На початку того року заразъ великихъ мясниць, якъ ужо войска великіе коронные уступили въ Полшу, гетманъ Дорошенко затягнувши орду не малую и войска своѣ скупивши притягнулъ подъ Тростянецъ и мѣсто спалилъ, але замку достати не могъ, же жолнѣре зъ людми тамъ зачинилися и оборонилися; тылко жъ великую шкоду жолнѣре подняли въ коняхъ и риштункахъ, що въ городѣ потратили, же много пѣшихъ зостало. Але Дорошенко не доставши замку вернулся ку Чигирину, тылкожъ много попустошилъ,—Татаре выбрали Кубычи, и инніе мѣстечки, и идучи зоставилъ пѣхоты полкъ въ Умани. На которыхъ Уманцѣ взбунтовавшися полковника Жеребыла убили и иннихъ козаковъ знатныхъ зъ старшины, а чернь выгнали зъ мѣста и мѣсто здали гетманови Ханенку на имя королевское.
Тогожъ року конфедерація встала на короля, и жолнѣрове, которіе были при гетману Ханенкови комонно пошли въ Полшу до того звянску.
Тойже зимы о средопустю старшина зъ пысаремъ войска заднѣпрского Карпомъ Мокріевичемъ зловившися, менуючи, же постерегли змѣну гетмана заднѣпрского Демка Игнатенка Многогрѣшного противно его царскому величеству, и напавши оного въ ночѣ въ замку батуринскомъ на ложу оного взяли и звязали, и уложивши въ возъ накрывши шкурою повезли на Москву ничого не держачи, боячись жебы оного не отнято, бо мѣлъ много войска своего затягавого по станціяхъ, такъ же и полковниковъ не мало по усѣхъ горахъ пріятелѣ его були, але якъ уже оного взявши попровадили, то уже и тое мусѣло розно уходити, а иннихъ поймавши на Москву поотсылали, гдѣ того гетмана на Москву припроводили, давали на спытку то есть катови до рукъ пробовати, а якъ проважено въ городъ, то многіе стрѣчи были, и на оного плювали. И не стративши оного отослано съ братами его зъ жоною на Сибѣръ на вѣчное пробуване. И такъ скончалося гетманство Многогрѣшного, которій нѣвочто поважаючи себѣ клятву соборную святѣйшаго патріархи, со всѣмъ въ нѣвецъ пойшолъ; а маетность его розно старшина подѣлила. Лѣта того присланъ отъ короля его милости и гетмановъ коронныхъ рейментаромъ зъ войсками панъ Лужецкій каштеланъ подляскій въ Ладыжинъ до гетмана Ханенка. Але тамъ не много стояли, бо Дорошенко гетманъ видячи же оного утискуютъ зо всѣхъ сторонъ, а жалуючи гетманство утратити, яко найчастѣй посылалъ до Турчина просячи о посылки. Турчинъ того лѣта зо всѣми войсками рушилъ подъ Камянецъ, росказавши и ханови кримскому ку себѣ ити. И такъ ханъ кримскій зишовшися зъ гетманомъ дорошенкомъ тягнули мимо Ладыжинъ на Батогъ. И тамъ гетманъ Ханенко и рейментарь панъ Каштелянъ подляскій мѣли потребу зъ оными, алежъ ихъ силы великіе недодержавши мусѣли уступити до Ладижина изъ шкодою. А ханъ и Дорошенко не займаючи Ладыжина зъ войсками потягнули просто подъ
На початку того року зараз великих мясниць, як ужо войска великие коронные уступили в Полшу, гетман Дорошенко затягнувши орду не малую и войска свое скупивши притягнул под Тростянец и место спалил, але замку достати не мог, же жолнере з людми там зачинилися и оборонилися; тылко ж великую шкоду жолнере подняли в конях и риштунках, що в городе потратили, же много пеших зостало. Але Дорошенко не доставши замку вернулся ку Чигирину, тылкож много попустошил, — Татаре выбрали Кубычи, и инние местечки, и идучи зоставил пехоты полк в Умани. На которых Уманце взбунтовавшися полковника Жеребыла убили и инних козаков знатных з старшины, а чернь выгнали з места и место здали гетманови Ханенку на имя королевское.
Тогож року конфедерация встала на короля, и жолнерове, которие были при гетману Ханенкови комонно пошли в Полшу до того звянску.
Тойже зимы о средопустю старшина з пысарем войска заднепрского Карпом Мокриевичем зловившися, менуючи, же постерегли змену гетмана заднепрского Демка Игнатенка Многогрешного противно его царскому величеству, и напавши оного в ноче в замку батуринском на ложу оного взяли и звязали, и уложивши в воз накрывши шкурою повезли на Москву ничого не держачи, боячись жебы оного не отнято, бо мел много войска своего затягавого по станциях, так же и полковников не мало по усех горах приятеле его були, але як уже оного взявши попровадили, то уже и тое мусело розно уходити, а инних поймавши на Москву поотсылали, где того гетмана на Москву припроводили, давали на спытку то есть катови до рук пробовати, а як проважено в город, то многие стречи были, и на оного плювали. И не стративши оного отослано с братами его з жоною на Сибер на вечное пробуване. И так скончалося гетманство Многогрешного, которий невочто поважаючи себе клятву соборную святейшего патриархи, со всем в невец пойшол; а маетность его розно старшина поделила. Лета того прислан от короля его милости и гетманов коронных рейментаром з войсками пан Лужецкий каштелан подляский в Ладыжин до гетмана Ханенка. Але там не много стояли, бо Дорошенко гетман видячи же оного утискуют зо всех сторон, а жалуючи гетманство утратити, яко найчастей посылал до Турчина просячи о посылки. Турчин того лета зо всеми войсками рушил под Камянец, росказавши и ханови кримскому ку себе ити. И так хан кримский зишовшися з гетманом дорошенком тягнули мимо Ладыжин на Батог. И там гетман Ханенко и рейментарь пан Каштелян подляский мели потребу з оными, алеж их силы великие недодержавши мусели уступити до Ладижина из шкодою. А хан и Дорошенко не займаючи Ладыжина з войсками потягнули просто под
