и Святаго Духа, и научися святымъ книгамъ, и пострижеся во мнишескій чинъ во святѣй горѣ, и пребывъ во святѣй горѣ 3 лѣта, и пойде въ землю свою, и пріиде изъ Синайскія горы къ отцу своему къ Миндовгу, и монастырь себѣ созда. Отецъ же его много ласкаше и муками претяше, онъ же никако ласканіе слушаше, ни прещенія бояшеся, и живяше въ монастырѣ, и славя Святую Троицу, Отца, и Сына, и Святаго Дѵха.
И въ лѣто 6773 (1265) побишась Литва межъ собою Божіимъ попущеніемъ, убиша Миндовга, Князя Молковцова сына. Ердень Князь, Даниловъ сынъ, сдумавъ съ своими совѣтники, уби Князя Миндовга, Молковцова сына, сродника своего.
И Вышлегжъ по убіеніи отца своего Миндовга на время сня съ себя ризы чернеческіе, и обѣщася Богу опять приняти ризы чернеческіе на 3 лѣто, а устава мнишскаго не остася, и совокупи себѣ вои многіе, и отца своего пріятели, и помоляся Богу, и иде на поганую Литву, и побѣди я, и плѣни всю землю ихъ.
А 2 Миндовговъ сынъ, а Вышлеговъ братъ меньшой Домантъ, иде во Псковъ на другое лѣто, и Княжисша во Псковѣ, и крестися, и нареченъ бысть во святомъ крещеніи Тимоѳей.
И по Великомъ Князѣ Миндовгѣ сѣде на княженіи Литовскомъ Давиловъ сынъ Видъ, егожъ люди волкомъ звали, и тотъ прибавилъ Деревскія земли много.
