полкъ Христіанскій, посѣкши большую часть плѣну, а другихъ живыхъ пометали, и все оставя, въ бѣгство обратишась. Такожъ и во другихъ градѣхъ, яко мало выше рѣхомъ, очима своима богатыхъ и благородныхъ, вооруженныхъ въ зброяхъ, видѣхъ, а не токмо сопротивъ враговъ хотящихъ исходити, а ни во слѣдъ ихъ гонити хотяще, или подобно и слѣду ихъ боящеся: понеже а ни лакоть[1] единъ которые Вельможи, вооруженные, дерзнули изыти изъ градовъ.
Се таковыя ужасно слышательныя, пачежъ смѣху достоиныя, отъ роскошей и отъ презлыхъ различныхъ вѣръ приключаются Христіанскимъ предстателемъ, и прежде бывшимъ храбрымъ и мужественнымъ славнымъ воиномъ женовидныя и боязни исполненныя случаются! А о тѣхъ Волынцахъ, не токмо въ Кроникахъ мужество[2] ихъ описуется, но и новыми повѣстьми храбростъ ихъ свидѣтельствуется, яко мало прежде и о другихъ рѣхомъ: егда быша въ вѣрѣ православной, пребываша по обычаямъ мѣрнымъ, и къ тому имѣюще надъ собою Гетмана храбраго и славнаго Константина, въ правовѣрныхъ догматахъ свѣтлаго и во всякомъ благочестіи сіяющаго, яко славни и похвальни въ дѣлѣхъ ратныхъ явишась , отечество свое обороняюще, не единаго, не дважды, но многажды показашася нарочиты.88) Но впала сія повѣсть, мнитъмися, преизлишнѣ; а сего ради оставя сію, ко предреченнымъ возвратимся.
