за горами; егдажъ изыдутъ Бусурманы съ лѣсовъ, по обычаю своему, тогда повелѣно сразитися съ ними.
Во утріе же, аки на третьей годинѣ дня, изыдоша на великое поле, глаголемое Арское, отъ лѣсовъ полки Бусурманскіе, и первѣе удариша на ротмистровъ, яже на стражехъ въ полцѣхъ стояша, коимъ было заповѣдано уступити имъ, уклоняющеся ажъ до шанцовъ; они же уповающе, аки боящеся, Христіане побѣгоша, гнаша за ними. Егда же втиснуша ихъ[1] уже въ обозъ, тогда начаша подъ шанцами круги водити и гарцовати, стрѣляюще изъ луковъ, по подобію частости дождя; овы же, во устроенію мноземъ, по малу полки грядуще, конные и пѣшіе, аки уже Христіанъ пожрети хотяще. Тогда убо, тогда, глаголю, изыдоша абіе Гетманъ съ войскомъ Христіанскимъ, тако же во устроенію мноземъ, и приближишася со тщаніемъ ко сраженію. Видѣвше же Бусурманы, и рады бы назадъ къ лѣсу, но не возмогоша: уже бо далеко отъѣхали отъ него на поле; но обаче, хотяще и нехотяще, дали битву и крѣпцѣ сразишася съ первыми полки. Егда же надспѣлъ[2] великій полкъ, въ немъ же самъ бяше Гетманъ, такоже и пѣшіе полки приближишася, обходяще ихъ, наипаче отъ лѣсу; тогда абіе въ бѣгство обратишася всѣ полки ихъ; Христіанское же воинство гониша за ними, біюще ихъ, и яко на полдвѣ[3] мили трупія Бусурманскаго множество лежаше, и къ тому аки тысячу живыхъ поимаша.
