ную вѣру обрѣсти, толь велико поползновеніе[1]. И сицевыя ради вины сіе предложися: понеже врачемъ достоитъ со прилежаніемъ прилагати пластырь тамо, идѣже есть тѣлесная язва; воиномъ же въздвизати оружіе и ополчатися крѣпко тамо, идѣже есть супостатная брань; строителемъ же корабельнымъ искуство хитрости свося показовати во время зимы и бурнаго противленіа. Тако и намъ достоитъ вся чювства наша очистививше, облещися во вся оружіа Божіа, зрѣти и обращатися тамо, откуду діаволъ, рыкая яко левъ, приходитъ искій церковъ Божію растерзати, и ополчитися и братися[2] мужествено, повинующеся подъ крѣпкую руку Божію, и ничтоже насъ вредити можетъ. Ты же, сыне нашъ, въ сладость почитай божественыхъ Писаній, и блюдися бѣсовскыхъ козней и прелестьныхъ соблазнъ; умягчаютъ бо словеса паче елея, и та суть стрѣлы: но поминай слово Христово иже глаголетъ: «могый вмѣстити, да вмѣститъ.» Не едино бо дарованіе Духа Святого всѣмъ дается, но по мѣрѣ. Ты же, елико можеши, вмѣщай; плотскы же не высокомудрьствуй, плотское бо мудрованіе смерть есть, а мудрованіе духовное животъ и миръ: но паче проси отъ Дающаго всѣмъ премудрость духовную, и тебѣ дасться, токмо божественыа книги почитай прилежно, ревнуя ученію, и послетъ тебѣ Богъ, якоже Филиппа иногда оному евнуху въ наставленіе твое церковнаго благочестіа. Начало же въ вѣкы премудрости, имѣй всегда во сердцы страхъ Господень и разумъ благъ, и тако вся заповѣди исполнити можеши: «не слышателіе бо закону праведни предъ Богомъ, но творцы закону, сіи оправдятся.» Пророкъ клятвѣ предаетъ всѣхъ уклоняющихся отъ заповѣдей Господнихъ. Слыши Христовы глаголы: «имѣяше кто вѣсть господина своего и не творитъ, болшее осужденіе пріемлетъ.» Не пріемшимъ же и не сохраншимъ кая отрада обрѣсти? Скверныхъ тщегласій отметайся и блюдися отъ творящихъ распря и раздоры, бесѣдъ же злыхъ о всемъ хранися, тлятъ бо обычаи благы, и растлѣваютъ умы, и лишатъ истины. Ты же, сыне нашъ, буди усерденъ на послушаніе божественыхъ Писаній: «всяко бо писаніе богодухновенное полезно есть ко ученію, и ко обличенію, и ко исправленію и наказанію, еже въ правду, да совершенъ будетъ человѣкъ Божій, на всяко дѣло благо уготованъ.» И тщися, елико мощно, по сихъ творити; симъ бо образомъ многа поживеши лѣта и приложатъ ти ся лѣта животу. Веліе, воистинну, обращеніе и измѣненіе и вѣчныхъ благъ пріобрѣтеніе, аще кто уклонится отъ злаго во благое, и отъ нечестіа во благочестіе, и отъ прегрѣшеній въ покаяніе: о семъ бо множество Ангелъ радуются на небесѣхъ и о единомъ взыскающемся отъ погибели грѣховныа, отъ смерти въ животъ, и отъ истлѣніа въ нетлѣніе, и отъ многообразныхъ и многоразличныхъ непрестанныхъ мукъ въ неизглаголанныя и приснопребываемыя водвореніа радости небесныя, «ихъ-же око не видѣ, и ухо не слыша, и на сердце человѣку не взыде, яже уготова Богъ любящимъ его.» Се же все, ища, обрящеши. Божественое Писаніе Ветхаго Завѣта и Новыа благодати подобно есть морю, облежащему вселенную, отъ негоже исходятъ вся моря и истекаютъ различныа рѣки и источники, напаяти человѣкы и скоты и вся движащаяся по земли: тако и се море пучины неизслѣдимыа объемлетъ и напаяетъ, нетокмо вселенную, но и вся превыспренняа и преисподняа, таже и самого престола величествіа касается, елико благоволитъ Сѣдящій на немъ, въ славословіе свое, во спасеніе же наше. Ты же пріи-
Страница:Акты исторические. Том 1.djvu/444
Эта страница была вычитана
