Заразъ на початку того року гетманъ Дорошенко уже будучи непріятелемъ коронѣ полской послалъ до пашѣ силистрійского просячи орду, жебы поспѣшала еще зимою на Украину. А покуля Орда вышла на Украину пріѣхалъ у свою епархію епископъ лвовскій Іосифъ Шумянскій до Могилева Днѣстрового, которого розсказалъ гетманъ Дорошенко силою провадити въ Чигиринъ зовсѣмъ, которого и взято въ Могилевѣ зъ великою жалостю усего народу зостаючого на тотъ часѣ въ Могилевѣ, а звлаща подъ часъ ярмарку богоявленского. Которого запровадивши въ Чигиринъ, не много держачи Дорошенко отпустилъ за старанемъ отца Митрополита. А заледво у свои городы увойшолъ. Бо заразъ въ тропы и орду за нимъ пустилъ, же мало въ неволю не впалъ. Итакъ орда много шкоды людямъ учинила и вернувшися стояла по волости коло Богу и коло Уманя, часто чаты отправуючи въ волости належачіе до короны; бо на весну якъ трава стала то и козаки зъ братомъ Дорошенковымъ скупившися стали за Калникомъ въ поляхъ зъ ордою до Спасовки, а видячи гетманове коронніе великую докуку отъ орды послали своихъ пословъ на Запороже до Ханенка и войска, жебы вышли ку Ладижину ознаймуючи и о своемъ приходѣ на побуже. На которое посольство королевское вышолъ Ханенко и Сѣрко зъ войскомъ въ килка тысячей зъ арматами, а гетмане коронніе упередили и Татаръ подъ Браславлемъ зломили, же мусѣли утекать въ свою землю. Такъ же и тая орда зостаючая при самомъ Дорошенкѣ гетману уступила, же и Дорошенко мусѣлъ отъ Богу вернутися и туляючися коло городовъ уступилъ ку Чигирину, а гетманове коронніе Янъ Собѣцкій и князь Димитрій полній знову подступили подъ Браславле а Ханенко зъ Сѣркомъ до Ладижина, которимъ усе побуже схилилося и учинивши раду потягнули со всѣмъ войсками подъ Калникъ, который не хотѣлъ ся поддати гетманомъ короннымъ. Итакъ стояли войска недѣль двѣ достаючи Калника; тамъ подъ Калникъ прислалъ король его милость булаву, короговъ, бубни козакомъ, позволяючи онымъ обирати гетмана. Гдѣ войско въ радѣ дали гетманство Михайлу Ханенку, на що и гетмане коронніе позволили. Але Калника не доставши войска отступили подъ Браславле и утвердили президіумъ тоесть жолнѣровъ по замкахъ: Могилевѣ, Браславли, Немировѣ, Ладижинѣ, Рашковѣ и излецили гетманове коронніе тіе усѣ войска по тихъ замкахъ гетманови запорожскому Ханенкови жебы оного слухали, ежели чого потреба придавши и своего рейментаря прозваніемъ Везицкого съ которымъ тіе войска росправили по станціяхъ. Але на тотъ часъ жолнѣре скромно заховалися съ людми зъ гроша ся контентовали тылко ежели сѣна узяли де найшли. А гетманъ Ханенко зоставалъ у Ладыжинѣ при которомъ жолнѣре и козаки були, тылкожъ люди козаковъ запорожскихъ кормили, а жолнѣре зъ гроша жили.
Зараз на початку того року гетман Дорошенко уже будучи неприятелем короне полской послал до паше силистрийского просячи орду, жебы поспешала еще зимою на Украину. А покуля Орда вышла на Украину приехал у свою епархию епископ лвовский Иосиф Шумянский до Могилева Днестрового, которого розсказал гетман Дорошенко силою провадити в Чигирин зовсем, которого и взято в Могилеве з великою жалостю усего народу зостаючого на тот часе в Могилеве, а звлаща под час ярмарку богоявленского. Которого запровадивши в Чигирин, не много держачи Дорошенко отпустил за старанем отца Митрополита. А заледво у свои городы увойшол. Бо зараз в тропы и орду за ним пустил, же мало в неволю не впал. Итак орда много шкоды людям учинила и вернувшися стояла по волости коло Богу и коло Уманя, часто чаты отправуючи в волости належачие до короны; бо на весну як трава стала то и козаки з братом Дорошенковым скупившися стали за Калником в полях з ордою до Спасовки, а видячи гетманове коронние великую докуку от орды послали своих послов на Запороже до Ханенка и войска, жебы вышли ку Ладижину ознаймуючи и о своем приходе на побуже. На которое посольство королевское вышол Ханенко и Серко з войском в килка тысячей з арматами, а гетмане коронние упередили и Татар под Браславлем зломили, же мусели утекать в свою землю. Так же и тая орда зостаючая при самом Дорошенке гетману уступила, же и Дорошенко мусел от Богу вернутися и туляючися коло городов уступил ку Чигирину, а гетманове коронние Ян Собецкий и князь Димитрий полний знову подступили под Браславле а Ханенко з Серком до Ладижина, которим усе побуже схилилося и учинивши раду потягнули со всем войсками под Калник, который не хотел ся поддати гетманом коронным. Итак стояли войска недель две достаючи Калника; там под Калник прислал король его милость булаву, корогов, бубни козаком, позволяючи оным обирати гетмана. Где войско в раде дали гетманство Михайлу Ханенку, на що и гетмане коронние позволили. Але Калника не доставши войска отступили под Браславле и утвердили президиум тоесть жолнеров по замках: Могилеве, Браславли, Немирове, Ладижине, Рашкове и излецили гетманове коронние тие усе войска по тих замках гетманови запорожскому Ханенкови жебы оного слухали, ежели чого потреба придавши и своего рейментаря прозванием Везицкого с которым тие войска росправили по станциях. Але на тот час жолнере скромно заховалися с людми з гроша ся контентовали тылко ежели сена узяли де найшли. А гетман Ханенко зоставал у Ладыжине при котором жолнере и козаки були, тылкож люди козаков запорожских кормили, а жолнере з гроша жили.
