оружившеся пойдоша вкупѣ Угровѣ и Нѣмцы на пробитыя мѣста, мнѣвъ же яко нѣкому противу ихъ стати. Господь же праведенъ ссѣчетъ выя грѣшникомъ, да постыдятся и возвратятся вспять вси ненавидящіи Сіона. Христово же оно стадо въ печали суще велице, плачуще моляхуся пречистѣй Богородицы и Святому Николѣ чюдотворцу и Святымъ Мученикомъ 40 иже въ Севастіи, и Преподобнымъ отцемъ Антонію и Ѳеодосію печерскимъ и всѣмъ святымъ о избавленіи толикія бѣды настоящыя. И тогда нѣкоему юношѣ именемъ Иуліану, юну сущу и спящу ему явися пресвятая Богородице, глаголя сице: «востани и повѣдай сущимъ ту инокамъ, и всѣмъ людемъ, итти къ проломному мѣсту и пѣти молебны безпрестани предъ образомъ Пречистыя Богородицы, неотпадати надежды на Господа и на Того Рождшую, — людемъ же неослабно вооруженнымъ быти и стояти крѣпце; ты же убіенъ будеши; Азъ же не оставлю мѣста сего и не предамъ въ руцѣ врагомъ». Таже дастъ ему три сребренницы, яже ему на потребу. Обаче же онъ юноша не имѣяше обувища, ни срачицы. Онъ же воставъ тече ко иконѣ Пречистыя Богородицы съ плачемъ моляся, и повѣда всѣмъ явленіе бывшее ему. Быша же тогда нѣкоторымъ мнихомъ и инымъ духовнымъ мужемъ явленіе Пречистыя Богородицы, и ово нѣкоего мужа свята глаголюща; и о семъ повѣда старецъ Спиридонъ Аникіевъ о преподобнѣмъ Варлаамѣ Ѳутынскомъ, еже видѣ; овогда же гласъ невидимо слыша сицевъ: «не ужасайтеся, но постраждите яко добріи воини Христови за домъ Пречистыя Богородицы». Слышавше же сія священный соборъ, иноцы и вси людіе радостію и трепетомъ, скоро притекоша ко Иконѣ Пречистыя Богородицы Успенія, къ пробитой стѣнѣ, молебная совершающе и плачущеся глаголаху сице: «не остави насъ въ человѣческое предстояніе, Пречистая Владычице Богородице, но пріими моленіе рабъ своихъ, скорби убо обдержатъ насъ» и прочая.
Въ то же время — егда приступаху Угрове и Нѣмцы, купно раздѣльшеся въ два пробитыя мѣста, тогда нѣкто рыболовъ Сергій, витая брада, видѣ надъ церковію Пречистыя Богородицы множество етеръ въ бѣлыхъ ризахъ, въ рукахъ свѣщи имуще и глаголюще другъ ко другу: «грядемъ на пособіе христіанамъ и пожжемъ иновѣрныя». Таже пойдоша множество етеръ, мню быти Святыхъ 40 мученикъ иже въ Севастіи, и Преподобныхъ Отецъ лежащихъ въ Богомъзданнѣй Пещере. Въ той же часъ, все упованіе возложше на Господа Бога и на Пребывающаго въ дому своемъ непобѣдимаго Воеводу Пречистую Богородицу, и на Святаго Николу чюдотворца и на всѣхъ святыхъ, маліе тогда обрѣтшеся людіе охрабришася и биша изъ пищалей, и каменіе на нихъ метаху отъ четвертаго часа дни до девятаго; и побиша ихъ. Сему же бывшу явленію, послѣди свидѣтельствоваху они Угрове и Нѣмцы, егда приступаху ко граду, тогда видѣша, глаголюще, нѣкое пособіе Божіе надъ монастыремъ множество вой въ бѣ-
