Страница:Православная богословская энциклопедия. Том 1.djvu/237

Эта страница была вычитана
443АЛЕБОГОСЛОВСКАЯАЛЕ444


же сѣдяху аки мглою одѣяни. И рече Борисъ: „брате Глѣбе, пойдемъ вскорѣ, да поможема сроднику нашему, великому князю Александру, на неистовыя нѣмцы“. Стражъ же той повѣда вся сія, яже видѣ, святому князю Александру. Князь же прослави Бога и святую мученику Бориса и Глѣба. И въ шестый часъ дне сступися со схизматики римляны, и Божіею помощію, и Пречистыя Богородицы, и пособіемъ Христову мученику Бориса и Глѣба, избіено бысть схизматикъ многое множество, и отступника краля блаженный самъ уязви мечемъ въ лице. И тако избавленъ бысть великій Новъ-градъ отъ лукавыхъ нѣмецъ; и не единою избави великій Новъ-градъ отъ плѣна лукавыхъ нѣмецъ. И посемъ тіи же лукавіи нѣмцы собравшеся на богохранимый градъ Псковъ: и многи люди избивше псковскія, и Псковъ пріяша, и намѣстники своя посадиша. И паки блаженный князь Александръ, и съ братомъ своимъ княземъ Андреемъ, пояста съ собою низовцы, и обыдоста своими людьми вси пути псковскія, и избиста лукавыхъ нѣмецъ многое множество, а инѣхъ окованныхъ посласта въ великій Новъ-градъ. И тако великій князь Александръ избави градъ Псковъ отъ плѣна лукавыхъ, помощію Святыя Троицы и молитвами Пресвятыя Богородицы. И землю ихъ шедъ плѣни, и пожже, и многихъ неистовыхъ мечемъ погуби. И не сіе токмо храбрство великаго князя Александра надъ лукавыми нѣмцы, но и отъ многихъ языкъ избавляше россійскую землю отъ плѣна при животѣ своемъ. Посемъ же въ то время безбожный царь Батый многи земли поплѣни; и пріиде на россійскую землю, и грады многи взя и пожже Владиміръ, и Ростовъ и прочыя, попущеніемъ Божіимъ, грѣхъ ради нашихъ. И ту избіена быста Всеволожя князя приснопамятная, Юрій и Василко отъ безбожнаго Батыя. Въ то же время пострада Христа ради князь Михаилъ Черниговскій и съ боляриномъ своимъ Ѳеодоромъ. А иніи князи россійскія земли мнози, чести ради и славы свѣта сего, волю безбожнаго царя сотвориша и страха ради мучителева оставишя вѣру христіанскую, и поклонишася солнцу, и кусту, и инымъ идоломъ ихъ. И паки окаянный царь Батый, еще не насытился бяше крови христіанскія, посылаетъ посланники своя во градъ Суждаль къ святому великому князю Александру, глаголя: „мнѣ покоришася мнози царства и языцы, а ты ли единъ не хощеши покоритимися? Аще хощеши соблюсти землю свою, пришедъ поклонимися, якоже и прочіи князи россійскія поклонишася мнѣ, и власти своя пріяша, и честь велію отъ мене; слышахъ бо тя храбра суща и велика возрастомъ“. Святый же, слышавъ сія отъ посланныхъ, печаленъ бяше, велми боля душею, и недоумѣвашеся что о семъ сотворити. И шедъ святый повѣда епископу Кириллу мысль свою. Епископъ же, поучивъ святаго на мнози, глаголя: „брашно и питіе да не внидетъ во уста твоя, и не остави Бога, сотворшаго тя, ни сотвори тако, якоже иніи сотвориша, но постражи за Христа, яко добрый воинъ Христовъ“. Святый же епископу вся сія обѣщася сотворити отъ всего сердца своего. Епископъ же давъ святому Тѣла и Крове Христовы спутника ему быти, и отпусти его съ миромъ, и прирече: „Господь да укрѣпитъ тя“. Таже прочее дошедъ блаженный князь Александръ безбожнаго царя Батыя, и въ томъ часѣ возвѣстиша царю о блаженнѣмъ. Царь же повелѣ привести предъ ся святаго. Волхвы же восхотѣша вести святаго сквозѣ огнь, якоже обычай бяше въ нихъ и поклонитися солнцу и огню. Святый же рече волхвомъ: „не подобаетъ ми, христіанину сущу, кланятися твари, кромѣ Бога; но поклоняюся Святѣй Троицѣ, Отцу и Сыну, и Святому Духу, иже сотвори небо, и землю, море, и вся яже въ нихъ суть“. Волхвы же, яко поругани отъ святаго, шедше возвѣстиша царю Батыю. Посемъ же царь повелѣ святаго съ честію привести предъ ся, не нудима кланятися солнцу и идоломъ, красоты ради лица его. Приведену же ему бывшу предъ царя, святый же ста предъ царемъ и поклонися ему, глаголя: „царю, тебѣ поклонюся, понеже Богъ почти