Открыть главное меню

Страница:Акты исторические. Том 1.djvu/501

Эта страница выверена

Изъ рукописнаго Сборника грамотъ Всероссійскихъ Митрополитовъ (XVI в., in 4°, л. 311—315), принадлежащаго Царскому.

 

260. — 1451 въ началѣ Февраля. Посольство Митрополита Іоны къ Польскому Королю Казимиру IV, которымъ благодаря за признаніе его Митрополитомъ Кіевскимъ и Литовскимъ, напоминаетъ о обѣщаніи присоединить въ вѣдомство его и Галицкія церкви, и два посланія его же: Королю Казимиру, о покровительствѣ православной вѣры, и пану Михаилу Кезигайловичу, о предстательствѣ предъ Королемъ о церковныхъ нуждахъ.

I. Богомолець великого вашего господьства Іона, Митрополитъ Кіевьскый и всея Руси, благословляетъ, и Бога молитъ, и челомъ бьетъ тебѣ Великому Господарю о великомъ вашемъ жалованьи.

Отець вашь и богомолець Іона, Митрополитъ Кіевьскый и всея Руси, повѣстуетъ: что еси, Великый Господарь, своего ради спасенія, въ единачествѣ учинилъ Божью церковь, свою богомолію Кіевьскую митрополію, по старинѣ, и тотъ ми еси Кіевьскый столъ, своему богомолцу, далъ: и о томъ великое ваше господьство язъ, вашъ общій богомолецъ и отецъ, благодарю, и благословляю, и челомъ бью, и Бога молю о вашемъ здоровьи, о душевномъ спасеніи, и до своего живота.

Богомолець вашъ общій Іона, Митрополитъ Кіевьскый и всея Руси, повѣстуетъ: еще еси, Великый Господарь, Великый Король, твоего ради спасенія, хотѣлъ жаловати, хотѣлъ еси всю извѣчьную старину церковьную исполнити и церковь Божію, свою богомолію, свершенно въ единачествѣ учинити хотѣлъ еси, въ другомъ своемъ богомоліи и господарьствѣ Галичьской митрополіи Божіи церкви и домы церковьныи къ той своей богомоліи Кіевьской, къ церкви Святѣй Софѣи и къ Кіевьскому столу, отдати по старинѣ, и велѣлъ еси памъ себя обослати, туто, въ томъ своемъ господарьствѣ; и ты бы, Великый Господарь, пожаловалъ, то бы еси свое великое жалованье, своего ради спасенія, исполнилъ, а церковь бы еси учинилъ въ священномъ единачествѣ и въ совокупленіи по старинѣ; а язъ, богомолець вашь, по своему долгу и до своего живота, радъ Бога молить за великое ваше господьство, въ всегдашнихъ нашихъ Богу престояніихъ и въ всѣхъ нашихъ молитвахъ, колико мощно.

Въ заглавіи акта отмѣчено: Посольство Королю.

II. Превысокому, благородному, славному, Великому Королеви Казимиру Польскому и Великому Князю Литовьскому, Рускому и Жамодѣйскому и иныхъ, и княжату Прускому, богомолець великого вашего господьства Іона, Митрополитъ Кіевьскый и всея Руси, благословляетъ, и Бога молитъ, и челомъ бьетъ. Что тебѣ, Великому Господарю, Богъ положилъ на сердцѣ хотѣти жаловати, церковьные наши дѣла оправляти: и о томъ великое ваше господьство благодарю, и благословляю, и Бога молю, и челомъ бью, вашъ общій богомолець. А и нынѣ, о томъ же, есмо къ великому вашему господьству послали сего нашего намѣстника Кричевьскаго, старца Іону, и о чемъ тебѣ, Великому Господарю, о которыхъ церковьныхъ дѣлѣхъ отъ насъ иметъ челомъ бити, чтобы еси, Великый Господарь, жаловалъ и смиловался: тѣ бы еси церковьные дѣла, своего ради спасенія, управилъ, чтобы церковь Божія, а ваша богомолія, не бывала изобижена ни отъ кого, великымъ жалованіемъ великого вашего господьства. А милость Божія и молитва нашего смиренія и благословеніе да есть всегда съ великымъ вашимъ господьствомъ.