, грешный? Вы же мя ввели в сию пустыню и хощете поругатися мне. Аз же, грешный, надеюся на Господа Бога моего Иисуса Христа, и на Пречисту его Матерь, и на силы небесныя, на Михаила и Гаврила, и на своего святого ангела, хранителя души и телу моему, и на всех святых».

4. И паки возлегох опочити; и возбнув от сна своего, обленив же ся, не востах со одра моего. Приспе же день празничен, христолюбец же он преждереченный потребная принесе ми, отиде восвояси. Аз же востах и канон отпел, такожде же и часы, потом поставих столец и потребная на нем, к нимже не прикоснухся за леность свою. Сам же помышляа, глаголя в себе: «О, окаянная моя плоть, за леность свою недостойна еси воды питии». Потом же прослезихся, глаголя: «Господи превечный, царю небесный, дух бодр, а плоть немощна, но дай же ми, Господи, суха хлеба омочити в воду и душу напитати». И не прикоснухся ни к чему от потребных, кроме сухариков и воды. Абие же бысть гром страшен, яко и земли потрястися, и лжица моя с стола паде на землю.

5. Потом же аз, грешный, отписал ко отцу своему духовному, да благословит мя в пустыни оной жити. Он же мя не благослови жити в пустыни, но глагола ми: «Поиди, господине, жити во общее житие». Аз же, грешный, поидох во град Смоленско помолитися Пречистей Богородици и великим чюдотворцем Аврамию и Ефрему. И оне, чюдотворцы, явишася мне, глаголюще сице: «Подобает ти жити в пустыни, где Господь благоволит».

Наказание к братии игумена Мартириа

6. Духовный мой брате Досифею, пишу тебе сию духовную памятцу вкратце и кроме братии, ты же держи ю у себе Бога ради, доколе Господь о мне благоизволит и возмет мя от житиа сего суетнаго, и не помянет многих моих грехов по милости своей.

7. Братие моя милая, прошу у вас того и молю, чтобы есте не надеялися ни на князя, ни на болярина, ни на какого властеля, имели бы есте надежю во всем на Живоначалную Троицу и на Пречистую Богородицу — те вам будут во всем помощники и заступники. Имейте срам к царю земному и к его царевичем, и к властем. Не просите у них ничего, как я, грешный, стыдлив к ним был и не просил у них ничего, но во всем есм имел надежу на Живоначалную Троицу и на Пречистую Богородицу. И чего есм у них, у светов, просил, и они мне, грешному, даровали. К ним есм точию был дерзостен всего просити. Тако и вы будите дерзостни к Живоначалней Троици и к Пречистей Богородици и всего у них просите, и кроме их помощников себе никого не имейте. А за земного царя, государя нашего, Бога молите, и за его царевичев, и за все его воинство. Понеже он, государь, за нас, за грешных, стражет и кровь проливает за святыя церкви и за все православное християнство.

8. А поминал есм живучи у Пресвятей Троици и у Пречистей Богородици слово Иоанна Предтеча, рекшаго к старцу, хотящему отъити от вертепа и ити в Синайскую гору, сице: «Сий тебе вертеп лучши Синайскиа горы, аще живеши в нем с верою». Тако и вы, братие, поживите с верою у Живоначалней Троици и у Пречистей Богородици, не отходя. А нечто Бог изволит, и государь вас учнет жаловати, или учнет участие земли давати, или грамоту ободную, и вы у него не емлите, занеже ободная земли — десница Светодавцова и риза Пречистей Богородици, и образ ея чудотворной — та хранит от всякого зла. Аще учнете любовь нелицемерную межи собою имети и роптанием аще Светодавца не разгневаете и Пречистую его Богоматерь, и учнете тружатися с радостию и от своих праведных трудов питатися, и надеюся милости Божии и Пречистей Богородици на вас пребывати, якоже и на мне, грешнем. А нечто Бог изволит и Пречистая Богородица положити государю на сердце — или милостыню учнет давати по своих родителех, или на свечи и на фимьян, и на пшеницу, — и вы то от государя приимите с любовию, яко от Светодавцовы десници, занеже не вы у него того просили, но Бог и Пречистая Богородица на то его вразумила.

О явлении места иконы Пречистыя Богородица

9. Аз же, многогрешный старец Мартирие, не своим изволением, но Божиим благоволением и Пречистыя Богородица поможением вселихся в сию пустыню, на сие святое место. Еще же живущу ми на Луках на Великих в Сергиеве монастыре с строителем Боголепом в единой келии, за седм лет до вхождения моего в сию пустыню, явися мне Пречистая Богородица образом своим честным не яве, но сонным видением, сице. Бывшу ми во обители той пономарем, и взыдох на колоколню вполдни, и уснух. И видех во сне столп огнен якобы в сей стране стоящ. Притек же аз ко огненому столпу оному и видех у столпа оного стоящ образ Пречистыя Богородица Одегитрие в церкви за крылосом, на левой стране, поставлен ис Старые Русы. Аз же якобы у образа того приложился, образ же той горяч велми от оного столпа огненаго. Возбнув же от сна и во ужасе быв от видения того, осязав же рукою своею чело свое и ощутих е горяче.

Видение 2 того же образа

10. Егда же приидох в пустыню сию, после того видения за долго время, и возлегох опочити, и уснух. И видех во сне у пустыни той море, и на том мори образ Пресвятыя Богородица Одигитрие, яков же и прежде явльшийся мне, плавает. Аз же стоях на берегу и видех от того образа недалече на том же мори бес поражен лежащ. Аз же возрех на правую страну и видех на воздусе стояща архаггела, образом же бе, як Гаврил архаггел пишется у Благовоещения Пресвятыя Богородица, со скипетром. Мне же восхотевшу знаменатися у образа Пресвятыя Богородица, яко и преже, но устрашихся воды морския, зане яко потопит мя. И глагола мне архангел он, стоящий на воздусе: «Почто не дерзаеши приити знаменатися ко образу Пречистей Богородици?» Аз же, грешный, отвещах ему, глаголя: «Господи, боюся». Он же глагола ми: «Чего боишися?» Аз ему паки рекох: «Бесовского шатания, да некако мя уловит». Архангел же паки рече ми: «Не бойся, дерзай к пречистому образу». Абие же образ той нача грузитися в море, и оставляется верху воды образа того ношка Светодавцова. Аз же, грешный, якобы есм в себе помыслил, глаголя: «Аще мне и случится потоплену быти от воды, но дабы мне принятися за ношку Светодавца». Абие дерзнух внити в море и ях его за ношку обема рукама, и начах плакати со слезами, глаголющи: «Милостивый Светодавче, аще и потоплену ми лучится быти, но дабы с тобою». И абие аки некоторую бурею пренесе мя образ той чрез море и постави мя на брезе, на друзей стране моря. И невидим бысть образ той от мене. И еще видех: и се град нов, и лавицы новы, а купающих и продающих несть. И абие возбнув от сна, и во ужасе бых велицем, и умилихся о видении том.

11. Бе же два образа чюдотворныя, образ Живоначалныя Троици да Пречистыя Богородици, стояху в первоначалной келии моей на стене, пред ними же стояше светилник с маслом горящ. Аз же, взяв образ чюдотворный Пресвятыя Богородица на руки свои, начах со слезами плакати, глаголя: «Царице госпоже Богороджице, что мене, грешнаго, посещаеши милосердием своим? Аз бо, окаянный, горчае бесов!» Абие же прииде ко мне, не вем откуду, глас, не во сне, но яве, глаголя ми: «Подвизайся, узриши бо и не ту едину Божию благодать». Потом же Федор Сырков повеле мне церков с трапезою поставити во имя Благовещения Пресвятыя Богородица.

12. Поведа мне, Мартирию, некто христианин, именем Иосиф, из села из Буборин, понеже и сами слышасте от него, сице глаголя: «В летнее время, в полудни, после Петрова дни, канон Козмодамьянова дни, опочивающу ми в клете своей и спящу. И видех во сне, якобы вшедшу ми на улицу, и видех в пустыни сей стоящ столп огнен от земля до небесе, и ис столпа того рука простерта, аки человеча, и из руки той прядают искры огнены». Се поведа Иосиф видение свое, занеже показа ему Бог видение се. Бывшу ему некогда велми болну и близ смерти, и посули мне, Мартирию, по себе коробью ржи, чим его поминати мне, старцу. Бог же воздвиже его от болезни, и бысть здрав. Зжалив же ся о оной ржи, посуленыя мне, старцу, и глаголя в себе: «За что мне тому старцу дати рожь та? Помилова мя Бог, и здрав есм». И того ради показа ему Бог и Пречистая Богородица видение се на уверение ему. Он же то видев, возбнув от сна, абие прииде ко мне в пустыню и прощениа прося у мене, глаголя сице: «Бога ради прости мя, честный отче. Винен есм пред Живоначалною Троицею и пред Пречистою Богородицею, и пред тобою, отче. Запрети бо ми диавол во уме моем, да ти не дам ржи оноя, посуленыя ти. Ныне же, честный отче, приими посуленую рожь свою». Аз же глаголах ему: «Господине, аз бо не имею у себе жерновов, чим ю смолоти. Но аще будет твое человеколюбие ко мне, да ты ю измолов и печя, хлебами да ми присылаеши». Он же тако и сотвори.

13. После же сего видения, пред поставлением моим во игуменство сея пустыни, почивах бо есм в своей келии в чюлане. И видех во сне Пречистую Богородицу в девичии образе, благолепна видением, несм бо видел в человецех таковы девицы благообразны. Умилена бо лицем, благолепна образом, долги зеницы и брови черны, нос же средний и похил, на главе же ей венец злат и многими цветы украшен разными и тяжки у госпожи, движися, невозможно же человеческому роду умом смыслити, ни языком сказати, сияет бо, аки солнце. Седит же в келии моей на лавицы в болшем углу, идеже и иконы стоят. Аз же якобы вышед ис чюлана своего и стоях пред нею, зрех же на ню прилежно и не зводя очей своих с красоты ея. Она же, царица и Богородица, тако же и на мене противу зря. Аз же на ню невосклонно зрях и видех милостивое ея лице, очи же ея бяху слез исполнены, едва мало на пречистое лице ея не канут. И абие невидима бысть от мене. Аз же возбнув от сна и во ужасе бых. Востах же, изыдох ис чюлана своего и вжег свещу от светилника масленаго, и хотех видети нескверную деву, аще ли она седит в келии моей на месте, идеже ю видех сидящу. Изшедшу же ми на среду келии моея, и не видех ея на месте оном. Аз же пришед со свещею к Пречистей образу Одигитрия, иже стоит в келии моей, и видех образ той, и познах, яко воистину явися Пресвятая Богородица тем образом, якоже и на иконе моей келейной образ ея написан.

14. По видении же том за мало дний ездих в Великий Новград, и в Великом Новеграде по милости Божии и Пречистей Богородицы архиепископ во игуменство мя совершил в пустыню сию, глаголемую Зеленая. А молился есм о посещении своем Пресвятей Богородици сице: «Пречистая госпоже, царице небесная, посещала ты, госпоже, великих чюдотворцев, Иоанна Предтечю, и Сергия и Александра преподобных новых чюдотворцев, и всех святых, но то не дивно, понеже они от утробы матерня святи и твоего посещения достойни. Сие же велми дивно и чюдно на земли и на небеси будет, аще мя, грешнаго и окаяннаго, своим милосердием посетишь на уверение души моей грешной и на утвержение к святому месту сему». Она же, Пресвятая Богородица, моления моего не презрела, и грешнаго мя своим милосердием посетила, и мне, окаянному, явилася.

О приходе с Лук с Великих на Тифину к Пречистей Богородицы в монастырь и о первом приходе в Зеленую пустыню игумена Мартирия

15. Егда же приидох аз с Лук с Великих на Тифину к Пречистей Богородици, бе же у Пречистыя Богородицы жительствует ученик мой пономарем, прииде с Лук же Великих прежде мне к Пречистей Богородици на Тифину, именем Аврамий, начах же и жити с ним в единой келии на Тифине. Возвестих же ему о пустынном жителстве, глаголя ему: «Брате Аврамие, хотех поискуситися на время в пустынном жителстве и помышляю ити в Поморие с Тифины, дабы незнаем был от человек». Аврамие же повесть мне поведа, глаголя сице: «Не ходи ты, отче, в Поморие, ни инуды камо, но иди в пустыню и на место, иже аз знаю пустыню ту и место. Шедшу ми некогда от чюдотворного образа Пречистыя Богородица и с церкви с книгою по манастырю, во время вечернее, в мрачне, в трапезу, и возрех на небо ко оной стране, идеже ныне пустыня сия, и виде на небе крест восиял светел, аки луч, иссажен же звездами весь, над оным пустынным местом. Аз же место то знаю, и воистинну над тем местом крест яви ми ся, место же то непроходимо бяше, бо во мху стоит. Ты же пойди на место то и кроме того места не ищи иного, живи же в том месте, доколе о тебе Бог изволит, будет бо в том месте Божие милосердие». То мне, Мартирию, Аврамие, ученик мой, поведа про сие святое место.

16. Потом же аз в сию пустыню, нарицаемую Зеленую, вселихся. Помале же и храм создах во имя Святыя и Живоначалныя Троица. Начах же ис часовне образы местныя носити в новую церков Святыя Живоначаныя Троица. И взях образ чюдотворной Святыя Троица, повеле же старцу Гурью его нести в церков, сам же аз идох за ним с другим чюдотворным же образом Пречистыя Богородица Одигитрия. Аз же в церкви начах устраивати образы по местом. Гурий же он выйде ис церкви и возре на небо, и виде на небеси крест восия, образом же бе, якоже крест и на церкви Святыя Троица стоит, не звездами бо бе сотворен, якоже Аврамие, ученик мой, прежде видел, но просто тако светлостию, якоже и на церкви Святыя Троица крест стоит, образом же бе, яко благословящей крест, имже иерей благословляет народы.

17. Вы же, братие, слышите и видите, каки Пресвятая Троица и Пречистая Богородица чюдеса творит от образа своего: бесы отгоняет и болных исцеляет, хромых и слепых здравы сотворяет, и многие чюдеса творит, ведомая же и неведомая. Се же, братие, слышаще и видяще такое Божие милосердие и Пречистыя Богородица, кто не удивится и не прославит Пресвятыя Троица и Пречистыя Богородица! Молю же ся вам, братие, о еже веру несуменну имейте к святому месту сему, и любовь межи собою нелицемерну имейте, и моего словеси не попирайте — еже сказах вам и заповедах, тако творите. Мене же, грешнаго, в святых своих молитвах поминайте, да и сами помяновени будете у Господа Бога и у Пречистей Богородицы, и Бог мира да будет с вами всегда, и ныне, и присно, и во веки веком. Аминь.