Того жъ року, 88, совершено на владычество Полоцкое Афанасия Терлецкого, за кроля Жикгимонта Третего, за митрополита Михаила Рагозу.
Року тогож от госоподаря кроля выслано напервей до Орши енералы, то есть над дванадцатми возными одинъ енералъ — местце старшое маетъ. Богданъ Биряленокъ, якожъ предъ тымъ у тыхъ краяхъ не бывало.
Року 1589, месеца мая 30 дня, по запустахъ святого (л. 144 об.) Петра и Павла у пятницу ее милость кнежна Богдановая Соломерецкая, княгина Евдокия Баркулабовна Корсаковна, у замку Кричевскомъ за староства князя малжонка своего породила сына именемъ Исакия Долматского по прозвищу Богданъ, а крестилъ его старецъ убогий.
Того жъ року 89, панъ Кгригоръ Вилянтъ у закупе Боркулабовъ держалъ годъ три; онъ уволоки меския роздавалъ. Тотъ рокъ 1590, яко в лете сухость, такъ зимѣ морозы силные великие; было такъ, ижъ ляда у восень палили.
Року 1590, были козаки запорозкие Матюша с полкомъ, Голый с полкомъ, у Могилеве ажъ до Минска приставъство по волостяхъ брали, а кривды шкоды не чинили, толко жонокъ охочихъ, тыхъ намовляли и заклинали, абы з ними на низъ ишли, и взяли з собою жонокъ и девокъ, яко двести поголовъ.
Року 1592, о мясопустахъ, его милость князь Богданъ Соломерецкий, староста кричовский и олучицкий, Буйничи, Чайки откупилъ и уволоки поволочивъ, а предъ тымъ было многихъ розныхъ пановъ — князей Соколенскихъ, князей Мосальскихъ, князей Крашинскихъ, пана Филона и далей.
Того жъ року 92, его милость князь Богданъ Соломерецкий, староста крический и олучицкий, слободы осадилъ село Махова и Сутоки.
Того жъ року 92, ст[а]лося великое и немилостивое замешане (л. 145) у вере от римлянъ на святую веру восточную греческую; почали соборы помесные чинити, то есть у месте Виленскомъ братство навчоныхъ людей до себе на поратунокъ прибавили з места Лвовского Григория Раготинца, Стефана Зизания. Тые силную и великую войну з рымляны мевали, не толко на ратушахъ и при рынку, по дорогахъ, но и посредку цервки святое войну, потарчку великую мевали, якожъ имъ Господь Богъ противу ихъ упоровъ великихъ из-
