И҆з̾ мла́да ꙗ҆ви́лсѧ є҆сѝ бг҃омꙋ́дре кнѧ́же гаврїи́ле, бж҃е́ственный сосꙋ́дъ, и҆збра́нъ бг҃ови, бл҃гоче́стїемъ воспита́нъ: вѣ́рꙋ непоро́чнꙋ соблю́дъ, и҆ мнѡ́ги ст҃ы̑ѧ цр҃кви ᲂу҆стро́ивъ, и҆згна́нїе претерпѣ́лъ є҆сѝ ѿ свои́хъ, ꙗ҆́коже и҆ цѣломꙋ́дрїи прароди́тели твоѝ ѿ бра́та ᲂу҆бїе́нїе. съ ни́ми же предстоѧ̀ ст҃ѣ́й трⷪ҇цѣ моли́сѧ, держа́вы рѡ́сскїѧ нача́льникѡмъ сохранє́нымъ бы́ти, и҆ всѣ́мъ на́мъ сп҃сти́сѧ.
Многомꙋ́дреннѡ пресели́всѧ во гра́дъ пско́въ бл҃же́нне кнѧ́же гаврїи́ле, пло́дъ бл҃гїй бг҃ови въ жи́зни се́й бы́лъ є҆сѝ, присноцвѣтꙋ́щъ добродѣ́тельми, и҆ ꙗ҆́коже дв҃дъ неѕло́бїемъ: тогѡ̀ ра́ди полꙋчи́лъ є҆сѝ жи́знь вѣ́чнꙋю на нб҃сѣ́хъ. всегда̀ зрѧ̀ ст҃ꙋ́ю трⷪ҇цꙋ, молѝ и҆зба́витисѧ на́мъ ѿ всѧ́кихъ бѣ́дъ, да зове́мъ тѝ: ра́дꙋйсѧ ᲂу҆твержде́нїе гра́дꙋ на́шемꙋ.
_-_%D0%BA%D0%BE%D0%BD%D1%86%D0%BE%D0%B2%D0%BA%D0%B0_19.png)
