Ꙗ҆́кѡ бл҃гочести́вагѡ ко́рене пречⷭ҇тна́ѧ ѻ҆́трасль бы́лъ є҆сѝ, бл҃же́нне а҆леѯа́ндре: ꙗ҆ви́ бо тѧ̀ хрⷭ҇то́съ ꙗ҆́кѡ нѣ́кое бж҃е́ственное сокро́вище рѡссі́йстѣй землѝ, но́ваго чꙋдотво́рца, пресла́вна и҆ бг҃опрїѧ́тна. и҆ дне́сь соше́дшесѧ въ па́мѧть твою̀ вѣ́рою и҆ любо́вїю, во ѱалмѣ́хъ и҆ пѣ́нїихъ ра́дꙋющесѧ сла́вимъ гдⷭ҇а, да́вшаго тебѣ̀ бл҃года́ть и҆сцѣле́нїй: є҆го́же молѝ сп҃стѝ гра́дъ се́й, и҆ держа́вѣ срѡ́дникъ твои́хъ бг҃оꙋго́днѣй бы́ти, и҆ сыновѡ́мъ рѡссі̑йскимъ сп҃сти́сѧ.
Позна́й свою̀ бра́тїю рѡссі́йскїй і҆ѡ́сифе, не въ є҆гѵ́птѣ, но на нб҃сѝ ца́рствꙋющїй, бл҃говѣ́рный кн҃же а҆леѯа́ндре, и҆ прїимѝ молє́нїѧ и҆́хъ, ᲂу҆множа́ѧ жи̑та лю́демъ плодоно́сїемъ землѝ твоеѧ̀, гра́ды влады́чествїѧ твоегѡ̀ ѡ҆гражда́ѧ моле́нїемъ, и҆ родꙋ христіанскомꙋ на сопроти̑вныѧ спобо́рствꙋѧ.
Ꙗ҆́кѡ ѕвѣздꙋ̀ тѧ̀ пресвѣ́тлꙋю почита́емъ, ѿ восто́ка возсїѧ́вшꙋю, и҆ на за́падъ прише́дшꙋю: всю́ бо странꙋ̀ сїю̀ чꙋдесы̀ и҆ добро́тою ѡ҆богаща́еши, и҆ просвѣща́еши вѣ́рою чтꙋ́щыѧ па́мѧть твою̀, а҆леѯа́ндре бл҃же́нне. сегѡ̀ ра́ди дне́сь пра́зднꙋемъ твоѐ ᲂу҆спе́нїе, лю́дїе твоѝ сꙋ́щїи: молѝ сп҃стѝ ѻ҆те́чество твоѐ, и҆ держа́вꙋ правосла́внагѡ, и҆ всѧ̑ притека́ющыѧ къ ра́цѣ моще́й твои́хъ, и҆ вѣ́рнѡ вопїю́щыѧ тѝ: ра́дꙋйсѧ, гра́дꙋ на́шемꙋ ᲂу҆твержде́нїе.
Ꙗ҆́коже сро́дники твоѝ, бори́съ и҆ глѣ́бъ, ꙗ҆ви́шасѧ тебѣ̀ съ нб҃сѐ въ по́мощь подвиза́ющемꙋсѧ на ве́йлгера свѣ́йскаго и҆ во́євъ є҆гѡ̀: та́кѡ и҆ ты̀ ны́нѣ, бл҃же́нне а҆леѯа́ндре, прїидѝ въ помо́щь твои̑мъ сро́дникѡмъ и҆ поборѝ борю́щыѧ ны̀.
_-_%D1%80%D0%B0%D0%B7%D0%B4%D0%B5%D0%BB%D0%B8%D1%82%D0%B5%D0%BB%D1%8C_5.png)
