[144]78.—1658, сентября 8. Подтвердительный универсалъ гетмана Ивана Выговскаго козаку Лаврентію Борознѣ на мѣстечко Горскъ и проч.
Іванъ Виговскій, гетманъ, зъ Войскомъ Запорожскимъ.
Ознаймуемъ симъ писаньемъ нашимъ старшинѣ и чернѣ Войска Запорожского, кому только тое писане наше показано будетъ, ижъ мы, углядаючи на прислугу у Войску нашомъ цана Лаврентія Борозны, которій и теперъ и кождое дороги до войска становляючися, не опускаетъ и зъ нами посполу стаетъ противъ неприятелей, заховуемъ его при власныхъ маетностяхъ очистыхъ, правомъ ему належачимъ, меновите при местечку Горску изъ селами, до него належачими, зо всѣми належними пожитками, сурово приказавши, абы жаденъ зъ козаковъ въ добрахъ тыхъ вышъ менованному пану Борознѣ кривды и жадное перешкоди чинити не важился, такъ абы за показанемъ сего нашего унѣверсалу спокойне тыхъ добръ оныхъ панъ Борозна, одъ жадного не имѣючи найменшои перешкоды, заживалъ. А хто бы важился надъ волю нашу оному въ тыхъ маетностяхъ чинити перешкоду, таковый кождый противенъ, срокгого безъ отпусту отъ насъ не войдетъ караня. Не чинячи иначей подъ срокгимъ каранемъ войсковимъ. Данъ въ таборѣ подъ Каменымъ, сентевріа 8, року 1658. — Іоанъ Виговскій.
Изъ сборника, хранящагося въ Моск. Арх. Иностр. дѣлъ, подъ заілавіемъ: Списки чили копіи унѣверсаловъ или указовъ одкритихъ давнихъ гетмановъ, именно Богдана Хмелницкого и другыхъ, которые на добра якые или зъ якою установою видани.