оныхъ предреченныхъ прелютѣйшихъ звѣрей, сирѣчь, ласкателей и человѣкоугодниковъ, надъ нихъ же ничтоже[1] можетъ быти повѣтреннѣйшаго26) во Царствѣ, и отсылаетъ и отдѣляетъ отъ него всяку нечистоту и скверну, прежде ему приключшуюся отъ сатаны; и подвижетъ на то и присовокупляетъ себѣ въ помощь Архіерея онаго великаго града27) и къ тому, всѣхъ предобрыхъ и преподобныхъ мужей, Презвитерствомъ[2] почтенныхъ: и возбуждаютъ[3] Царя къ покаянію, и исчистивъ сосудъ его внутренній, яко подобаетъ, къ Богу приводятъ, и святыхъ, непорочныхъ Христа нашего Таинъ сподобляютъ, и въ сицевую высоту онаго,[4] прежде бывшаго окаяннаго, возводятъ, яко и многимъ окрестнымъ языкомъ дивитися обращенію его и благочестію.
И къ тому еще и сіе[5] прилагаютъ: собираютъ къ нему Совѣтниковъ, мужей разумныхъ и совершенныхъ, во старости мастистѣй[6] сущихъ, благочестіемъ и страхомъ Божіимъ украшенныхъ; другихъ же, аще и въ среднемъ вѣку, такожъ предобрыхъ и храбрыхъ, и тѣхъ и онѣхъ въ военныхъ и земскихъ вещахъ по всему искусныхъ: и сице ему ихъ въ пріязнь и въ дружбу усвояютъ, яко безъ ихъ совѣту, ничесоже устроити или мыслити. Воистинну премудрому Соломону глаголющему: Царь, рече, добрыми совѣтники, яко градъ претвердыми[7] столпы утвержденъ; и паки: любяй, рече, совѣтъ, хранитъ свою душу, а не любяй его,
