умираютъ, тако и о Христѣ всѣ оживутъ; койждо во своемь чину: начатокъ Христосъ, сирѣчь пострадавшихъ: воскресе первый въ нетлѣнномъ тѣлеси, Начальникъ воскресенію за него пострадавшихъ; потомъ Христу вѣровавшіе во пришествіе его, сирѣчь во второе, егда со Ангелы явится, потомъ кончина, сирѣчь Антихристово убіеніе и общее всѣхъ воскресеніе. „Тогда, рече Соломонъ, станетъ во дерзновеніи мнозѣ праведникъ предъ лицемъ мучителя,“ рекше, очевистѣ съ мучившимъ его, або со обидѣвшимъ; тогда глаголю, и тѣ послѣдніе мученики, со древними страстотерпцы и побѣдоносцы, встрѣтятъ Христа своего, посреди аера отъ превыспреннихъ небесъ грядущаго со всѣми Ангелы своими, на избавленіе ихъ: онижъ отъ земли многими и великими полки, яко небопарный Павелъ глаголетъ, восхищены будутъ на облацѣхъ во срѣтеніе Господне на воздусѣ, и тамо всегда съ Господемъ будутъ. Ихъ же и насъ да сподобитъ, по премногой благодати своей, а не по нашимъ дѣламъ, Господь нашъ Іисусъ Христосъ, истинный Богъ, емужъ слава со безначальнымъ Отцемъ и со пресвятымъ и благимъ и животворящимъ Святымъ Духомъ, нынѣ и присно и во вѣки вѣковъ. Аминь.
