Страница:Летопись самовидца о войнах Богдана Хмельницкого (1846).djvu/63

Эта страница была вычитана


Украинѣ ажъ до Днѣстра, хотячи зимою ити за Днѣпръ воевати, що и розказалъ былъ ордѣ купитися ку Мошнамъ передъ P. X., которіе любо скупилися були, але збунтовавшися вернулися отъ Днѣпра для того, же зъ оными не шолъ гетманъ Дорошенко; и такъ гдѣ стоялъ набралъ ясыру и повернулъ у свою землю, на которихъ посилалъ Дорошенко зъ жалобою до царя Турецкого, але тое повернули къ жартъ, нѣкого не вернули, кого узято пропалъ, хиба кого выкуплено.

Того жъ лѣта патріархове повернули зъ Москвы, постановивши на Москвѣ патріарху инного на мѣстцѣ Никона. Але тая дорога несчастлива была патріархомъ, бо Александрійскій идучи моремъ померъ, а Антіохійскій якъ пришолъ въ землю турецкую, то оного взято до Царигорода, и тамъ много сплатился, и за ледво на своемъ мѣстцу зосталъ, бо часъ не малій у Царигородѣ зоставалъ непущенный.


РОКУ 1670.

Гетманъ Дорошенко послалъ своего резидента до царя Турецкого; и отъ того часу зоставали резиденты у Турчина козацкіе.

Тогожъ року посилалъ митрополита кіевскій Іосифъ Тукалскій посланца своего Романа Ракушу протопопу браславского до святѣйшаго патріархи въ Царигородъ о подтверженю сакры на Митрополію кіевскую, а то для того, же и епископъ премыслскій Антоній Винецкій отзывался митрополитомъ кіевскимъ, ижъ бы одинъ хто зъ нихъ былъ митрополитомъ, а не два митрополита, чого нѣколи передъ тимъ не бувало. Которого посланнаго святѣйшій патріарха Меѳодій не хотѣлъ приняти безъ вѣдомости цесарской, и такъ ажъ мусѣлъ ѣхати до Солуня ку цесареви, отъ которого привезлъ писмо также и отъ Визира до святѣйшого патріархи, же позволено приняти, и такъ принять и соборне позволено и потвержено митрополію Іосифу Тукалскому, аже бы нѣхто иншій не отзывался митрополитомъ и архіепископомъ кіевскимъ. Тотъ же посланный протопопъ браславскій вивезлъ соборную клятву отъ святѣйшого патріархи на заднѣпрского гетмана Демяна Многогрѣшного, которій въ ниху поднесшися легце себѣ тое поважилъ, еще ся грозячи, але заразъ оного Господь Богъ скаралъ, же спадши зъ кганку шію былъ зламалъ, же часъ немалій не моглъ говорити, що пришовши до здоровя не хотѣлъ ся упамятати що на потомъ оному нагородилося зле бо того року заДнѣпря зоставало въ покою, а Запороже маючи себѣ кошовимъ Ханенка пословъ своихъ часто посылали до короля полского на тотъ часъ зостаючого Мѣхала зъ Вишневецкихъ; и на Запороже послове королевскіе по Заднѣпрю ходили бо уже Дорошенко гетманъ цале держалъ зъ Турчиномъ. Любо то и комиссію зложили были въ Острозѣ, на которую козаки зъ паволочи не хотѣли ѣхати не подобныхъ рѣчей на комѣсарахъ полскихъ вымагаючи а звлаща Сенаторовъ у заставѣ, жебы дано до Чигирина, которая комисія ни нащо зышлася.

Тот же текст в современной орфографии

Украине аж до Днестра, хотячи зимою ити за Днепр воевати, що и розказал был орде купитися ку Мошнам перед P. X., которие любо скупилися були, але збунтовавшися вернулися от Днепра для того, же з оными не шёл гетман Дорошенко; и так где стоял набрал ясыру и повернул у свою землю, на которих посилал Дорошенко з жалобою до царя Турецкого, але тое повернули к жарт, некого не вернули, кого узято пропал, хиба кого выкуплено.

Того ж лета патриархове повернули з Москвы, постановивши на Москве патриарху инного на местце Никона. Але тая дорога несчастлива была патриархом, бо Александрийский идучи морем помер, а Антиохийский як пришёл в землю турецкую, то оного взято до Царигорода, и там много сплатился, и за ледво на своем местцу зостал, бо час не малий у Царигороде зоставал непущенный.


РОКУ 1670.

Гетман Дорошенко послал своего резидента до царя Турецкого; и от того часу зоставали резиденты у Турчина козацкие.

Тогож року посилал митрополита киевский Иосиф Тукалский посланца своего Романа Ракушу протопопу браславского до святейшего патриархи в Царигород о подтверженю сакры на Митрополию киевскую, а то для того, же и епископ премыслский Антоний Винецкий отзывался митрополитом киевским, иж бы один хто з них был митрополитом, а не два митрополита, чого неколи перед тим не бувало. Которого посланного святейший патриарха Мефодий не хотел приняти без ведомости цесарской, и так аж мусел ехати до Солуня ку цесареви, от которого привезл писмо также и от Визира до святейшого патриархи, же позволено приняти, и так принять и соборне позволено и потвержено митрополию Иосифу Тукалскому, аже бы нехто инший не отзывался митрополитом и архиепископом киевским. Тот же посланный протопоп браславский вивезл соборную клятву от святейшого патриархи на заднепрского гетмана Демяна Многогрешного, которий в ниху поднесшися легце себе тое поважил, еще ся грозячи, але зараз оного Господь Бог скарал, же спадши з кганку шию был зламал, же час немалий не могл говорити, що пришовши до здоровя не хотел ся упамятати що на потом оному нагородилося зле бо того року заДнепря зоставало в покою, а Запороже маючи себе кошовим Ханенка послов своих часто посылали до короля полского на тот час зостаючого Мехала з Вишневецких; и на Запороже послове королевские по Заднепрю ходили бо уже Дорошенко гетман цале держал з Турчином. Любо то и комиссию зложили были в Острозе, на которую козаки з паволочи не хотели ехати не подобных речей на комесарах полских вымагаючи а звлаща Сенаторов у заставе, жебы дано до Чигирина, которая комисия ни нащо зышлася.