18.—1414. Настольная грамота Митрополита Фотія, Герасиму Епископу Владимерскому на Волынѣ.
Понеже благоволеніемъ и благодатію Божіею соединися церковь Русская, и въ первый миръ приведена бысть и уставлена, и вся раздвоенія упразднена быша, и соблажненія и мятежи низложена быша; и по давному обычяю и закономъ, укрѣплено бысть единой митрополья быти во всей Русской земли, якоже то изъ-начала пошло отъ святаго крещенія, и единъ Митрополитъ Кіевски и всея Руси, по древнему преданію и по сборной грамотѣ Святѣйшаго и Вселенскаго Патріярха..... и Боговѣнчаннымъ Царемъ, и весь священный великій Сборъ оправдаша[1] мнѣ мою митрополью, всю Русійскую землю. И достояше убо, по толикимъ молвамъ и бури, устроенію быти, Русской митропольи въ свой чинъ пріити. И того ради и язъ, по благодати данной ми отъ Пресвятаго и Живоначальнаго Духа, избрахъ, со еже о насъ священнымъ Сборомъ священнѣйшихъ Архіепископъ и Епископъ, священноинока Герасима, и поставихъ его во Епископа въ святѣйшую епископію богоспасаемаго града Володимеря и на весь предѣлъ тоя епископьи, елико изъ начяла имѣетъ, по давной пошлинѣ. Сего же ради, долженъ есть боголюбивый Епископъ, о Святѣмъ Дусѣ возлюбленный сынъ и сослужебникъ нашего смиренія Герасимъ пріяти порученную ему церковъ и творити въ ней елика достоитъ своимъ Епископомъ: четци знаменати, и поддіяконы и діяконы и презвитеры ставити, еще же и игуменовъ во обителихъ уставляти; учити же люди православные еуангелскымь заповѣдемъ и закону христіянскому, и заблуждьшихъ наставляти ко истинному пути. Сего ради, должни суть благородніи и христолюбивыи Князи послушати его и честь подаяти, такожъ и весь священническій и иноческій чинъ и вси христоименитыи люди предѣла тоя епископьи, вѣдяще же се, яко Святителю честь воздаяти, на самого Бога тая честь преходитъ, егоже есть намѣстникъ Святитель. И се вѣдый азъ, яко по моему слову творити имете, и писахъ къ вамъ, да и моего благословенія наслѣдуете. Сего ради дана бысть сія моя грамота нашего смиренія, во утвержденіе, боголюбивому Епископу святѣшія епископьи, лѣта 6922.
Изъ рукописи подъ заглавіемъ: Посланія Россійскихъ Митрополитовъ и другихъ лицъ (in 4°, XVI вѣка, грам. 21, л. 86—87); хранящейся въ Московской Синодальной библіотекѣ подъ № 562.
Примѣчанія
править- ↑ Въ подл. «опрадваша.»
